ಆಗಿನ ವೋಟ್​ಗಳು ಈಗ ಸೀಟ್​​ಗಳಾಗ್ತಾವಾ..? ಟಿಎಂಸಿಯ ಈ ವೀಕ್ ಪಾಯಿಂಟ್​​ಗಳನ್ನೇ ಟಾರ್ಗೆಟ್ ಮಾಡಿದ ಪ್ರಧಾನಿ ಮೋದಿ! | West Bengal Elections

ಏಪ್ರಿಲ್ 23 ರಂದು ನಡೆಯಲಿರುವ ಮೊದಲ ಹಂತದ ಮತದಾನಕ್ಕೂ ಮುನ್ನ ಪ್ರಧಾನಿ ನರೇಂದ್ರ ಮೋದಿ ರಾಜ್ಯದಲ್ಲಿ ಏಳು ಪ್ರಮುಖ ಸಮಾವೇಶಗಳನ್ನು ಉದ್ದೇಶಿಸಿ ಮಾತನಾಡಲಿದ್ದು, ಇದು ಬಿಜೆಪಿಯ ಪ್ರಚಾರಕ್ಕೆ ಕೊನೆಯ ಕ್ಷಣದಲ್ಲಿ ದೊಡ್ಡ ಶಕ್ತಿಯನ್ನು ನೀಡಲಿದೆ ಎಂದು ಪಕ್ಷದ ಮೂಲಗಳು ವಿಶ್ವಾಸ ವ್ಯಕ್ತಪಡಿಸಿವೆ.

2024ರ ಲೋಕಸಭಾ ಚುನಾವಣೆಯಲ್ಲಿ ಪಶ್ಚಿಮ ಬಂಗಾಳದಲ್ಲಿ ಬಿಜೆಪಿ ಹೆಚ್ಚು ಮತಗಳನ್ನು ಪಡೆದಿತ್ತು, ಆದರೆ ಈಗ ಅದೇ ಮತಗಳನ್ನು ಸೀಟುಗಳಾಗಿ ಪರಿವರ್ತಿಸಲು ಪ್ರಧಾನಿ ಮೋದಿ ಪ್ರಚಾರವು ಮಿಂಚಿನ ಸಂಚಾರದಂತೆ ಕೆಲಸ ಮಾಡಲಿದೆ ಎಂಬುದು ಕೇಸರಿ ಪಡೆಯ ಲೆಕ್ಕಾಚಾರವಾಗಿದೆ. ಕಳೆದ ಏಳು ವರ್ಷಗಳಲ್ಲಿ ಟಿಎಂಸಿಗೆ ಪ್ರಬಲ ಪ್ರತಿಸ್ಪರ್ಧಿಯಾಗಿ ಬೆಳೆದಿರುವ ಬಿಜೆಪಿ, ಈ ಬಾರಿ ಪಶ್ಚಿಮ ಬಂಗಾಳದಲ್ಲಿ ಎರಡು ಹಂತಗಳಲ್ಲಿ (ಏಪ್ರಿಲ್ 23 ಮತ್ತು 29) ನಡೆಯುವ ಚುನಾವಣೆಯನ್ನು ಅತ್ಯಂತ ಗಂಭೀರವಾಗಿ ಪರಿಗಣಿಸಿದೆ.

ಪ್ರಧಾನಿ ಮೋದಿಯವರ ಪ್ರಚಾರದ ವೇಳಾಪಟ್ಟಿಯನ್ನು ಅತ್ಯಂತ ಚಾಣಾಕ್ಷತನದಿಂದ ವಿನ್ಯಾಸಗೊಳಿಸಲಾಗಿದ್ದು, ವಿಶೇಷವಾಗಿ 2024ರ ಚುನಾವಣೆಯಲ್ಲಿ ಟಿಎಂಸಿ ಅತ್ಯಲ್ಪ ಅಂತರದಿಂದ ಜಯಗಳಿಸಿದ ಕ್ಷೇತ್ರಗಳ ಮೇಲೆ ಮೋದಿ ಹೆಚ್ಚಿನ ಗಮನ ಹರಿಸಲಿದ್ದಾರೆ. ಈಗಾಗಲೇ ಏಪ್ರಿಲ್ 9 ರಂದು ಅಸನ್ಸೋಲ್, ತಮ್ಲುಕ್ ಮತ್ತು ಬಿರ್ಭುಮ್‌ನಲ್ಲಿ ಪ್ರಧಾನಿ ಬೃಹತ್ ಸಮಾವೇಶಗಳನ್ನು ನಡೆಸಿದ್ದು, ಈ ಮೂರು ಕ್ಷೇತ್ರಗಳು ರಾಜಕೀಯವಾಗಿ ಅತ್ಯಂತ ಸೂಕ್ಷ್ಮವಾಗಿವೆ ಮತ್ತು ಇಲ್ಲಿ ಆಡಳಿತ ವಿರೋಧಿ ಅಲೆಯ ಲಾಭ ಪಡೆದುಕೊಳ್ಳಲು ಬಿಜೆಪಿ ಸಜ್ಜಾಗಿದೆ.

ಇಂದು (ಏಪ್ರಿಲ್ 11) ದಕ್ಷಿಣ ದಿನಾಜ್‌ಪುರ, ಕಟ್ವಾ ಮತ್ತು ಜಂಗಿಪುರದಲ್ಲಿ ಪ್ರಧಾನಿ ಪ್ರಚಾರ ನಡೆಸಿದ್ದು, ಏಪ್ರಿಲ್ 12 ರಂದು ಸಿಲಿಗುರಿಯಲ್ಲಿ ಬೃಹತ್ ಸಮಾವೇಶದ ಮೂಲಕ ಉತ್ತರ ಬಂಗಾಳದ ಮತದಾರರನ್ನು ಸೆಳೆಯಲಿದ್ದಾರೆ.

ಬಿಜೆಪಿಯು ಸಾಂಪ್ರದಾಯಿಕವಾಗಿ ದಕ್ಷಿಣ ಬಂಗಾಳಕ್ಕಿಂತ ಉತ್ತರ ಬಂಗಾಳದಲ್ಲಿ ಬಲಿಷ್ಠವಾಗಿದೆ ಎನ್ನಲಾಗಿದ್ದು, ಆದ್ದರಿಂದ ಪ್ರಚಾರದ ಅಂತಿಮ ಹಂತದಲ್ಲಿ ಈ ಪ್ರದೇಶದಲ್ಲಿ ಆವೇಗವನ್ನು ಮತ್ತಷ್ಟು ಹೆಚ್ಚಿಸುವುದು ಕಾರ್ಯತಂತ್ರದ ಪ್ರಮುಖ ಭಾಗವಾಗಿದೆ. ಟಿಎಂಸಿ ವಿರೋಧಿ ಮತಗಳನ್ನು ಕ್ರೋಢೀಕರಿಸುವುದು, ಹಿಂದೂ ಬೆಂಬಲ ನೆಲೆಯನ್ನು ಗಟ್ಟಿಗೊಳಿಸುವುದು ಹಾಗೂ ಮಹಿಳೆಯರು ಮತ್ತು ಸರ್ಕಾರದ ಯೋಜನೆಗಳ ಫಲಾನುಭವಿಗಳನ್ನು ಸೆಳೆಯುವ ಮೂಲಕ ಕೆಲವೇ ಮತಗಳ ಅಂತರದ ಕ್ಷೇತ್ರಗಳಲ್ಲಿ ಬಿಜೆಪಿಯ ವಿಜಯ ಪತಾಕೆ ಹಾರಿಸುವುದು ಪಕ್ಷದ ಗುರಿಯಾಗಿದೆ.

ಈ ಬಾರಿ ಬಿಜೆಪಿಯ ಪ್ರಚಾರದ ಪ್ರಮುಖ ಮಂತ್ರ ಡಬಲ್-ಎಂಜಿನ್ ಸರ್ಕಾರ. ರಾಜ್ಯವು ಕೇಂದ್ರದೊಂದಿಗೆ ಹೊಂದಾಣಿಕೆ ಮಾಡಿಕೊಂಡರೆ ಮಾತ್ರ ಅಭಿವೃದ್ಧಿ, ಮೂಲಸೌಕರ್ಯ ವಿಸ್ತರಣೆ ಮತ್ತು ಕಲ್ಯಾಣ ಯೋಜನೆಗಳು ಜನರಿಗೆ ವೇಗವಾಗಿ ತಲುಪುತ್ತವೆ ಎಂಬ ಸಂದೇಶವನ್ನು ಬಿಜೆಪಿ ಜನರಿಗೆ ತಲುಪಿಸುವ ಕಾರ್ಯದಲ್ಲಿ ತೊಡಗಿಸಿಕೊಂಡಿದ್ದು, ಇದರ ಜೊತೆಗೆ ಭ್ರಷ್ಟಾಚಾರ, ನಿರುದ್ಯೋಗ ಮತ್ತು ಕಾನೂನು ಸುವ್ಯವಸ್ಥೆಯ ಹದಗೆಟ್ಟ ಸ್ಥಿತಿಯನ್ನು ಪ್ರಧಾನಿ ಮೋದಿ ತಮ್ಮ ಭಾಷಣಗಳಲ್ಲಿ ಪ್ರಮುಖವಾಗಿ ಪ್ರಸ್ತಾಪಿಸುತ್ತಿದ್ದಾರೆ.

ಪಶ್ಚಿಮ ಬಂಗಾಳವು ಬಿಜೆಪಿ ಪಾಲಿಗೆ ಕೇವಲ ಒಂದು ರಾಜ್ಯವಲ್ಲ, ಅದು ಸೈದ್ಧಾಂತಿಕವಾಗಿ ಮತ್ತು ಚುನಾವಣಾ ದೃಷ್ಟಿಯಿಂದ ಅತ್ಯಂತ ಪ್ರಮುಖವಾಗಿದೆ. ಕಳೆದ ಹಲವಾರು ವರ್ಷಗಳಿಂದ ಪಕ್ಷವು ಇಲ್ಲಿ ಸಾಕಷ್ಟು ಬೆವರು ಹರಿಸಿದ್ದರೂ, ಮಮತಾ ಬ್ಯಾನರ್ಜಿಯವರನ್ನು ಅಧಿಕಾರದಿಂದ ಕೆಳಗಿಳಿಸಲು ಇದುವರೆಗೆ ಸಾಧ್ಯವಾಗಿಲ್ಲ. ಆದ್ದರಿಂದ, ಮತದಾನಕ್ಕೂ ಮುನ್ನ ಉಳಿದಿರುವ ಈ ಕೊನೆಯ ದಿನಗಳನ್ನು ಬಿಜೆಪಿ ಪಾಲಿಗೆ ಅತ್ಯಂತ ನಿರ್ಣಾಯಕ ಎಂದು ನೋಡಲಾಗುತ್ತಿದೆ(ಏಜೆನ್ಸೀಸ್​).