ಪಿಎಂ ಮೋದಿ ಮೈ ಗುಡ್ ಫ್ರೆಂಡ್...ಶ್ವೇತಭವನದಿಂದಲೇ ಭಾರತದೊಂದಿಗಿನ ಒಪ್ಪಂದಕ್ಕೆ ಹಸಿರು ನಿಶಾನೆ ತೋರಿದ ಡೊನಾಲ್ಡ್ ಟ್ರಂಪ್ | Donald Trump

ಶ್ವೇತಭವನದ ಓವಲ್ ಕಚೇರಿಯಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಟ್ರಂಪ್, ಈ ಹಿಂದೆ ಭಾರತವು ಅಮೆರಿಕಾದ ನೀತಿಗಳ ಲಾಭವನ್ನು ಪಡೆದುಕೊಂಡು ಭಾರೀ ಪ್ರಮಾಣದ ಸುಂಕ ವಿಧಿಸುತ್ತಿತ್ತು, ಆದರೆ ಈಗ ಪರಿಸ್ಥಿತಿ ಸಂಪೂರ್ಣ ಉಲ್ಟಾ ಆಗಿದ್ದು, ಅಮೆರಿಕವು ಭಾರತದೊಂದಿಗೆ ತುಂಬಾ ಹಣ ಗಳಿಸುತ್ತಿದೆ ಎಂದು ಹೇಳಿದರು.

ಭಾರತದವರು ನಮ್ಮ ಕಂಪನಿಗಳಿಗೆ ಭಾರಿ ಪ್ರಮಾಣದ ಸುಂಕವನ್ನು ವಿಧಿಸುತ್ತಿದ್ದರು, ಆದರೆ ನಾವು ಅವರಿಗೆ ಏನನ್ನೂ ವಿಧಿಸುತ್ತಿರಲಿಲ್ಲ. ಈಗ ಅದು ಉಲ್ಟಾ ಆಗಿದೆ ಮತ್ತು ನಾವು ಭಾರತದೊಂದಿಗೆ ಸಾಕಷ್ಟು ಹಣವನ್ನು ಗಳಿಸುತ್ತಿದ್ದೇವೆ ಎಂದು ಉಭಯ ದೇಶಗಳ ನಡುವಿನ ವ್ಯಾಪಾರ ಒಪ್ಪಂದದ ಮಾತುಕತೆಗಳ ಕುರಿತ ಪ್ರಶ್ನೆಗೆ ಉತ್ತರಿಸುತ್ತಾ ಅವರು ಹೇಳಿದರು. ನಾವು ಒಪ್ಪಂದಕ್ಕೆ ಬರುತ್ತೇವೆ ಏಕೆಂದರೆ ನನಗೆ ನಿಮ್ಮ ಪ್ರಧಾನಿ ತುಂಬಾ ಇಷ್ಟ. ಅವರು ನನ್ನ ಉತ್ತಮ ಸ್ನೇಹಿತ. ನಾವು ಒಟ್ಟಿಗೆ ಉತ್ತಮವಾಗಿ ಕಾರ್ಯನಿರ್ವಹಿಸುತ್ತೇವೆ ಮತ್ತು ನಾವು ಒಪ್ಪಂದವನ್ನು ಮಾಡಿಕೊಳ್ಳಲಿದ್ದೇವೆ ಎಂದರು.

ಸುಪ್ರೀಂ ಕೋರ್ಟ್ ತೀರ್ಪಿನ ಬಳಿಕ, ಭಾರತ ಮತ್ತು ಅಮೆರಿಕ ಒಪ್ಪಂದವನ್ನು ಮರು ಮಾತುಕತೆ ನಡೆಸಿವೆ. ಇದರ ಭಾಗವಾಗಿ, ವಾಣಿಜ್ಯ ಇಲಾಖೆಯ ಹೆಚ್ಚುವರಿ ಕಾರ್ಯದರ್ಶಿ ದರ್ಪಣ್ ಜೈನ್ ನೇತೃತ್ವದ ಭಾರತೀಯ ನಿಯೋಗವು ಏಪ್ರಿಲ್‌ನಲ್ಲಿ ಚರ್ಚೆಗಾಗಿ ಅಮೆರಿಕಕ್ಕೆ ಭೇಟಿ ನೀಡಿತ್ತು. ನಂತರ ಜೂನ್ 1 ರಿಂದ 4 ರವರೆಗೆ ಬ್ರೆಂಡನ್ ಲಿಂಚ್ ನೇತೃತ್ವದ ಅಮೆರಿಕದ ನಿಯೋಗವು ಮಾತುಕತೆಗಳನ್ನು ಮುಂದುವರಿಸಲು ಭಾರತಕ್ಕೆ ಆಗಮಿಸಿತ್ತು. ಭಾರತದ ಪ್ರಕಾರ, ವ್ಯಾಪಾರ ಒಪ್ಪಂದವು ಬಹುತೇಕ ಅಂತಿಮಗೊಂಡಿದೆ. ಸಣ್ಣಪುಟ್ಟ ವಿಷಯಗಳ ಬಗ್ಗೆ ಚರ್ಚೆಗಳು ನಡೆಯುತ್ತಿದ್ದು, ಇದನ್ನು ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವ ಪಿಯೂಷ್ ಗೋಯಲ್ ಕೇವಲ ವಿರಾಮಚಿಹ್ನೆಗಳು ಎಂದು ಕರೆದಿದ್ದಾರೆ(ಏಜೆನ್ಸೀಸ್​).