PM CARES Fundಗೆ ಮತ್ತಷ್ಟು ಬಲ! ಒಂದೇ ವರ್ಷದಲ್ಲಿ 1,279 ಕೋಟಿ ರೂ. ಏರಿಕೆ... | PM CARES Fund increase

PM CARES Fund: ‘ಪಿಎಂ ಕೇರ್ಸ್ ಫಂಡ್​​’ನ ಒಟ್ಟು ನಿಧಿಯು 2024-25ನೇ ಸಾಲಿನಲ್ಲಿ ದಾಖಲೆಯ ಏರಿಕೆ ಕಂಡಿದ್ದು, 8,452 ಕೋಟಿ ರೂ.ಗೆ ತಲುಪಿದೆ. ಇತ್ತೀಚೆಗೆ ಆಡಿಟ್ ಮಾಡಲಾದ ಹಣಕಾಸು ವಿವರಗಳ ಪ್ರಕಾರ, 2023-24ರಲ್ಲಿ 7,173 ಕೋಟಿ ರೂ. ಇದ್ದ ಫಂಡ್, ಒಂದೇ ವರ್ಷದಲ್ಲಿ 1,279 ಕೋಟಿ ರೂ. ಹೆಚ್ಚಾಗಿದೆ.

‘ಪಿಎಂ ಕೇರ್ಸ್ ಫಂಡ್’ನ ಒಟ್ಟು ಮೊತ್ತದಲ್ಲಿ 6,641 ಕೋಟಿ ರೂ. ಅನ್ನು ಫಿಕ್ಸೆಡ್ ಡೆಪಾಸಿಟ್‌ಗಳಲ್ಲಿ (FD) ಇರಿಸಲಾಗಿದೆ. ಈ ಹಣದಿಂದ 2024-25ನೇ ಸಾಲಿನಲ್ಲಿ ಸುಮಾರು 475 ಕೋಟಿ ರೂ. ಬಡ್ಡಿ ಆದಾಯ ಬಂದಿದೆ. ಅಂದರೆ, ಹೊಸದಾಗಿ ಯಾವುದೇ ದೇಣಿಗೆ ಬಂದಿಲ್ಲದಿದ್ದರೂ, ಈಗಾಗಲೇ ನಿಧಿಯಲ್ಲಿದ್ದ ಹಣವನ್ನು ಎಫ್​ಡಿ ಮಾಡಿ ಆದಾಯ ಗಳಿಸಲಾಗಿದೆ. ಅಗತ್ಯವಿಲ್ಲದ ಹಣವನ್ನು ಮೀಸಲಿಟ್ಟು, ಅದರಿಂದ ಬಡ್ಡಿಯನ್ನೂ ಪಡೆಯುವ ವ್ಯವಸ್ಥೆ ಮಾಡಲಾಗಿದೆ.

2024-25ನೇ ಸಾಲಿನಲ್ಲಿ ಪಿಎಂ ಕೇರ್ಸ್ ಫಂಡ್​ಗೆ ದೇಶೀಯ ಮೂಲಗಳಿಂದ ಸುಮಾರು 475 ಕೋಟಿ ರೂ. ದೇಣಿಗೆ ಬಂದಿದೆ. ದೇಣಿಗೆಗಳ ಜೊತೆಗೆ ಎಫ್​ಡಿಗಳಿಂದ ಬಂದ ಬಡ್ಡಿ ಆದಾಯವೂ ನಿಧಿಯ ಒಟ್ಟು ಸಂಪನ್ಮೂಲ ಹೆಚ್ಚಳಕ್ಕೆ ನೆರವಾಗಿದೆ. ಇತ್ತೀಚಿನ ಅಂಕಿ-ಅಂಶಗಳು, ನಿಧಿಯಲ್ಲಿರುವ ಹಣವನ್ನು ಕೇವಲ ಉಳಿತಾಯ ಖಾತೆಗಳಲ್ಲಿ ಇಡುವ ಬದಲು ಅದರ ದೊಡ್ಡ ಭಾಗವನ್ನು ಫಿಕ್ಸೆಡ್ ಡೆಪಾಸಿಟ್‌ಗಳಿಗೆ ವರ್ಗಾಯಿಸಿರುವುದನ್ನು ತೋರಿಸುತ್ತವೆ.

ಇನ್ನು, ಈ ಫಂಡ್ ಹೆಚ್ಚಾಗಿರುವುದರಿಂದ, ತುರ್ತು ಪರಿಸ್ಥಿತಿಗಳು ಎದುರಾದಾಗ ಸರ್ಕಾರಕ್ಕೆ ತಕ್ಷಣ ಹಣಕಾಸಿನ ನೆರವು ಒದಗಿಸಲು ದೊಡ್ಡ ಮೊತ್ತದ ಮೀಸಲು ಇದೆ. ಒಟ್ಟು 8,452 ಕೋಟಿ ರೂ. ನಿಧಿ ಹೊಂದಿರುವ ಪಿಎಂ ಕೇರ್ಸ್ ಫಂಡ್​ನಲ್ಲಿ 6,641 ಕೋಟಿ ರೂ. ಎಫ್​ಡಿ ಇದೆ. ಹೀಗಾಗಿ ಬಳಕೆಯಾಗದ ಹಣದಿಂದ ಬಡ್ಡಿ ಆದಾಯ ಪಡೆಯುತ್ತಲೇ, ಅಗತ್ಯ ಸಂದರ್ಭದಲ್ಲಿ ಬಳಸಿಕೊಳ್ಳಲು ನಿಧಿಯನ್ನು ಕಾಯ್ದಿರಿಸಲಾಗಿದೆ.

ಕೊರೊನಾ ಸಾಂಕ್ರಾಮಿಕದ ಸಂದರ್ಭದಲ್ಲಿ ಪೋಷಕರು ಅಥವಾ ಕಾನೂನುಬದ್ಧ ಪಾಲಕರನ್ನು ಕಳೆದುಕೊಂಡ ಮಕ್ಕಳಿಗಾಗಿ ಆರಂಭಿಸಲಾಗಿರುವ ‘ಪಿಎಂ ಕೇರ್ಸ್ ಫಾರ್ ಚಿಲ್ಡ್ರನ್’ ಯೋಜನೆಯಡಿ ಖರ್ಚು ಮುಂದುವರಿದಿದೆ. ಈ ಯೋಜನೆಯಡಿ ಮಕ್ಕಳ ಶಿಕ್ಷಣ, ಆರೋಗ್ಯ ಅಗತ್ಯಗಳಿಗೆ ನೆರವು ನೀಡಲಾಗುತ್ತಿದೆ.ಮತ್ತೊಂದೆಡೆ ಈ ಮಕ್ಕಳ ಕಲ್ಯಾಣ ಯೋಜನೆಯಡಿ ಹಣವನ್ನು ಖರ್ಚು ಮಾಡಲಾಗುತ್ತಿದೆ,(ಏಜೆನ್ಸೀಸ್​).