ಆತನೇ ನನ್ನ ಪ್ರಪಂಚವಾಗಿದ್ದ, ನನಗೆ ನ್ಯಾಯ ಕೊಡಿ!...ಪ್ರಧಾನಿ ಮೋದಿಗೆ ಪತ್ರ ಬರೆದ ಕೇತನ್ ತಾಯಿ | Ketan Agarwal Case

ಪ್ರಧಾನಿ ಮೋದಿ ಅವರಿಗೆ ಬರೆದಿರುವ ಪತ್ರದಲ್ಲಿ ರಾಖಿ ಅಗರ್‌ವಾಲ್, ತಾವು ಯಾವುದೇ ಸಹಾನುಭೂತಿ ಅಥವಾ ವಿಶೇಷ ಸೌಲಭ್ಯವನ್ನು ಕೇಳುತ್ತಿಲ್ಲ, ಬದಲಿಗೆ ತಮ್ಮ ಮಗನ ಸಾವಿಗೆ ಕಾರಣರಾದವರಿಗೆ ಕಠಿಣ ಶಿಕ್ಷೆಯಾಗಬೇಕು ಎಂದು ವಿನಂತಿಸಿದ್ದಾರೆ.

ಪ್ರಧಾನಿ ಮೋದಿಯವರಿಗೆ ರವಾನಿಸಿದ ಇಮೇಲ್‌ನಲ್ಲಿ, ರಾಖಿ ಅಗರ್‌ವಾಲ್ ಅವರು ಚಿಕ್ಕ ವಯಸ್ಸಿನಲ್ಲಿಯೇ ಮಗನನ್ನು ಕಳೆದುಕೊಂಡ ಕಲ್ಪಿಸಲೂ ಸಾಧ್ಯವಾಗದ ನೋವಿನ ಬಗ್ಗೆ ಬರೆದಿದ್ದಾರೆ. ಪ್ರತಿಯೊಬ್ಬ ತಾಯಿಯಂತೆ, ನಾನು ಕೂಡ ಕೇತನ್ ಸುಂದರವಾದ ಜೀವನವನ್ನು ಕಟ್ಟಿಕೊಳ್ಳುವುದನ್ನು, ಮದುವೆಯಾಗುವುದನ್ನು ಮತ್ತು ನಮ್ಮೊಂದಿಗೆ ಬೆಳೆಯುವುದನ್ನು ನೋಡುವ ಕನಸು ಕಂಡಿದ್ದೆ. ಆದರೆ, ಅದಕ್ಕೆ ಬದಲಾಗಿ ನನ್ನ ಮಗನ ಅಂತ್ಯಸಂಸ್ಕಾರವನ್ನು ನಾನೇ ಮಾಡಬೇಕಾಯಿತು ಎಂದು ಕಣ್ಣೀರಿಟ್ಟಿದ್ದಾರೆ.

ನನ್ನ ಮಗನನ್ನು ನಿರ್ದಯವಾಗಿ ಕೊಲೆ ಮಾಡಲಾಯಿತು, ಆತನ ಜೊತೆಗೆ ನನ್ನ ಇಡೀ ಜಗತ್ತೇ ಹೊರಟುಹೋಯಿತು. ನಮ್ಮ ಮನೆಯ ಪ್ರತಿಯೊಂದು ಮೂಲೆಯೂ ನನಗೆ ಆತನನ್ನು ನೆನಪಿಸುತ್ತದೆ. ಅವನ ನಗುವಿನ ಜಾಗದಲ್ಲಿ ಆವರಿಸಿರುವ ಮೌನವು, ಆತ ಇನ್ಯಾವತ್ತೂ ಹಿಂತಿರುಗಿ ಬರುವುದಿಲ್ಲ ಎಂಬುದನ್ನು ಪ್ರತಿದಿನ ನೆನಪಿಸುತ್ತದೆ. ಈ ದುರಂತವು ಇಡೀ ಕುಟುಂಬವನ್ನು ತೀವ್ರವಾಗಿ ಕುಗ್ಗಿಸಿದೆ ಎಂದು ಹೇಳಿರುವ ರಾಖಿ, ತಮ್ಮ ಮೊಮ್ಮಗನನ್ನು ಕಳೆದುಕೊಂಡ ಆಘಾತವನ್ನು ತಾಳಲಾರದೆ ತಮ್ಮ ಮಾವ (ಕೇತನ್ ಅಜ್ಜ) ಕೇತನ್ ಸತ್ತ ಕೇವಲ 20 ದಿನಗಳಲ್ಲಿ ತೀರಿಕೊಂಡರು ಎಂಬುದನ್ನು ಬಹಿರಂಗಪಡಿಸಿದ್ದಾರೆ.

ಮೋದೀಜಿ, ನಾನು ಬರೀ ಒಬ್ಬ ತಾಯಿ. ನಾನು ಯಾವುದೇ ಸಹಾನುಭೂತಿ ಅಥವಾ ವಿಶೇಷ ಸೌಲಭ್ಯವನ್ನು ಕೇಳುತ್ತಿಲ್ಲ. ಕೇಳುತ್ತಿರುವುದು ಕೇವಲ ನ್ಯಾಯ ಮಾತ್ರ ಎಂದು ಬರೆದಿದ್ದಾರೆ. ಈ ಪ್ರಕರಣವನ್ನು ಅನಗತ್ಯವಾಗಿ ವಿಳಂಬ ಮಾಡದೆ, ತಪ್ಪಿತಸ್ಥರಿಗೆ ಕಾನೂನು ಪ್ರಕಾರ ಶಿಕ್ಷೆಯಾಗಬೇಕೆಂದು ಎಂದು ಮನವಿ ಮಾಡಿದ್ದಾರೆ.

ದಯವಿಟ್ಟು ಕೇತನ್ ಪ್ರಕರಣವನ್ನು ಮತ್ತೊಂದು ಕೇಸ್ ಫೈಲ್ ಆಗಲು ಬಿಡಬೇಡಿ. ಆತ ಯಾರೋ ಒಬ್ಬರ ಮಗ, ಯಾರೋ ಒಬ್ಬರ ಮೊಮ್ಮಗ, ಯಾರೋ ಒಬ್ಬರ ಸಹೋದರನಾಗಿದ್ದ, ಆದರೆ ನನಗೆ ಆತನೇ ಇಡೀ ಪ್ರಪಂಚವಾಗಿದ್ದ. ನಾವು ಈಗಲೂ ಪ್ರತಿದಿನ ರಾತ್ರಿ ಮಗನ ಫೋಟೋ ಜೊತೆ ಮಾತನಾಡುತ್ತಾ, ಒಂದಲ್ಲ ಒಂದು ದಿನ ನಿನಗೆ ಅಂತಿಮವಾಗಿ ನ್ಯಾಯ ಸಿಕ್ಕಿದೆ ಎಂದು ಹೇಳುವ ಭರವಸೆಯಲ್ಲಿದ್ದೇನೆ ಎಂದು ಆ ತಾಯಿ ಹೇಳಿದ್ದಾರೆ.

ಪುಣೆಯ 26 ವರ್ಷದ ರಿಯಲ್ ಎಸ್ಟೇಟ್ ಉದ್ಯಮಿ ಕೇತನ್ ಅಗರ್‌ವಾಲ್, ಜೂನ್ 18 ರಂದು ಪುಣೆ ಜಿಲ್ಲೆಯ ಲೋಹಗಡ್ ಕೋಟೆಯ ಬಳಿಯ ಕಂದಕಕ್ಕೆ ಬಿದ್ದು ಸಾವನ್ನಪ್ಪಿದ್ದರು. ಈ ಪ್ರಕರಣವನ್ನು ಆರಂಭದಲ್ಲಿ ಆಕಸ್ಮಿಕ ಸಾವು ಎಂದು ದಾಖಲಿಸಿಕೊಳ್ಳಲಾಗಿತ್ತು. ಆದರೆ, ತನಿಖೆಯ ವೇಳೆ ಇದು ಪೂರ್ವನಿಯೋಜಿತ ಕೊಲೆ ಎಂಬ ತೀರ್ಮಾನಕ್ಕೆ ಪೊಲೀಸರು ಬಂದಿದ್ದಾರೆ. ತದನಂತರ, ಕೇತನ್ ಅವರ ನಿಶ್ಚಿತಾರ್ಥವಾಗಿದ್ದ ಸಿಯಾ ಗೋಯಲ್ ಹಾಗೂ ಆಕೆಯ ಪ್ರಿಯಕರನೆನ್ನಲಾದ ಚೇತನ್ ಚೌಧರಿಯನ್ನು ಬಂಧಿಸಲಾಗಿದೆ. ತನಿಖಾಧಿಕಾರಿಗಳ ಪ್ರಕಾರ, ಅವರಿಬ್ಬರೂ ಬೆಟ್ಟದ ಕೋಟೆಗೆ ಪ್ರವಾಸ ತೆರಳಿದ್ದಾಗ ಕೇತನ್‌ನನ್ನು ಪ್ರಪಾತಕ್ಕೆ ತಳ್ಳಿ ಕೊಲೆ ಮಾಡಲು ಸಂಚು ರೂಪಿಸಿದ್ದರು ಎನ್ನಲಾಗಿದೆ(ಏಜೆನ್ಸೀಸ್​​).