ಪಿಎಫ್ ಹಣ ವಿತ್​ಡ್ರಾ ಶೀಘ್ರವೇ ಸ್ವಯಂಚಾಲಿತ! 'ಫೈನಲ್ ಸೆಟಲ್​ವೆುಂಟ್' ಈಗ ಇನ್ನಷ್ಟು ಸುಲಭ

EPFO: ಒಂದು ಕಾಲದಲ್ಲಿ ಭವಿಷ್ಯ ನಿಧಿ (PF) ಹಣವನ್ನು ಹಿಂಪಡೆಯುವುದು ಉದ್ಯೋಗಿಗಳಿಗೆ ದೊಡ್ಡ ತಲೆನೋವಾಗಿತ್ತು. ಅರ್ಜಿಗಳನ್ನು ಭರ್ತಿ ಮಾಡುವುದು, ಇಪಿಎಫ್​ಒ ​​ಕಚೇರಿಗಳಿಗೆ ಅಲೆದಾಡುವುದು, ಕಡತಗಳ ಪರಿಶೀಲನೆಗಳು ಮತ್ತು ವಾರಗಳವರೆಗೆ ನಮ್ಮ ಹಣಕ್ಕಾಗಿ ಕಾಯಬೇಕಾಗಿತ್ತು. ಕೆಲವೊಮ್ಮೆ ಹಣ ಬರುವುದಕ್ಕೆ ಒಂದು ತಿಂಗಳ ಸಮಯ ಕೂಡ ಹಿಡಿಯುತ್ತಿತ್ತು. ಆದರೆ, ಇನ್ಮುಂದೆ ಇಂತಹ ಪರಿಸ್ಥಿತಿ ಇರುವುದಿಲ್ಲ. ಯಾಕೆಂದರೆ, ಇದು ಡಿಜಿಟಲ್​ ಕಾಲ.

ಭವಿಷ್ಯ ನಿಧಿ ಸಂಸ್ಥೆಯ ಏಳು ಕೋಟಿಗೂ ಅಧಿಕ ಸದಸ್ಯರಿಗೆ ಸಿಹಿಸುದ್ದಿ ಸಿಕ್ಕಿದೆ. ನಿವೃತ್ತಿ ನಿಧಿಯ ಅಂತಿಮ ವಿತರಣೆಯ ಪ್ರಕ್ರಿಯೆಯನ್ನು ಶೀಘ್ರದಲ್ಲೇ ಸಂಪೂರ್ಣವಾಗಿ ಸ್ವಯಂಚಾಲಿತ (ಆಟೋಮೇಷನ್) ಮಾಡುವುದಾಗಿ ಇಪಿಎಫ್​ಒ ಬುಧವಾರ (ಮೇ.13) ಅಧಿಕೃತವಾಗಿ ಘೋಷಿಸಿದೆ. ಇದರಿಂದಾಗಿ ಉದ್ಯೋಗಿಗಳು ತಮ್ಮ ಪಿಎಫ್ ಹಣ ಹಿಂಪಡೆಯಲು ಸಲ್ಲಿಸುವ ಫಾರ್ಮ್​ಗಳು ವೇಗವಾಗಿ ವಿಲೇವಾರಿಯಾಗಿ, ಹಣ ನೇರವಾಗಿ ಅವರ ಬ್ಯಾಂಕ್ ಖಾತೆಗಳಿಗೆ ವರ್ಗಾವಣೆಯಾಗಲಿದೆ.

ಪ್ರಸ್ತುತ 5 ಲಕ್ಷ ರೂ.ವರೆಗಿನ ಪಿಎಫ್ ಮುಂಗಡ (ಅಡ್ವಾನ್ಸ್) ಅರ್ಜಿಗಳನ್ನು ಮಾತ್ರ ಸ್ವಯಂಚಾಲಿತವಾಗಿ 3 ದಿನಗಳಲ್ಲಿ ಇತ್ಯರ್ಥಪಡಿಸಲಾಗುತ್ತಿದೆ. ಆದರೆ, ಇನ್ನು ಮುಂದೆ ಹುದ್ದೆಗೆ ರಾಜೀನಾಮೆ ನೀಡಿದಾಗ ಅಥವಾ ನಿವೃತ್ತಿಯಾದಾಗ ಪಡೆಯುವ ‘ಫೈನಲ್ ಸೆಟಲ್​ವೆುಂಟ್’ ಕೂಡ ಇದೇ ಮಾದರಿಯಲ್ಲಿ ನಡೆಯಲಿದೆ ಎಂದು ಕೇಂದ್ರ ಭವಿಷ್ಯ ನಿಧಿ ಆಯುಕ್ತ ರಮೇಶ್ ಕೃಷ್ಣಮೂರ್ತಿ ತಿಳಿಸಿದ್ದಾರೆ.

ಅದಲ್ಲದೆ, ಉದ್ಯೋಗಿಗಳು ಕೆಲಸ ಬದಲಿಸಿದಾಗ ಅವರ ಪಿಎಫ್ ಖಾತೆಯನ್ನು ಹೊಸ ಕಂಪನಿಗೆ ವರ್ಗಾಯಿಸಲು ಪ್ರತ್ಯೇಕ ಅರ್ಜಿ ಸಲ್ಲಿಸುವ ಅಗತ್ಯವಿರುವುದಿಲ್ಲ. ಹಳೆಯ ಖಾತೆಯು ಹೊಸ ಖಾತೆಗೆ ತಾನಾಗಿಯೇ ವರ್ಗಾವಣೆಯಾಗುವ (ಆಟೋ-ಟ್ರಾನ್ಸ್​ಫರ್) ವ್ಯವಸ್ಥೆಯನ್ನು ಜಾರಿಗೆ ತರಲಾಗುತ್ತಿದೆ. ಈ ಡಿಜಿಟಲ್ ಬದಲಾವಣೆಯು ಉದ್ಯೋಗಿಗಳಿಗೆ ಅಲೆದಾಟ ತಪ್ಪಿಸಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.