ವಿಜಯ್ ಪಾಲಿಗೆ ಈ ವರ್ಗವೇ ಆನೆಬಲನಾ..? ಪೆರಂಬೂರಿನ ಹಳೆಯ ರಾಜಕೀಯ ವ್ಯವಸ್ಥೆಯನ್ನು ಬುಡಮೇಲು ಮಾಡುತ್ತಾ ಟಿವಿಕೆ ಎಂಬ ಹೊಸ ಶಕ್ತಿ..? | TVK Vijay

ಪೆರಂಬೂರ್ ಕ್ಷೇತ್ರವು ಸಾಂಪ್ರದಾಯಿಕವಾಗಿ ದ್ರಾವಿಡ ಪಕ್ಷಗಳ ಭದ್ರಕೋಟೆಯಾಗಿದ್ದರೂ, ಈ ಬಾರಿ ವಿಜಯ್ ಪ್ರವೇಶದಿಂದಾಗಿ ತಮಿಳುನಾಡಿನ ಅತ್ಯಂತ ಹೈ-ಪ್ರೊಫೈಲ್ ಕ್ಷೇತ್ರವಾಗಿ ಮಾರ್ಪಟ್ಟಿದೆ. ವಿಜಯ್ ಜನಪ್ರಿಯತೆ, ಯುವ ಮತದಾರರ ಮೇಲಿನ ಅವರ ಪ್ರಭಾವ ಮತ್ತು ಅವರ ಪಕ್ಷದ ಸಂಘಟನಾ ಚತುರತೆ ಈಗ ಆಡಳಿತಾರೂಢ ಡಿಎಂಕೆ ಮತ್ತು ವಿರೋಧ ಪಕ್ಷ ಎಐಎಡಿಎಂಕೆಗೆ ಸಣ್ಣ ಮಟ್ಟದ ಆತಂಕ ತಂದಿರುವುದರಲ್ಲಿ ಅನುಮಾನವಿಲ್ಲ.

ಈ ಕ್ಷೇತ್ರದಲ್ಲಿ ಡಿಎಂಕೆ ಇದುವರೆಗೆ ಒಂಬತ್ತು ಬಾರಿ ಗೆಲುವು ಸಾಧಿಸುವ ಮೂಲಕ ತನ್ನ ಅಧಿಪತ್ಯವನ್ನು ಸ್ಥಾಪಿಸಿದೆ. 1967 ಮತ್ತು 1971 ರಲ್ಲಿ ಗೆಲುವು ಕಂಡ ಸತ್ಯವಾಣಿ ಮುತ್ತು ಹಾಗೂ 1984 ರಲ್ಲಿ ಜಯಭೇರಿ ಬಾರಿಸಿದ ಪರಿಥಿ ಇಲಂವಝುತಿ ಅವರಂತಹ ಪ್ರಭಾವಿ ನಾಯಕರ ರಾಜಕೀಯ ಇತಿಹಾಸಕ್ಕೆ ಈ ಕ್ಷೇತ್ರ ಸಾಕ್ಷಿಯಾಗಿದೆ. 2016ರಲ್ಲಿ ಅಖಿಲ ಭಾರತ ಅಣ್ಣಾ ದ್ರಾವಿಡ ಮುನ್ನೇತ್ರ ಕಳಗಂ (ಎಐಎಡಿಎಂಕೆ) ಅತ್ಯಲ್ಪ ಅಂತರದಿಂದ ಈ ಸ್ಥಾನವನ್ನು ಕಸಿದುಕೊಳ್ಳುವಲ್ಲಿ ಯಶಸ್ವಿಯಾಗಿದ್ದರೂ, 2019ರ ಉಪಚುನಾವಣೆ ಮತ್ತು 2021ರ ಸಾರ್ವತ್ರಿಕ ಚುನಾವಣೆಯಲ್ಲಿ ಆರ್.ಡಿ. ಶೇಖರ್ ಅವರ ಭರ್ಜರಿ ಗೆಲುವಿನೊಂದಿಗೆ ಡಿಎಂಕೆ ತನ್ನ ಪ್ರಾಬಲ್ಯವನ್ನು ಮತ್ತೆ ದೃಢಪಡಿಸಿತ್ತು.

ಚೆನ್ನೈ ಜಿಲ್ಲೆಯ ಅತ್ಯಂತ ಜನನಿಬಿಡ ಕ್ಷೇತ್ರಗಳಲ್ಲಿ ಒಂದಾದ ಪೆರಂಬೂರು ಸುಮಾರು 2.22 ಲಕ್ಷಕ್ಕೂ ಹೆಚ್ಚು ಮತದಾರರನ್ನು ಹೊಂದಿದ್ದು, ಇಲ್ಲಿ ಮಹಿಳಾ ಮತದಾರರ ಸಂಖ್ಯೆ ಪುರುಷರಿಗಿಂತ ತುಸು ಹೆಚ್ಚಿರುವುದು ವಿಶೇಷ. ಯುವಕರು ಮತ್ತು ಕಾರ್ಮಿಕ ವರ್ಗದ ನಿವಾಸಿಗಳನ್ನು ದೊಡ್ಡ ಪ್ರಮಾಣದಲ್ಲಿ ಹೊಂದಿರುವ ಈ ಕ್ಷೇತ್ರವು ಸಾಮಾಜಿಕವಾಗಿ ಮತ್ತು ರಾಜಕೀಯವಾಗಿ ಅತ್ಯಂತ ಸೂಕ್ಷ್ಮ ವಿಭಾಗವಾಗಿದೆ.

ರೈಲ್ವೆ ಕಾಲೋನಿಗಳು ಮತ್ತು ಇಂಟಿಗ್ರಲ್ ಕೋಚ್ ಫ್ಯಾಕ್ಟರಿ (ಐಸಿಎಫ್) ಸುತ್ತಮುತ್ತಲಿನ ಪ್ರದೇಶಗಳನ್ನು ಒಳಗೊಂಡಿರುವ ಈ ಕ್ಷೇತ್ರದಲ್ಲಿ ಮಧ್ಯಮ ವರ್ಗ ಮತ್ತು ಕಾರ್ಮಿಕ ಸಮುದಾಯಗಳ ಪ್ರಭಾವ ಹೆಚ್ಚಿದೆ. ಈ ಬಾರಿಯ ಚುನಾವಣಾ ಪ್ರಚಾರದಲ್ಲಿ ಉದ್ಯೋಗಾವಕಾಶ, ಹಣದುಬ್ಬರ ತಡೆ, ವಸತಿ ಸೌಕರ್ಯ ಮತ್ತು ನಾಗರಿಕ ಸೌಲಭ್ಯಗಳಂತಹ ಮೂಲಭೂತ ಸಮಸ್ಯೆಗಳು ಪ್ರಮುಖ ಚರ್ಚಾ ವಿಷಯಗಳಾಗುವ ನಿರೀಕ್ಷೆಯಿದೆ.

ಯುವ ಮತದಾರರಲ್ಲಿ ವಿಜಯ್ ಅವರಿಗಿರುವ ಅಪಾರ ಜನಪ್ರಿಯತೆಯು ದಶಕಗಳಿಂದ ದ್ರಾವಿಡ ಪಕ್ಷಗಳ ಹಿಡಿತದಲ್ಲಿದ್ದ ಈ ಕೋಟೆಯನ್ನು ಭೇದಿಸಲು ನೆರವಾಗಬಹುದು ಎಂದು ರಾಜಕೀಯ ವೀಕ್ಷಕರು ವಿಶ್ಲೇಷಿಸುತ್ತಿದ್ದಾರೆ. ಪೆರಂಬೂರಿನಲ್ಲಿ ಸ್ಪರ್ಧೆ ಇನ್ನು ಮುಂದೆ ಕೇವಲ ಸಾಂಪ್ರದಾಯಿಕ ಚುನಾವಣೆಯಾಗಿ ಉಳಿದಿಲ್ಲ, ಆಳವಾಗಿ ಬೇರೂರಿರುವ ಹಳೆಯ ರಾಜಕೀಯ ವ್ಯವಸ್ಥೆಯನ್ನು ಹೊಸ ಶಕ್ತಿಯೊಂದು ಬುಡಮೇಲು ಮಾಡಬಲ್ಲದೇ ಎಂಬುದಕ್ಕೆ ಇದು ಸಾಂಕೇತಿಕ ಪರೀಕ್ಷೆಯಾಗಿದೆ ಎನ್ನುವುದು ವಿಶ್ಲೇಷಕರ ಅಭಿಪ್ರಾಯ.

ಪ್ರಸ್ತುತ ಪೆರಂಬೂರು ಕ್ಷೇತ್ರದಲ್ಲಿ ಪ್ರಚಾರದ ಕಾವು ಏರುತ್ತಿದ್ದು, ಡಿಎಂಕೆಯ ಸಂಘಟನಾತ್ಮಕ ಶಕ್ತಿ, ಎಐಎಡಿಎಂಕೆಯ ಮರಳಿ ಅಧಿಕಾರ ಪಡೆಯುವ ಪ್ರಯತ್ನ ಮತ್ತು ರಾಜಕೀಯ ಕ್ರಾಂತಿಯ ಭರವಸೆಯೊಂದಿಗೆ ಬಂದಿರುವ ಟಿವಿಕೆ ನಡುವೆ ಸ್ಪರ್ಧೆ ಏರ್ಪಟ್ಟಿದೆ(ಏಜೆನ್ಸೀಸ್​​).