ಕಳ್ಳತನ ಆರೋಪ! 12 ವರ್ಷದ ಬಾಲಕನ್ನು ಸರಪಳಿಯಿಂದ ಕಟ್ಟಿಹಾಕಿ ಕೆಲಸಕ್ಕೆ ಹೋಗುತ್ತಿದ್ದ ಪೋಷಕರು..theft

ನಾಗ್ಪುರ: ( theft) ತನ್ನ ಮಗ ಪದೇ ಪದೇ ಕಳ್ಳತನ ಮಾಡುತ್ತಾನೆಂಬ ಕಾರಣಕ್ಕೆ ಹೆತ್ತ ಪೋಷಕರೇ ಆತನನ್ನು ಸರಪಳಿಯಿಂದ ಕಟ್ಟಿಹಾಕುತ್ತಿದ್ದ ಅಮಾನವೀಯ ಘಟನೆಯೊಂದು ನಾಗ್ಪುರದ ಇಮಾಮ್‌ವಾಡಾ ಪ್ರದೇಶದಲ್ಲಿ ಈ ಘಟನೆ ನಡೆದಿದೆ.

ವರದಿಗಳ ಪ್ರಕಾರ, 12 ವರ್ಷದ ಈ ಬಾಲಕನಿಗೆ ಸಣ್ಣಪುಟ್ಟ ಕಳ್ಳತನ ಮಾಡುವ ಹವ್ಯಾಸವಿತ್ತು. ಮನೆಯಿಂದ ಹೊರಹೋಗುತ್ತಿದ್ದ ಈತ, ಸುತ್ತಮುತ್ತಲಿನ ಮನೆಗಳಲ್ಲಿ ಅಥವಾ ಅಂಗಡಿಗಳಲ್ಲಿ ಕೈಚಳಕ ತೋರುತ್ತಿದ್ದನು.

ಈತನ ಈ ವರ್ತನೆಯಿಂದ ಪೋಷಕರು ಸಮಾಜದಲ್ಲಿ ಅವಮಾನ ಎದುರಿಸಬೇಕಾಗಿ ಬಂದಿತ್ತು. ಮಗನ ಹವ್ಯಾಸವನ್ನು ತಿದ್ದಲು ಸಾಧ್ಯವಾಗದ ಪೋಷಕರು, ಪ್ರತಿದಿನ ಕೆಲಸಕ್ಕೆ ಹೋಗುವ ಮುನ್ನ ಆತನ ಕಾಲಿಗೆ ಕಬ್ಬಿಣದ ಸರಪಳಿ ಹಾಕಿ ಬೀಗ ಜಡಿಯುತ್ತಿದ್ದರು. ಮಗು ಮನೆಯ ಒಳಗೇ ಬಂಧಿಯಾಗಿರುತ್ತಿತ್ತು. ಪೋಷಕರು ಸಂಜೆ ಕೆಲಸ ಮುಗಿಸಿ ಮನೆಗೆ ಬಂದ ಮೇಲೆಯೇ ಆತನಿಗೆ ಮುಕ್ತಿ ಸಿಗುತ್ತಿತ್ತು.

ಬಾಲಕನು ಸರಪಳಿಯೊಂದಿಗೆ ಕಿಟಕಿಯ ಬಳಿ ನಿಂತಿರುವುದನ್ನು ಗಮನಿಸಿದ ನೆರೆಹೊರೆಯವರು ತಕ್ಷಣ ಅವರು ಪೊಲೀಸರಿಗೆ ಮತ್ತು ಮಕ್ಕಳ ಕಲ್ಯಾಣ ಸಮಿತಿಗೆ ಮಾಹಿತಿ ನೀಡಿದ್ದಾರೆ. ಸ್ಥಳಕ್ಕೆ ಆಗಮಿಸಿದ ಪೊಲೀಸರು ಬಾಲಕನನ್ನು ರಕ್ಷಿಸಿ, ಆತನ ಕಾಲಿನಲ್ಲಿದ್ದ ಸರಪಳಿಯನ್ನು ಕತ್ತರಿಸಿ ಮುಕ್ತಗೊಳಿಸಿದ್ದಾರೆ.

ಪೊಲೀಸ್ ವಿಚಾರಣೆಯ ವೇಳೆ ಪೋಷಕರು ತಮ್ಮ ಅಸಹಾಯಕತೆಯನ್ನು ವ್ಯಕ್ತಪಡಿಸಿದ್ದಾರೆ. "ನಮ್ಮ ಮಗನಿಗೆ ಕಳ್ಳತನ ಮಾಡುವ ಹವ್ಯಾಸ ಬೆಳೆದುಬಿಟ್ಟಿದೆ. ಎಷ್ಟೇ ತಿಳಿಹೇಳಿದರೂ ಆತ ಕೇಳುತ್ತಿಲ್ಲ. ನಾವು ಕೆಲಸಕ್ಕೆ ಹೋದಾಗ ಆತ ಹೊರಗೆ ಹೋಗಿ ಇತರರ ವಸ್ತುಗಳನ್ನು ಕದಿಯುತ್ತಾನೆ. ಇದರಿಂದ ನಮಗೆ ಸಮಾಜದಲ್ಲಿ ಅವಮಾನವಾಗುತ್ತಿದೆ ಮತ್ತು ಪೊಲೀಸ್ ತೊಂದರೆ ಉಂಟಾಗುತ್ತಿದೆ. ಆತನನ್ನು ನಿಯಂತ್ರಿಸಲು ಬೇರೆ ದಾರಿ ಕಾಣದೆ ಈ ರೀತಿ ಮಾಡಬೇಕಾಯಿತು" ಎಂದು ಅವರು ಹೇಳಿಕೆ ನೀಡಿದ್ದಾರೆ.

ಪೋಷಕರು ನಾವು ಮಗನ ಒಳ್ಳೆಯದಕ್ಕಾಗಿಯೇ ಹೀಗೆ ಮಾಡಿದ್ದೇವೆ ಎಂದು ವಾದಿಸಿದರೂ, ಪೊಲೀಸರು ಇದನ್ನು ಗಂಭೀರವಾಗಿ ಪರಿಗಣಿಸಿದ್ದಾರೆ. ಬಾಲಾಪರಾಧ ನ್ಯಾಯ ಕಾಯ್ದೆಯಡಿ (Juvenile Justice Act) ಪೋಷಕರ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ. ಸದ್ಯ ಬಾಲಕನನ್ನು ಮಕ್ಕಳ ರಕ್ಷಣಾ ಕೇಂದ್ರಕ್ಕೆ ದಾಖಲಿಸಲಾಗಿದ್ದು, ಆತನಿಗೆ ಕೌನ್ಸೆಲಿಂಗ್ ನೀಡಲಾಗುತ್ತಿದೆ.