Ratna Debnath: ಬಂಗಾಳದಲ್ಲಿ ಅರಳಿದ ಕೇಸರಿ: ಪಾಣಿಹಟಿಯಲ್ಲಿ ಆರ್.ಜಿ ಕರ್ ಸಂತ್ರಸ್ತೆಯ ತಾಯಿಗೆ ಭರ್ಜರಿ ಜಯ!

ಪಾಣಿಹಟಿಯಲ್ಲಿ ಐದು ಬಾರಿ ಶಾಸಕರಾಗಿದ್ದ ಟಿಎಂಸಿಯ ಪ್ರಭಾವಿ ನಾಯಕನ ಪುತ್ರ ತೀರ್ಥಂಕರ್ ಘೋಷ್ ವಿರುದ್ಧ ರತ್ನಾ ಅವರು ಸ್ಪರ್ಧಿಸಿದ್ದರು. ಮಗಳ ಸಾವಿಗೆ ನ್ಯಾಯ ಕೋರಿ ಬೀದಿಗಿಳಿದಿದ್ದ ತಾಯಿಗೆ ಪಾಣಿಹಟಿಯ ಮತದಾರರು ಭರ್ಜರಿ ಬೆಂಬಲ ನೀಡಿದ್ದಾರೆ.

ಫಲಿತಾಂಶದ ಟ್ರೆಂಡ್ ಬೆನ್ನಲ್ಲೇ ಮಾಧ್ಯಮಗಳೊಂದಿಗೆ ಮಾತನಾಡಿದ ರತ್ನಾ ದೆಬ್‌ನಾಥ್ ಅವರು ಅತ್ಯಂತ ಭಾವನಾತ್ಮಕವಾಗಿ ಪ್ರತಿಕ್ರಿಯಿಸಿದರು. "ನನ್ನ ಮಗಳ ಸಾವಿಗೆ ಮಮತಾ ಬ್ಯಾನರ್ಜಿ ಮತ್ತು ಅವರ ಭ್ರಷ್ಟ ಪಕ್ಷದ ನಾಯಕರೇ ನೇರ ಹೊಣೆ. ನಾನು ಮಗಳ ನ್ಯಾಯಕ್ಕಾಗಿ ಮತ್ತು ಬಂಗಾಳದ ಮಹಿಳೆಯರ ಸುರಕ್ಷತೆಗಾಗಿ ಈ ಹೋರಾಟ ಆರಂಭಿಸಿದ್ದೆ. ಮತದಾರರು ನನ್ನನ್ನು ತುಂಬು ಹೃದಯದಿಂದ ಸ್ವಾಗತಿಸಿದ್ದಾರೆ. ನಾನು ನನ್ನ ಮಗಳಂತೆ ವೈದ್ಯೆಯಾಗಲು ಸಾಧ್ಯವಿಲ್ಲದಿರಬಹುದು, ಆದರೆ ಜನಪ್ರತಿನಿಧಿಯಾಗಿ ಅವಳ ಸೇವೆಯ ಮಿಷನ್ ಅನ್ನು ಮುಂದುವರಿಸುತ್ತೇನೆ," ಎಂದು ಕಣ್ಣೀರಿಟ್ಟರು.

ನಾಮಪತ್ರ ಸಲ್ಲಿಕೆಗೂ ಮುನ್ನ ರತ್ನಾ ಅವರು ಒಂದು ಕಠಿಣ ಪ್ರತಿಜ್ಞೆ ಮಾಡಿದ್ದರು. "ನನ್ನ ಮಗಳಿಗೆ ಸಂಪೂರ್ಣ ನ್ಯಾಯ ಸಿಗುವವರೆಗೂ ನಾನು ತಲೆ ಬಾಚುವುದಿಲ್ಲ" ಎಂದು ಅವರು ವ್ರತ ತೊಟ್ಟಿದ್ದರು. ಅವರ ಈ ನಿರ್ಧಾರ ಬಂಗಾಳದ ಮಹಿಳೆಯರಲ್ಲಿ ದೊಡ್ಡ ಮಟ್ಟದ ಸಂಚಲನ ಮೂಡಿಸಿತ್ತು. ಮಾಜಿ ಕೇಂದ್ರ ಸಚಿವೆ ಸ್ಮೃತಿ ಇರಾನಿ ಅವರು ರತ್ನಾ ಪರ ಪ್ರಚಾರ ನಡೆಸಿ, ಅವರನ್ನು ಮಹಿಳಾ ಚೈತನ್ಯದ ಸಂಕೇತ ಎಂದು ಬಣ್ಣಿಸಿದ್ದರು. ಟಿಎಂಸಿ ಗುಂಡಾಗಳು ಸಂತ್ರಸ್ತೆಯ ತಾಯಿಯನ್ನು ಅವಮಾನಿಸುತ್ತಿದ್ದಾರೆ ಎಂದು ಇರಾನಿ ವಾಗ್ದಾಳಿ ನಡೆಸಿದ್ದರು.

ಮಹಿಳೆಯರ ಸುರಕ್ಷತೆಯ ವಿಷಯದಲ್ಲಿ ತೀವ್ರ ಟೀಕೆಗೆ ಗುರಿಯಾಗಿದ್ದರೂ ಟಿಎಂಸಿ ಸಂಸದೆ ಡೋಲಾ ಸೇನ್ ಅವರು ಸರ್ಕಾರದ ವೈಫಲ್ಯವನ್ನು ಒಪ್ಪಿಕೊಳ್ಳಲು ನಿರಾಕರಿಸಿದ್ದಾರೆ. "ಆರ್.ಜಿ ಕರ್ ಘಟನೆ ದುರದೃಷ್ಟಕರ ನಿಜ. ಆದರೆ ಮಮತಾ ಬ್ಯಾನರ್ಜಿ ಸರ್ಕಾರ ಇದನ್ನು ನಿರ್ವಹಿಸಿದ ರೀತಿ ಅದ್ಭುತವಾಗಿದೆ. ಯಾವುದೇ ಡಬಲ್ ಇಂಜಿನ್ ಸರ್ಕಾರಗಳು ಇಷ್ಟು ವೇಗವಾಗಿ ಕ್ರಮ ಕೈಗೊಂಡಿಲ್ಲ. ಕೋಲ್ಕತ್ತಾ ಇಂದಿಗೂ ಸುರಕ್ಷಿತ ನಗರ," ಎಂದು ಅವರು ವಾದಿಸಿದ್ದಾರೆ.

ಆಗಸ್ಟ್ 9, 2024 ರಂದು ಆರ್.ಜಿ ಕರ್ ವೈದ್ಯಕೀಯ ಕಾಲೇಜಿನ ಸೆಮಿನಾರ್ ಹಾಲ್‌ನಲ್ಲಿ 31 ವರ್ಷದ ಸ್ನಾತಕೋತ್ತರ ಪ್ರಶಿಕ್ಷಣಾರ್ಥಿ ವೈದ್ಯೆಯ ಶವ ಪತ್ತೆಯಾಗಿತ್ತು. ಭೀಕರ ಅತ್ಯಾಚಾರ ಮತ್ತು ಕೊಲೆ ಪ್ರಕರಣವು ದೇಶಾದ್ಯಂತ ಪ್ರತಿಭಟನೆಗೆ ಕಾರಣವಾಗಿತ್ತು. ಕೋಲ್ಕತ್ತಾ ಪೊಲೀಸರ ತನಿಖೆಯ ಬಗ್ಗೆ ಹೈಕೋರ್ಟ್ ಅತೃಪ್ತಿ ವ್ಯಕ್ತಪಡಿಸಿದ ನಂತರ ಪ್ರಕರಣವನ್ನು ಸಿಬಿಐಗೆ ವರ್ಗಾಯಿಸಲಾಗಿತ್ತು. ಇದೀಗ ಅದೇ ಪ್ರಕರಣದ ಕಿಚ್ಚು ಪಶ್ಚಿಮ ಬಂಗಾಳದ ಚುನಾವಣಾ ಫಲಿತಾಂಶದ ಮೇಲೆ ನೇರ ಪರಿಣಾಮ ಬೀರಿದೆ,(ಏಜೆನ್ಸೀಸ್​).