ಪಾಲಕ್ ಪನೀರ್ ಬೆಲೆ 1.8 ಕೋಟಿ ರೂ.! ತಾರತಮ್ಯ ತೋರಿದ ಅಮೆರಿಕನ್ನರಿಗೆ ತಕ್ಕ ಶಾಸ್ತಿ ಮಾಡಿದ ಇಂಡಿಯನ್ಸ್! Palak Paneer

ವಾಷಿಂಗ್ಟನ್​: ಅಮೆರಿಕದ ಕೊಲೊರಾಡೋ ಬೌಲ್ಡರ್ ವಿಶ್ವವಿದ್ಯಾಲಯದಲ್ಲಿ ವ್ಯಾಸಂಗ ಮಾಡುತ್ತಿರುವ ಇಬ್ಬರು ಭಾರತೀಯ ಪಿಎಚ್‌ಡಿ ವಿದ್ಯಾರ್ಥಿಗಳು ಸಾಂಸ್ಕೃತಿಕ ತಾರತಮ್ಯದ ವಿರುದ್ಧದ ಹೋರಾಟದಲ್ಲಿ ಐತಿಹಾಸಿಕ ಗೆಲವು ಸಾಧಿಸಿದ್ದಾರೆ. ಊಟದ ವಾಸನೆಯ (Palak Paneer) ನೆಪದಲ್ಲಿ ನಡೆದ ಅವಮಾನಕ್ಕೆ ಸಂಬಂಧಿಸಿದಂತೆ ವಿಶ್ವವಿದ್ಯಾಲಯ ವಿದ್ಯಾರ್ಥಿಗಳಿಗೆ ಸುಮಾರು 1.8 ಕೋಟಿ ರೂ. ಪರಿಹಾರ ನೀಡುವುದಾಗಿ ಒಪ್ಪಿಕೊಂಡಿದೆ.

ಸೆಪ್ಟೆಂಬರ್ 2023 ರಲ್ಲಿ, ಕೊಲೊರಾಡೋ ಬೌಲ್ಡರ್ ವಿವಿಯ ಪಿಎಚ್‌ಡಿ ವಿದ್ಯಾರ್ಥಿಗಳಾದ ಆದಿತ್ಯ ಪ್ರಕಾಶ್ ಮತ್ತು ಉರ್ಮಿ ಭಟ್ಟಚೇರಿಯಾ ಅವರು ವಿಶ್ವವಿದ್ಯಾಲಯದ ವಿಭಾಗೀಯ ಮೈಕ್ರೋವೇವ್‌ನಲ್ಲಿ ಮನೆಯಿಂದ ತಂದಿದ್ದ ಪಾಲಕ್​ ಪನೀರ್​ ಆಹಾರವನ್ನು ಬಿಸಿ ಮಾಡುತ್ತಿದ್ದರು. ಈ ವೇಳೆ ಅಲ್ಲಿಗೆ ಬಂದ ಸಿಬ್ಬಂದಿಯೊಬ್ಬರು ಆಹಾರದ ವಾಸನೆ ಅಸಹನೀಯವಾಗಿದೆ. ಆದರಿಂದ ಮೈಕ್ರೋವೇವ್​ ಬಳಸಬೇಡಿ ಎಂದಿದ್ದರಂತೆ. ಈ ವೇಳೆ ವಿದ್ಯಾರ್ಥಿಗಳು ಇದು ಆಹಾರ ಮಾತ್ರ ಈಗ ಬಿಸಿ ಮಾಡಿ ಹೊರಟಿದ್ದೇವೆ ಎಂದು ಹೇಳಿದ್ದಾರೆ.

ಈ ಘಟನೆ ತೀವ್ರಗೊಂಡಂತೆ ಪ್ರಕಾಶ್ (34) ಮತ್ತು ಭಟ್ಟಾಚೇರಿಯಾ (35) ಕೊಲೊರಾಡೋದ ಯುನೈಟೆಡ್ ಸ್ಟೇಟ್ಸ್ ಜಿಲ್ಲಾ ನ್ಯಾಯಾಲಯದಲ್ಲಿ ವಿಶ್ವವಿದ್ಯಾಲಯದ ವಿರುದ್ಧ ಕೇಸು ದಾಖಲಿಸಿದರು. ವಿದ್ಯಾರ್ಥಿಗಳು ದೂರನ್ನು ನೀಡಿದ ನಂತರ ವಿಶ್ವವಿದ್ಯಾಲಯವು ಪ್ರತಿಯಾಗಿ ಪ್ರತೀಕಾರ ತೀರಿಸಿಕೊಂಡಿತು ಎಂದು ಆರೋಪ ಮಾಡಿದ್ದಾರೆ.

ಈ ಘಟನೆಗೆ ಸಂಬಂಧಿಸಿದಂತೆ ಇಲಾಖೆಯ ಅಡುಗೆ ನಿಯಮಗಳು ದಕ್ಷಿಣ ಏಷ್ಯನ್ನರನ್ನು ಪ್ರತ್ಯೇಕವಾಗಿಡುವುದರಿಂದ ಸಾಮಾನ್ಯ ಪ್ರದೇಶಗಳಲ್ಲಿ ತಮ್ಮ ಊಟವನ್ನು ತೆರೆಯುವುದು ಬಹಳ ನಿರುತ್ಸಾಹಗೊಳಿಸಿದೆ ಎಂದು ವಿದ್ಯಾರ್ಥಿಗಳು ವಾದಿಸಿದ್ದಾರೆ.

ಸಿಬ್ಬಂದಿಗೆ "ಅಸುರಕ್ಷಿತ ಭಾವನೆ" ಮೂಡಿಸಿದ ಆರೋಪದ ಹಿನ್ನಲೆ ಹಿರಿಯ ಅಧ್ಯಾಪಕರು ಪದೇ ಪದೇ ಸಭೆಗಳಿಗೆ ಕರೆಯುತ್ತಿದ್ದರು. ಹಾಗೆಯೇ ಯಾವುದೇ ಮಾಹಿತಿ ಇಲ್ಲದೇ, ಭೋಧನಾ ಸಹಾಯಕ ಹುದ್ದೆಯಿಂದ ನನ್ನನ್ನು ವಜಾಗೊಳಿಸಲಾಗಿದೆ. ಆದಾಗ್ಯೂ, ಪಾಲಕ್ ಪನೀರ್ ಘಟನೆಯ ನಂತರ ಎರಡು ದಿನಗಳ ಕಾಲ ಭಾರತೀಯ ಆಹಾರವನ್ನು ಸೇವಿಸಿದ್ದಾರೆ ಇದು ಗಲಭೆಗೆ ಪ್ರಚೋದನೆ ನೀಡಿದೆ ಎಂದು ನಮ್ಮ ಮೇಲೆ ಆರೋಪ ಮಾಡಿದ್ದಾರೆ ಎಂದು ವಿದ್ಯಾರ್ಥಿಗಳು ತಿಳಿಸಿದ್ದಾರೆ.

ಎರಡು ವರ್ಷಗಳ ಕಾಲ ನಡೆದ ಕಾನೂನು ಹೋರಾಟದ ನಂತರ, ವಿಶ್ವವಿದ್ಯಾನಿಲಯವು ಅಂತಿಮವಾಗಿ ಇಬ್ಬರೂ ವಿದ್ಯಾರ್ಥಿಗಳಿಗೂ ಸೆಪ್ಟೆಂಬರ್ 2025 ರಲ್ಲಿ 1.8 ಕೋಟಿ ರೂ. ಪಾವತಿಸಲು ಮತ್ತು ಅವರ ಸ್ನಾತಕೋತ್ತರ ಪದವಿಗಳನ್ನು ನೀಡಲು ಒಪ್ಪಿಕೊಂಡಿತು.

ಆದಾಗ್ಯೂ, ಉರ್ಮಿ ಭಟ್ಟಚೇರಿಯಾ ಅವರು ಈ ಕಾನೂನು ಹೋರಾಟದ ಗೆಲುವಿನ ನಂತರ ತಮ್ಮ ಇನ್‌ಸ್ಟಾಗ್ರಾಮ್ ಪೋಸ್ಟ್‌ನಲ್ಲಿ ನಮ್ಮ ಆಹಾರವು ಕೇವಲ ಊಟವಲ್ಲ, ಅದು ನಮ್ಮ ಅಸ್ಮಿತೆ ಮತ್ತು ಸಂಸ್ಕೃತಿಯ ಭಾಗ. ಅದನ್ನು 'ವಾಸನೆ' ಎಂದು ಕರೆದು ಅವಮಾನಿಸಿದಾಗ ಸುಮ್ಮನಿರಲು ಸಾಧ್ಯವಿರಲಿಲ್ಲ" ಎಂದು ಬರೆದು ಪೋಸ್ಟ್ ಮಾಡಿದ್ದಾರೆ.

ಘಟನೆಯ ಸುದ್ದಿ ವೈರಲ್ ಆಗುತ್ತಿದ್ದಂತೆ, ಸಾಮಾಜಿಕ ಮಾಧ್ಯಮ ಬಳಕೆದಾರರು ವಿದ್ಯಾರ್ಥಿಗಳನ್ನು ಅಭಿನಂದಿಸಿದ್ದಾರೆ. ಹಾಗೂ ತಾರತಮ್ಯದ ವಿರುದ್ಧದ ಹೋರಾಟಕ್ಕಾಗಿ ಅವರನ್ನು ಶ್ಲಾಘಿಸಿದ್ದಾರೆ (ಏಜನ್ಸೀಸ್​).