ಬಂಗಾಳದಲ್ಲಿ ಮುಂದುವರಿದ ಆಪರೇಷನ್ ಕಮಲ: ಟಿಎಂಸಿ ಬಂಡಾಯ ಸಂಸದರಿಗೆ ಸದ್ಯಕ್ಕೆ ಬಿಜೆಪಿಯ ಬಾಗಿಲು ಬಂದ್ ಎಂದ ಕೇಂದ್ರ ಸಚಿವ ಶಂತನು ಠಾಕೂರ್! Shantanu Thakur

ಮತ್ತೊಂದೆಡೆ, ಟಿಎಂಸಿಯ ಹಿರಿಯ ಸಂಸದ ಸೌಗತ ರಾಯ್ ಅವರು, ಇದು ಪ್ರಜಾಪ್ರಭುತ್ವ ವಿರೋಧಿ ಬಿಜೆಪಿಯ ಆಪರೇಷನ್ ಕಮಲ. ನಮ್ಮ ಪಕ್ಷದ ದುರ್ಬಲ ಮತ್ತು ಸಿದ್ಧಾಂತವಿಲ್ಲದ ನಾಯಕರಿಗೆ ಬೆದರಿಕೆ ಹಾಗೂ ಆಮಿಷ ಒಡ್ಡಿ ಬಿಜೆಪಿ ಈ ಕೃತ್ಯ ಎಸಗುತ್ತಿದೆ ಎಂದು ಹರಿಹಾಯ್ದಿದ್ದಾರೆ.

ಶನಿವಾರ ನವದೆಹಲಿಯಲ್ಲಿ ನಡೆದ ಹೈ-ವೋಲ್ಟೇಜ್ ರಾಜಕೀಯ ಬೆಳವಣಿಗೆಯೊಂದು ಇಡೀ ದೇಶದ ಗಮನ ಸೆಳೆದಿದೆ. ಟಿಎಂಸಿಯ ಅತ್ಯಂತ ಹಿರಿಯ ನಾಯಕ ಹಾಗೂ 6 ಬಾರಿಯ ಸಂಸದ ಸುದೀಪ್ ಬಂದ್ಯೋಪಾಧ್ಯಾಯ ಅವರು ಬಂಡಾಯ ಸಂಸದೆ ಶತಾಬ್ದಿ ರಾಯ್ ಅವರೊಂದಿಗೆ ದಿಢೀರನೆ ದೆಹಲಿಯಲ್ಲಿ ಕೇಂದ್ರ ಸಚಿವ, ಬಿಜೆಪಿ ನಾಯಕ ಭೂಪೇಂದರ್ ಯಾದವ್ ಅವರನ್ನು ಭೇಟಿಯಾಗಿ ಸುದೀರ್ಘ ಚರ್ಚೆ ನಡೆಸಿದ್ದಾರೆ.

ಈ ರಹಸ್ಯ ಭೇಟಿಯ ಬೆನ್ನಲ್ಲೇ ಮಮತಾ ಕಂಗೆಟ್ಟಿದ್ದು, ದೆಹಲಿಯಲ್ಲಿ ಸಭೆ ಮುಗಿದ ಕೆಲವೇ ಗಂಟೆಗಳಲ್ಲಿ ಸುದೀಪ್ ಬಂದ್ಯೋಪಾಧ್ಯಾಯ ಅವರನ್ನು ಉತ್ತರ ಕೋಲ್ಕತಾ ಜಿಲ್ಲಾಧ್ಯಕ್ಷ ಸ್ಥಾನದಿಂದ ಕಿತ್ತೆಸೆದಿದ್ದಾರೆ. ಅವರ ಜಾಗಕ್ಕೆ ಪಕ್ಷದ ವಕ್ತಾರ ಕುನಾಲ್ ಘೋಷ್ ಅವರನ್ನು ನೇಮಿಸಲಾಗಿದೆ. ಇಷ್ಟೇ ಅಲ್ಲದೆ, ಯುವ ಕಾಂಗ್ರೆಸ್ ಅಧ್ಯಕ್ಷೆ ಸಾಯೋನಿ ಘೋಷ್ ಅವರನ್ನೂ ಹುದ್ದೆಯಿಂದ ಮುಕ್ತಗೊಳಿಸಿ ಅರ್ನಬ್ ಬ್ಯಾನರ್ಜಿ ಅವರಿಗೆ ಜವಾಬ್ದಾರಿ ನೀಡಲಾಗಿದೆ. ಇತ್ತ ಮಾಜಿ ಸಚಿವ ಮಾನಸ್ ರಂಜನ್ ಭುನಿಯಾ ಪಕ್ಷಕ್ಕೆ ರಿಸೈನ್ ಮಾಡಿರುವುದು ದೀದಿಗೆ ಮತ್ತೊಂದು ದೊಡ್ಡ ಪೆಟ್ಟು ನೀಡಿದೆ.

ಲೋಕಸಭೆಯಲ್ಲಿ ಸದ್ಯ ಟಿಎಂಸಿ ಒಟ್ಟು 28 ಸಂಸದರನ್ನು ಹೊಂದಿದೆ. ಆದರೆ, ಇವರಲ್ಲಿ ಬರೋಬ್ಬರಿ 19 ಸಂಸದರು ಈಗಾಗಲೇ ಮಮತಾ ವಿರುದ್ಧ ಸಿಡಿದೆದ್ದಿದ್ದಾರೆ. ಮೇ 18 ರಂದೇ ಸಿದ್ಧವಾಗಿರುವ ಬಂಡಾಯ ಸಂಸದರ ಸಹಿ ಇರುವ ಪತ್ರದಲ್ಲಿ 20 ಜನರ ಲಿಸ್ಟ್ ಇದ್ದು, 13ನೇ ನಂಬರ್ ಎದುರು ಯಾರ ಸಹಿಯೂ ಇರಲಿಲ್ಲ. ಈಗ ಸುದೀಪ್ ಬಂದ್ಯೋಪಾಧ್ಯಾಯ ಸಹಿ ಹಾಕಿದರೆ ಬಂಡಾಯ ಸಂಸದರ ಸಂಖ್ಯಾಬಲ 20 ಕ್ಕೆ ಏರಲಿದೆ.

ಈ ಬಂಡಾಯ ಸಂಸದರ ಗುಂಪು ಸೋಮವಾರ ಲೋಕಸಭೆಯ ಸ್ಪೀಕರ್ ಓಂ ಬಿರ್ಲಾ ಅವರನ್ನು ಭೇಟಿಯಾಗಲಿದ್ದು, ತಮಗೆ ಸಂಸತ್ತಿನಲ್ಲಿ ಪ್ರತ್ಯೇಕ ಸಂಸದೀಯ ಗುಂಪು ಆಗಿ ಮಾನ್ಯತೆ ನೀಡಬೇಕು ಎಂದು ಮನವಿ ಸಲ್ಲಿಸಲಿದ್ದಾರೆ. ವಿಧಾನಸಭೆ ಮತ್ತು ಲೋಕಸಭೆಯಲ್ಲಿ ತಮಗಿರುವ ಸಂಖ್ಯಾಬಲದ ಆಧಾರದ ಮೇಲೆ ತಾವೇ ಅಸಲಿ ಟಿಎಂಸಿ ಎಂದು ಹಕ್ಕು ಮಂಡಿಸಲು ಈ ರೆಬೆಲ್ ಪಡೆ ಸಜ್ಜಾಗಿದೆ. ಇದಕ್ಕೂ ಮುನ್ನ ಭಾನುವಾರ ಇವರು ಪಶ್ಚಿಮ ಬಂಗಾಳದ ಮುಖ್ಯಮಂತ್ರಿ ಸುವೇಂದು ಅಧಿಕಾರಿ ಅವರನ್ನು ಭೇಟಿಯಾಗಿ ಮಾತುಕತೆ ನಡೆಸಲಿದ್ದಾರೆ.

ಚುನಾವಣೆಯ ಸೋಲಿಗೆ ಪಕ್ಷದ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಅಭಿಷೇಕ್ ಬ್ಯಾನರ್ಜಿ ಅವರ ತಪ್ಪು ನಿರ್ಧಾರಗಳೇ ಕಾರಣವಾಗಿದೆ. ಪಕ್ಷದಲ್ಲಿ ಹಿರಿಯ ನಾಯಕರ ಮತ್ತು ಸಂಸದರ ಸಲಹೆಗಳಿಗೆ ಬೆಲೆಯೇ ಇಲ್ಲದಂತಾಗಿದೆ ಎಂದು ಬಂಡಾಯ ನಾಯಕರು ಬಹಿರಂಗವಾಗಿಯೇ ಅಸಮಾಧಾನ ಹೊರಹಾಕಿದ್ದಾರೆ. ಇತ್ತೀಚೆಗೆ ಅಭಿಷೇಕ್ ಬ್ಯಾನರ್ಜಿ ನಿವಾಸದ ಮೇಲೆ ನಡೆದ ಪೊಲೀಸ್ ತನಿಖೆಯ ಬಗ್ಗೆ ಪ್ರತಿಕ್ರಿಯಿಸಿದ ಕೇಂದ್ರ ಸಚಿವ ಶಂತನು ಠಾಕೂರ್, ಯಾರೆಲ್ಲಾ ತಪ್ಪು ಮತ್ತು ನೆಗೆಟಿವ್ ಕೆಲಸಗಳನ್ನು ಮಾಡಿದ್ದಾರೋ, ಅವರ ವಿರುದ್ಧ ಜಾರಿ ನಿರ್ದೇಶನಾಲಯ ಕಾನೂನು ಪ್ರಕಾರ ಕಠಿಣ ಕ್ರಮ ಕೈಗೊಳ್ಳಲಿದೆ ಎಂದು ಎಚ್ಚರಿಸಿದ್ದಾರೆ.

ಒಟ್ಟಾರೆಯಾಗಿ, ಮೂರು ದಶಕಗಳ ಇತಿಹಾಸವಿರುವ ತೃಣಮೂಲ ಕಾಂಗ್ರೆಸ್ ಬಂಗಾಳದ ನೆಲದಲ್ಲಿ ಅಸ್ತಿತ್ವ ಕಳೆದುಕೊಳ್ಳುವ ಭೀತಿಯಲ್ಲಿದೆ. ಒಂದೆಡೆ ಶಾಸಕರ ದಂಗೆ, ಇನ್ನೊಂದೆಡೆ ಸಂಸದರ ಸಾಮೂಹಿಕ ಬಂಡಾಯದಿಂದಾಗಿ ಮಮತಾ ಅವರ ರಾಜಕೀಯ ಭವಿಷ್ಯ ಸದ್ಯಕ್ಕೆ ತೀವ್ರ ಕತ್ತಲಿಗೆ ತಳ್ಳಲ್ಪಟ್ಟಿದೆ,(ಏಜೆನ್ಸೀಸ್).