ಮುದುಕರು ಆಶ್ರಮ ಸೇರಿಕೊಳ್ಳಿ: ಅಣ್ಣಾ ಹಜಾರೆಗೆ ಅಭಿಜಿತ್​ ದೀಪ್ಕೆ ಅವಮಾನ; ಸಂಸ್ಕಾರದ ಕೊರತೆ ಎಂದ ಮಾಳವೀಯ! Abhijit Dipke on Anna Hazare

ನವದೆಹಲಿ: ಹಿರಿಯ ಸಾಮಾಜಿಕ ಹೋರಾಟಗಾರ ಅಣ್ಣಾ ಹಜಾರೆ ಬಗ್ಗೆ ಕಾಕ್ರೋಚ್ ಜನತಾ ಪಾರ್ಟಿ (CJP) ಸ್ಥಾಪಕ ಅಭಿಜಿತ್ ದೀಪ್ಕೆ (Abhijit Dipke on Anna Hazare) ನೀಡಿರುವ ವಿವಾದಾತ್ಮಕ ಹೇಳಿಕೆಯೊಂದು ಈಗ ರಾಜಕೀಯ ವಲಯದಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.

ಅಣ್ಣಾ ಹಜಾರೆಯಂತಹ ಹಿರಿಯರನ್ನು 'ಮುದುಕ' ಎಂದು ಹೀಯಾಳಿಸಿರುವ ದೀಪ್ಕೆ, ರಾಜಕೀಯ ಹಾಗೂ ಸಮಾಜಮುಖಿ ಚಟುವಟಿಕೆಗಳಿಂದ ನಿವೃತ್ತಿ ಪಡೆದು ಆಶ್ರಮದಲ್ಲಿ ವಿಶ್ರಾಂತಿ ಪಡೆಯಬೇಕು ಎಂದು ವಿವಾದಾತ್ಮಕ ಸಲಹೆ ನೀಡಿದ್ದಾರೆ.

ಈ ಮಾತುಗಳು ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದ್ದಂತೆ ಬಿಜೆಪಿ ನಾಯಕ ಅಮಿತ್ ಮಾಳವೀಯ ಸೇರಿದಂತೆ ಹಲವರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ: ಜೆನ್​- ಜೀ ಗಳನ್ನು ನೋಡಿ ಕಲಿತುಕೊಳ್ಳಿ..! ಜೈಸ್ವಾಲ್​ ಜೊತೆ ಮೃಣಾಲ್​ ಡೇಟಿಂಗ್​ ವದಂತಿ; ಬಾಲಿವುಡ್​ ನಟಿ ಹೇಳಿದ್ದೇನು? Mrunal Thakur on Dating

ಮಾಧ್ಯಮಗಳೊಂದಿಗೆ ಮಾತನಾಡುತ್ತ ಅಭಿಜಿತ್ ದೀಪ್ಕೆ, ದೇಶದ ಯುವಕರು ಈಗ ಜವಾಬ್ದಾರಿ ವಹಿಸಿಕೊಳ್ಳಬೇಕು. 60 ಅಥವಾ 70 ವರ್ಷ ದಾಟಿದವರು ಇಂತಹ ಕ್ಷೇತ್ರಗಳಿಂದ ಸಂಪೂರ್ಣವಾಗಿ ನಿವೃತ್ತರಾಗಬೇಕು. ಅವರು ವೃದ್ಧಾಶ್ರಮ ಅಥವಾ ಆಶ್ರಮ ಸೇರುವುದು ಉತ್ತಮ.

ದೀಪ್ಕೆಯ ಈ ಹೇಳಿಕೆಯನ್ನು ಬಿಜೆಪಿಯ ಐಟಿ ಸೆಲ್ ಮುಖ್ಯಸ್ಥ ಅಮಿತ್ ಮಾಳವೀಯ ತೀವ್ರವಾಗಿ ಖಂಡಿಸಿದ್ದಾರೆ. ಅಭಿಜಿತ್ ದೀಪ್ಕೆಯ ವಿಡಿಯೋವನ್ನು ಹಂಚಿಕೊಂಡಿರುವ ಅವರು, ನಾವು ಅಣ್ಣಾ ಹಜಾರೆಯಂತಹ ಹಿರಿಯರಿಂದ ಯಾವುದೇ ಸ್ಫೂರ್ತಿ ಪಡೆಯುವ ಅಗತ್ಯವಿಲ್ಲ ಎಂಬ ರೀತಿಯಲ್ಲಿ ಮಾತನಾಡುವುದು ಕೇವಲ ಅಸಭ್ಯತೆಯಲ್ಲ, ಬದಲಾಗಿ ಅವರಲ್ಲಿರುವ ಸಂಸ್ಕೃತಿಯ ಕೊರತೆಯನ್ನು ತೋರಿಸುತ್ತದೆ ಎಂದು ಕಿಡಿಕಾರಿದ್ದಾರೆ.

ಮುಂದುವರಿದು ಮಾತನಾಡಿದ ಮಾಳವೀಯ, ತಮಗಿಂತ ಹಿರಿಯರಾದ, ತಂದೆ ಸಮಾನರಾದ ವ್ಯಕ್ತಿಗಳ ಬಗ್ಗೆ ಇಂತಹ ಕೀಳುಮಟ್ಟದ ಭಾಷೆಯನ್ನು ಬಳಸುವವರು ಮೊದಲು ತಮ್ಮ ಸ್ವಂತ ತಂದೆಯ ವಯಸ್ಸನ್ನು ನೆನಪಿಸಿಕೊಳ್ಳಲಿ. ಇಂತಹ ಭಾಷೆ ಅವರ ಸ್ವಂತ ತಂದೆಗೂ ಅನ್ವಯವಾದರೆ ಅವರಿಗೆ ಒಪ್ಪಿಗೆಯಾಗುತ್ತದೆಯೇ?

ರಾಜಕೀಯದಲ್ಲಿ ಭಿನ್ನಾಭಿಪ್ರಾಯಗಳು ಇರಬಹುದು, ಆದರೆ ಸಭ್ಯತೆ ಮತ್ತು ಮರ್ಯಾದೆಗೆ ಒಂದು ಎಲ್ಲೆ ಇರುತ್ತದೆ. ಯಾವಾಗ ಭಾಷೆಯ ಮಟ್ಟ ಕುಸಿಯುತ್ತದೋ, ಆಗ ತರ್ಕವೂ ಸೋತುಹೋಗುತ್ತದೆ ಎಂದು ತರಾಟೆಗೆ ತೆಗೆದುಕೊಂಡಿದ್ದಾರೆ.

ವಿಶೇಷವೆಂದರೆ, ಕೆಲವೇ ದಿನಗಳ ಹಿಂದೆ ಅಭಿಜಿತ್ ದಿಪ್ಕೆ ನೇತೃತ್ವದಲ್ಲಿ ನಡೆದ ಜಂತರ್​-ಮಂತರ್​ ಪ್ರತಿಭಟನೆಗೆ ಸ್ವತಃ ಅಣ್ಣಾ ಹಜಾರೆ ಸಾಥ್ ನೀಡಿದ್ದರು. ಕಳೆದ ತಿಂಗಳು ವಿದ್ಯಾರ್ಥಿಗಳ ಪರವಾಗಿ ಅಹಲ್ಯಾನಗರದಲ್ಲಿ ಮಹಾತ್ಮ ಗಾಂಧಿ ಪ್ರತಿಮೆಯ ಬಳಿ ಅಣ್ಣಾ ಹಜಾರೆ ಎರಡು ಗಂಟೆಗಳ ಕಾಲ ಮೌನ ಪ್ರತಿಭಟನೆ ನಡೆಸಿ ಬೆಂಬಲ ಸೂಚಿಸಿದ್ದರು.

ಅಷ್ಟೇ ಅಲ್ಲದೆ, ವಿದ್ಯಾರ್ಥಿ ಪ್ರತಿಭಟನೆ ವೇಳೆ ನಡೆದ ಹಿಂಸಾಚಾರ ಮತ್ತು ಪೊಲೀಸ್ ಕ್ರಮದ ಬಗ್ಗೆ ಕಳವಳ ವ್ಯಕ್ತಪಡಿಸಿ ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಪತ್ರವನ್ನೂ ಬರೆದಿದ್ದರು. ತಮ್ಮ ಹೋರಾಟಕ್ಕೆ ಬೆಂಬಲಕ್ಕೆ ನಿಂತ ಹಿರಿಯ ಚೇತನಕ್ಕೇ ದೀಪ್ಕೆ ಈ ರೀತಿಯಲ್ಲಿ ಅವಮಾನ ಮಾಡಿರುವುದು ಈಗ ಸಾರ್ವಜನಿಕ ವಲಯದಲ್ಲಿ ತೀವ್ರ ಟೀಕೆಗೆ ಗುರಿಯಾಗಿದೆ, (ಏಜನ್ಸೀಸ್​).