ದೇಶ

ದಳಪತಿ ಪಟ್ಟಾಭಿಷೇಕಕ್ಕೆ ಅಡ್ಡಿ? ಇದು ಪ್ರಜಾಪ್ರಭುತ್ವದ ಹತ್ಯೆ! ವಿಜಯ್ ಪರವಾಗಿ ಧ್ವನಿ ಎತ್ತಿದ ಕಮಲ್! ಗವರ್ನರ್ ವಿರುದ್ಧ ಗುಡುಗಿದ ಉಳಗನಾಯಗನ್! Kamal Haasan

ದಳಪತಿ ಪಟ್ಟಾಭಿಷೇಕಕ್ಕೆ ಅಡ್ಡಿ? ಇದು ಪ್ರಜಾಪ್ರಭುತ್ವದ ಹತ್ಯೆ! ವಿಜಯ್ ಪರವಾಗಿ ಧ್ವನಿ ಎತ್ತಿದ ಕಮಲ್! ಗವರ್ನರ್ ವಿರುದ್ಧ ಗುಡುಗಿದ ಉಳಗನಾಯಗನ್!
ದಳಪತಿ ಪಟ್ಟಾಭಿಷೇಕಕ್ಕೆ ಅಡ್ಡಿ? ಇದು ಪ್ರಜಾಪ್ರಭುತ್ವದ ಹತ್ಯೆ! ವಿಜಯ್ ಪರವಾಗಿ ಧ್ವನಿ ಎತ್ತಿದ ಕಮಲ್! ಗವರ್ನರ್ ವಿರುದ್ಧ ಗುಡುಗಿದ ಉಳಗನಾಯಗನ್!
Published on: 

ಪ್ರಮುಖ ಮುಖ್ಯಾಂಶಗಳು

  • ವಿಜಯ್ ಸರ್ಕಾರ ರಚನೆಗೆ ಆಹ್ವಾನ ನೀಡದಿದ್ದರೆ ಅದು ಜನಾದೇಶಕ್ಕೆ ದ್ರೋಹ ಎಂದ ಕಮಲ್ ಹಾಸನ್
  • ಬಹುಮತ ಸಾಬೀತಿಗೆ ಎಸ್.ಆರ್. ಬೊಮ್ಮಾಯಿ ಕೇಸ್‌ನ ಸುಪ್ರೀಂ ಕೋರ್ಟ್ ತೀರ್ಪು ನೆನಪಿಸಿದ ಉಳಗನಾಯಗನ್.
  • ಎಂ.ಕೆ. ಸ್ಟಾಲಿನ್ ಅವರ ಜವಾಬ್ದಾರಿಯುತ ವಿರೋಧ ಪಕ್ಷದ ನಿಲುವಿಗೆ ಕಮಲ್ ಮೆಚ್ಚುಗೆ.
  • ಚುನಾಯಿತ ಸದಸ್ಯರ ಪ್ರಮಾಣವಚನ ವಿಳಂಬವು ಪ್ರಜಾಪ್ರಭುತ್ವದ ಹತ್ಯೆ ಎಂದು ವಾಗ್ದಾಳಿ.
ಚೆನ್ನೈ: ತಮಿಳುನಾಡು ವಿಧಾನಸಭಾ ಚುನಾವಣಾ ಫಲಿತಾಂಶ ಪ್ರಕಟವಾಗಿ ಹಲವು ದಿನಗಳಾದರೂ ಸರ್ಕಾರ ರಚನೆಯ ಪ್ರಕ್ರಿಯೆ ಕುಂಠಿತವಾಗಿರುವುದು ಈಗ ತೀವ್ರ ಸಂಚಲನಕ್ಕೆ ಕಾರಣವಾಗಿದೆ. ನಟ ವಿಜಯ್ ನೇತೃತ್ವದ ತಮಿಳಗ ವೆಟ್ರಿ ಕಳಗಂ 108 ಸ್ಥಾನಗಳನ್ನು ಗೆದ್ದು ಅತಿ ದೊಡ್ಡ ಪಕ್ಷವಾಗಿ ಹೊರಹೊಮ್ಮಿದ್ದರೂ, ಸರ್ಕಾರ ರಚನೆಗೆ ಆಹ್ವಾನ ನೀಡದಿರುವುದರ ವಿರುದ್ಧ ಉಳಗನಾಯಗನ್ ಕಮಲ್ ಹಾಸನ್(Kamal Haasan) ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಸಂವಿಧಾನಿಕ ಕರ್ತವ್ಯ ಮರೆತಿದ್ದೀರಾ? ಕಮಲ್ ಹಾಸನ್ ನೇರ ಪ್ರಶ್ನೆ

ಈ ಬಗ್ಗೆ Xನಲ್ಲಿ ಪೋಸ್ಟ್​ ಮಾಡಿರುವ ಕಮಲ್ ಹಾಸನ್, ತಮಿಳುನಾಡಿನ ಪ್ರಸ್ತುತ ರಾಜಕೀಯ ಸ್ಥಿತಿಯನ್ನು ಪ್ರಜಾಪ್ರಭುತ್ವಕ್ಕೆ ಉಂಟಾದ ಹಾನಿ ಎಂದು ಬಣ್ಣಿಸಿದ್ದಾರೆ. ಯಾವುದೇ ಒಂದು ಪಕ್ಷಕ್ಕೆ ಪೂರ್ಣ ಬಹುಮತ ಸಿಗದೇ ಇರುವುದು ತಮಿಳುನಾಡು ಇತಿಹಾಸದಲ್ಲೇ ಅಭೂತಪೂರ್ವವಾಗಿದೆ. ಇಂತಹ ಸಮಯದಲ್ಲಿ ಸಾಂವಿಧಾನಿಕ ಹುದ್ದೆಯಲ್ಲಿರುವವರು ತಮ್ಮ ಜವಾಬ್ದಾರಿಯನ್ನು ನಿಷ್ಠೆಯಿಂದ ನಿಭಾಯಿಸಬೇಕು. ಇದು ನನ್ನ ಬೇಡಿಕೆಯಲ್ಲ, ಬದಲಿಗೆ ಅವರಿಗೆ ಅವರ ಸಾಂವಿಧಾನಿಕ ಕರ್ತವ್ಯದ ನೆನಪು ಮಾಡಿಕೊಡುತ್ತಿದ್ದೇನೆ ಎಂದು ರಾಜಭವನದ ವಿಳಂಬ ನೀತಿಯನ್ನು ಕಟುವಾಗಿ ಟೀಕಿಸಿದ್ದಾರೆ.

ಸ್ಟಾಲಿನ್ ರಾಜಕೀಯ ಪ್ರಬುದ್ಧತೆಗೆ ಶ್ಲಾಘನೆ

ತಮ್ಮ ಹೇಳಿಕೆಯಲ್ಲಿ ಎಂ.ಕೆ. ಸ್ಟಾಲಿನ್ ಅವರನ್ನು ಸಹೋದರ ಎಂದು ಸಂಬೋಧಿಸಿರುವ ಕಮಲ್, ನಾವು ಜನರ ತೀರ್ಪನ್ನು ಗೌರವಿಸುತ್ತೇವೆ ಮತ್ತು ಜವಾಬ್ದಾರಿಯುತ ವಿರೋಧ ಪಕ್ಷವಾಗಿ ಕಾರ್ಯನಿರ್ವಹಿಸುತ್ತೇವೆ ಎಂಬ ಸ್ಟಾಲಿನ್ ಅವರ ಹೇಳಿಕೆಯನ್ನು ಶ್ಲಾಘಿಸಿದ್ದಾರೆ. ಸ್ಟಾಲಿನ್ ಅವರ ಈ ನಿಲುವು ಅವರ ರಾಜಕೀಯ ಪ್ರಬುದ್ಧತೆಯನ್ನು ತೋರಿಸುತ್ತದೆ ಎಂದು ಕಮಲ್ ಅಭಿಪ್ರಾಯಪಟ್ಟಿದ್ದಾರೆ.

ದಳಪತಿ ವಿಜಯ್‌ಗೆ ಆಹ್ವಾನ ನೀಡದಿರುವುದು ಜನಾದೇಶಕ್ಕೆ ಅವಮಾನ!

108 ಸ್ಥಾನಗಳನ್ನು ಗೆದ್ದಿರುವ ವಿಜಯ್ ಅವರನ್ನು ಸರ್ಕಾರ ರಚಿಸಲು ಆಹ್ವಾನಿಸದಿರುವುದು ತಮಿಳುನಾಡಿನ ಕೋಟ್ಯಂತರ ಮತದಾರರಿಗೆ ಮಾಡುವ ಅವಮಾನ ಎಂದು ಕಮಲ್ ಹೇಳಿದ್ದಾರೆ. 233 ಚುನಾಯಿತ ಪ್ರತಿನಿಧಿಗಳು ಇನ್ನೂ ಪ್ರಮಾಣವಚನ ಸ್ವೀಕರಿಸಲು ಸಾಧ್ಯವಾಗುತ್ತಿಲ್ಲ ಎಂದರೆ ಇದು ರಾಜ್ಯಕ್ಕೆ ಆದ ಅಪಮಾನವಾಗಿದೆ. ಎಸ್.ಆರ್. ಬೊಮ್ಮಾಯಿ ಪ್ರಕರಣದಲ್ಲಿ ಸುಪ್ರೀಂ ಕೋರ್ಟ್ ಸ್ಪಷ್ಟವಾಗಿ ಹೇಳಿದೆ. ಬಹುಮತವು ವಿಧಾನಸಭೆಯಲ್ಲಿ ಸಾಬೀತಾಗಬೇಕೇ ಹೊರತು ರಾಜಭವನದಲ್ಲಲ್ಲ. ಇದನ್ನು ಪಾಲಿಸುವುದು ಸರ್ಕಾರದ ಜವಾಬ್ದಾರಿ ಎಂದು ಕಮಲ್​ ಗುಡುಗಿದ್ದಾರೆ.

ಪಕ್ಷಾತೀತವಾಗಿ ಧ್ವನಿ ಎತ್ತಿದ ಕಮಲ್

ನಾನು ಈಗ ಮಾತನಾಡುತ್ತಿರುವುದು ಕೇವಲ ಪಕ್ಷದ ಪರವಾಗಿ ಅಲ್ಲ, ಒಬ್ಬ ಭಾರತೀಯ ಪ್ರಜೆಯಾಗಿ ಮತ್ತು ತಮಿಳುನಾಡಿನ ಮಣ್ಣಿನ ಮಗನಾಗಿ ಮಾತನಾಡುತ್ತಿದ್ದೇನೆ. ಜನರ ತೀರ್ಪನ್ನು ಯಾರೂ ಹತ್ತಿಕ್ಕಬಾರದು ಎಂದು ಕಮಲ್ ಹಾಸನ್ ಸ್ಪಷ್ಟಪಡಿಸಿದ್ದಾರೆ. ವಿಜಯ್ ಮತ್ತು ಸ್ಟಾಲಿನ್ ನಡುವಿನ ರಾಜಕೀಯ ಸಮೀಕರಣಗಳ ನಡುವೆ ಕಮಲ್ ಹಾಸನ್ ಅವರು ದಳಪತಿ ವಿಜಯ್ ಪರವಾಗಿ ನಿಂತಿರುವುದು ತಮಿಳುನಾಡು ರಾಜಕಾರಣದಲ್ಲಿ ಹೊಸ ಸಂಚಲನ ಮೂಡಿಸಿದೆ.

ರಾಜ್ಯಪಾಲರ ನಡೆಗೆ ಪ್ರಕಾಶ್​ ರೈ- ವಿಶಾಲ್​ ಕಿಡಿ

ಈ ಕುರಿತು ಎಕ್ಸ್​ನಲ್ಲಿ (ಹಿಂದಿನ ಟ್ವಿಟರ್​) ಪೋಸ್ಟ್ ಹಂಚಿಕೊಂಡು ಪ್ರತಿಕ್ರಿಯಿಸಿರುವ ಪ್ರಕಾಶ್ ರಾಜ್​, "ತಮಿಳುನಾಡು ರಾಜ್ಯಪಾಲರ ನಡವಳಿಕೆ ಸ್ವೀಕಾರಾರ್ಹವಲ್ಲ. ಅವರ ನಿಲುವು ಸಂವಿಧಾನಬಾಹಿರ. ನಮ್ಮಲ್ಲಿ ಭಿನ್ನಾಭಿಪ್ರಾಯಗಳಿರಬಹುದು. ಆದರೆ, ವಿಜಯ್ ಅವರಿಗೆ ಜನರ ಬೆಂಬಲ ಸಿಕ್ಕಿದೆ. ಹೀಗಾಗಿ, ಸದನದಲ್ಲಿ ತಮ್ಮ ಬಲವನ್ನು ಸಾಬೀತುಪಡಿಸಲು ಅವರಿಗೆ ಅವಕಾಶ ನೀಡುವುದು ಸೂಕ್ತ" ಎಂದಿದ್ದಾರೆ.
ಇನ್ನು ನಟ ವಿಶಾಲ್ ಮಾತನಾಡಿ, "2017/18ರಲ್ಲಿ ಗೋವಾ, ಮಣಿಪುರ, ಮೇಘಾಲಯ ಮತ್ತು ಮುಖ್ಯವಾಗಿ ಕರ್ನಾಟಕದಲ್ಲಿ ಸಂಭವಿಸಿದ ಪರಿಸ್ಥಿತಿ ಇಲ್ಲಿಯೂ ನಡೆಯುತ್ತಿದೆ. ಅಲ್ಲಿ ಸರ್ಕಾರ ರಚನೆಯಾದ ನಂತರ, ಅವರನ್ನು ಫ್ಲೋರ್​ ಟೆಸ್ಟ್​ ಮೂಲಕ ವಿಧಾನಸಭೆಯಲ್ಲಿ ತಮ್ಮ ಬಹುಮತವನ್ನು ಸಾಬೀತುಪಡಿಸಲು ಕೇಳಲಾಯಿತು. ಅದೇ ರೀತಿಯಲ್ಲಿ ದಳಪತಿ ವಿಜಯ್ ಅವರಿಗೂ ಸರ್ಕಾರ ರಚಿಸಲು ಅವಕಾಶ ನೀಡಲು ತಮಿಳುನಾಡು ರಾಜ್ಯಪಾಲರು ಏಕೆ ಹಿಂಜರಿಯುತ್ತಿದ್ದಾರೆ? ಜನರ ತೀರ್ಪಿಗೆ ಕೊಡುವ ಗೌರವ ಇದೇನಾ?" ಎಂದರು. 

ಬಿಕ್ಕಟ್ಟಿನ ಕೇಂದ್ರಬಿಂದು: ಬಹುಮತದ ಕೊರತೆ

ತಮಿಳುನಾಡಿನ 234 ಕ್ಷೇತ್ರಗಳ ಪೈಕಿ 118 ಮ್ಯಾಜಿಕ್ ನಂಬರ್ ಆಗಿದೆ. ವಿಜಯ್ ಅವರ TVK 108 ಸ್ಥಾನಗಳಲ್ಲಿದ್ದು, ಕಾಂಗ್ರೆಸ್‌ನ 5 ಸ್ಥಾನಗಳ ಬೆಂಬಲದೊಂದಿಗೆ 113ಕ್ಕೆ ತಲುಪಿದೆ. ಇನ್ನು ಕೇವಲ 5 ಸ್ಥಾನಗಳ ಕೊರತೆಯಿದ್ದರೂ ಅತಿ ದೊಡ್ಡ ಪಕ್ಷವಾಗಿ ವಿಜಯ್ ಅವರನ್ನು ಆಹ್ವಾನಿಸಲು ರಾಜ್ಯಪಾಲರು ವಿಳಂಬ ಮಾಡುತ್ತಿರುವುದು ಈಗ ದೊಡ್ಡ ವಿವಾದವಾಗಿ ಮಾರ್ಪಟ್ಟಿದೆ. ಕಮಲ್ ಹಾಸನ್ ಅವರ ಈ ಹಸ್ತಕ್ಷೇಪವು ರಾಜಭವನದ ಮೇಲೆ ಒತ್ತಡ ಹೇರುವ ಸಾಧ್ಯತೆಯಿದೆ,(ಏಜೆನ್ಸೀಸ್).
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net