OBC ಕಾಲಂ ಎಲ್ಲಿದೆ? ಕೇಂದ್ರದ ವಿರುದ್ಧ ದೆಹಲಿಯಲ್ಲಿ ಬೃಹತ್ ಪ್ರತಿಭಟನೆಗೆ ಕರೆ! | Where is the OBC column?

ಠಾಣೆ: 2026ರ ಜನಗಣತಿಗೆ ಸಂಬಂಧಿಸಿದಂತೆ ಕೇಂದ್ರ ಸರ್ಕಾರ ಹೊರಡಿಸಿರುವ ಗಜೆಟ್‌ನಲ್ಲಿ ಇತರೆ ಹಿಂದುಳಿದ ಸಮುದಾಯಗಳ(OBC) ಪ್ರತ್ಯೇಕ ವರ್ಗವನ್ನು ಸ್ಪಷ್ಟವಾಗಿ ಉಲ್ಲೇಖಿಸಿಲ್ಲ ಎಂಬ ಆರೋಪ ಕೇಳಿಬಂದಿದೆ. ಸಧ್ಯ ಈ ವಿಚಾರಕ್ಕೆ ನ್ಯಾಷನಲ್ ಒಬಿಸಿ ಫೆಡರೇಷನ್ ಕೇಂದ್ರ ಸರ್ಕಾರದ ವಿರುದ್ಧ ತೀವ್ರ ಅಸಮಾಧಾನ ಹೊರಹಾಕಿದೆ.

ನ್ಯಾಷನಲ್ ಒಬಿಸಿ ಫೆಡರೇಷನ್‌ನ ಕೊಂಕಣ ವಿಭಾಗದ ಅಧ್ಯಕ್ಷ ಏಕನಾಥ್ ತಾರಮಾಳೆ, ಇತರೆ ಹಿಂದುಳಿದ ಸಮುದಾಯದ ಜಾತಿವಾರು ಜನಗಣತಿಗೆ ಸ್ಪಷ್ಟ ವ್ಯವಸ್ಥೆ ಕಲ್ಪಿಸಬೇಕು ಎಂದು ಆಗ್ರಹಿಸಿದ್ದಾರೆ. ಕೇಂದ್ರ ಸರ್ಕಾರ 2025ರ ಏಪ್ರಿಲ್ 30ರಂದು ಜಾತಿ ಗಣತಿ ನಡೆಸುವ ನಿರ್ಧಾರ ಪ್ರಕಟಿಸಿತ್ತು, ಹೀಗಾಗಿ ಒಬಿಸಿ ಸಮುದಾಯದಲ್ಲಿ ನಿರೀಕ್ಷೆ ಹೆಚ್ಚಾಗಿದ್ದವು. ಆದರೆ ಆಗಸ್ಟ್ 14, 2026ರಂದು ಜನಗಣತಿ ಅಧಿಸೂಚನೆಯಲ್ಲಿ 40 ಪ್ರಶ್ನೆಗಳನ್ನು ನೀಡಲಾಗಿದ್ದು, 10ನೇ ಅಂಶದಲ್ಲಿ ಪರಿಶಿಷ್ಟ ಜಾತಿ (SC), ಪರಿಶಿಷ್ಟ ಪಂಗಡ (ST) ಮತ್ತು ಜಾತಿ ಎಂದು ಉಲ್ಲೇಖಿಸಲಾಗಿದೆ.

1931ರ ಬಳಿಕ ಇತರೆ ಹಿಂದುಳಿದ ಸಮುದಾಯದ ಸಮಗ್ರ ಜಾತಿವಾರು ಜನಗಣತಿ ನಡೆದಿಲ್ಲ. 2011ರಲ್ಲಿ ಸಾಮಾಜಿಕ-ಆರ್ಥಿಕ ಮತ್ತು ಜಾತಿ ಗಣತಿ (SECC) ನಡೆದಿದ್ದರೂ, ಸಂಪೂರ್ಣ ಜಾತಿವಾರು ಮಾಹಿತಿಯನ್ನು ಸಾರ್ವಜನಿಕವಾಗಿ ಪ್ರಕಟಿಸಿಲ್ಲ ಎಂಬುದು ಒಬಿಸಿ ಸಂಘಟನೆಗಳ ಆರೋಪ. ಇದರಿಂದ ಒಬಿಸಿ ಜನಸಂಖ್ಯೆ, ಶಿಕ್ಷಣ, ಉದ್ಯೋಗ, ಆರ್ಥಿಕ ಪರಿಸ್ಥಿತಿ ಹಾಗೂ ಸರ್ಕಾರಿ ಸಂಸ್ಥೆಗಳಲ್ಲಿನ ಪ್ರಾತಿನಿಧ್ಯದ ಬಗ್ಗೆ ನಿಖರ ಮಾಹಿತಿ ಸಿಕ್ಕಿಲ್ಲ ಎಂದು ತಾರಮಾಳೆ ಹೇಳಿದ್ದಾರೆ.

ಗಜೆಟ್ ಅಧಿಸೂಚನೆಯಲ್ಲಿ ತಿದ್ದುಪಡಿ ಮಾಡಲು ಇನ್ನೂ ಟೈಮ್​ ಇದೆ. ಒಬಿಸಿ ಸಮುದಾಯವನ್ನು ಸ್ಪಷ್ಟವಾಗಿ ಗುರುತಿಸಿ, ಪ್ರತ್ಯೇಕವಾಗಿ ದಾಖಲಿಸುವ ವ್ಯವಸ್ಥೆ ಮಾಡಬೇಕು ಎಂದು ತಾರಮಾಳೆ ಕೇಂದ್ರ ಸರ್ಕಾರಕ್ಕೆ ಒತ್ತಾಯಿಸಿದ್ದಾರೆ. ಬೇಡಿಕೆ ಈಡೇರದಿದ್ದರೆ ಸಂಸತ್‌ನ ಮುಂಬರುವ ಚಳಿಗಾಲದ ಅಧಿವೇಶನದ ವೇಳೆ ದೆಹಲಿಯ ರಾಮಲೀಲಾ ಮೈದಾನದಲ್ಲಿ ಬೃಹತ್ ಹೋರಾಟ ನಡೆಸುವುದಾಗಿ ಕೇಂದ್ರಕ್ಕೆ ಡೆಡ್‌ಲೈನ್ ನೀಡಿದ್ದಾರೆ. ಈ ವಿವಾದದ ಬೆನ್ನಲ್ಲೇ ಒಬಿಸಿ ಮೀಸಲಾತಿ ಕುರಿತ ಚರ್ಚೆ ಮತ್ತೊಮ್ಮೆ ಮುನ್ನೆಲೆಗೆ ಬಂದಿದೆ,(ಏಜೆನ್ಸೀಸ್​).