ಸ್ಪೀಡೋಮೀಟರ್ ಪಕ್ಕದಲ್ಲೇ ಎರಡು ಗ್ಲಾಸ್‌ಗಳ ಮೇಲೆ ನೀರಿನಿಂದ ತುಂಬಿದ ಮತ್ತೊಂದು ಲೋಟವನ್ನು ಬ್ಯಾಲೆನ್ಸ್ ಮಾಡಿ ಇಡಲಾಗಿತ್ತು. ಗಾಳಿಯ ವೇಗದಲ್ಲಿ ರೈಲು ಹಳಿಗಳ ಮೇಲೆ ಚಿಮ್ಮುತ್ತಿದ್ದರೂ, ಆ ಗ್ಲಾಸ್‌ನಿಂದ ಒಂದೇ ಒಂದು ಹನಿ ನೀರೂ ಕೆಳಗೆ ಚೆಲ್ಲಲಿಲ್ಲ.
ಇಷ್ಟೊಂದು ಅಪಾಯಕರ ವೇಗದಲ್ಲೂ ರೈಲು ಎಷ್ಟೊಂದು ಸ್ಥಿರವಾಗಿ ಮತ್ತು ಆರಾಮದಾಯಕವಾಗಿ ಚಲಿಸುತ್ತದೆ ಎಂಬುದಕ್ಕೆ ಈ ದೃಶ್ಯವೇ ಸಾಕ್ಷಿಯಾಗಿದೆ. ರಾಯ್‌ಬರೇಲಿಯ ರೈಲ್ ಕೋಚ್ ಫ್ಯಾಕ್ಟರಿಯಲ್ಲಿ ಸಿದ್ಧಗೊಂಡಿರುವ ಈ ಹೊಸ ರೇಕ್‌ನ ಪರೀಕ್ಷಾರ್ಥ ಸಂಚಾರ ಇದಾಗಿದ್ದು, ಸದ್ಯ ಇಂಟರ್ನೆಟ್‌ನಲ್ಲಿ ಈ ವಿಡಿಯೋ ಭಾರಿ ಮೆಚ್ಚುಗೆ ಗಳಿಸುತ್ತಿದೆ.
ಏನಿದರ ವಿಶೇಷತೆ? ಯಾಕಿಷ್ಟು ಕ್ರೇಜ್?
ಭಾರತದ ಹೆಮ್ಮೆಯ ಸೆಮಿ ಹೈಸ್ಪೀಡ್ ವಂದೇ ಭಾರತ್ ರೈಲುಗಳು ಹಳಿಗಳ ಮೇಲೆ ಇಳಿದಾಗಿನಿಂದಲೂ ಜನರಿಗೆ ಅಚ್ಚುಮೆಚ್ಚಾಗಿದೆ. ಈ ರೈಲಿನಲ್ಲಿರುವ ಅತ್ಯಾಧುನಿಕ ತಂತ್ರಜ್ಞಾನದ ಕಾರಣ ಇಂದು ಪ್ರಯಾಣಿಕರು, ಅತ್ಯಂತ ಕಡಿಮೆ ಸಮಯದಲ್ಲಿ, ಸುಸಜ್ಜಿತ ವ್ಯವಸ್ಥೆಯೊಂದಿದೆ ಪ್ರಯಾಣ ಮಾಡುವಂತಾಗಿದೆ.
ಪ್ರತ್ಯೇಕ ಎಂಜಿನ್ ಇಲ್ಲ: ಸಾಮಾನ್ಯ ರೈಲುಗಳಂತೆ ಇದಕ್ಕೆ ಮುಂದೆ ಎಳೆಯಲು ಪ್ರತ್ಯೇಕ ಎಂಜಿನ್ ಬೇಕಿಲ್ಲ. ಬದಲಿಗೆ ಪ್ರತಿ ಬೋಗಿಯ ಕೆಳಗಡೆಯೇ ಮೋಟಾರ್ ವ್ಯವಸ್ಥೆ ಇರುವುದರಿಂದ, ಕ್ಷಣಾರ್ಧದಲ್ಲಿ ಇದು ಹೆಚ್ಚಿನ ವೇಗ ಪಡೆದುಕೊಳ್ಳುತ್ತದೆ ಮತ್ತು ಸರಾಗವಾಗಿ ಬ್ರೇಕ್ ಹಾಕಲು ಸಾಧ್ಯವಾಗುತ್ತದೆ.
