ಪ್ರಮುಖ ಸಾಕ್ಷಿಯೇ ನಾಶ! ಪತಿಯನ್ನು ಕೊಂದ ರೀತಿಯಲ್ಲೇ ಮಹಿಳೆಯ ಹಣೆಗೆ ಗುಂಡು; 3 ವರ್ಷಗಳ ಹಿಂದಿನ ಘಟನೆ...

ನವದೆಹಲಿ: ಮೂರು ವರ್ಷಗಳ ಹಿಂದೆ ತನ್ನ ಗಂಡನನ್ನು ಕಿಡಿಗೇಡಿಗಳ ಗ್ಯಾಂಗ್​ ಕೊಲೆಗೈದಿದ್ದ ರೀತಿಯಲ್ಲೇ ಮಹಿಳೆ ಮೃತಪಟ್ಟ ಘಟನೆ ದೆಹಲಿಯ ಶಾಲಿಮಾರ್ ಬಾಗ್‌ನಲ್ಲಿ ಶನಿವಾರ (ಜ.10) ವರದಿಯಾಯಿತು. ಪತಿಯ ಸಾವಿನಿಂದ ಕಂಗಾಲಾಗಿದ್ದ ಮಹಿಳೆ, ಆರೋಪಿಗಳಿಗೆ ತಕ್ಕ ಶಿಕ್ಷೆ ಕೊಡಿಸಲೆಂದು ಕೋರ್ಟ್​ ಮೊರೆ ಹೋಗಿದ್ದರು. ಈಕೆಯ ಬಲವಾದ ಸಾಕ್ಷಿಯೂ ಆಗಿದ್ದರು. ಆದರೆ, ಆಕೆಯನ್ನೇ ಇಲ್ಲವಾಗಿಸಿದರೆ, ಈ ಕೇಸ್​ ಹಾದಿ ತಪ್ಪಿಸಬಹುದು ಎಂಬ ನಿಟ್ಟಿನಲ್ಲಿ ಅದೇ ಕಿಲ್ಲರ್​ ಗ್ಯಾಂಗ್​ನ ಪ್ರಮುಖ ಆರೋಪಿ ಕೊಲೆಗೈದ ಶಂಕೆ ಇದೀಗ ವ್ಯಕ್ತವಾಗಿದೆ.

ವರದಿಗಳ ಪ್ರಕಾರ, ಬೈಕ್​ನಲ್ಲಿ ಬಂದ ಇಬ್ಬರಲ್ಲಿ ಒಬ್ಬ ಮಹಿಳೆಯ ಪತಿಯ ಕೊಲೆಯ ಶಂಕಿತನೇ ಎಂದು ಪೊಲೀಸರು ತಿಳಿಸಿದ್ದಾರೆ. ಇತಿಹಾಸ ತಜ್ಞ ವಿಜೇಂದ್ರ ಯಾದವ್​ನನ್ನು ಮೂರು ವರ್ಷಗಳ ಹಿಂದೆ ದುಷ್ಕರ್ಮಿಗಳು ಭೀರಕವಾಗಿ ಕೊಲೆ ಮಾಡಿದ್ದರು. ಈಗ ಪತಿ ಕೊಲೆಯಾದ ರೀತಿಯಲ್ಲೇ ಸಾವಿಗೀಡಾಗಿರುವ ಪತ್ನಿ ರಚನಾ (52) ಪತಿಯ ಕೊಲೆ ಕೇಸ್​ನ ಪ್ರಮುಖ ಸಾಕ್ಷಿಗಳಲ್ಲಿ ಒಬ್ಬರಾಗಿದ್ದರು ಎನ್ನಲಾಗಿದೆ.

ದಂಪತಿಯ ಪುತ್ರಿ ಕನಿಕಾ ಮಾತನಾಡಿ, ಕೋರ್ಟ್​ಗೆ ಹೋಗುವಾಗ ತನ್ನ ತಾಯಿಯನ್ನು ಬೆದರಿಸಿ ಹಿಂಬಾಲಿಸಿದ್ದರು. ಸುಮಾರು ಒಂದೂವರೆ ವರ್ಷಗಳ ಹಿಂದೆಯೂ, ನ್ಯಾಯಾಲಯಕ್ಕೆ ಸಾಗುವಾಗ ದಾರಿ ಮಧ್ಯೆ ಅವಳನ್ನು ಹಿಂಬಾಲಿಸಿ, ಬೆದರಿಕೆಯೊಡ್ಡಿದ್ದರು. ಆ ನಂತರ ತಾಯಿ ವಿಡಿಯಯೋ ಮುಖಾಂತರವೇ ವಿಚಾರಣೆಗೆ ಹಾಜರಾಗುತ್ತಿದ್ದರು. ನನ್ನ ತಂದೆ ಕೊಲೆಗೈದ ಕೆಲವು ಆರೋಪಿಗಳನ್ನು ತಿಹಾರ್ ಜೈಲಿನಲ್ಲಿ ಇರಿಸಲಾಗಿದೆ. ಇಷ್ಟಾದರೂ ಸಹ ಕೊಲೆಗಳು ನಡೆಯುತ್ತಿರುವುದು ಆಘಾತಕಾರಿ" ಎಂದು ಹೇಳಿದ್ದಾರೆ.

ಮೃತ ರಚನಾ ಸಂಬಂಧಿಕರನ್ನು ಭೇಟಿಯಾಗಿ ತಮ್ಮ ಮನೆಗೆ ಹಿಂತಿರುಗುತ್ತಿದ್ದ ವೇಳೆ ಬೈಕ್​ನಲ್ಲಿ ಬಂದ ದುಷ್ಕರ್ಮಿಗಳು, ಆಕೆಯ ಬಳಿ ಹೋಗಿ, ನಿನ್ನ ಹೆಸರೇನು ಎಂದು ಕೇಳಿದರು. ತಾನು ಯಾರೆಂದು ಅವರಿಗೆ ಹೇಳ್ತಿದ್ದಂತೆ, ಕಿಡಿಗೇಡಿಗಳು ಆಕೆಯ ಹಣೆಗೆ ಗುಂಡು ಹಾರಿಸಿ, ಸ್ಥಳದಿಂದ ಪರಾರಿಯಾದರು ಎಂದು ಮೃತಳ ಸಂಬಂಧಿಕರು ತಿಳಿಸಿದ್ದಾರೆ. ಗುಂಡೇಟು ಬಿದ್ದ ಕ್ಷಣವೇ ರಚನಾ ಮೃತಪಟ್ಟಿದ್ದು, ರಕ್ತದ ಮಡುವಿನಲ್ಲಿ ಬಿದ್ದಿರುವುದು ಪೊಲೀಸರ ಭೇಟಿ ಬಳಿಕ ಸ್ಪಷ್ಟವಾಗಿದೆ. ಸಿಸಿಟಿವಿಯಲ್ಲಿ ಆಕೆಗೆ ಗುಂಡು ಹಾರಿಸಿದ ಆರೋಪಿಯ ದೃಶ್ಯ ಸೆರೆಯಾಗಿದ್ದು, ಸ್ಪೋರ್ಟ್ಸ್ ಬೈಕ್ ದೆಹಲಿ ನೋಂದಣಿ ಸಂಖ್ಯೆಯನ್ನು ಹೊಂದಿದೆ,(ಏಜೆನ್ಸೀಸ್).