Non-Vegetarian Village: ಆಧುನಿಕ ಜೀವನಶೈಲಿಯ ಪ್ರಭಾವದಿಂದ ಇಂದು ಆಹಾರ ಪದ್ಧತಿ ದಿನದಿಂದ ದಿನಕ್ಕೆ ಬದಲಾಗುತ್ತಿದೆ. ಸಾಮಾನ್ಯ ದಿನದಂತೆ, ಹಬ್ಬ-ಹರಿದಿನಗಳಲ್ಲಿ ಮಾಡುವ ತಿಂಡಿ-ತಿನಿಸುಗಳಲ್ಲಿ ಸಹ ಕೊಂಚ ಬದಲಾವಣೆಗಳು ಕಾಣುತ್ತಿವೆ. ಆದರೆ, ತಮಿಳುನಾಡಿನ ಒಂದು ಪುಟ್ಟ ಗ್ರಾಮ ಮಾತ್ರ ಕಳೆದ 63 ವರ್ಷಗಳಿಂದ ತನ್ನ ಸಂಪ್ರದಾಯ ಮತ್ತು ತತ್ವಗಳಿಗೆ ಬದ್ಧವಾಗಿ ಬದುಕುತ್ತಿದೆ ಎಂಬುದಕ್ಕೆ ಮಾಂಸಹಾರದ ಊಟದ ಮೇಲೆ ಹಾಕಿರುವ ನಿಷೇಧವೇ ಸಾಕ್ಷಿ.
ಈ ಊರಿನಲ್ಲಿ ಮಾಂಸಾಹಾರಕ್ಕೆ ಸಂಪೂರ್ಣ ನಿಷೇಧವಿದೆ. ಅಷ್ಟೇ ಅಲ್ಲ, ಗ್ರಾಮದ ಕೆರೆಯಲ್ಲಿ ಮೀನುಗಳಿದ್ದರೂ ಅವುಗಳನ್ನು ಯಾರೊಬ್ಬರೂ ಹಿಡಿಯುವುದಿಲ್ಲ. ಪ್ರಾಣಿಗಳ ಹತ್ಯೆಗಳು ನಡೆಯಬಾರದು ಎಂಬ ಒಂದೇ ಒಂದು ಕಾರಣಕ್ಕೆ, ಇಲ್ಲಿ ಯಾರೂ ಸಹ ಕುರಿ, ಮೇಕೆ, ಕೋಳಿಗಳನ್ನೂ ಸಾಕುವುದಿಲ್ಲ. ವಳ್ಳಲಾರ್ ಅವರ ಜೀವಕಾರುಣ್ಯದ ಮಾರ್ಗವನ್ನು ಅನುಸರಿಸುತ್ತಿರುವ ಈ ಗ್ರಾಮದ ಜೀವನಶೈಲಿ ಈಗ ಎಲ್ಲರ ಗಮನ ಸೆಳೆಯುತ್ತಿದೆ.
ತಮಿಳುನಾಡಿನ ಒಂದು ಪುಟ್ಟ ಗ್ರಾಮ ಕಳೆದ 63 ವರ್ಷಗಳಿಂದ ಮಾಂಸಾಹಾರವನ್ನು ಸಂಪೂರ್ಣವಾಗಿ ತ್ಯಜಿಸಿ, ಸಸ್ಯಾಹಾರವನ್ನೇ ಜೀವನದ ಪ್ರಮುಖ ಭಾಗವಾಗಿಸಿಕೊಂಡಿದೆ. ಅಷ್ಟೇ ಅಲ್ಲ, ಪ್ರಾಣಿ-ಪಕ್ಷಿಗಳ ಮೇಲಿನ ಕರುಣೆ ಮತ್ತು ಜೀವಹಿಂಸೆ ಮಾಡಬಾರದು ಎಂಬ ತತ್ವವನ್ನು ತಮ್ಮ ದೈನಂದಿನ ಬದುಕಿನಲ್ಲಿ ಬಹಳ ಶಿಸ್ತಿನಿಂದ ಪಾಲಿಸುತ್ತಿದೆ. ಈ ವಿಶಿಷ್ಟ ಜೀವನಶೈಲಿಯಿಂದಲೇ ಈ ಗ್ರಾಮದ ಹೆಸರು ಇಂದಿಗೂ ಹಲವರ ಗಮನ ಸೆಳೆಯುತ್ತಿದೆ.
ತಮಿಳುನಾಡಿನ ಪುದುಕ್ಕೊಟ್ಟೈ ಜಿಲ್ಲೆಯ ಆಲಂಗುಡಿ ಸಮೀಪವಿರುವ ವಡಿಮಾನೈಪಟ್ಟಿ ಗ್ರಾಮವೇ ಈ ವಿಶೇಷತೆಗೆ ಹೆಸರಾಗಿದೆ. ಸುಮಾರು 75 ಕುಟುಂಬಗಳ 300ಕ್ಕೂ ಹೆಚ್ಚು ಜನರು ವಾಸಿಸುವ ಈ ಗ್ರಾಮದಲ್ಲಿ 1963ರಿಂದ ಮಾಂಸಾಹಾರ ಸೇವನೆಯನ್ನು ಸಂಪೂರ್ಣವಾಗಿ ನಿಲ್ಲಿಸಲಾಗಿದೆ.
ವಳ್ಳಲಾರ್ ತತ್ವಗಳಿಂದ ಬದಲಾಯ್ತು ಪದ್ಧತಿ
ಒಂದು ಕಾಲದಲ್ಲಿ ಇತರ ಗ್ರಾಮಗಳಂತೆ ಇಲ್ಲಿನ ಜನರೂ ಸಸ್ಯಾಹಾರ ಮತ್ತು ಮಾಂಸಾಹಾರ ಎರಡನ್ನೂ ಸೇವಿಸುತ್ತಿದ್ದರು. ಆದರೆ, 1963ರಲ್ಲಿ ವಳ್ಳಲಾರ್ ಅವರ ಜೀವಕಾರುಣ್ಯ ಮತ್ತು ಸನ್ಮಾರ್ಗದ ತತ್ವಗಳಿಂದ ಪ್ರೇರಿತರಾದ ಗ್ರಾಮಸ್ಥರು, ಮಾಂಸಾಹಾರ ತ್ಯಜಿಸುವ ನಿರ್ಧಾರ ಕೈಗೊಂಡರು. ಅಂದಿನಿಂದ ಇಂದಿನವರೆಗೂ ಇಡೀ ಗ್ರಾಮ ಸಸ್ಯಾಹಾರ ಪದ್ಧತಿಯನ್ನೇ ಅನುಸರಿಸುತ್ತ ಬಂದಿದೆ.
