ಅತ್ತೆಯ ಎಕ್ಸ್ ಪೋಸ್ಟ್ ಶೇರ್ ಮಾಡದ್ದಕ್ಕೆ ಅಳಿಯನಿಗೆ ಉಚ್ಚಾಟನೆ ಶಿಕ್ಷೆ!... ಅಷ್ಟಕ್ಕೂ ಏನಿತ್ತು ಮಾಯಾವತಿ ಮಾಡಿದ ಆ ಟ್ವೀಟ್​​ನಲ್ಲಿ..? | Bahujan Samaj Party

ಎಕ್ಸ್ ಖಾತೆಯಲ್ಲಿ ಒಂದೇ ಒಂದು ಪೋಸ್ಟ್ ಅನ್ನು ರೀಪೋಸ್ಟ್ ಮಾಡಲಿಲ್ಲ ಎಂಬ ಕಾರಣಕ್ಕೆ 31 ವರ್ಷದ ಯುವ ನಾಯಕನನ್ನು ಪಕ್ಷದಿಂದ ಉಚ್ಚಾಟಿಸಲಾಗಿದೆ. ಈ ಘಟನೆಯ ಹಿಂದೆ ಬಿಎಸ್‌ಪಿಯ ಕಠಿಣ ಶಿಸ್ತು, ಸಿದ್ಧಾಂತ ಹಾಗೂ ಬಹುಜನ ಚಳವಳಿಯ ಅಸ್ತಿತ್ವದ ಹೋರಾಟದ ಕಥೆಯಿದೆ.

ಸೆಪ್ಟೆಂಬರ್ 3 ರಂದು ಮಾಯಾವತಿಯವರು ಆಕಾಶ್ ಅವರನ್ನು ಪಕ್ಷದ ರಾಷ್ಟ್ರೀಯ ಸಂಯೋಜಕ ಹುದ್ದೆಯಿಂದ ತೆಗೆದುಹಾಕಿ ಸಾಮಾನ್ಯ ಕಾರ್ಯಕರ್ತನನ್ನಾಗಿ ಕೆಲಸ ಮಾಡುವಂತೆ ಸೂಚಿಸಿದ್ದರು. ತದನಂತರ ಸೆಪ್ಟೆಂಬರ್ 9 ರಂದು ಮಾಯಾವತಿಯವರು, ಆಕಾಶ್ ಅವರ ಮಾವ ಹಾಗೂ ಮಾಜಿ ರಾಜ್ಯಸಭಾ ಸಂಸದ ಅಶೋಕ್ ಸಿದ್ಧಾರ್ಥ್ ರಾಜಕೀಯದಿಂದ ಸಂಪೂರ್ಣ ಸನ್ಯಾಸ ಸ್ವೀಕರಿಸಿದರೆ, ಆಕಾಶ್ ಅವರಿಗೆ ಮರಳಿ ಜವಾಬ್ದಾರಿ ನೀಡುವ ಬಗ್ಗೆ ಪರಿಶೀಲಿಸಲಾಗುವುದು ಎಂಬ ಷರತ್ತು ವಿಧಿಸಿದ್ದರು.

ಆಕಾಶ್ ಆನಂದ್ ಅವರ ಬಿಎಸ್‌ಪಿ ರಾಜಕೀಯ ಜೀವನವು ಸತತ ಏಳು-ಬೀಳುಗಳ ಸರಣಿಯಾಗಿದೆ. 2019 ರಲ್ಲಿ ರಾಷ್ಟ್ರೀಯ ಸಂಯೋಜಕರಾಗಿ ನೇಮಕಗೊಂಡಿದ್ದ ಆಕಾಶ್ ಅವರನ್ನು ಡಿಸೆಂಬರ್ 2023 ರಲ್ಲಿ ಮಾಯಾವತಿಯವರು ತಮ್ಮ ಉತ್ತರಾಧಿಕಾರಿ ಎಂದು ಘೋಷಿಸಿದ್ದರು. ಆದರೆ ಮೇ 2024 ರಲ್ಲಿ ಅವರನ್ನು ಹುದ್ದೆಯಿಂದ ವಜಾಗೊಳಿಸಿ, ಜೂನ್ 2024 ರಲ್ಲಿ ಮರಳಿ ನೇಮಿಸಿಕೊಳ್ಳಲಾಯಿತು. ಮಾರ್ಚ್ 2025 ರಲ್ಲಿ ಮತ್ತೆ ಪಕ್ಷದಿಂದ ಹೊರಹಾಕಲ್ಪಟ್ಟು, ಏಪ್ರಿಲ್ 2025 ರಲ್ಲಿ ಕ್ಷಮೆಯಾಚನೆ ಬಳಿಕ ಮರುಸೇರ್ಪಡೆ ಮಾಡಿಕೊಳ್ಳಲಾಗಿತ್ತು. ಇದೀಗ ಸೆಪ್ಟೆಂಬರ್ 3 ರಂದು ಹುದ್ದೆ ರದ್ದುಗೊಳಿಸಿ, ಸೆಪ್ಟೆಂಬರ್ 10 ರಂದು ಪಕ್ಷದಿಂದಲೇ ಅಂತಿಮವಾಗಿ ಬಹಿಷ್ಕರಿಸಲಾಗಿದೆ. ಈ ಬೆಳವಣಿಗೆಯು ಬಿಎಸ್‌ಪಿಯ ಆಂತರಿಕ ಕಟ್ಟುಪಾಡು ಮತ್ತು ಮಾಯಾವತಿಯವರ ರಾಜಿ ರಹಿತ ರಾಜಕೀಯ ಶೈಲಿಯನ್ನು ಪ್ರತಿಬಿಂಬಿಸುತ್ತದೆ.

ಈ ಬೆಳವಣಿಗೆಯು ಕೇವಲ ಒಂದು ಕುಟುಂಬದ ಕಲಹವಲ್ಲದೆ, 2027ರ ಉತ್ತರ ಪ್ರದೇಶ ವಿಧಾನಸಭಾ ಚುನಾವಣೆ ಹತ್ತಿರವಾಗುತ್ತಿರುವಾಗ ಬಿಎಸ್‌ಪಿಯ ಅಸ್ತಿತ್ವಕ್ಕೆ ಬಿದ್ದ ದೊಡ್ಡ ಹೊಡೆತವಾಗಿದೆ. 2022 ರ ವಿಧಾನಸಭಾ ಚುನಾವಣೆಯಲ್ಲಿ ಬಿಎಸ್‌ಪಿ ಗೆದ್ದದ್ದು ಕೇವಲ 1 ಸ್ಥಾನ, ಹಾಗೂ 2024 ರ ಲೋಕಸಭಾ ಚುನಾವಣೆಯಲ್ಲಿ ಶೂನ್ಯ ಸಾಧನೆ ಮಾಡಿದ್ದು, ಪಕ್ಷದ ಶೇಕಡಾವಾರು ಮತಪ್ರಮಾಣ ಶೇಕಡಾ 9.39ಕ್ಕೆ ಕುಸಿದಿದೆ. ಇನ್ನೊಂದೆಡೆ ಪಶ್ಚಿಮ ಉತ್ತರ ಪ್ರದೇಶದಲ್ಲಿ ಆಜಾದ್ ಸಮಾಜ್ ಪಾರ್ಟಿಯ ಯುವ ನಾಯಕ ಚಂದ್ರಶೇಖರ್ ಆಜಾದ್ ದಲಿತ ಯುವಕರ ಆಶಾಕಿರಣವಾಗಿ ಬೆಳೆಯುತ್ತಿದ್ದಾರೆ. ಆಕಾಶ್ ನಿರ್ಗಮನದಿಂದ ಯುವ ದಲಿತ ಮತದಾರರು ಆಜಾದ್ ಕಡೆಗೆ ವಾಲುವು ಸಾಧ್ಯತೆ ಹೆಚ್ಚಿದೆ.

ಆಕಾಶ್ ನಿರ್ಗಮನದ ಬೆನ್ನಲ್ಲೇ ಅವರ ಕಿರಿಯ ಸಹೋದರ ಇಶಾನ್ ಆನಂದ್ ಅವರನ್ನು ಉತ್ತರ ಪ್ರದೇಶ ಮತ್ತು ಉತ್ತರಾಖಂಡ ಹೊರತುಪಡಿಸಿ ಇತರ ರಾಜ್ಯಗಳ ಉಸ್ತುವಾರಿಯಾಗಿ ನೇಮಿಸಲಾಗಿದೆ. ಇಶಾನ್ ಅವರು ಮಾಯಾವತಿಯವರ ಪೋಸ್ಟ್ ಅನ್ನು ತಕ್ಷಣವೇ ರೀಪೋಸ್ಟ್ ಮಾಡುವ ಮೂಲಕ ತಮ್ಮ ನಿಷ್ಠೆಯನ್ನು ಪ್ರದರ್ಶಿಸಿದ್ದಾರೆ. ಅಂಬೇಡ್ಕರ್ ವಾದಿ ರಾಜಕೀಯದಲ್ಲಿ ತ್ಯಾಗ ಮತ್ತು ಸಿದ್ಧಾಂತವು ವ್ಯಕ್ತಿ ಹಾಗೂ ಕುಟುಂಬಕ್ಕಿಂತ ಮಿಗಿಲಾದುದು ಎಂಬ ಕಠಿಣ ಸಂದೇಶವನ್ನು ಮಾಯಾವತಿ ನೀಡಿದ್ದಾರೆ. 2027 ರ ಕದನಕ್ಕೆ ಬಿಎಸ್‌ಪಿ ತನ್ನ ಸೈನ್ಯವನ್ನು ಸಜ್ಜುಗೊಳಿಸುತ್ತಿರುವಾಗಲೇ, ಪಕ್ಷದ ಯುವ ಮುಖವಾಗಬೇಕಿದ್ದ ಆಕಾಶ್ ಆನಂದ್ ಅಖಾಡದಿಂದ ಸಂಪೂರ್ಣವಾಗಿ ಹೊರಬಿದ್ದಿದ್ದಾರೆ(ಏಜೆನ್ಸೀಸ್​).