ಇ20 ಪೆಟ್ರೋಲ್‌ನಿಂದ ಇಂಜಿನ್‌ಗೆ ಯಾವುದೇ ಹಾನಿಯಿಲ್ಲ, ಮೈಲೇಜ್‌ ಕಡಿತವೂ ಇಲ್ಲ!...ವೈಜ್ಞಾನಿಕ ವರದಿ ಉಲ್ಲೇಖಿಸಿ ಕೇಂದ್ರದ ಸ್ಪಷ್ಟನೆ | E20 Petrol

ರಾಜ್ಯಸಭೆಗೆ ನೀಡಿದ ಲಿಖಿತ ಉತ್ತರದಲ್ಲಿ ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್ ಗಡ್ಕರಿ, ಇ20 ಪೆಟ್ರೋಲ್ ಅನ್ನು ಹಂತ ಹಂತವಾಗಿ ಜಾರಿಗೆ ತರುವ ಮೊದಲು ವಾಹನಗಳ ಮೇಲಿನ ಪರಿಣಾಮವನ್ನು ಮೌಲ್ಯಮಾಪನ ಮಾಡಲು ವ್ಯಾಪಕವಾದ ವೈಜ್ಞಾನಿಕ ಅಧ್ಯಯನಗಳು, ಪರೀಕ್ಷೆಗಳು ಮತ್ತು ತಜ್ಞರ ಸಂಸ್ಥೆಗಳೊಂದಿಗೆ ಸಮಾಲೋಚನೆ ನಡೆಸಲಾಗಿದೆ ಎಂದು ಸ್ಪಷ್ಟಪಡಿಸಿದ್ದಾರೆ.

ಇಂಡಿಯನ್ ಆಯಿಲ್ ಕಾರ್ಪೊರೇಷನ್ ಲಿಮಿಟೆಡ್, ಡೆಹ್ರಾಡೂನ್‌ನ ಇಂಡಿಯನ್ ಇನ್‌ಸ್ಟಿಟ್ಯೂಟ್ ಆಫ್ ಪೆಟ್ರೋಲಿಯಂ, ಸೊಸೈಟಿ ಆಫ್ ಇಂಡಿಯನ್ ಆಟೋಮೊಬೈಲ್ ಮ್ಯಾನುಫ್ಯಾಕ್ಚರರ್ಸ್ ಮತ್ತು ಆಟೋಮೊಬೈಲ್ ರಿಸರ್ಚ್ ಅಸೋಸಿಯೇಷನ್ ಆಫ್ ಇಂಡಿಯಾ ಜಂಟಿಯಾಗಿ ದ್ವಿಚಕ್ರ ಮತ್ತು ನಾಲ್ಕು ಚಕ್ರಗಳ ವಾಹನಗಳ ಮೇಲೆ ಇ20 ಇಂಧನದ ಪ್ರಭಾವದ ಕುರಿತು ಅಧ್ಯಯನ ನಡೆಸಿವೆ ಎಂದು ಸಚಿವರು ತಿಳಿಸಿದ್ದಾರೆ. ಈ ಅಧ್ಯಯನಗಳ ಪ್ರಕಾರ, ಕಾರುಗಳು ಅಥವಾ ದ್ವಿಚಕ್ರ ವಾಹನಗಳ ಇಂಜಿನ್‌ಗಳಲ್ಲಿ ಯಾವುದೇ ಮಾರ್ಪಾಡು ಮಾಡುವ ಅಗತ್ಯ ಕಂಡುಬಂದಿಲ್ಲ. ಹಳೆಯ ಮಾದರಿಯ ವಾಹನಗಳಲ್ಲಿಯೂ ಇ20 ಇಂಧನ ಬಳಸಿದಾಗ ಕಾರ್ಯಕ್ಷಮತೆಯಲ್ಲಿ ಯಾವುದೇ ಗಣನೀಯ ಕುಸಿತ ಅಥವಾ ಅಸಾಮಾನ್ಯ ಸವೆತ ಕಂಡುಬಂದಿಲ್ಲ ಎಂದು ಅವರು ಹೇಳಿದ್ದಾರೆ.

ಮೈಲೇಜ್ ಕಡಿಮೆಯಾಗುವ ಆತಂಕಕ್ಕೆ ಸ್ಪಂದಿಸಿದ ಗಡ್ಕರಿ, ವಾಹನದ ಮೈಲೇಜ್ ಎಂಬುದು ಕೇವಲ ಇಂಧನದ ಪ್ರಕಾರವನ್ನು ಮಾತ್ರವಲ್ಲದೆ ಹಲವು ಕಾರ್ಯಾಚರಣೆಯ ಅಂಶಗಳನ್ನು ಅವಲಂಬಿಸಿರುತ್ತದೆ ಎಂದು ವಾಹನ ತಯಾರಕರು ಮತ್ತು ಪರೀಕ್ಷಾ ಸಂಸ್ಥೆಗಳು ಸ್ಪಷ್ಟಪಡಿಸಿವೆ ಎಂದಿದ್ದಾರೆ. ದೇಶಾದ್ಯಂತ ಇ20 ಪೆಟ್ರೋಲ್ ಪರಿಚಯಿಸುವ ಮೊದಲು ನಡೆಸಿದ ವೈಜ್ಞಾನಿಕ ಮೌಲ್ಯಮಾಪನಗಳು ಈ ಅಂಶಗಳನ್ನು ಬೆಂಬಲಿಸುತ್ತವೆ ಎಂದು ತಿಳಿಸಿದ್ದಾರೆ.

80 ಪ್ರತಿಶತ ಪೆಟ್ರೋಲ್ ಮತ್ತು 20 ಪ್ರತಿಶತ ಎಥನಾಲ್ ಒಳಗೊಂಡಿರುವ ಇ20 ಪೆಟ್ರೋಲ್ ಪರಿಚಯಿಸಿರುವುದಕ್ಕೆ ವಿರೋಧ ಪಕ್ಷಗಳು ಮತ್ತು ಗ್ರಾಹಕ ಸಂಘಟನೆಗಳಿಂದ ಟೀಕೆಗಳು ವ್ಯಕ್ತವಾಗಿವೆ. ವಿಶೇಷವಾಗಿ ಹೆಚ್ಚು ಎಥನಾಲ್ ಮಿಶ್ರಣಕ್ಕೆ ಹೊಂದಿಕೊಳ್ಳದ ಹಳೆಯ ವಾಹನಗಳ ಮೇಲೆ ಇದು ಬೀರುವ ಪ್ರಭಾವದ ಬಗ್ಗೆ ಕಳವಳ ವ್ಯಕ್ತವಾಗಿದೆ. ವಾಹನಗಳ ಹೊಂದಾಣಿಕೆ, ಮೈಲೇಜ್ ಕುಸಿತ ಮತ್ತು ಹೆಚ್ಚಿನ ನಿರ್ವಹಣೆ ವೆಚ್ಚದ ಸಾಧ್ಯತೆಯನ್ನು ಪ್ರಶ್ನಿಸಿರುವ ವಿಪಕ್ಷಗಳು, ಇಂಜಿನ್ ಹಾನಿಯಾದರೆ ಯಾರು ಹೊಣೆ ಎಂಬುದರ ಬಗ್ಗೆ ಸ್ಪಷ್ಟತೆ ಹಾಗೂ ಗ್ರಾಹಕರ ರಕ್ಷಣೆಗೆ ಸೂಕ್ತ ಕ್ರಮಗಳನ್ನು ಆಗ್ರಹಿಸಿವೆ.

ಇದಕ್ಕೆ ಉತ್ತರಿಸಿದ ಗಡ್ಕರಿ, 2020ರ ಡಿಸೆಂಬರ್‌ನಲ್ಲಿ ನಿತಿ ಆಯೋಗ ರಚಿಸಿದ್ದ ಸಚಿವಾಲಯಗಳ ನಡುವಿನ ಸಮಿತಿಯು ವಾಹನ ಹೊಂದಾಣಿಕೆ ಮತ್ತು ಇಂಧನ ದಕ್ಷತೆಯ ಕುರಿತಾದ ವಿಷಯಗಳನ್ನು ಸಮಗ್ರವಾಗಿ ಪರಿಶೀಲಿಸಿದೆ. 2021ರ ಜೂನ್​ನಲ್ಲಿ ಬಿಡುಗಡೆಯಾದ ಭಾರತದಲ್ಲಿ ಎಥನಾಲ್ ಮಿಶ್ರಣದ ಮಾರ್ಗಸೂಚಿ 2020-25 ವರದಿಯನ್ನು ವಾಹನ ತಯಾರಕರು, ತೈಲ ಮಾರಾಟ ಕಂಪನಿಗಳು ಮತ್ತು ಕೃಷಿ ತಜ್ಞರೊಂದಿಗೆ ಸಮಾಲೋಚಿಸಿದ ನಂತರವೇ ಸಿದ್ಧಪಡಿಸಲಾಗಿದೆ ಎಂದಿದ್ದಾರೆ.

ಎಥನಾಲ್ ಮಿಶ್ರಿತ ಪೆಟ್ರೋಲ್ ಕಾರ್ಯಕ್ರಮವನ್ನು ವೈಜ್ಞಾನಿಕವಾಗಿ ಹಂತ ಹಂತವಾಗಿ ಜಾರಿಗೆ ತರಲಾಗಿದೆ. ಭಾರತವು 2001 ರಲ್ಲಿ ಪ್ರಾಯೋಗಿಕ ಯೋಜನೆಯಾಗಿ ಎಥನಾಲ್ ಮಿಶ್ರಣವನ್ನು ಪ್ರಾರಂಭಿಸಿತು, ನಂತರ 2006 ರಲ್ಲಿ E5 ಇಂಧನವನ್ನು ಪರಿಚಯಿಸಿತು. 2013-14 ರವರೆಗೆ ಮಿಶ್ರಣದ ಪ್ರಮಾಣ ಕಡಿಮೆಯಿದ್ದರೂ, ಉತ್ಪಾದನಾ ಸಾಮರ್ಥ್ಯ ಮತ್ತು ಮೂಲಸೌಕರ್ಯ ಹೆಚ್ಚಾದಂತೆ ಇದನ್ನು ಹಂತ ಹಂತವಾಗಿ ಹೆಚ್ಚಿಸಲಾಯಿತು.

2026ರ ಏಪ್ರಿಲ್‌ನಲ್ಲಿ ಇ20 ಅನ್ನು ಪರಿಚಯಿಸುವ ಮೊದಲು, ಇಂಜಿನ್ ಬಾಳಿಕೆ, ತುಕ್ಕು ನಿರೋಧಕತೆ, ವಸ್ತುಗಳ ಹೊಂದಾಣಿಕೆ, ಹೊರಸೂಸುವಿಕೆ, ಇಂಧನ ದಕ್ಷತೆ ಮತ್ತು ಒಟ್ಟಾರೆ ವಾಹನದ ಕಾರ್ಯಕ್ಷಮತೆಯನ್ನು ಒಳಗೊಂಡಂತೆ ಪ್ರಯೋಗಾಲಯ ಅಧ್ಯಯನಗಳು ಮತ್ತು ಕ್ಷೇತ್ರ ಪರೀಕ್ಷೆಗಳನ್ನು ನಡೆಸಲಾಗಿದೆ. BS (ಭಾರತ್ ಸ್ಟೇಜ್) ಎಂಬುದು ಭಾರತದ ವಾಹನ ಹೊರಸೂಸುವಿಕೆ ಮಾನದಂಡವಾಗಿದ್ದು, ವಾಹನಗಳಿಂದ ಬಿಡುಗಡೆಯಾಗುವ ಕಾರ್ಬನ್ ಮೊನಾಕ್ಸೈಡ್, ನೈಟ್ರೋಜನ್ ಆಕ್ಸೈಡ್ ಮುಂತಾದ ಮಾಲಿನ್ಯಕಾರಕಗಳನ್ನು ನಿಯಂತ್ರಿಸುತ್ತದೆ(ಏಜೆನ್ಸೀಸ್​).