ಯಾರನ್ನೂ ಓಡಿಸಲ್ಲ, ಕಾಡನ್ನೂ ನಾಶ ಮಾಡಲ್ಲ! ನಿಕೋಬಾರ್​ ದ್ವೀಪದಲ್ಲಿ 81 ಸಾವಿರ ಕೋಟಿ ಯೋಜನೆ; ವಿರೋಧ ಪಕ್ಷಕ್ಕೆ ಲೆಫ್ಟಿನೆಂಟ್ ಗವರ್ನರ್ ತಿರುಗೇಟು! Great Nicobar Project

ನಿಕೋಬಾರ್: ಗ್ರೇಟ್​ ನಿಕೋಬಾರ್​ ದ್ವೀಪದಲ್ಲಿ ಕೇಂದ್ರ ಸರ್ಕಾರ ನಾನಾ ಅಭಿವೃದ್ಧಿ ಯೋಜನೆಗಳನ್ನು(Great Nicobar Project) ಪ್ರಾರಂಭಿಸಲು ಮುಂದಾಗಿದ್ದು, ಇದಕ್ಕೆ ವಿರೋಧ ಪಕ್ಷಗಳಿಂದ ತೀವ್ರ ಪ್ರತಿಕ್ರಿಯೆ ದೊರೆಯುತ್ತಿದೆ.

ಆದರೆ ಇತ್ತೀಚೆಗೆ ಈ ಕುರಿತು ಮಾತನಾಡಿರುವ ಅಂಡಮಾನ್​- ನಿಕೋಬಾರ್​​ನ ಲೆಫ್ಟಿನೆಂಟ್​ ಗಮರ್ನರ್​, ಅಡ್ಮಿರಲ್​ ಡಿ.ಕೆ. ಜೋಶಿ, ನಿಕೋಬಾರ್​ ದ್ವೀಪಗಳಲ್ಲಿ ಮಾಡ ಹೊರಟಿರುವ ಯೋಜನೆಗಳ ಬಗ್ಗೆ ವಿರೋಧ ಪಕ್ಷಗಳಿಗೆ ಮಾಹಿತಿ ಕೊರತೆಯಿದೆ, ಇದರಿಂದ ಯಾವುದೇ ಬುಡಕಟ್ಟು ಜನರಿಗೆ ತೊಂದರೆಯಾಗುವುದಿಲ್ಲ ಎಂದು ಜೋಶಿ ಸ್ಪಷ್ಟ ಪಡಿಸಿದ್ದಾರೆ.

ಗ್ರೇಟ್​ ನಿಕೋಬಾರ್​ ದ್ವೀಪದಲ್ಲಿ ನಡೆಯಲಿರುವ ಯೋಜನೆ ಬಗ್ಗೆ ಮಾತನಾಡಿರುವ ನಿವೃತ್ತ ನೌಕಾಪಡೆ ಮುಖ್ಯಸ್ಥ ಹಾಗೂ ಅಂಡಮಾನ್​- ನಿಕೋಬಾರ್​​ನ ಲೆಫ್ಟಿನೆಂಟ್​ ಗಮರ್ನರ್​, ಅಡ್ಮಿರಲ್​ ಡಿ.ಕೆ. ಜೋಶಿ, ಈ ಯೋಜನೆಗೆ ಪರಿಸರ ಸಂರಕ್ಷಣಾ ಸಮಿತಿಯಿಂದ ಶಾಸನಬದ್ಧ ಅನುಮತಿ ಪಡೆದಿದ್ದೆವೆ. ಇಲ್ಲಿ ನಡೆಯಲಿರುವ ಅಭಿವೃದ್ಧಿ ಯೋಜನೆಗಳು ಭವಿಷ್ಯದಲ್ಲಿ ಭಾರತ ಶಕ್ತಿಶಾಲಿಯಾಗಿ ರೂಪುಗೊಳ್ಳುವುದರಲ್ಲಿ ಬಹಳ ಪ್ರಮುಖ ಪಾತ್ರವಹಿಸಲಿದೆ ಎಂದು ಹೇಳಿದ್ದಾರೆ.

ಕೇಂದ್ರ ಸರ್ಕಾರವು ಗ್ರೇಟ್​ ನಿಕೋಬಾರ್​ ದ್ವೀಪದಲ್ಲಿ ಗ್ರೀನ್​ಫೀಲ್ಡ್​​ ಏರ್​ಪೋರ್ಟ್​, ಟ್ರಾನ್ಸ್‌ಶಿಪ್‌ಮೆಂಟ್ ಬಂದರು, ವಿದ್ಯುತ್ ಮೂಲಸೌಕರ್ಯ ಮತ್ತು ಪಟ್ಟಣ ಅಭಿವೃದ್ಧಿ ಮೊದಲಾದವುಗಳನ್ನು ನಿರ್ಮಿಸುವ ಸಲುವಾಗಿ ಸುಮಾರು 81,000 ಕೋಟಿ ಹೂಡಿಕೆ ಮಾಡಲು ಮುಂದಾಗಿದೆ.

ಇದು ಕೇವಲ ಪ್ರವಾಸೋದ್ಯಮ ಹಾಗೂ ಆರ್ಥಿಕ ಅಭಿವೃದ್ಧಿಗಾಗಿ ಮಾತ್ರವಲ್ಲ, ಗ್ರೇಟ್​ ನಿಕೋಬಾರ್ ದ್ವೀಪ ಜಾಗತಿಕ ಭೂಗೋಳದಲ್ಲಿ ಅತ್ಯಂತ ಮಹತ್ವದ ಪ್ರದೇಶವಾಗಿದ್ದು, ಇಲ್ಲಿ ಭಾರತದ ಹಿಡಿತದ ಪ್ರದರ್ಶನ ಅಗತ್ಯವಾಗಿದೆ ಎಂದು ಅಡ್ಮಿರಲ್​ ಜೋಶಿ ಹೇಳಿದ್ದಾರೆ.

ಈ ಅಭಿವೃದ್ಧಿ ಯೋಜನೆಯಿಂದ ನಿಕೋಬಾರ್​ ದ್ವೀಪಗಳನ್ನು ನಾಶಮಾಡಲಾಗುತ್ತಿದೆ ಎಂದು ವಿರೋಧ ಪಕ್ಷದ ನಾಯಕ ರಾಹುಲ್​ ಗಾಂಧಿ ಮಾಡಿರುವ ಆರೋಪಕ್ಕೆ ಪ್ರತಿಕ್ರಿಯಿಸಿರುವ ಜೋಶಿ, ನಿಕೋಬಾರ್ ಶೇ. 94 ರಷ್ಟು ಅರಣ್ಯ ಪ್ರದೇಶದಿಂದ ಕೂಡಿದೆ. ಆದರೆ ನಾವು ಈ ಅಭಿವೃದ್ಧಿ ಯೋಜನೆಗೆ ಕೇವಲ ಶೇ.1.8 ಅರಣ್ಯವನ್ನು ಮಾತ್ರ ಉಪಯೋಗಿಸಿ ಕೊಳ್ಳುತ್ತಿದ್ದವೆ ಎಂದಿದ್ದಾರೆ.