ರಾಗಾ ಇನ್‌ಫ್ಲೇಷನ್ ಮ್ಯಾನ್ ವಾಗ್ದಾಳಿಗೆ ನಿರ್ಮಲಾ ಕೌಂಟರ್! ದೇಶದ ಆರ್ಥಿಕತೆ ಸದೃಢವಾಗಿದೆ, ಸುಳ್ಳು ವದಂತಿ ಹರಡಬೇಡಿ: ವಿಪಕ್ಷಗಳ ವಿರುದ್ಧ ಹರಿಹಾಯ್ದ ವಿತ್ತ ಸಚಿವೆ! Nirmala Sitharaman

ಈ ಬಗ್ಗೆ ಸಿಡ್ಬಿ (SIDBI) ಸಂಸ್ಥೆಯ ಸಂಸ್ಥಾಪನಾ ದಿನಾಚರಣೆಯ 37ನೇ ವಾರ್ಷಿಕೋತ್ಸವದ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದ ನಿರ್ಮಲಾ, ಭಾರತದ ಆರ್ಥಿಕತೆಯು ಅತ್ಯಂತ ಸಕಾರಾತ್ಮಕವಾಗಿದ್ದು, ಯಾವುದೇ ಆಘಾತಗಳನ್ನು ತಡೆದುಕೊಳ್ಳುವಷ್ಟು ಸದೃಢವಾಗಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಅಲ್ಲದೆ, ದೇಶದ ಸಾಧನೆಗಳನ್ನು ಕುಗ್ಗಿಸಿ ಜನರಲ್ಲಿ ಅನಗತ್ಯ ಭಯ ಬಿತ್ತುತ್ತಿರುವ ವಿಪಕ್ಷಗಳ ನಕಾರಾತ್ಮಕ ಧೋರಣೆಯ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದ್ದಾರೆ. ಅಲ್ಲದೆ, ಪ್ರಧಾನಿ ನರೇಂದ್ರ ಮೋದಿ ಅವರ ಮಿತವ್ಯಯದ ಮನವಿಗಳ ನಂತರ ದೇಶದಲ್ಲಿ ಒಂದು ವರ್ಗವು ಹತಾಶೆಯ ವಾತಾವರಣ ಸೃಷ್ಟಿಸಲು ಯತ್ನಿಸುತ್ತಿದೆ ಎಂದು ಸಚಿವರು ಬೇಸರ ವ್ಯಕ್ತಪಡಿಸಿದ್ದಾರೆ.

ದೇಶದ ಆರ್ಥಿಕತೆ ಕುಸಿಯುತ್ತಿದೆ ಎಂಬ ವಿಪಕ್ಷಗಳ ನಿರಂತರ ಆರೋಪಗಳಿಗೆ ನೇರವಾಗಿಯೇ ಟಾಂಗ್ ನೀಡಿದ ನಿರ್ಮಲಾ, ಭಾರತದ ದೇಶೀಯ ಆರ್ಥಿಕ ಪರಿಸ್ಥಿತಿ ಇಂದಿಗೂ ಅತ್ಯಂತ ಸದೃಢವಾಗಿದೆ. ಆದರೆ ಎಲ್ಲವೂ ಮುಳುಗಿ ಹೋಗುತ್ತಿದೆ ಎಂಬಂತೆ ಬಿಂಬಿಸಲು ಕೆಲವು ನಕಾರಾತ್ಮಕ ಶಕ್ತಿಗಳು ತಕ್ಷಣವೇ ರಂಗಪ್ರವೇಶ ಮಾಡುತ್ತವೆ. ನಮ್ಮದೇ ದೇಶದ ಜನರ ಕಠಿಣ ಶ್ರಮ ಮತ್ತು ಸಾಧನೆಗಳನ್ನು ಅತ್ಯಂತ ವೇಗವಾಗಿ ಹೀಯಾಳಿಸುವ ಒಂದು ವರ್ಗ ಭಾರತದಲ್ಲಿದೆ. ಇಂತಹ ಸಿನಿಕತನದ ಮತ್ತು ನಿರಾಶಾದಾಯಕ ನಿರೂಪಣೆಯನ್ನು ಸೃಷ್ಟಿಸುವುದು ತಪ್ಪು. ಇದು ಕೇವಲ ಸಾರ್ವಜನಿಕರಲ್ಲಿ ಭಯವನ್ನು ಹುಟ್ಟುಹಾಕುವ ತಂತ್ರವಷ್ಟೇ. ಭಾರತವು ಇಂತಹ ಭಯದ ವಾತಾವರಣವನ್ನು ಸಹಿಸುವುದಿಲ್ಲ. ನಮ್ಮ ಮಾತುಗಳ ಮೂಲಕ ನಾವು ಜನರಲ್ಲಿ ಆತ್ಮವಿಶ್ವಾಸವನ್ನು ತುಂಬಬೇಕಿದೆಯೇ ಹೊರತು ದೃತಿಗೆಡಿಸಬಾರದು ಎಂದು ಖಡಕ್ ಆಗಿ ಹೇಳಿದ್ದಾರೆ.

ಜಾಗತಿಕ ಮಟ್ಟದಲ್ಲಿ ಕಚ್ಚಾ ತೈಲ ಬೆಲೆಗಳು ತೀವ್ರವಾಗಿ ಏರಿಕೆಯಾಗುತ್ತಿದ್ದರೂ, ಭಾರತದ ಜನಸಾಮಾನ್ಯರನ್ನು ಆರ್ಥಿಕ ಹೊರೆಯಿಂದ ರಕ್ಷಿಸಲು ಕೇಂದ್ರ ಸರ್ಕಾರವು ಈಗಾಗಲೇ ಪೆಟ್ರೋಲ್ ಮತ್ತು ಡೀಸೆಲ್ ಮೇಲಿನ ಕೇಂದ್ರ ಅಬಕಾರಿ ಸುಂಕವನ್ನು ಪ್ರತಿ ಲೀಟರ್‌ಗೆ 10 ರೂಪಾಯಿಗಳಷ್ಟು ಕಡಿತಗೊಳಿಸಿದೆ ಎಂದು ಸಚಿವರು ನೆನಪಿಸಿದ್ದಾರೆ.

ದೇಶದ ಪ್ರಸ್ತುತ ಆರ್ಥಿಕ ಸನ್ನಿವೇಶದ ಬಗ್ಗೆ ಮಾತನಾಡಿದ ಹಣಕಾಸು ಸಚಿವರು, ಜಾಗತಿಕ ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ ಭಾರತವು ಪ್ರಮುಖವಾಗಿ ಮೂರು ವಲಯಗಳ ಮೇಲೆ ತೀವ್ರ ನಿಗಾ ಇಡಬೇಕಾಗಿದೆ ಎಂದು ವಿವರಿಸಿದ್ದಾರೆ. ಇದನ್ನು ಅವರು '3 F' (Fuel - ಇಂಧನ, Fertiliser - ರಸಗೊಬ್ಬರ ಮತ್ತು Forex - ವಿದೇಶಿ ವಿನಿಮಯ) ಎಂದು ಕರೆದಿದ್ದಾರೆ.

ಕಚ್ಚಾ ತೈಲ ಬೆಲೆಗಳ ಜೊತೆಗೆ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ರಸಗೊಬ್ಬರಗಳ ಬೆಲೆಗಳು ಊಹಿಸಲಾಗದ ಮಟ್ಟಕ್ಕೆ ತಲುಪಿವೆ. ಮತ್ತೊಂದೆಡೆ, ಚಿನ್ನದ ಬೆಲೆಯು ಸಾರ್ವಕಾಲಿಕ ದಾಖಲೆ ಬರೆಯುತ್ತಿರುವುದು ವಿದೇಶಿ ವಿನಿಮಯದ ಮೇಲೆ ಕೆಲವು ಸವಾಲುಗಳನ್ನು ಸೃಷ್ಟಿಸಿದೆ. ಪ್ರಧಾನಿ ನರೇಂದ್ರ ಮೋದಿ ಅವರ ಇತ್ತೀಚಿನ ಮನವಿಗಳು ಸಹ ಇದೇ ಚೌಕಟ್ಟಿನಲ್ಲಿದ್ದವು ಎಂದು ಸಚಿವರು ಪ್ರತಿಪಾದಿಸಿದ್ದಾರೆ.

ಇದೇ ಸಂದರ್ಭದಲ್ಲಿ ದೇಶದ ಆರ್ಥಿಕತೆಯ ಬೆನ್ನೆಲುಬಾಗಿರುವ ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳ (MSME) ಆರ್ಥಿಕ ಬಿಕ್ಕಟ್ಟಿನ ಕುರಿತು ಕಳವಳ ವ್ಯಕ್ತಪಡಿಸಿದ ಸೀತಾರಾಮನ್, ದೇಶದ ಸಾರ್ವಜನಿಕ ವಲಯದ ಸಂಸ್ಥೆಗಳಲ್ಲಿ (PSUs) MSMEಗಳಿಗೆ ಸೇರಬೇಕಾದ ಬರೋಬ್ಬರಿ 8.1 ಲಕ್ಷ ಕೋಟಿ ರೂಪಾಯಿಗಳ ಪಾವತಿ ವಿಳಂಬವಾಗಿ ಬಾಕಿ ಉಳಿದಿದೆ. ಇದು ಅವರ ದುಡಿಯುವ ಬಂಡವಾಳ ಮತ್ತು ಬೆಳವಣಿಗೆಯ ಮೇಲೆ ತೀವ್ರ ಪರಿಣಾಮ ಬೀರುತ್ತಿದೆ. ಯಾವುದೇ ಸಾರ್ವಜನಿಕ ವಲಯದ ಸಂಸ್ಥೆಗಳು MSMEಗಳಿಗೆ ನೀಡಬೇಕಾದ ಬಾಕಿ ಹಣವನ್ನು 45 ದಿನಗಳ ಅವಧಿಗಿಂತ ಹೆಚ್ಚು ದಿನ ತಡೆಹಿಡಿಯಬಾರದು ಎಂದು ನಿರ್ಮಲಾ ಕಟ್ಟುನಿಟ್ಟಿನ ಆದೇಶ ನೀಡಿದ್ದಾರೆ.

ರಾಹುಲ್ ಗಾಂಧಿಯವರ ತೀವ್ರ ಟೀಕೆಗಳ ಬೆನ್ನಲ್ಲೇ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ನೀಡಿರುವ ಈ ಆರ್ಥಿಕ ಮುನ್ನೋಟ ಮತ್ತು ಅಂಕಿ-ಅಂಶಗಳ ವಿವರಣೆಗಳು, ದೇಶದ ಆರ್ಥಿಕತೆಯ ದಾರಿಯ ಕುರಿತು ಆಡಳಿತ ಮತ್ತು ವಿಪಕ್ಷಗಳ ನಡುವಿನ ರಾಜಕೀಯ ಜಟಾಪಟಿಯನ್ನು ಮತ್ತಷ್ಟು ರೋಚಕಗೊಳಿಸಿದೆ,(ಏಜೆನ್ಸೀಸ್​).