ಎಲ್ಲ ಬಿಳಿ ವಾಣಿಜ್ಯ ವಿಮಾನಗಳ ಪೈಕಿ ನ್ಯೂಜಿಲೆಂಡ್​ ಮಾತ್ರ ಕಪ್ಪು ಬಣ್ಣ! ವೈಟ್​-ಬ್ಲ್ಯಾಕ್​ ಹಿಂದಿದೆ ಉಳಿತಾಯದ ಲೆಕ್ಕಾಚಾರ | Commercial Airplanes

ನವದೆಹಲಿ: ಬಾನೆತ್ತರದಲ್ಲಿ ಹಕ್ಕಿಯಂತೆ ಹಾರಾಡುವ ದೊಡ್ಡ ವಿಮಾನಗಳನ್ನು ನೋಡುವುದೇ ಒಂದು ಚೆಂದ. ಇನ್ನು ಅದರೊಳಗೆ ಕುಳಿತು ನಾವೂ ಹಕ್ಕಿಗಳಂತೆ ಆಗಸದಲ್ಲಿ ಹಾರಾಡುವ ಅನುಭವವಂತು ನಿಜಕ್ಕೂ ಹೇಳತೀರದು. ನಮಗೆ ಗೊತ್ತಿರುವಂತೆ ಬಹುತೇಕ ಎಲ್ಲ ವಾಣಿಜ್ಯ ವಿಮಾನಗಳು ಬಿಳಿ ಬಣ್ಣದಲ್ಲೇ ಇರುತ್ತವೆ. ಅದರಲ್ಲೂ, ಕೆಲವು ಆಯಾ ಕೆಂಪು ಬಣ್ಣದ ಮಿಶ್ರಣವನ್ನು ಹೊಂದಿದ್ದೇ ಆದರೂ ವೈಟ್​ ಬಣ್ಣವೇ ಹೆಚ್ಚಾಗಿ ಬಳಸಲಾಗಿರುತ್ತೆ. ಆದರೆ, ನ್ಯೂಜಿಲೆಂಡ್​ ದೇಶದ ಫ್ಲೈಟ್​ಗಳು ಮಾತ್ರವೇ ಕಪ್ಪು ಬಣ್ಣದಲ್ಲಿ ಇರುವುದು ಎಂಬ ಸಂಗತಿ ನಿಜಕ್ಕೂ ಕುತೂಹಲ ಕೆರಳಿಸಿದೆ.

ವಿಮಾನಯಾನ ಸಂಸ್ಥೆಗಳು ಪ್ರಾಯೋಗಿಕ ಕಾರಣಗಳಿಂದಾಗಿ ಬಿಳಿ ಬಣ್ಣಕ್ಕೆ ಸೀಮಿತವಾಗಿವೆ. ಆದ್ರೆ, ಏರ್ ನ್ಯೂಜಿಲೆಂಡ್ ಮಾತ್ರ ಭಿನ್ನವಾಗಿದ್ದು, ಪೂರ ಕಪ್ಪು ಬಣ್ಣದಲ್ಲೇ ರೂಪಿಸಲಾಗಿದೆ. ವಾಸ್ತವವಾಗಿ, ಇದು ವಿಶ್ವದಲ್ಲೇ ಅತಿ ಹೆಚ್ಚು ಕಪ್ಪು ಬಣ್ಣ ಬಳಿದ ವಾಣಿಜ್ಯ ವಿಮಾನಗಳನ್ನು ಹೊಂದಿರುವ ವಿಮಾನಯಾನ ಸಂಸ್ಥೆ ಎಂದು ಗುರುತಿಸಲಾಗಿದೆ. ಬ್ಲ್ಯಾಕ್​ ಬಣ್ಣದ ಹಿಂದೆ ದೇಶದ ಸಂಸ್ಕೃತಿ, ಬ್ರ್ಯಾಂಡಿಂಗ್, ವಾಯುಯಾನ ವಿಜ್ಞಾನದ ರಸವಿದೆ ಎಂಬುದು ವಿಶೇಷ. 

ಇಲ್ಲಿ ನ್ಯೂಜಿಲೆಂಡ್​ ವಿಮಾನಗಳು ಕಪ್ಪು ಬಣ್ಣದಲ್ಲೇ ಏಕಿದೆ? ಎಂಬ ಪ್ರಶ್ನೆಗಿಂತಲೂ ಬಹುತೇಕ ಸಂಸ್ಥೆಗಳು ತಮ್ಮ ಫ್ಲೈಟ್​ಗಳಿಗೆ ಬಿಳಿ ಬಣ್ಣವನ್ನೇ ಏಕೆ ಬಳಕೆ ಮಾಡಿಕೊಂಡಿದೆ ಎಂಬುದರ ಬಗ್ಗೆ ತಿಳಿಯೋಣ. ವಿಮಾನಕ್ಕೆ ಬಣ್ಣ ಬಳಿಯುವುದು ಕೇವಲ ಲುಕ್​ಗೆ ಮಾತ್ರ ಸಂಬಂಧಿಸಿದ್ದಲ್ಲ. ಪ್ರತಿಯೊಂದು ಕಲರ್​ನ ಆಯ್ಕೆಯು ಅದರ ವೆಚ್ಚ, ಸುರಕ್ಷತೆ, ದಕ್ಷತೆ ಮತ್ತು ದೀರ್ಘಕಾಲೀನ ನಿರ್ವಹಣೆಯ ಮೇಲೆ ಪರಿಣಾಮ ಬೀರುತ್ತದೆ. ಹೀಗಾಗಿಯೇ, ಜಾಗತಿಕವಾಗಿ ವಿಮಾನಯಾನ ಸಂಸ್ಥೆಗಳು ಇನ್ನೂ ಬಿಳಿ ಬಣ್ಣವನ್ನೇ ತಮ್ಮ ಡೀಫಾಲ್ಟ್ ಕಲರ್​ ಆಗಿ ಬಳಸುತ್ತಿವೆ. 

ಬಿಳಿ ಬಣ್ಣಗಳು ಸೂರ್ಯನ ಕಿರಣಗಳನ್ನು ಹೀರಿಕೊಳ್ಳುವುದಿಲ್ಲ. ಇದು ವಿಮಾನವನ್ನು ಆದಷ್ಟು ಕೂಲ್​ ಆಗಿರಿಸುತ್ತದೆ. ಅದೇ ಕಪ್ಪು ಬಣ್ಣಗಳು ಬಿಸಿಲಿನ ಶಾಖವನ್ನು ಬೇಗ ಆವರಿಸುತ್ತವೆ. ಅದರಲ್ಲೂ, ಹೆಚ್ಚು ಸಮಯ ರನ್​ವೇಯಲ್ಲಿ ನಿಲ್ಲಿಸಿದ್ದಾಗ ತಾಪ ಕಾಡಲಾರಂಭಿಸುತ್ತೆ. ಬಣ್ಣದ ತೂಕ ಕೂಡ ವಿಮಾನ ಇಂಧನದ ಮೇಲೆ ಹೊಡೆತ ಬೀಳುತ್ತೆ ಎಂಬುದು ಗಮನಾರ್ಹ ವಿಷಯ. ಅಸಲಿಗೆ ಇದು ಸತ್ಯ.

ಬಿಳಿ ಬಣ್ಣಗಳು ಹಗುರವಾಗಿರುತ್ತೆ. ಹೀಗಾಗಿ, ಇದು ವಿಮಾನಗಳ ಹಾರಾಟವನ್ನು ಸುಗುಮವಾಗಿಸುತ್ತೆ. ಜತೆಗೆ ಇಂಧನ ಬಳಕೆಯನ್ನು ಕಡಿಮೆ ಮಾಡುತ್ತೆ. ಅದೇ ಕಪ್ಪು ಬಣ್ಣ ದೀರ್ಘಕಾಲ ಇರಬೇಕು ಎಂಬ ನಿಟ್ಟಿನಲ್ಲಿ ಎರಡು ಕೋಟಿಂಗ್​ನಲ್ಲಿ ಬಳೆಯಲಾಗುತ್ತೆ. ಇದು ವಿಮಾನದ ತೂಕದ ಮೇಲೆ ಪ್ರಭಾವ ಬೀರುತ್ತೆ. ಇದರಿಂದ ಅಧಿಕ ಇಂಧನ ಬಳಕೆ ಹಾಗೂ ಖರ್ಚು-ವೆಚ್ಚಗಳು ಕೂಡ ಜಾಸ್ತಿಯಾಗುತ್ತೆ ಎಂದು ವರದಿ ಉಲ್ಲೇಖಿಸಿದೆ. 

ವಿಮಾನಗಳಲ್ಲಿ ಸೇಫ್ಟಿ ಚೆಕಿಂಗ್​ಗಳು ದಿನನಿತ್ಯದ ಬಹುಮುಖ್ಯ ಕಾರ್ಯ. ಇಂಜಿನಿಯರ್​ಗಳು ಆಯಾ ಫ್ಲೈಟ್​ಗಳಲ್ಲಿ ಬಿರುಕು, ಆಯಿಲ್​ ಲೀಕ್​ ಸೇರಿದಂತೆ ಒಂದಷ್ಟು ಸಮಸ್ಯೆಗಳನ್ನು ಸುಲಭವಾಗಿ ಪತ್ತೆಹಚ್ಚಬಹುದು. ಇದು ಸಮಯ ಉಳಿಸುತ್ತದೆ ಹಾಗೂ ಸಿಬ್ಬಂದಿಗಳ ಕೆಲಸವನ್ನು ವೇಗವಾಗಿ ಮುಗಿಸಲು ಅನುವು ಮಾಡಿಕೊಡುತ್ತದೆ. 

ಬಿಸಿಲಿನ ಹೊಡೆತಕ್ಕೆ ಕಪ್ಪು ಬಣ್ಣಗಳು ಬೇಗ ಮಾಸುತ್ತದೆ. ಇದು ವಿಮಾನಕ್ಕೆ ರೀ-ಪೇಂಟಿಂಗ್ ಅಗತ್ಯವನ್ನು ಹೆಚ್ಚಿಸುತ್ತದೆ. ವಿಮಾನ ಹೊಸತು ಅಥವಾ ಚೆನ್ನಾಗಿದೆ ಎಂಬುದನ್ನು ಕಾಪಾಡಿಕೊಳ್ಳಲು ಆಗಾಗ್ಗೆ ಬಣ್ಣ ಹೊಡೆಯುವ ಅವಶ್ಯಕತೆಯಿದೆ. ಅದೇ ಬಿಳಿ ಕಲರ್​ ಒಂದು ಬಾರಿ ಬಳಕೆ ಮಾಡಿದರೆ ದೀರ್ಘಕಾಲ ಬಾಳಿಕೆ ಬರುತ್ತದೆ. ಇದು ಅನಗತ್ಯ ಖರ್ಚು-ವೆಚ್ಚವನ್ನು ಕಡಿತಗೊಳಿಸುತ್ತದೆ. ಈ ಎಲ್ಲ ಕಾರಣಗಳಿಂದಲೇ ಬಹುತೇಕ ವಾಯುಯಾನ ಸಂಸ್ಥೆಗಳು ಬಿಳಿ ಬಣ್ಣದ ಮೇಲೆ ಹೆಚ್ಚು ಅವಲಂಬಿತವಾಗಿದೆ. ಆದ್ರೆ, ನ್ಯೂಜಿಲೆಂಡ್​ ಇದ್ಯಾವುದಕ್ಕೂ ತಲೆಕೆಡಿಸಿಕೊಳ್ಳದೆ ತನ್ನದೇ ದಾಟಿಯನ್ನು ಅನುಸರಿಸುತ್ತಿದೆ,(ಏಜೆನ್ಸೀಸ್).