New Year ಸಂಭ್ರಮ ಎಲ್ಲರಿಗೂ ಒಂದೇ ಸಮಯದಲ್ಲಿ ಬರಲ್ಲ! ಮೊದಲೆಲ್ಲಿ ಆಚರಣೆ? ಕೊನೆಗೆ ಎಲ್ಲಿ ಗೊತ್ತೇ..?

ವಿಶ್ವದಲ್ಲೇ ಎಲ್ಲರಿಗಿಂತ ಮೊದಲು ಹೊಸ ವರ್ಷವನ್ನು ಸ್ವಾಗತಿಸುವ ಹೆಗ್ಗಳಿಕೆ ಪೆಸಿಫಿಕ್ ಸಾಗರದಲ್ಲಿರುವ ಪುಟ್ಟ ದ್ವೀಪ ರಾಷ್ಟ್ರ ಕಿರಿಬಾಟಿ (Kiribati) ಗೆ ಸಲ್ಲುತ್ತದೆ. ಕಿರಿಬಾಟಿಯ ಕಿರಿಟಿಮತಿ (Kiritimati) ಅಥವಾ ಕ್ರಿಸ್ಮಸ್ ದ್ವೀಪ ಎಂಬ ಪ್ರದೇಶದಲ್ಲಿ ಜಗತ್ತಿನ ಮೊದಲ ಹೊಸ ವರ್ಷಾಚರಣೆ ನಡೆಯುತ್ತದೆ.

ಭೌಗೋಳಿಕವಾಗಿ ಕಿರಿಬಾಟಿ ಅಂತರರಾಷ್ಟ್ರೀಯ ದಿನಾಂಕ ರೇಖೆಯ (International Date Line) ಅತ್ಯಂತ ಸಮೀಪದಲ್ಲಿದೆ. ಈ ದ್ವೀಪವು ಗ್ರೀನ್‌ವಿಚ್ ಮೀನ್ ಟೈಮ್‌ಗಿಂತ (GMT) 14 ಗಂಟೆಗಳು ಮುಂದಿದೆ. ಕುತೂಹಲಕಾರಿ ವಿಷಯವೆಂದರೆ, ಭಾರತೀಯ ಕಾಲಮಾನದ (IST) ಪ್ರಕಾರ ಡಿಸೆಂಬರ್ 31ರ ಮಧ್ಯಾಹ್ನ 3:30 ಗಂಟೆ ಆಗುವಷ್ಟರಲ್ಲೇ ಕಿರಿಬಾಟಿಯಲ್ಲಿ ಮಧ್ಯರಾತ್ರಿ 12 ಗಂಟೆಯಾಗಿ ಹೊಸ ವರ್ಷ ಆರಂಭವಾಗಿರುತ್ತದೆ. ಅಂದರೆ ಭಾರತಕ್ಕಿಂತ ಸುಮಾರು 8.5 ಗಂಟೆಗಳ ಕಾಲ ಮುಂಚಿತವಾಗಿ ಇಲ್ಲಿ ಜನ ಸಂಭ್ರಮ ಆಚರಿಸುತ್ತಾರೆ.

ಕಿರಿಬಾಟಿಯ ನಂತರ ಸುಮಾರು 15 ನಿಮಿಷಗಳ ಅಂತರದಲ್ಲಿ ನ್ಯೂಜಿಲೆಂಡ್‌ನ ಚಾಥಮ್ ದ್ವೀಪಗಳು ಹೊಸ ವರ್ಷವನ್ನು ಬರಮಾಡಿಕೊಳ್ಳುತ್ತವೆ. ಆ ಬಳಿಕ ಫಿಜಿ, ಟೋಂಗಾ ಮತ್ತು ರಷ್ಯಾದ ಕೆಲವು ಭಾಗಗಳಲ್ಲಿ ಸಂಭ್ರಮಾಚರಣೆ ಆರಂಭವಾಗುತ್ತದೆ. ಆಸ್ಟ್ರೇಲಿಯಾದ ಸಿಡ್ನಿ ನಗರದಲ್ಲಿ ನಡೆಯುವ ಅದ್ಧೂರಿ ಬಾಣಬಿರುಸುಗಳ ಪ್ರದರ್ಶನ ಇಡೀ ವಿಶ್ವದ ಗಮನ ಸೆಳೆಯುತ್ತದೆ.

ಜಗತ್ತಿನ ಮೊದಲ ಹೊಸ ವರ್ಷ ಕಿರಿಬಾಟಿಯಲ್ಲಿ ಆರಂಭವಾದರೆ, ಎಲ್ಲರಿಗಿಂತ ಕೊನೆಯದಾಗಿ ಅಮೆರಿಕದ ಅಧೀನದಲ್ಲಿರುವ ಅಮೆರಿಕನ್ ಸಮೋವಾ (American Samoa) ದ್ವೀಪಗಳಲ್ಲಿ ಹೊಸ ವರ್ಷ ಆರಂಭವಾಗುತ್ತದೆ. ಕಿರಿಬಾಟಿ ಮತ್ತು ಅಮೆರಿಕನ್ ಸಮೋವಾ ಭೌಗೋಳಿಕವಾಗಿ ಅಷ್ಟೇನು ದೂರವಿಲ್ಲದಿದ್ದರೂ, ದಿನಾಂಕ ರೇಖೆಯ ವ್ಯತ್ಯಾಸದಿಂದಾಗಿ ಈ ಎರಡು ಸ್ಥಳಗಳ ನಡುವೆ ಸುಮಾರು 25 ಗಂಟೆಗಳ ಸಮಯದ ವ್ಯತ್ಯಾಸವಿದೆ,(ಏಜೆನ್ಸೀಸ್​).