ನೀಟ್​ನಂಥ ರಾಷ್ಟ್ರಮಟ್ಟದ ಪರೀಕ್ಷೆಗಳು ರದ್ದಾದಾಗ ಅಥವಾ ಮರುಪರೀಕ್ಷೆ ನಿಗದಿಯಾದಾಗ ವಿದ್ಯಾರ್ಥಿಗಳು ಮತ್ತು ಅವರ ಪಾಲಕರು ಎದುರಿಸುವ ತೊಂದರೆಗಳು ನಿಜಕ್ಕೂ ಗಂಭೀರವಾದವು. ಇದು ಕೇವಲ ಒಂದು ಪರೀಕ್ಷೆಯ ಪ್ರಶ್ನೆಯಲ್ಲ, ಲಕ್ಷಾಂತರ ವಿದ್ಯಾರ್ಥಿಗಳ ಕನಸು ಮತ್ತು ಶ್ರಮದ ಜತೆ ವ್ಯವಸ್ಥೆ ಚೆಲ್ಲಾಟವಾಡಿದಂತೆ. ಈ ಬಾರಿ 22 ಲಕ್ಷಕ್ಕೂ ಅಧಿಕ ವಿದ್ಯಾರ್ಥಿಗಳು ನೀಟ್ ಬರೆದಿದ್ದರು. ತಮ್ಮದಲ್ಲದ ತಪ್ಪಿಗೆ ಈ ಲಕ್ಷಾಂತರ ವಿದ್ಯಾರ್ಥಿಗಳು ಮತ್ತು ಅವರ ಪಾಲಕರು ಶಿಕ್ಷೆ ಅನುಭವಿಸುವಂತಾಗಿದೆ. ವಿದ್ಯಾರ್ಥಿಗಳು ಈ ಪರೀಕ್ಷೆಗಾಗಿ ವರ್ಷಗಟ್ಟಲೇ ಹಗಲಿರುಳು ಶ್ರಮಿಸಿರುತ್ತಾರೆ. ಪರೀಕ್ಷೆ ಮುಗಿದ ನಂತರ ನಿರಾಳವಾಗಿದ್ದ ಸಮಯದಲ್ಲಿ ‘ಪರೀಕ್ಷೆ ರದ್ದಾಗಿದೆ’ ಎಂಬ ಸಂಗತಿಯೇ ತೀವ್ರ ಆಘಾತವನ್ನು ಮತ್ತು ಎನ್​ಟಿಎ ವಿರುದ್ಧ ಆಕ್ರೋಶವನ್ನು ಹುಟ್ಟುಹಾಕಿದೆ. ಮರು ಪರೀಕ್ಷೆಗಾಗಿ ಮತ್ತೆ ಓದಬೇಕು ಎಂಬುದು ಮಾನಸಿಕವಾಗಿ ದೊಡ್ಡ ಹೊರೆಯಾಗುತ್ತದೆ. ಪರೀಕ್ಷೆ ಮುಗಿದ ಮೇಲೆ ಹೆಚ್ಚಿನ ವಿದ್ಯಾರ್ಥಿಗಳು ಒತ್ತಡದಿಂದ ಹೊರಬರಲು ಪ್ರಯತ್ನಿಸುತ್ತಿರುತ್ತಾರೆ. ಹೀಗಿರುವಾಗ, ಇದ್ದ ಕ್ಕಿದ್ದಂತೆ ಜೂನ್​ನಲ್ಲಿ ಪರೀಕ್ಷೆ ಎಂದರೆ, ಮತ್ತೆ ಹಳೆಯ ವೇಗಕ್ಕೆ, ಲಯಕ್ಕೆ ಮರಳುವುದು ಕಷ್ಟವಾಗುತ್ತದೆ. ನೆನಪಿನ ಶಕ್ತಿ ಮತ್ತು ವಿಷಯಗಳ ಮೇಲಿನ ಹಿಡಿತ ಸ್ವಲ್ಪ ಮಟ್ಟಿಗೆ ಕಡಿಮೆಯಾಗುವ ಸಾಧ್ಯತೆ ಇರುತ್ತದೆ. ಅಲ್ಲದೆ, ಅನೇಕ ವಿದ್ಯಾರ್ಥಿಗಳು ದೂರದ ಊರುಗಳಿಂದ ಪರೀಕ್ಷಾ ಕೇಂದ್ರಗಳಿಗೆ ಬರಬೇಕಾಗುತ್ತದೆ. ಮರುಪರೀಕ್ಷೆ ಎಂದರೆ ಮತ್ತೆ ಪ್ರಯಾಣ ಮತ್ತು ಉಳಿದುಕೊಳ್ಳುವ ವೆಚ್ಚ ಭರಿಸಬೇಕಾಗುತ್ತದೆ. ಮರುಪರೀಕ್ಷೆಗಾಗಿ ಮತ್ತೆ ಕ್ರಾ್ಯಶ್ ಕೋರ್ಸ್​ಗಳು ಅಥವಾ ಟೆಸ್ಟ್ ಸೀರೀಸ್​ಗಳಿಗೆ ಸೇರಬೇಕಾಗಿ ಬಂದರೆ ಪಾಲಕರಿಗೆ ಆರ್ಥಿಕ ಹೊರೆ. ಪರೀಕ್ಷೆ ತಡವಾಗಿ ನಡೆದಷ್ಟೂ ಫಲಿತಾಂಶ ಮತ್ತು ಕೌನ್ಸಿಲಿಂಗ್ ಪ್ರಕ್ರಿಯೆ ವಿಳಂಬವಾಗುತ್ತದೆ. ಇದರಿಂದ ವೈದ್ಯಕೀಯ ಕಾಲೇಜುಗಳ ಮೊದಲ ವರ್ಷದ ತರಗತಿಗಳು ತಡವಾಗಿ ಆರಂಭವಾಗುತ್ತವೆ. ಇದು ಇಡೀ ಶೈಕ್ಷಣಿಕ ವರ್ಷದ ಮೇಲೆ ಪರಿಣಾಮ ಬೀರುತ್ತದೆ.

ನೀಟ್-ಯುಜಿ (ಘಚಠಿಜಿಟ್ಞಚ್ಝ ಉಜಿಜಜಿಚಿಜ್ಝಿಜಿಠಿಢ cಞ ಉಠ್ಟಿಚ್ಞ್ಚ ಖಛಿಠಠಿ ಖ್ಞಿಛಛ್ಟಿಜ್ಟಚಛ್ಠಚಠಿಛಿ)-ಇದು ಭಾರತದಲ್ಲಿ ವೈದ್ಯಕೀಯ ಶಿಕ್ಷಣಕ್ಕೆ ಇರುವ ಏಕೈಕ ಪ್ರವೇಶ ಪರೀಕ್ಷೆಯಾಗಿದೆ. ಇದನ್ನು ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ (ಎನ್​ಟಿಎ) ನಡೆಸುತ್ತದೆ. ಎಂಬಿಬಿಎಸ್, ಬಿಡಿಎಸ್, ಆಯುಷ್ ಅಥವಾ ನರ್ಸಿಂಗ್ ಕೋರ್ಸ್​ಗಳಿಗೆ ಸೇರಲು ಈ ಪರೀಕ್ಷೆಯನ್ನು ಬರೆಯುವುದು ಕಡ್ಡಾಯ. ಸರ್ಕಾರಿ ಮತ್ತು ಖಾಸಗಿ ವೈದ್ಯಕೀಯ ಕಾಲೇಜುಗಳಲ್ಲಿ ಸೀಟು ಪಡೆಯಲು ಈ ಪರೀಕ್ಷೆಯ ಅಂಕಗಳೇ ಆಧಾರ. ನೀಟ್ ಪರೀಕ್ಷೆಯು ಪೆನ್ ಮತ್ತು ಪೇಪರ್​ವಾದರಿಯಲ್ಲಿ ನಡೆಯುತ್ತದೆ.

ಅಭ್ಯರ್ಥಿಗಳು 12ನೇ ತರಗತಿಯಲ್ಲಿ (ಪಿಯುಸಿ) ಭೌತಶಾಸ್ತ್ರ, ರಸಾಯನಶಾಸ್ತ್ರ, ಮತ್ತು ಜೀವಶಾಸ್ತ್ರ ವಿಷಯಗಳನ್ನು ಅಧ್ಯಯನ ಮಾಡಿರಬೇಕು. ಸಾಮಾನ್ಯ ವರ್ಗದವರು ಕನಿಷ್ಠ 50% ಅಂಕಗಳನ್ನು ಮತ್ತು ಮೀಸಲಾತಿ ವರ್ಗದವರು 40% ಅಂಕಗಳನ್ನು ಈ ವಿಷಯಗಳಲ್ಲಿ ಪಡೆದಿರಬೇಕು. ದ್ವಿತೀಯ ಪಿಯು ಪಾಸ್ ಆಗಿರುವ ವರ್ಷದ ಡಿಸೆಂಬರ್ 31ಕ್ಕೆ ಕನಿಷ್ಠ 17 ವರ್ಷ ತುಂಬಿರಬೇಕು.

ಎನ್​ಟಿಎ ಅಧಿಕೃತ ವೆಬ್​ಸೈಟ್​ನಲ್ಲಿ ಆನ್​ಲೈನ್ ಮೂಲಕ ಅರ್ಜಿ ಸಲ್ಲಿಸಬೇಕು. ಇಲ್ಲಿ ವಿದ್ಯಾರ್ಥಿಯ ಮಾಹಿತಿ, ಶೈಕ್ಷಣಿಕ ದಾಖಲೆಗಳು ಮತ್ತು ಫೋಟೋಗಳನ್ನು ಅಪ್​ಲೋಡ್ ಮಾಡಬೇಕು. ಭೌತಶಾಸ್ತ್ರ, ರಸಾಯನಶಾಸ್ತ್ರ, ಸಸ್ಯಶಾಸ್ತ್ರ ಮತ್ತು ಪ್ರಾಣಿಶಾಸ್ತ್ರ ವಿಷಯಗಳಿಗೆ ಪರೀಕ್ಷೆ ನಡೆಯುತ್ತದೆ. ಒಟ್ಟು 200 ಪ್ರಶ್ನೆಗಳಿರುತ್ತವೆ, ಅದರಲ್ಲಿ 180 ಪ್ರಶ್ನೆಗಳಿಗೆ ಉತ್ತರಿಸಬೇಕು. ಒಟ್ಟು ಅಂಕಗಳು 720. ಪ್ರತಿ ಸರಿಯಾದ ಉತ್ತರಕ್ಕೆ 4 ಅಂಕಗಳು ಸಿಕ್ಕರೆ, ಪ್ರತಿ ತಪ್ಪು ಉತ್ತರಕ್ಕೆ 1 ಅಂಕ ಕಳೆಯಲಾಗುತ್ತದೆ. ಪರೀಕ್ಷಾ ಅವಧಿ 3 ಗಂಟೆ 20 ನಿಮಿಷಗಳು. ಪರೀಕ್ಷೆಯ ನಂತರ ಎನ್​ಟಿಎ ಫಲಿತಾಂಶವನ್ನು ಪ್ರಕಟಿಸುತ್ತದೆ. ಪ್ರತಿ ವರ್ಷ ಪರೀಕ್ಷೆಯ ಕಠಿಣತೆ ಮತ್ತು ಅಭ್ಯರ್ಥಿಗಳ ಸಂಖ್ಯೆಗೆ ಅನುಗುಣವಾಗಿ ಕಟ್-ಆಫ್ ಅಂಕಗಳು ನಿರ್ಧಾರವಾಗುತ್ತವೆ. ಫಲಿತಾಂಶ ಬಂದ ನಂತರ ಸೀಟು ಹಂಚಿಕೆ ಪ್ರಕ್ರಿಯೆ ಆರಂಭವಾಗುತ್ತದೆ. ದೇಶಾದ್ಯಂತ ಇರುವ ಎಲ್ಲ ಸರ್ಕಾರಿ ಕಾಲೇಜುಗಳ 15% ಸೀಟುಗಳಿಗೆ ‘ಮೆಡಿಕಲ್ ಕೌನ್ಸೆಲಿಂಗ್ ಕಮಿಟಿ’ (ಎಂಸಿಸಿ) ಕೌನ್ಸೆಲಿಂಗ್ ನಡೆಸುತ್ತದೆ. ಆಯಾ ರಾಜ್ಯದ ವಿದ್ಯಾರ್ಥಿಗಳಿಗಾಗಿ ಇರುವ 85% ಸೀಟುಗಳಿಗೆ ಆಯಾ ರಾಜ್ಯ ಸರ್ಕಾರಗಳು (ಕರ್ನಾಟಕದಲ್ಲಿ ಓಚ್ಟ್ಞಠಿಚkಚ ಉಚಞಜ್ಞಿಚಠಿಜಿಟ್ಞಠ ಅಠಿಜಟ್ಟಜಿಠಿಢ) ಕೌನ್ಸೆಲಿಂಗ್ ನಡೆಸುತ್ತವೆ.

ಪ್ರಶ್ನೆಪತ್ರಿಕೆ ಸೋರಿಕೆಯಂತಹ ಘಟನೆಗಳು ನಡೆದಾಗ ಪ್ರಾಮಾಣಿಕವಾಗಿ ಓದಿದ ವಿದ್ಯಾರ್ಥಿಗಳಿಗೆ ವ್ಯವಸ್ಥೆಯ ಮೇಲೆ ಬೇಸರ ಮೂಡುವುದು ಸ್ವಾಭಾವಿಕ. ಜೂನ್ ತಿಂಗಳಲ್ಲಿ ಇತರ ರಾಜ್ಯ ಮಟ್ಟದ ಪ್ರವೇಶ ಪರೀಕ್ಷೆಗಳು ಅಥವಾ ಇತರ ಕೋರ್ಸ್​ಗಳ ಪ್ರವೇಶಾತಿ ಪ್ರಕ್ರಿಯೆಗಳು ನಡೆಯುತ್ತಿರುತ್ತವೆ. ನೀಟ್ ಮರುಪರೀಕ್ಷೆಯ ದಿನಾಂಕವು ಇವುಗಳೊಂದಿಗೆ ಸಂಘರ್ಷಕ್ಕೀಡಾಗುವ ಸಾಧ್ಯತೆ ಇರುತ್ತದೆ, ಇದು ವಿದ್ಯಾರ್ಥಿಗಳಲ್ಲಿ ಗೊಂದಲ ಮೂಡಿಸುತ್ತದೆ.

ನೀಟ್ ಪರೀಕ್ಷೆ ಪ್ರಶ್ನೆಪತ್ರಿಕೆ ಸೋರಿಕೆಗೆ ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆಯ (ಎನ್​ಟಿಎ) ಬೇಜವಾಬ್ದಾರಿ ಕಾರಣ. ಇದು ತಾಂತ್ರಿಕ ದೋಷವಲ್ಲ, ಮನುಷ್ಯ ನಿರ್ವಿುತ ದುರಂತ. ಲಕ್ಷಾಂತರ ವಿದ್ಯಾರ್ಥಿಗಳ ಪರಿಶ್ರಮ ಹಾಗೂ ಅವರ ಪಾಲಕರ ಕನಸಿಗೆ ಎಸಗಿದ ದ್ರೋಹ. ಪರೀಕ್ಷಾ ವ್ಯವಸ್ಥೆಯ ಪಾವಿತ್ರ್ಯ ಕಾಪಾಡುವಲ್ಲಿ ಎನ್​ಟಿಎ ಸಂಪೂರ್ಣ ವಿಫಲವಾಗಿದೆ. ಈ ಹಗರಣದ ತನಿಖೆ ಕೇವಲ ಮೇಲ್ಪದರದಲ್ಲಿ ನಡೆಯಬಾರದು. ಇದರ ಹಿಂದಿರುವ ಕಾಣದ ಕೈಗಳನ್ನು ಪತ್ತೆಹಚ್ಚಿ ಕಠಿಣ ಶಿಕ್ಷೆ ವಿಧಿಸಬೇಕು. ನ್ಯಾಯ ವಿಳಂಬವಾದರೆ ಅದು ಅನ್ಯಾಯಕ್ಕೆ ಸಮಾನ. ಆದ್ದರಿಂದ ಪ್ರಕರಣದ ವಿಚಾರಣೆಯು ‘ತ್ವರಿತ ಗತಿ ನ್ಯಾಯಾಲಯ’ದಲ್ಲಿ ನಡೆದು, ವರ್ಷದ ಒಳಗಾಗಿ ತಪ್ಪಿತಸ್ಥರಿಗೆ ಕಠಿಣ ಶಿಕ್ಷೆ ಪ್ರಕಟವಾಗಬೇಕು. ಶಿಕ್ಷೆಯಾಗಿರುವುದನ್ನು ದೇಶದ ಜನರಿಗೆ ಗೊತ್ತಾಗುವಂತೆ ಮಾಡಬೇಕು. ಆಗ ಮಾತ್ರ ವ್ಯವಸ್ಥೆಯ ಮೇಲೆ ಜನರಿಗೆ ಮತ್ತೆ ನಂಬಿಕೆ ಬರಲು ಸಾಧ್ಯ. ಈ ಸಂಕಷ್ಟದ ಸಮಯದಲ್ಲಿ ವಿದ್ಯಾರ್ಥಿಗಳು ಧೈರ್ಯಗೆಡಬಾರದು. ಮರು ಪರೀಕ್ಷೆ ಬರೆಯುವುದು ಅನಿವಾರ್ಯ. ಜೂನ್ 21ಕ್ಕೆ ಮರು ಪರೀಕ್ಷೆ ನಿಗದಿಯಾಗಿದೆ. ಸತತ ಪರಿಶ್ರಮ ಎಂದಿಗೂ ವ್ಯರ್ಥವಾಗುವುದಿಲ್ಲ. ವ್ಯವಸ್ಥೆಯ ತಪ್ಪುಗಳಿಗೆ ನಿಮ್ಮ ಪ್ರತಿಭೆಯನ್ನು ಬಲಿಗೊಡಬೇಡಿ. ಪಾಲಕರು ಮತ್ತು ಶಿಕ್ಷಕರು ಈ ಹಂತದಲ್ಲಿ ಮಕ್ಕಳಿಗೆ ಬೆನ್ನೆಲುಬಾಗಿ ನಿಲ್ಲಬೇಕು. ಪರೀಕ್ಷೆ ಎದುರಿಸಲು ಮಕ್ಕಳಿಗೆ ಮಾನಸಿಕ ಸ್ಥೈರ್ಯ ತುಂಬಬೇಕು. ಈ ಹಿಂದೆ ಹಲವು ಪ್ರಮುಖ ಪರೀಕ್ಷೆಗಳ ಪ್ರಶ್ನೆಪತ್ರಿಕೆಗಳು ಸೋರಿಕೆಯಾಗಿವೆ. ಆದರೆ ನಂತರ ತಪ್ಪಿತಸ್ಥರಿಗೆ ಏನು ಶಿಕ್ಷೆಯಾಗಿದೆ ಎಂಬುದು ಯಾರಿಗೂ ಗೊತ್ತಿಲ್ಲ. ಅದರಂತೆ ಈ ಪ್ರಕರಣವೂ ಮರೆತು ಹೋಗಬಾರದು. ಮುಂದಿನ ವರ್ಷದ ಸಿಇಟಿ ಪರೀಕ್ಷೆಯೊಳಗೆ ಈ ಪ್ರಕರಣದಲ್ಲಿ ಗಂಭೀರ ಕ್ರಮ ಆದರೆ ಮಾತ್ರ ಮುಂಬರುವ ಪರೀಕ್ಷೆ ಸುಸೂತ್ರವಾಗಿ ನಡೆಯಲು ಸಾಧ್ಯ.

ದ್ವಿತೀಯ ಪಿಯುಸಿ ರಸಾಯನಶಾಸ್ತ್ರ ಪ್ರಶ್ನೆಪತ್ರಿಕೆ ಸೋರಿಕೆ ಪ್ರಕರಣವು ಕರ್ನಾಟಕದ ಮಟ್ಟಿಗೆ ಅತಿದೊಡ್ಡ ಪ್ರಶ್ನೆಪತ್ರಿಕೆ ಸೋರಿಕೆ ಪ್ರಕರಣವಾಗಿ ಉಳಿದಿದೆ. ಆದರೆ, ಅಪರಾಧಿಗಳಿಗೆ ಕಠಿಣ ಶಿಕ್ಷೆಯಾಗದಿರುವುದು ವ್ಯವಸ್ಥೆಯ ಲೋಪಕ್ಕೆ ನಿದರ್ಶನವಾಗಿದೆ. 2016ರ ಮಾರ್ಚ್ 21ರಂದು ನಿಗದಿಯಾಗಿದ್ದ ರಸಾಯನಶಾಸ್ತ್ರ ಪ್ರಶ್ನೆಪತ್ರಿಕೆಯು, ಪರೀಕ್ಷೆ ಆರಂಭವಾಗುವ ಎರಡು ಗಂಟೆಗಳ ಮೊದಲು ವಾಟ್ಸ್​ಆಪ್ ಮೂಲಕ ಸೋರಿಕೆಯಾಗಿತ್ತು. ಕೂಡಲೇ ಪರೀಕ್ಷೆಯನ್ನು ರದ್ದುಗೊಳಿಸಿ ಮಾರ್ಚ್ 31ಕ್ಕೆ ಮುಂದೂಡಲಾಗಿತ್ತು. ಎರಡನೇ ಬಾರಿಗೂ ಪ್ರಶ್ನೆಪತ್ರಿಕೆ ಸೋರಿಕೆಯಾಯಿತು. ಬಳಿಕ ಮೂರನೇ ಬಾರಿಗೆ ಪರೀಕ್ಷೆಯನ್ನು ಯಶಸ್ವಿಯಾಗಿ ನಡೆಸಲಾಯಿತು. 2.74 ಲಕ್ಷ ವಿದ್ಯಾರ್ಥಿಗಳು ಪರೀಕ್ಷೆಗೆ ಹಾಜರಾಗಿದ್ದರು. ಪ್ರಕರಣದ ತನಿಖಾ ಹೊಣೆಯನ್ನು ಸಿಐಡಿಗೆ ವಹಿಸಲಾಯಿತು. ಬೆಂಗಳೂರಿನ ರಾಜಾಜಿನಗರದಲ್ಲಿ ಟ್ಯೂಷನ್ ನಡೆಸುತ್ತಿದ್ದ ಶಿವಕುಮಾರ್ ಅಲಿಯಾಸ್ ಶಿವಕುಮಾರಯ್ಯ ಎಂಬಾತನನ್ನು ಕಿಂಗ್ ಪಿನ್ ಎಂದು ಗುರುತಿಸಿ ಅವನ ಜತೆಗೆ ಇತರ 18 ಮಂದಿಯನ್ನು ಬಂಧಿಸಲಾಯಿತು. ಪದವಿಪೂರ್ವ ಶಿಕ್ಷಣ ಇಲಾಖೆಯ ಮುಖ್ಯ ಕಚೇರಿಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಹಾಗೂ ಪ್ರಶ್ನೆಪತ್ರಿಕೆ ಖಜಾನೆ ವಿಭಾಗದಲ್ಲಿದ್ದ 40 ಸಿಬ್ಬಂದಿಯನ್ನು ಅಮಾನತು ಮಾಡಲಾಯಿತು. ಬಳಿಕ ಈ ಸಿಬ್ಬಂದಿಯನ್ನು ಹೆಡ್ ಆಫೀಸ್​ನಿಂದ ಬೇರೆ ಕಡೆ ವರ್ಗಾವಣೆ ಮಾಡಲಾಯಿತು. ಅಂದಿನ ಪಿಯು ಇಲಾಖೆ ನಿರ್ದೇಶಕಿಯನ್ನು ಬೇರೆಡೆಗೆ ಎತ್ತಂಗಡಿ ಮಾಡಲಾಯಿತು. ಎಂಟು ವರ್ಷಗಳ ನಂತರ (2024) ಸಾಕ್ಷ್ಯಧಾರ ಕೊರತೆ ಕಾರಣ ನೀಡಿ ಪ್ರಕರಣದ ಪ್ರಮುಖ ಆರೋಪಿಯನ್ನೂ ಸೇರಿ 19 ಆರೋಪಿಗಳನ್ನು ಖುಲಾಸೆಗೊಳಿಸಲಾಯಿತು.

ತಾಂತ್ರಿಕ ಲೋಪಗಳು: ಪ್ರಶ್ನೆಪತ್ರಿಕೆ ಗಳನ್ನು ಸಾಗಿಸುವಾಗ ಮತ್ತು ಸ್ಟ್ರಾಂಗ್ ರೂಮ್ಳಲ್ಲಿ ಇರಿಸು ವಾಗ ಪಾಲಿಸಬೇಕಾದ ಕಟ್ಟುನಿಟ್ಟಿನ ನಿಯಮಗಳ ಉಲ್ಲಂಘನೆಯಾಗಿದೆ.

ಖಾಸಗಿ ಏಜೆನ್ಸಿಗಳ ಹಸ್ತಕ್ಷೇಪ: ಪರೀಕ್ಷಾ ಕೇಂದ್ರಗಳ ನಿರ್ವಹಣೆ ಮತ್ತು ಪ್ರಶ್ನೆಪತ್ರಿಕೆ ವಿತರಣೆಯಲ್ಲಿ ತೊಡಗಿರುವ ಕೆಲವು ಖಾಸಗಿ ವ್ಯಕ್ತಿಗಳು ಅಥವಾ ಸಂಸ್ಥೆಗಳು ಭ್ರಷ್ಟಾಚಾರಕ್ಕೆ ಕೈಹಾಕಿರುವುದು. ಕೆಲವು ಪರೀಕ್ಷಾ ಕೇಂದ್ರದ ಸಿಬ್ಬಂದಿ ಮತ್ತು ಜಿಲ್ಲಾ ಮಟ್ಟದ ಅಧಿಕಾರಿಗಳು ಪೇಪರ್ ಲೀಕ್ ಮಾಫಿಯಾ ಜೊತೆ ಕೈಜೋಡಿಸಿರುವುದು.

ಕಣ್ಗಾವಲಿನ ಕೊರತೆ: ಡಿಜಿಟಲ್ ಲಾಕ್​ಗಳು ಮತ್ತು ಸಿಸಿಟಿವಿ ಕ್ಯಾಮರಾಗಳ ನಿರಂತರ ನಿಗಾ ಇರುವಲ್ಲಿ ವೈಫಲ್ಯ ಉಂಟಾಗಿರುವುದು.

ಪ್ರಸ್ತುತ ಸ್ಥಿತಿ: ಸರ್ಕಾರವು ಹೊಸದಾಗಿ ‘ಸಾರ್ವಜನಿಕ ಪರೀಕ್ಷೆಗಳ (ಅನ್ಯಾಯದ ವಿಧಾನಗಳ ತಡೆಗಟ್ಟುವಿಕೆ) ಕಾಯ್ದೆ-2024’ ಅನ್ನು ಜಾರಿಗೆ ತಂದಿದೆ. ಪರೀಕ್ಷಾ ಅಕ್ರಮ ಎಸಗುವವರಿಗೆ ಇದರ ಅಡಿಯಲ್ಲಿ 10 ವರ್ಷದವರೆಗೆ ಜೈಲು ಶಿಕ್ಷೆ ಮತ್ತು 1 ಕೋಟಿ ರೂಪಾಯಿವರೆಗೆ ದಂಡ ವಿಧಿಸುವ ಅವಕಾಶವಿದೆ.