ನೀಟ್ ಮರುಪರೀಕ್ಷೆಗೂ ಮುನ್ನ ಟೆಲಿಗ್ರಾಮ್‌ಗೆ ಕೇಂದ್ರದ ಶಾಕ್: ಸರ್ಕಾರದ ಕಠಿಣ ನಿರ್ಧಾರವನ್ನು ಸ್ವಾಗತಿಸಿದ ಎನ್‌ಟಿಎ! NEET-UG 2026

ಪರೀಕ್ಷಾ ಅವಧಿ ಮತ್ತು ಅದರ ತಕ್ಷಣದ ಪರಿಣಾಮಗಳನ್ನು ಒಳಗೊಂಡಂತೆ ಜೂನ್ 22 ರವರೆಗೆ ಭಾರತದಲ್ಲಿ ಟೆಲಿಗ್ರಾಮ್ ಪ್ರವೇಶವನ್ನು ತಾತ್ಕಾಲಿಕವಾಗಿ ನಿರ್ಬಂಧಿಸಲು ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯ ನಿರ್ದೇಶಿಸಿದೆ ಎಂದು ಎನ್​ಟಿಎ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ. ಆದಾಗ್ಯೂ, ಜೂನ್​ 30ರವೆಗೆ ಭಾರತದಲ್ಲಿ ಈ ಸಂದೇಶ- ಸಂಪಾದನಾ ವೈಶಿಷ್ಟ್ಯವನ್ನು ನಿಷ್ಕ್ರಿಯಗೊಳಿಸುವಂತೆ ಸಚಿವಾಲಯವು ವೇದಿಕೆಗೆ ನಿರ್ದೆಶನ ನೀಡಿದೆ.

ನೀಟ್ ಅಭ್ಯರ್ಥಿಗಳನ್ನು ವಂಚಿಸಲು ಟೆಲಿಗ್ರಾಮ್ ಆ್ಯಪ್ ಅನ್ನು ವ್ಯವಸ್ಥಿತವಾಗಿ ಬಳಸಿಕೊಳ್ಳುತ್ತಿರುವುದೇ ಈ ಕಟ್ಟುನಿಟ್ಟಿನ ಕ್ರಮಕ್ಕೆ ಮುಖ್ಯ ಕಾರಣ ಎಂದು ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ ಸ್ಪಷ್ಟಪಡಿಸಿದೆ. ಹಲವಾರು ನಕಲಿ ಟೆಲಿಗ್ರಾಮ್ ಚಾನೆಲ್‌ಗಳು ಮುಂಬರುವ ಮರುಪರೀಕ್ಷೆಯ ಪ್ರಶ್ನೆಪತ್ರಿಕೆಗಳನ್ನು ಮುಂಚಿತವಾಗಿಯೇ ಕೊಡುವುದಾಗಿ ಅಭ್ಯರ್ಥಿಗಳಿಗೆ ಸುಳ್ಳು ಭರವಸೆ ನೀಡುತ್ತಿದ್ದವು. ಪರೀಕ್ಷಾ ಪತ್ರಿಕೆಗಳನ್ನು ನೀಡುವ ಆಮಿಷ ಒಡ್ಡಿ ಈ ಚಾನೆಲ್‌ಗಳು ವಿದ್ಯಾರ್ಥಿಗಳಿಂದ ಮತ್ತು ಅವರ ಕುಟುಂಬದವರಿಂದ ಭಾರಿ ಪ್ರಮಾಣದ ಹಣವನ್ನು ಬೇಡಿಕೆ ಇಡುತ್ತಿದ್ದು, ಇದನ್ನು ವಂಚನೆ ಎಂದು ಎನ್​ಟಿಎ ಬಣ್ಣಸಿದೆ.

ಟೆಲಿಗ್ರಾಮ್‌ನಲ್ಲಿ ಹಳೆಯ ಸಂದೇಶಗಳನ್ನು ಎಡಿಟ್ ಮಾಡಿದರೂ ಮೂಲ ಸಮಯ ಬದಲಾಗುವುದಿಲ್ಲ. ಇದರ ಲಾಭ ಪಡೆಯುವ ವಂಚಕರು, ಪರೀಕ್ಷೆ ಮುಗಿದ ನಂತರ ಹಳೆಯ ಸಂದೇಶಗಳ ಜಾಗದಲ್ಲಿ ಪ್ರಶ್ನೆಪತ್ರಿಕೆ ಸೇರಿಸಿ, 'ಪರೀಕ್ಷೆಗೂ ಮುನ್ನವೇ ಪೇಪರ್ ಲೀಕ್ ಆಗಿತ್ತು' ಎಂದು ಬಿಂಬಿಸುವ ಸುಳ್ಳು ಪುರಾವೆ ಸೃಷ್ಟಿಸುತ್ತಿದ್ದರು. ಇಂತಹ ಕಲ್ಪಿತ ಕಾಗದ ಸೋರಿಕೆ ವದಂತಿಗಳು ಮತ್ತು ಗೊಂದಲಗಳಿಗೆ ತಡೆಹಾಕಲು ಈ ಕಠಿಣ ಕ್ರಮ ಕೈಗೊಳ್ಳಲಾಗಿದೆ ಎಂದು ಎನ್‌ಟಿಎ ತಿಳಿಸಿದೆ.

ನಿರ್ಬಂಧಗಳು ಕಾನೂನುಬದ್ಧ ಟೆಲಿಗ್ರಾಮ್ ಬಳಕೆದಾರರಿಗೆ ಅನಾನುಕೂಲವನ್ನುಂಟು ಮಾಡುತ್ತದೆ ಎಂದು ಸಂಸ್ಥೆ ಒಪ್ಪಿಕೊಂಡಿದ್ದು, ಈ ಕ್ರಮಗಳು ಅವಧಿಗೆ ಸೀಮಿತವಾಗಿರುವುದರಿಂದ ಪರೀಕ್ಷೆಯ ಸಮಗ್ರತೆಯನ್ನು ರಕ್ಷಿಸಲು ಅಗತ್ಯವಾಗಿದೆ ಎಂದು ಎನ್​ಟಿಎ ಸೂಚನೆ ನೀಡಿದೆ. ಆದಾಗ್ಯೂ, ಜೂನ್​ 21 ರಂದು ನಿಗದಿಯಂತೆ NEET-UG 2026 ಮರುಪರೀಕ್ಷೆಯನ್ನು ನಡೆಸಲಾಗುತ್ತದೆ. ಅದಕ್ಕಾಗಿ ಅಭ್ಯರ್ಥಿಗಳು ನವೀಕರಣಗಳಿಗಾಗಿ ಅಧಿಕೃತ ಎನ್​ಟಿಎ ಚಾನೆಲ್​ಗಳನ್ನು ಮಾತ್ರ ಅವಲಂಬಿಸುವಂತೆ ಒತ್ತಾಯಿಸಲಾಯಿತು.

ನೀಟ್ (NEET-UG 2026) ಮರುಪರೀಕ್ಷೆಯ ಸಂದರ್ಭದಲ್ಲಿ ಎದುರಾಗಿದ್ದ ಡಿಜಿಟಲ್ ವಂಚನೆ ಮತ್ತು ಸಂಘಟಿತ ಸೈಬರ್ ಅಪರಾಧಗಳನ್ನು ಯಶಸ್ವಿಯಾಗಿ ನಿಭಾಯಿಸಿದ್ದಕ್ಕಾಗಿ ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆಯು (NTA) ದೇಶದ ಪ್ರಮುಖ ಭದ್ರತಾ ಮತ್ತು ತಾಂತ್ರಿಕ ಸಂಸ್ಥೆಗಳಿಗೆ ಕೃತಜ್ಞತೆ ಸಲ್ಲಿಸಿದೆ (ಏಜೆನ್ಸೀಸ್​).