ಪಠ್ಯಪುಸ್ತಕದಲ್ಲಿ ಇತಿಹಾಸ ತಿರುಚಿದ ಆಕ್ರೋಶ; ಕೊನೆಗೂ ಎಚ್ಚೆತ್ತುಕೊಂಡು ತಪ್ಪು ತಿದ್ದಿಕೊಂಡ NCERT!

ಈ ಕುರಿತು ಎನ್‌ಸಿಇಆರ್‌ಟಿ ನಿರ್ದೇಶಕ ದಿನೇಶ್ ಸಕ್ಲಾನಿ ಮಾಹಿತಿ ನೀಡಿದ್ದು, ಪಠ್ಯಪುಸ್ತಕದಲ್ಲಿನ ಚಿತ್ರದ ಕುರಿತು ವಿವಾದ ಸೃಷ್ಟಿಯಾಗುತ್ತಿದ್ದಂತೆ ಸಂಬಂಧಪಟ್ಟ ಇಲಾಖೆಗೆ ಈ ವಿಷಯವನ್ನು ಮರುಪರಿಶೀಲಿಸುವಂತೆ ಸೂಚಿಸಲಾಗಿತ್ತು. ಈ ವಿಷಯವನ್ನು ತಜ್ಙರೊಂದಿಗೆ ಸಮಾಲೋಚನೆ ನಡೆಸಿದ ನಂತರ, ಮಾರ್ಪಡಿಸಲಾದ ಡ್ಯಾನ್ಸಿಂಗ್ ಗರ್ಲ್ ಚಿತ್ರದ ಬದಲಿಗೆ ಮೂಲ ಆವೃತ್ತಿಯ ಚಿತ್ರವನ್ನೇ ಮರುಬಳಕೆ ಮಾಡಲು ತೀರ್ಮಾನಿಸಲಾಗಿದೆ ಎಂದು ಅವರು ತಿಳಿಸಿದ್ದಾರೆ.

ಎನ್​ಸಿಇಆರ್​ಟಿ ಪ್ರಕಾರ, ಪಠ್ಯಪುಸ್ತಕದ ಆನ್‌ಲೈನ್ ಆವೃತ್ತಿಯಲ್ಲಿ ತಿದ್ದುಪಡಿಯನ್ನು ತಕ್ಷಣವೇ ಮಾಡಲಾಗುವುದು, ಆದರೆ ಪರಿಷ್ಕೃತ ಚಿತ್ರವನ್ನು ಭವಿಷ್ಯದ ಮುದ್ರಿತ ಆವೃತ್ತಿಗಳಲ್ಲಿ ಸೇರಿಸಲಾಗುವುದು.

ಈ ವಿವಾದವು 9 ನೇ ತರಗತಿಗೆ ಹೊಸದಾಗಿ ಪರಿಚಯಿಸಲಾದ ಕಲಾ ಶಿಕ್ಷಣ ಪಠ್ಯಪುಸ್ತಕವಾದ ಮಧುರಿಮಾಗೆ ಸಂಬಂಧಿಸಿದ್ದಾಗಿದ್ದು, ಮೊಹೆಂಜೊ-ದಾರೊದಲ್ಲಿ ಪತ್ತೆಯಾದ ನೃತ್ಯ ಹುಡುಗಿ ಶಿಲ್ಪವು ಪ್ರಾಚೀನ ಸಿಂಧೂ ಕಣಿವೆ ನಾಗರಿಕತೆಯ ಅತ್ಯಂತ ಪ್ರಸಿದ್ಧ ಕಲಾಕೃತಿಗಳಲ್ಲಿ ಒಂದಾಗಿದೆ. ಆದಾಗ್ಯೂ, ಕಂಚಿನ ಪ್ರತಿಮೆಯನ್ನು 4000 ವರ್ಷಗಳ ಹಿಂದೆ ರಚಿಸಲಾಗಿದೆ ಮತ್ತು ಇದನ್ನು ಆರಂಭಿಕ ಕಲಾತ್ಮಕ ಸಾಧನೆಯ ಗಮನಾರ್ಹ ಉದಾಹರಣೆ ಎಂದು ಪರಿಗಣಿಸಲಾಗಿದೆ.

ಹೊಸ ಪಠ್ಯಪುಸ್ತಕದಲ್ಲಿ ಬಳಸಲಾದ ಚಿತ್ರವು ಮೂಲ ಶಿಲ್ಪಕ್ಕಿಂತ ಭಿನ್ನವಾಗಿತ್ತು. ನಿಜವಾದ ಪ್ರತಿಮೆಯು ಬರಿಯ ಮುಂಡವನ್ನು ಹೊಂದಿದ್ದರೂ, ಹೊಸದಾಗಿ ಪ್ರಕಟಿಸಲಾಗಿದ್ದ ಚಿತ್ರದಲ್ಲಿ ಆ ಪ್ರತಿಮೆಯ ಮುಂಡವನ್ನು ಭುಜಗಳಿಂದ ಕೆಳಕ್ಕೆ ಸಂಪೂರ್ಣವಾಗಿ ಮುಚ್ಚಿದಂತೆ ತೋರಿಸಲಾಗಿತ್ತು.

ಕಲೆಗಳ ಇತಿಹಾಸ ಎಂಬ ಶೀರ್ಷಿಕೆಯ ಆರಂಭಿಕ ಅಧ್ಯಾಯದಲ್ಲಿ ಸಂಪಾದಿತ ಚಿತ್ರ ಕಾಣಿಸಿಕೊಂಡಿತು. ಮೂಲ ಶಿಲ್ಪವು ಅದರ ಅಧಿಕೃತ ರೂಪದಲ್ಲಿ ವ್ಯಾಪಕವಾಗಿ ಗುರುತಿಸಲ್ಪಟ್ಟಿದೆ ಮತ್ತು ವಿಶ್ವಾದ್ಯಂತ ಇತಿಹಾಸ, ಪುರಾತತ್ತ್ವ ಶಾಸ್ತ್ರ ಮತ್ತು ಕಲಾ ಪ್ರಕಟಣೆಗಳಲ್ಲಿ ಆಗಾಗ್ಗೆ ಕಾಣಿಸಿಕೊಳ್ಳುವುದರಿಂದ ಈ ಬದಲಾವಣೆಯು ಗಮನ ಸೆಳೆಯಿತು.

ಇದಕ್ಕೂ ಮೊದಲು, ಮಾಧ್ಯಮಗಳೊಂದಿಗೆ ಮಾತನಾಡಿದ ಎನ್‌ಸಿಇಆರ್‌ಟಿ ನಿರ್ದೇಶಕ ದಿನೇಶ್ ಪ್ರಸಾದ್ ಸಕ್ಲಾನಿ ಮುಂಡವನ್ನು ಮರೆಮಾಚುವ ಹಿಂದೆ ಯಾವುದೇ ನಿರ್ದಿಷ್ಟ ಕಾರಣವಿಲ್ಲ. ಈ ವಿಷಯವನ್ನು ಪಠ್ಯಪುಸ್ತಕ ಚೌಕಟ್ಟಿನ ಜವಾಬ್ದಾರಿಯನ್ನು ಹೊಂದಿರುವ ಕಲೆ ಮತ್ತು ಶಿಕ್ಷಣ ಇಲಾಖೆಗೆ ಉಲ್ಲೇಖಿಸಲಾಗಿದೆ ಎಂದು ಹೇಳಿದ್ದರು.

ವಿವಾದ ಏನೇ ಇರಲಿ, 'ನರ್ತಿಸುವ ಹುಡುಗಿ' ಶಿಲ್ಪವು ಸಿಂಧೂ ಕಣಿವೆ ನಾಗರಿಕತೆಯ ಅದ್ಭುತ ಕಲಾ ನೈಪುಣ್ಯದ ಸಂಕೇತವಾಗಿದೆ. ಸುಮಾರು 4500 ವರ್ಷಗಳ ಇತಿಹಾಸವಿರುವ ಈ ಕಂಚಿನ ಪ್ರತಿಮೆ, ದಕ್ಷಿಣ ಏಷ್ಯಾದ ಪ್ರಾಚೀನ ಸಂಸ್ಕೃತಿ ಮತ್ತು ಕಲಾ ಪರಂಪರೆಯ ಅತ್ಯಂತ ಪ್ರಮುಖ ಹಾಗೂ ಹೆಮ್ಮೆಯ ಭಾಗವಾಗಿ ಇಂದಿಗೂ ಮುಂದುವರಿದಿದೆ (ಏಜೆನ್ಸೀಸ್​).