ನಾರಿ ಶಕ್ತಿ ಮಸೂದೆಗೆ ಸೋಲು: ಇಂದು ರಾತ್ರಿ 8.30ಕ್ಕೆ ದೇಶವನ್ನುದ್ದೇಶಿಸಿ ಪ್ರಧಾನಿ ಮೋದಿ ಭಾಷಣ! PM Modi

ಮಹಿಳಾ ಸಬಲೀಕರಣದ ಕನಸಿಗೆ ತಣ್ಣೀರು ಎರಚಿದ ಪ್ರತಿಪಕ್ಷಗಳ ನಡೆಯ ವಿರುದ್ಧ ಪ್ರಧಾನಿ ಕೆಂಡಾಮಂಡಲವಾಗಿದ್ದು, ಇಂದಿನ ಭಾಷಣದಲ್ಲಿ ಅವರು ನೀಡಲಿರುವ ಸಂದೇಶದ ಮೇಲೆ ಇಡೀ ದೇಶದ ಕಣ್ಣು ನೆಟ್ಟಿದೆ.

ಇಂದು ಬೆಳಿಗ್ಗೆ ಪ್ರಧಾನಿ ನೇತೃತ್ವದಲ್ಲಿ ನಡೆದ ಕೇಂದ್ರ ಸಚಿವ ಸಂಪುಟ ಸಭೆಯಲ್ಲಿ, ಮಸೂದೆ ವಿಫಲವಾದ ಕುರಿತು ತೀವ್ರ ಚರ್ಚೆ ನಡೆಯಿತು. ಈ ವೇಳೆ ಮಾತನಾಡಿದ ಮೋದಿ, ಪ್ರತಿಪಕ್ಷಗಳು ಮಹಿಳಾ ಮೀಸಲಾತಿಯನ್ನು ವಿರೋಧಿಸುವ ಮೂಲಕ ಬಹುದೊಡ್ಡ ತಪ್ಪು ಮಾಡಿದೆ. ದೇಶದ ಕೋಟ್ಯಂತರ ಮಹಿಳೆಯರು ಪ್ರತಿಪಕ್ಷಗಳ ಈ ನಡೆಯನ್ನು ಎಂದಿಗೂ ಕ್ಷಮಿಸುವುದಿಲ್ಲ. ಈ ಐತಿಹಾಸಿಕ ಅವಕಾಶವನ್ನು ಹಾಳುಮಾಡಿದವರಿಗೆ ದೇಶದ ಹೆಣ್ಣುಮಕ್ಕಳು ತಕ್ಕ ಪಾಠ ಕಲಿಸಲಿದ್ದಾರೆ ಎಂದು ಎಚ್ಚರಿಸಿದ್ದಾರೆ.

ಸಂವಿಧಾನದ (131ನೇ ತಿದ್ದುಪಡಿ) ಮಸೂದೆ ಅಥವಾ 'ನಾರಿ ಶಕ್ತಿ ವಂದನ್ ಅಧಿನಿಯಮ' ಜಾರಿಯಾಗಲು ಲೋಕಸಭೆಯಲ್ಲಿ ವಿಶೇಷ ಬಹುಮತದ ಅವಶ್ಯಕತೆಯಿತ್ತು.

ಒಟ್ಟು ಸ್ಥಾನಗಳು: 543

ಅಗತ್ಯವಿದ್ದ ಮತಗಳು (2/3 ಬಹುಮತ): 352

ಪರವಾಗಿ ಬಂದ ಮತಗಳು: 298

ವಿರೋಧವಾಗಿ ಬಂದ ಮತಗಳು: 230

ಅಗತ್ಯವಿದ್ದ 352 ಮತಗಳ ಬದಲಿಗೆ ಕೇವಲ 298 ಮತಗಳು ಬಂದ ಕಾರಣ ಮಸೂದೆಯು ಅಂಗೀಕಾರಗೊಳ್ಳದೆ ವಿಫಲವಾಯಿತು. ಈ ಸೋಲಿನ ನಂತರ, ಸರ್ಕಾರವು ಇದರೊಂದಿಗೆ ಸಂಬಂಧ ಹೊಂದಿದ್ದ 'ಕ್ಷೇತ್ರ ಪುನರ್ವಿಂಗಡಣೆ ಮಸೂದೆ' ಮತ್ತು 'ಕೇಂದ್ರಾಡಳಿತ ಪ್ರದೇಶಗಳ ಕಾಯ್ದೆ' ತಿದ್ದುಪಡಿಗಳನ್ನು ಮತದಾನಕ್ಕೆ ಒಳಪಡಿಸದೆ ಕೈಬಿಟ್ಟಿತು.

ಕಾಂಗ್ರೆಸ್ ನೇತೃತ್ವದ ಪ್ರತಿಪಕ್ಷಗಳ ಒಕ್ಕೂಟವು ಸರ್ಕಾರದ ವಿರುದ್ಧ ಗಂಭೀರ ಆರೋಪ ಮಾಡಿದೆ. ಮಹಿಳಾ ಮೀಸಲಾತಿಯನ್ನು ಕೇವಲ ಒಂದು ಕವಚವಾಗಿ ಬಳಸಿಕೊಂಡು ಸರ್ಕಾರವು ಕ್ಷೇತ್ರ ಪುನರ್ವಿಂಗಡಣೆಯ ಮೂಲಕ ದೇಶದ ಚುನಾವಣಾ ನಕ್ಷೆಯನ್ನು ತನಗೆ ಬೇಕಾದಂತೆ ತಿದ್ದಲು ಪ್ರಯತ್ನಿಸುತ್ತಿದೆ ಎಂದು ಆರೋಪಿಸಿದೆ.

ನಾವು ಮಹಿಳಾ ಮೀಸಲಾತಿಯ ಪರವಾಗಿದ್ದೇವೆ. ಆದರೆ ಸರ್ಕಾರವು ಇದನ್ನು ಜಾರಿಗೆ ತರುತ್ತಿರುವ ವಿಧಾನ ಮತ್ತು ಕ್ಷೇತ್ರ ಪುನರ್ವಿಂಗಡಣೆಯ ಶರತ್ತಿನ ವಿರುದ್ಧವಾಗಿದ್ದೇವೆ. ಪ್ರಸ್ತುತ ಇರುವ ಸ್ಥಾನಗಳಲ್ಲೇ 1/3 ಭಾಗದಷ್ಟು ಮೀಸಲಾತಿಯನ್ನು ತಕ್ಷಣವೇ ಜಾರಿಗೊಳಿಸಿ ಎಂದು ಪ್ರತಿಪಕ್ಷಗಳು ಪಟ್ಟು ಹಿಡಿದಿವೆ.

ಮತದಾನಕ್ಕೂ ಮುನ್ನ ಪ್ರಧಾನಿ ಮೋದಿ ಅವರು ಸಾಮಾಜಿಕ ಜಾಲತಾಣ 'X' ನಲ್ಲಿ ಸರಣಿ ಪೋಸ್ಟ್‌ಗಳನ್ನು ಹಾಕುವ ಮೂಲಕ ಪ್ರತಿಪಕ್ಷಗಳ ಆತ್ಮಸಾಕ್ಷಿಯನ್ನು ಜಾಗೃತಗೊಳಿಸಲು ಪ್ರಯತ್ನಿಸಿದ್ದರು. ಈ ಮಸೂದೆಯು ದೇಶದ ಶೇ. 50ರಷ್ಟಿರುವ ಮಹಿಳೆಯರಿಗೆ ನ್ಯಾಯ ಒದಗಿಸುವ ಐತಿಹಾಸಿಕ ಅವಕಾಶ. ನಮ್ಮ ನಿರ್ಧಾರಗಳನ್ನು ಕೋಟ್ಯಂತರ ಮಹಿಳೆಯರು ಗಮನಿಸುತ್ತಿದ್ದಾರೆ. ರಾಜಕೀಯವನ್ನು ಬದಿಗಿಟ್ಟು ಬೆಂಬಲಿಸಿ ಎಂದು ಕೋರಿದ್ದರು. ಆದರೆ ಪ್ರತಿಪಕ್ಷಗಳ ಏಕತೆಯ ಮುಂದೆ ಈ ಮನವಿ ಫಲ ನೀಡಲಿಲ್ಲ.

ಈ ಮಸೂದೆ ವಿಫಲವಾಗಿರುವುದು ಬಿಜೆಪಿಗೆ ರಾಜಕೀಯವಾಗಿ ಹಿನ್ನಡೆಯಾಗಿ ಕಂಡರೂ, ಪ್ರಧಾನಿ ಮೋದಿ ಅವರು ಇದನ್ನು ಪ್ರತಿಪಕ್ಷಗಳ ವಿರುದ್ಧ ಮಹಿಳಾ ವಿರೋಧಿ ಎಂಬ ಅಸ್ತ್ರವಾಗಿ ಬಳಸಿಕೊಳ್ಳುವ ಸಾಧ್ಯತೆಯಿದೆ. ಕ್ಷೇತ್ರ ಪುನರ್ವಿಂಗಡಣೆ ಮತ್ತು ಜನಗಣತಿಯ ಶರತ್ತುಗಳ ಸುತ್ತ ಇರುವ ಗೊಂದಲಗಳೇ ಈ ವೈಫಲ್ಯಕ್ಕೆ ಮುಖ್ಯ ಕಾರಣ ಎಂದು ವಿಶ್ಲೇಷಿಸಲಾಗುತ್ತಿದೆ.

ಇಂದು ರಾತ್ರಿ 8.30ಕ್ಕೆ ಪ್ರಧಾನಿ ಮೋದಿ ಅವರು ತಮ್ಮ ಭಾಷಣದಲ್ಲಿ ಮಹಿಳಾ ಮೀಸಲಾತಿಯ ಮುಂದಿನ ಹಾದಿ ಅಥವಾ ಸರ್ಕಾರದ ಮುಂದಿನ ಯೋಜನೆಯ ಬಗ್ಗೆ ಮಹತ್ವದ ಘೋಷಣೆ ಮಾಡುವ ನಿರೀಕ್ಷೆಯಿದೆ. ಇದು ಮುಂಬರುವ ಲೋಕಸಭಾ ಚುನಾವಣೆಯ ದಿಕ್ಸೂಚಿಯೂ ಆಗಬಹುದು,(ಏಜೆನ್ಸೀಸ್).