ನರವಣೆ ಪುಸ್ತಕ ವಿವಾದ; ಪ್ರಕಾಶಕರ ಬೆನ್ನಿಗೆ ನಿಂತ ಮಾಜಿ ಸೇನಾ ಮುಖ್ಯಸ್ಥ; ರಾಹುಲ್‌ಗೆ ಬಿಗ್ ಶಾಕ್..! M.M Naravane

ಈ ಬಗ್ಗೆ ಎಕ್ಸ್​ನಲ್ಲಿ ಪೋಸ್ಟ್​ ಮಾಡಿರುವ ನರವಣೆ, ತಮ್ಮ ಪುಸ್ತಕದ ಕುರಿತು ಪೆಂಗ್ವಿನ್ ರಾಂಡಮ್ ಹೌಸ್ ಇಂಡಿಯಾ ನೀಡಿರುವ ಸ್ಪಷ್ಟನೆಯನ್ನು ಅವರು ಬೆಂಬಲಿಸಿದ್ದು, ಈ ಮೂಲಕ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಅವರ ವಾದಕ್ಕೆ ತಿರುಗೇಟು ನೀಡಿದ್ದಾರೆ.

ತಮ್ಮ ಪುಸ್ತಕ ಇನ್ನೂ ಪ್ರಕಟವಾಗಿಲ್ಲ ಎಂಬ ಪ್ರಕಾಶಕರ ಪೋಸ್ಟ್ ಅನ್ನು ಮರುಹಂಚಿಕೊಂಡಿರುವ ಜನರಲ್ ನರವಣೆ, ಇದೇ ಪುಸ್ತಕದ ಸದ್ಯದ ಸ್ಥಿತಿ ಎಂದು ಬರೆಯುವ ಮೂಲಕ ವಿವಾದಕ್ಕೆ ತೆರೆ ಎಳೆಯಲು ಪ್ರಯತ್ನಿಸಿದ್ದಾರೆ. ಪ್ರಕಾಶಕರಾದ ಪೆಂಗ್ವಿನ್ ಸಂಸ್ಥೆಯು, ಪುಸ್ತಕವನ್ನು ಘೋಷಿಸುವುದು ಅಥವಾ ಮುಂಗಡ ಬುಕ್ಕಿಂಗ್‌ಗೆ ಇಡುವುದು ಎಂದರೆ ಪುಸ್ತಕ ಪ್ರಕಟವಾಗಿದೆ ಎಂದರ್ಥವಲ್ಲ ಎಂದು ಸ್ಪಷ್ಟಪಡಿಸಿದೆ.

ಪುಸ್ತಕ ಪ್ರಕಟಣೆಯ ಪ್ರಕ್ರಿಯೆ ಬಗ್ಗೆ ಗೊಂದಲವಿರುವ ಹಿನ್ನೆಲೆಯಲ್ಲಿ ಪ್ರಕಾಶಕರು ಈ ಕೆಳಗಿನ ವಿವರಣೆ ನೀಡಿದ್ದಾರೆ.

ಘೋಷಣೆ: ಇದು ಕೇವಲ ಭವಿಷ್ಯದಲ್ಲಿ ಪುಸ್ತಕ ಪ್ರಕಟಿಸುವ ಯೋಜನೆಯನ್ನು ಸೂಚಿಸುತ್ತದೆ.

ಮುಂಗಡ ಬುಕ್ಕಿಂಗ್: ಓದುಗರು ಮತ್ತು ಮಾರಾಟಗಾರರು ಮುಂಚಿತವಾಗಿ ಆರ್ಡರ್ ಮಾಡಲು ನೀಡುವ ಅವಕಾಶ, ಆದರೆ ಪುಸ್ತಕ ಇನ್ನೂ ಮಾರುಕಟ್ಟೆಗೆ ಬಂದಿರುವುದಿಲ್ಲ.

ಪ್ರಕಟಣೆ: ಪುಸ್ತಕವು ರಿಟೇಲ್ ಮಾರುಕಟ್ಟೆಯಲ್ಲಿ ಖರೀದಿಗೆ ಲಭ್ಯವಿದ್ದಾಗ ಮಾತ್ರ ಅದನ್ನು ಪ್ರಕಟಿತ ಎಂದು ಪರಿಗಣಿಸಲಾಗುತ್ತದೆ.

ಹಕ್ಕುಸ್ವಾಮ್ಯ: ಪುಸ್ತಕದ ಹಕ್ಕುಗಳು ಕೇವಲ ಪೆಂಗ್ವಿನ್ ಸಂಸ್ಥೆಯ ಬಳಿ ಇದ್ದು, ಸದ್ಯ ಚಲಾವಣೆಯಲ್ಲಿರುವ ಯಾವುದೇ ಡಿಜಿಟಲ್ ಅಥವಾ ಪಿಡಿಎಫ್ ಪ್ರತಿಗಳು ಅಕ್ರಮವಾಗಿವೆ.

ಈ ವಿವಾದ ಸ್ಫೋಟಗೊಳ್ಳಲು ಪ್ರಮುಖ ಕಾರಣ ರಾಹುಲ್ ಗಾಂಧಿ ಹೇಳಿಕೆಗಳಾಗಿದ್ದು. ಕಳೆದ ವಾರ ಸಂಸತ್ತಿನಲ್ಲಿ ಪುಸ್ತಕದ ಪ್ರತಿಯೊಂದನ್ನು ತೋರಿಸಿದ್ದ ರಾಹುಲ್, ಸರ್ಕಾರಕ್ಕೆ ಮುಜುಗರ ತರುವಂತಹ ವಿಚಾರಗಳು ಈ ಪುಸ್ತಕದಲ್ಲಿವೆ, ಹಾಗಾಗಿ ಇದನ್ನು ತಡೆಯಲಾಗುತ್ತಿದೆ ಎಂದು ಆರೋಪಿಸಿದ್ದರು. ಅಲ್ಲದೆ, ಫೆಬ್ರವರಿ 2 ರಿಂದಲೂ ಲೋಕಸಭೆಯಲ್ಲಿ ಈ ಪುಸ್ತಕದ ಆಂಶಗಳನ್ನು ಉಲ್ಲೇಖಿಸಲು ಪ್ರಯತ್ನಿಸುತ್ತಿದ್ದಾರೆ. ಆದರೆ, ಪುಸ್ತಕ ಇನ್ನೂ ಅಧಿಕೃತವಾಗಿ ಪ್ರಕಟವಾಗದ ಕಾರಣ ಸ್ಪೀಕರ್ ಅದಕ್ಕೆ ಅನುಮತಿ ನೀಡಿಲ್ಲ.

ದೆಹಲಿ ಪೊಲೀಸರಿಂದ FIR ದಾಖಲು

ಪುಸ್ತಕದ ಹಸ್ತಪ್ರತಿ ಡಿಜಿಟಲ್ ರೂಪದಲ್ಲಿ ಅಕ್ರಮವಾಗಿ ಸೋರಿಕೆಯಾಗಿರುವ ಹಿನ್ನೆಲೆಯಲ್ಲಿ ದೆಹಲಿ ಪೊಲೀಸರು ಈಗಾಗಲೇ ಎಫ್‌ಐಆರ್ ದಾಖಲಿಸಿದ್ದಾರೆ. ರಕ್ಷಣಾ ಸಚಿವಾಲಯದ ಅನುಮತಿ ಸಿಗುವ ಮೊದಲೇ ಈ ಪುಸ್ತಕದ ಅಂಶಗಳು ಹೊರಬಂದಿದ್ದು ಹೇಗೆ ಎಂಬ ಬಗ್ಗೆ ತನಿಖೆ ನಡೆಯುತ್ತಿದೆ,(ಏಜೆನ್ಸೀಸ್).