ಪಶ್ಚಿಮ ಬಂಗಾಳದ ಹೈವೋಲ್ಟೇಜ್ ಕಣ ನಂದಿಗ್ರಾಮ

ಪಶ್ಚಿಮ ಬಂಗಾಳದ ಹಾಲಿ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿಗೆ ರಾಜಕೀಯ ನೆಲೆ ಕಂಡುಕೊಳ್ಳಲು ಹಾಗೂ ಗಟ್ಟಿಗಿತ್ತಿ ನಾಯಕಿಯಾಗಿ ಬೆಳೆದು ನಿಲ್ಲಲು ಕಾರಣವಾಗಿದ್ದ ನಂದಿಗ್ರಾಮ ವಿಧಾನಸಭಾ ಕ್ಷೇತ್ರದಲ್ಲಿಯೇ ದೀದಿಯನ್ನು ನೇರ ಸ್ಪರ್ಧೆಯಲ್ಲಿ ಸೋಲಿಸಿ ಗಮನ ಸೆಳೆದಿದ್ದ ಸುವೇಂದು ಅಧಿಕಾರಿ, ಈ ಬಾರಿಯೂ ಇದೇ ಕ್ಷೇತ್ರದಿಂದ ಕಣಕ್ಕಿಳಿದಿದ್ದು, ಅವರಿಗೆ ಸೋಲಿನ ರುಚಿ ತೋರಿಸಲೇಬೇಕು ಎಂದು ಮಮತಾ ಪಡೆ ತಯಾರಿ ನಡೆಸಿದೆ.

ಪಶ್ಚಿಮ ಬಂಗಾಳದ ಪೂರ್ವ ಮೇದಿನಿಪುರ ಜಿಲ್ಲೆಯಲ್ಲಿ ಚಿಕ್ಕ ಚಿಕ್ಕ ಹಳ್ಳಿಗಳನ್ನು ಒಳಗೊಂಡಿರುವ ನಂದಿಗ್ರಾಮ ವಿಧಾನಸಭಾ ಕ್ಷೇತ್ರ ಒಂದು ಕಾಲದಲ್ಲಿ ಬಂಗಾಳದ ರಾಜಕೀಯವನ್ನು ವ್ಯಾಖ್ಯಾನಿಸಿದ ಚಳವಳಿಯ ಕೇಂದ್ರಬಿಂದುವಾಗಿತ್ತು. 2007ರಲ್ಲಿ ಭೂ ಸ್ವಾಧೀನದ ವಿರುದ್ಧ ನಡೆದ ಹೋರಾಟದಲ್ಲಿ 14 ಜನರು ಪೊಲೀಸರ ಗುಂಡಿಗೆ ಬಲಿಯಾಗಿದ್ದರು. ಇದರ ವಿರುದ್ಧ ಮಮತಾ ಬ್ಯಾನರ್ಜಿ ಹೋರಾಟ ನಡೆಸಿದ್ದು, ಅವರ ರಾಜಕೀಯ ಏಳಿಗೆಗೆ ಪ್ರಮುಖ ಕಾರಣವಾಗಿತ್ತು. 2011ರಿಂದ ಮುಖ್ಯಮಂತ್ರಿಯಾಗಿರುವ ದೀದಿ, ಕಳೆದ ಚುನಾವಣೆಯಲ್ಲಿ ತನ್ನ ಆಪ್ತ ಬಳಗದಲ್ಲಿ ಗುರುತಿಸಿಕೊಂಡಿದ್ದ ಸುವೇಂದು ಅಧಿಕಾರಿ ವಿರುದ್ಧ ಸೋಲನುಭವಿಸಿದ್ದ ಕಾರಣ, ಈ ಬಾರಿ ಸುವೇಂದು ಆಪ್ತನನ್ನೇ ತಮ್ಮ ಪಕ್ಷದಿಂದ ಕಣಕ್ಕಿಳಿಸುವ ಮೂಲಕ ಹಿಂದಿನ ಚುನಾವಣೆಯಲ್ಲಾದ ಘಟನೆಗಳನ್ನು ಮರುಸೃಷ್ಟಿಸುವ ಪ್ರಯತ್ನ ಮಾಡಿದ್ದಾರೆ. ಸುವೇಂದು ಅಧಿಕಾರಿ ಕ್ಷೇತ್ರದಲ್ಲಿ ಅಪಾರ ಜನಪ್ರಿಯತೆ ಗಳಿಸಿದ್ದು, ಗೆಲುವು ನಿಶ್ಚಿತ ಎಂದು ಹೇಳಲಾಗುತ್ತಿದ್ದರೂ, ಶೇ. 50ಕ್ಕೂ ಅಧಿಕ ಸಂಖ್ಯೆಯಲ್ಲಿರುವ ಮುಸ್ಲಿಂ ಮತದಾರರ ತೀರ್ಮಾನ ಈ ಚುನಾವಣೆಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ.

ಚುನಾವಣಾ ಕಣ ತಿಳಿಯುವ ನಿಟ್ಟಿನಲ್ಲಿ ‘ವಿಜಯವಾಣಿ’, ನಂದಿಗ್ರಾಮ ವಿಧಾನಸಭಾ ಕ್ಷೇತ್ರದಲ್ಲಿ ಸಂಚಾರ ಮಾಡಿದ್ದು, ಬಿಜೆಪಿ ಹಾಗೂ ಟಿಎಂಸಿ ಬಾವುಟಗಳ ಜತೆಗೆ ಜೈಶ್ರೀರಾಮ್ ಬಾವುಟಗಳು ಕಂಡುಬಂದವು. ಇಲ್ಲಿನ ಬಹುತೇಕ ಮತದಾರರು ಬಿಜೆಪಿಗಾಗಿ ಅಲ್ಲದಿದ್ದರೂ, ಸುವೇಂದು ಅಧಿಕಾರಿಗೆ ಮತ ನೀಡುತ್ತೇವೆ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದು, ಅವರ ಜನಪ್ರಿಯತೆಯೇ ಈ ಹಿಂದಿನ ಚುನಾವಣೆಯಲ್ಲಿ ಹಾಲಿ ಮುಖ್ಯಮಂತ್ರಿ ಎದುರು ಗೆಲುವು ದಾಖಲಿಸಲು ಸಾಧ್ಯವಾಗಿತ್ತು ಎನ್ನುತ್ತಾರೆ. ‘ಈ ಕ್ಷೇತ್ರದಲ್ಲಿ ಸುವೇಂದು ಅಧಿಕಾರಿ ಸೋಲಲು ಸಾಧ್ಯವೇ? ಕಳೆದ ಬಾರಿ ದೀದಿ ವಿರುದ್ಧವೇ ಇವರನ್ನು ಗೆಲ್ಲಿಸಿದ್ದೇವೆ. ಹೀಗಿರುವಾಗ ಅವರು ಇಲ್ಲಿ ಪ್ರಚಾರಕ್ಕೆ ಬರದಿದ್ದರೂ ಚುನಾವಣೆಯಲ್ಲಿ ಗೆಲ್ಲುತ್ತಾರೆ. ಬಿಜೆಪಿ ಅಥವಾ ಟಿಎಂಸಿ ಎಂದು ಯಾವುದೇ ಪಕ್ಷ ಅಲ್ಲ, ಸುವೇಂದು ಎಂಬುದೇ ಜನಪ್ರಿಯತೆ’ ಎನ್ನುತ್ತಾರೆ ಈ ಕ್ಷೇತ್ರದ ಬೊಲುಟ್ಟು ಗ್ರಾಮದ ರಿಕ್ಷಾ ಚಾಲಕ ಮಧುಸೂದನ್.

ಕುಲ್ವಾಡಿ ಗ್ರಾಮದ ಸುರುಜಿತ್ ಹಾಗೂ ಸುಕ್ವಾಂತ್, ಚುನಾವಣೆ ಬಗ್ಗೆ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದು ಹೀಗೆ... ‘ನೋಡುಗರ ಕಣ್ಣಿಗೆ ನಂದಿಗ್ರಾಮ ಬಹಳ ದೊಡ್ಡ ಕ್ಷೇತ್ರ. ದೀದಿ ಹಾಗೂ ಸುವೇಂದು ಅಧಿಕಾರಿ ಸ್ಪರ್ಧಿಸಿದ್ದ ಕ್ಷೇತ್ರ. ಆದರೆ ಈ ಕ್ಷೇತ್ರ ಇನ್ನೂ ಅಭಿವೃದ್ಧಿ ಕಾಣುವುದರಲ್ಲಿ ಹಿಂದೆ ಬಿದ್ದಿದೆ. ಈ ಬಾರಿಯೂ ಬಹುತೇಕ ಸುವೇಂದು ಅಧಿಕಾರಿಯೇ ಗೆಲ್ಲಬಹುದು, ರಾಜ್ಯದಲ್ಲಿ ಬಿಜೆಪಿ ಅಧಿಕಾರಕ್ಕೆ ಬಂದರೆ ಮುಖ್ಯಮಂತ್ರಿ ಕೂಡ ಆಗಬಹುದು. ಆದರೆ ಕ್ಷೇತ್ರದ ಬಗ್ಗೆ ಸ್ವಲ್ಪ ಗಮನಹರಿಸಲಿ.’

ಇನ್ನು ಈ ಕ್ಷೇತ್ರದಲ್ಲಿ ಶೇ. 50-55ರಷ್ಟು ಮುಸ್ಲಿಂ ಮತದಾರರಿದ್ದಾರೆ. ಅವರಿಗೆ ಸುವೇಂದು ಅಧಿಕಾರಿ ಬಗ್ಗೆ ಬೇಸರವಿಲ್ಲವಾದರೂ ಬಿಜೆಪಿ ಬಗ್ಗೆ ಬೇಸರ ವ್ಯಕ್ತಪಡಿಸುತ್ತಾರೆ. ‘ಜನಪ್ರಿಯತೆಯ ಕಾರಣದಿಂದಾಗಿಯೇ ಸುವೇಂದು ಅಧಿಕಾರಿ ಕಳೆದ ಬಾರಿ ಬಿಜೆಪಿಯಿಂದ ಸ್ಪರ್ಧಿಸಿ ಗೆದ್ದಿದ್ದರು. ಆದರೆ ಈ ಬಾರಿ ಮತದಾರರ ಪಟ್ಟಿ ಪರಿಷ್ಕರಣೆಯಲ್ಲಿ ನಮ್ಮವರ ಹೆಸರುಗಳನ್ನು ತೆಗೆದುಹಾಕಲಾಗಿದೆ. ಬಿಜೆಪಿ ಈ ಕೆಲಸವನ್ನು ಉದ್ದೇಶಪೂರ್ವಕವಾಗಿ ಮಾಡಿರುವುದರಿಂದ ನಾವು ಬಿಜೆಪಿಗೆ ಹೇಗೆ ಮತ ನೀಡಲು ಸಾಧ್ಯ? ಆದರೆ ಸದ್ಯ ಸುವೇಂದು ಅಧಿಕಾರಿಯೇ ಚುನಾವಣೆಗೆ ನಿಂತಿರುವ ಕಾರಣ ಮಗದೊಮ್ಮೆ ಯೋಚಿಸಬೇಕಿದೆ’ ಎಂದು ಈ ಕ್ಷೇತ್ರದ ಮತದಾರ ಆದಿಲ್ ಮತ್ತು ಅವರ ಜತೆಯಲ್ಲಿದ್ದ ಕೆಲವರು ಅಭಿಪ್ರಾಯ ಹಂಚಿಕೊಂಡರು.

ಮಮತಾ ಬ್ಯಾನರ್ಜಿ ವಿರುದ್ಧ 2021ರಲ್ಲಿ ನಂದಿಗ್ರಾಮದಲ್ಲಿ ಸುವೇಂದು ಅಧಿಕಾರಿ ಗೆಲುವು ಸಾಧಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದ ನಿಷ್ಠಾವಂತ ಕಾರ್ಯಕರ್ತನಾಗಿದ್ದ ಪಬಿತ್ರ ಕರ್ ಅವರನ್ನು ಟಿಎಂಸಿ ಈ ಬಾರಿ ಅಭ್ಯರ್ಥಿಯಾಗಿ ಕಣಕ್ಕಿಳಿಸಿದೆ. 2020ರ ಅಂತ್ಯದಲ್ಲಿ ಬಿಜೆಪಿ ಸೇರ್ಪಡೆಗೊಂಡಿದ್ದ ಪಬಿತ್ರ, 2021ರ ಚುನಾವಣೆಯಲ್ಲಿ ಮಮತಾ ಬ್ಯಾನರ್ಜಿ ವಿರುದ್ಧ ನಂದಿಗ್ರಾಮದಲ್ಲಿ ಸುವೇಂದು ಅಧಿಕಾರಿಗೆ ಗೆಲುವು ಆಗುವಂತೆ ವಾತಾವರಣ ನಿರ್ಮಿಸಿದ್ದರು. ಸುವೇಂದು ಅಧಿಕಾರಿಯ ತಂತ್ರ, ಪ್ರತಿತಂತ್ರಗಳನ್ನು ತಿಳಿದಿರುವ ಈತನನ್ನೇ ಇದೀಗ ದೀದಿ, ತಮ್ಮ ಪಕ್ಷಕ್ಕೆ ಕರೆತಂದು ಟಿಕೆಟ್ ನೀಡಿದ್ದಾರೆ. ಈ ಹಿಂದೆ ಬಿಜೆಪಿ ಯಾವ ರೀತಿಯಲ್ಲಿ ಸುವೇಂದುರನ್ನು ಬಿಜೆಪಿಗೆ ಕರೆತಂದು ಮಮತಾರನ್ನು ಸೋಲಿಸಿತ್ತೋ, ಅದೇ ವಿಧಾನವನ್ನು ಈ ಬಾರಿ ದೀದಿ ಅನುಸರಿಸಿದ್ದಾರೆ.

ನಂದಿಗ್ರಾಮದ ರಿಯಾಪಡ ಎಂಬ ಹಳ್ಳಿಯಲ್ಲಿ, ‘ವಿಜಯವಾಣಿ’ ಮತದಾರರನ್ನು ಮಾತನಾಡಿಸುವ ವೇಳೆ, ಯಾವ ಪಕ್ಷ ಅಧಿಕಾರಕ್ಕೆ ಬಂದರೆ ಉತ್ತಮ ಎಂದು ಕೇಳಿದೊಡನೆ, ಕೆಲವರು ಬಿಜೆಪಿ ಎಂದರೆ ಕೆಲವರು ಟಿಎಂಸಿ ಎಂದು ಉತ್ತರಿಸಿದರು. ಈ ವೇಳೆ ಯುವಕರ ನಡುವೆಯೇ ನಿಮ್ಮ ಪಕ್ಷ ಸರಿಯಿಲ್ಲ ಎಂಬ ಮಾತು ಪ್ರಾರಂಭಗೊಂಡು, ಒಬ್ಬರಿಗೊಬ್ಬರು ಕೈ ಮಿಲಾಯಿಸಿದರು. ಬಳಿಕ ಸ್ಥಳೀಯರು ಬಂದು ಪರಿಸ್ಥಿತಿ ತಿಳಿಗೊಳಿಸಿದರು.