ನಡುರಸ್ತೆಯಲ್ಲಿ ನಮಾಜ್​: ವಿಡಿಯೋ ವೈರಲ್​; ಪೊಲೀಸರಿಂದ ಆರೋಪಿ ಬಂಧನ! Namaz On Road

ಉತ್ತರ ಪ್ರದೇಶ: ಜನ ನಿಬಿಡ ರಸ್ತೆಯಲ್ಲಿ ವ್ಯಕ್ತಿಯೊಬ್ಬ ನಮಾಜ್​ (Namaz On Road) ಮಾಡಿದ್ದು, ಪರಿಣಾಮ ಪೊಲೀಸರು ವಶಕ್ಕೆ ಪಡಿದಿರುವ ಘಟನೆ ಉತ್ತರ ಪ್ರದೇಶದ ರಾಮ್​ಪುರ್​ದಲ್ಲಿ ವರದಿಯಾಗಿದೆ.

ಸುತ್ತಲೂ ವಾಹನಗಳಿಂದ ತುಂಬಿರುವ ಶಾಹಬಾದ್​ ಗೇಟ್​ ಕ್ರಾಸಿಂಗ್​ನಲ್ಲಿ ಬಂಧಿತ ವ್ಯಕ್ತಿ ನಮಾಜ್​ ಸಲ್ಲಿಸಿದ್ದು, ಇದರಿಂದ ವಾಹನ ಸಂಚಾರಕ್ಕೆ ತೊಂದರೆ ಉಂಟಾಗಿದೆ. ತಕ್ಷಣ ಸ್ಥಳಕ್ಕೆ ಪೊಲೀಸರು ಆಗಮಿಸಿ ನಮಾಜ್​ ಸಲ್ಲಿಸುತ್ತಿದ್ದ ನಯೀಮ್​(35) ಎಂಬಾತನನ್ನು ವಶಕ್ಕೆ ಪಡೆದಿದ್ದಾರೆ.

ಮನೆಯ ಸದಸ್ಯನನ್ನು ಪೊಲೀಸರು ವಶಕ್ಕೆ ಪಡೆದ ವಿಷಯ ತಿಳಿದ ನಂತರ ಪೊಲೀಸ್​ ಠಾಣೆಗೆ ಬಂದ ಕುಟುಂಬ ವರ್ಗ ಅವನು ಮಾನಸಿಕ ಅಸ್ವಸ್ಥನಾಗಿದ್ದು, ಈ ರೀತಿಯ ಕೆಲಸ ಮಾಡಿದ್ದಾನೆ. ಸಾರ್ವಜನಿಕ ಸ್ಥಳದಲ್ಲಿ ನಮಾಜ್​ ಮಾಡುವ ಮೂಲಕ ಅಶಾಂತಿ ಉಂಟುಮಾಡುವ ಯೋಜನೆ ಅವನದ್ದಾಗಿರಲಿಲ್ಲ ಎನ್ನುವುದುವು ಕುಟುಂಬದವರ ವಾದವಾಗಿದೆ. ಪೊಲೀಸರು ಸಹ ವಿಚಾರಣೆಯ ಸಂದರ್ಭದಲ್ಲಿ ಈತ ಮಾನಸಿಕವಾಗಿ ಸರಿಯಿಲ್ಲ ಎಂದು ದೃಢ ಪಡಿಸಿದ್ದಾರೆ. ಆದರೆ ಸಾರ್ವಜನಿಕ ಅಶಾಂತಿ ಉಂಟಾದ ಕಾರಣ ಪ್ರಕರಣವನ್ನು ದಾಖಲಿಸಿಕೊಂಡಿದ್ದಾರೆ.

ಈ ಘಟನೆಗೆ ಪ್ರತಿಕ್ರಿಯೆ ನೀಡಿರುವ ಎಸ್ಪಿ ಅನುರಾಗ್ ಸಿಂಗ್​, ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದ ವಿಡಿಯೋವನ್ನು ಆಧರಿಸಿ ಅವನನ್ನು ಕಸ್ಟಡಿಗೆ ತೆಗೆದುಕೊಂಡು ಎಫ್​.ಐ.ಆರ್​ ದಾಖಲಿಸಲಾಗಿದ್ದು, ಈಗ ಅವನನ್ನು ಜೈಲಿಗೆ ಕಳುಹಿಸಲಾಗಿದೆ ಎಂದು ಅನುರಾಗ್​ ಸಿಂಗ್​ ತಿಳಿಸಿದ್ದಾರೆ.

ರಾಜ್ಯದಲ್ಲಿ ಕೋಮು ಗಲಭೆ ಮತ್ತು ಹಿಂಸಾಚಾರವನ್ನು ತಡೆಗಟ್ಟಲು ಸಾರ್ವಜನಿಕ ಸ್ಥಳಗಳಲ್ಲಿ ಅನಗತ್ಯ ಧಾರ್ಮಿಕ ಆಚರಣೆಗಳನ್ನು ನಿಷೇಧಿಸಲಾಗಿದೆ. ಧಾರ್ಮಿಕ ಆಚರಣೆ ಮೂಲಕ ಸಾರ್ವಜನಿಕರಿಗೆ ತೊಂದರೆ ನೀಡಿದರೆ ಪೊಲೀಸರು ಕ್ರಮ ಕೈಗೊಳ್ಳ ಬಹುದೆಂದು ಅಲಹಾಬಾದ್​ ಹೈಕೋರ್ಟ್​ ಸಹ ತಿಳಿಸಿದೆ.

ಖಾಸಗಿ ಸ್ಥಳಗಳಲ್ಲಿ ಹಾಗೂ ಅನುಮತಿ ಪಡೆದ ದಿನ ಹಾಗೂ ಸ್ಥಳಗಳಲ್ಲಿ ನಮಾಜ್​, ಪೂಜೆ, ಮೆರವಣಿಗೆ ಮಾಡಲು ಅವಕಾಶವಿದ್ದು, ಕಾನೂನುಬಾಹಿರ ರೀತಿಯಲ್ಲಿ ಧಾರ್ಮಿಕ ಆಚರಣೆ ನಡೆಸಿದರೆ ಶಿಸ್ತಿನ ಕ್ರಮ ತೆಗೆದುಕೊಳ್ಳಲಾಗುವುದೆಂದು ಉತ್ತರ ಪ್ರದೇಶ ಸರ್ಕಾರ ಮತ್ತು ಪೊಲೀಸರು ತಿಳಿಸಿದ್ದಾರೆ, (ಏಜನ್ಸೀಸ್​).