24 ತಾಸು, 1036 ವಿಮಾನ​... ಈ ವಿಚಾರದಲ್ಲಿ ವಿಶ್ವ ದಾಖಲೆ ನಿರ್ಮಿಸಿದ ಮುಂಬೈ ಏರ್​ಪೋರ್ಟ್​

Mumbai Airport: ಮುಂಬೈನ ಛತ್ರಪತಿ ಶಿವಾಜಿ ಮಹಾರಾಜ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣವು ಇದೀಗ ಹೊಸ ದಾಖಲೆಗೆ ಸಾಕ್ಷಿಯಾಗಿದೆ. ನವೆಂಬರ್ 21, 2025ರಂದು, 24 ಗಂಟೆಗಳ ಅವಧಿಯಲ್ಲಿ ಬರೋಬ್ಬರಿ 1,036 ವಿಮಾನಗಳ ಚಲನೆಯನ್ನು ನಿರ್ವಹಿಸುವ ಮೂಲಕ ವಿಶ್ವ ದಾಖಲೆಯನ್ನು ಸೃಷ್ಟಿಸಿದೆ. ಸದ್ಯ ಈ ಸಂಗತಿ ಹಲವರ ಹುಬ್ಬೇರಿಸಿದೆ.

ಮುಂಬೈ ವಿಮಾನ ನಿಲ್ದಾಣವು ವಿಶ್ವದ ಅತ್ಯಂತ ಜನನಿಬಿಡ ವಿಮಾನ ನಿಲ್ದಾಣಗಳಲ್ಲಿ ಒಂದಾಗಿದೆ. ದೆಹಲಿಯ ನಂತರದಲ್ಲಿ ಮುಂಬೈ ಏರ್​ಪೋರ್ಟ್​ ಈ ಸಾಲಿನಲ್ಲಿದೆ. ಇದರೊಟ್ಟಿಗೆ ವಿಶ್ವದ ಅತಿದೊಡ್ಡ ವಿಮಾನ ನಿಲ್ದಾಣಗಳಲ್ಲಿ ಮುಂಬೈ ಕೂಡ ಒಂದು. ದೆಹಲಿ, ಲಂಡನ್, ದುಬೈ ಮತ್ತು ನ್ಯೂಯಾರ್ಕ್‌ನಂತೆ, ಮುಂಬೈ ಏರ್​ಪೋರ್ಟ್​ ಎರಡು ರನ್‌ವೇಗಳನ್ನು ಏಕಕಾಲದಲ್ಲಿ ನಿರ್ವಹಿಸುವ ಸಾಮರ್ಥ್ಯವನ್ನು ಹೊಂದಿದೆ. ಇದರೊಂದಿಗೆ, ನ.21ರಂದು 100 ಸೆಕೆಂಡುಗಳೊಳಗೆ 1,036 ಟೇಕ್‌ಆಫ್‌ಗಳು ಮತ್ತು ಲ್ಯಾಂಡಿಂಗ್‌ಗಳು ಸಂಭವಿಸಿವೆ.

ಈ ಮೂಲಕ ಮುಂಬೈ ಏರ್​ಪೋರ್ಟ್​ ತನ್ನ ಹಿಂದಿನ ದಾಖಲೆಯನ್ನು ಮುರಿದಿದೆ. ಇದೇ ನವೆಂಬರ್ 21, 2023ರಂದು, 1,032 ವಿಮಾನಗಳು ಹಾರಾಡಿತ್ತು. ಇದು ಇತ್ತೀಚೆಗೆ 1,036 ಸಂಖ್ಯೆಗೆ ತಲುಪಿರುವುದು ವಿಶ್ವ ದಾಖಲೆಗೆ ಸಾಕ್ಷಿಯಾಗಿದೆ. ಇದರಲ್ಲಿ 755 ದೇಶೀಯ ಫ್ಲೈಟ್​ಗಳು ಮತ್ತು 281 ಅಂತಾರಾಷ್ಟ್ರೀಯ ವಿಮಾನಗಳು ಸೇರಿವೆ. 520 ಆಗಮನ ವಿಮಾನಗಳು ಮತ್ತು 516 ನಿರ್ಗಮನ ವಿಮಾನಗಳು ಸೇರಿವೆ.

ನವೆಂಬರ್ 21ರಂದು 1,70,488 ಪ್ರಯಾಣಿಕರು ಪ್ರಯಾಣಿಸಿದ್ದಾರೆ. 121,527 ಪ್ರಯಾಣಿಕರು ದೇಶೀಯ ಮಾರ್ಗಗಳಲ್ಲಿ ಟ್ರಾವಲ್​ ಮಾಡಿದ್ದಾರೆ ಮತ್ತು 48,961 ಅಂತರರಾಷ್ಟ್ರೀಯ ಪ್ರಯಾಣಿಕರು ಪ್ರಯಾಣ ಮಾಡಿದ್ದಾರೆ. ಈ ಪಯಣಗಳು ದೆಹಲಿ, ಬೆಂಗಳೂರು, ಅಹಮದಾಬಾದ್, ಹೈದರಾಬಾದ್ ಮತ್ತು ಕೋಲ್ಕತ್ತಾಗೆ ದೇಶೀಯ ಮಾರ್ಗಗಳಲ್ಲಿ ನಡೆದಿವೆ ಎಂದು ಅಧಿಕಾರಿಗಳು ಮಾಹಿತಿ ಹಂಚಿಕೊಂಡಿದ್ದಾರೆ.

ಜನವರಿ 11, 2025ರಂದು, ಮುಂಬೈ ಏರ್​ಪೋರ್ಟ್​ನಿಂದ ಅತಿ ಹೆಚ್ಚು ಪ್ರಯಾಣ ಮಾಡಲಾಗಿದೆ. ಆ ಒಂದೇ ದಿನ 170,516 ಜನರು ಪ್ರಯಾಣಿಸಿದ್ದಾರೆ. ದೆಹಲಿಯು ದೇಶದಲ್ಲಿ ಸ್ವಾಭಾವಿಕವಾಗಿಯೇ ಜನದಟ್ಟಣೆಯಿಂದ ಕೂಡಿದೆ. ಮುಂಬೈನಿಂದಲೂ ಇದೇ ರೀತಿಯ ಪ್ರಯಾಣಗಳು ನಡೆಯುತ್ತಿದ್ದು, ದೆಹಲಿ ನಂತರದಲ್ಲಿ ಮುಂಬೈ ಈ ಸ್ಥಾನದಲ್ಲಿದೆ,(ಏಜೆನ್ಸೀಸ್).