ಭಾರತೀಯ ಚುನಾವಣೆ ಆಯೋಗವನ್ನು ವಾಟ್ಸಾಪ್ ಆಯೋಗ ಎಂದು ಕರೆದ ಸಂಸದ ಅಭಿಷೇಕ್ ಬ್ಯಾನರ್ಜಿ | Abhishek Banerjee

ಕೋಲ್ಕತ್ತಾ: ಪಶ್ಚಿಮ ಬಂಗಾಳದಲ್ಲಿ ಎಸ್​ಐಆರ್ ಪ್ರಕ್ರಿಯೆಯ ಕುರಿತಾದ ವಿಷಯಗಳಿಗೆ ಸಂಬಂಧಿಸಿದಂತೆ ಭಾರತೀಯ ಚುನಾವಣೆ ಆಯೋಗದ ವಿರುದ್ಧ ವಾಗ್ದಾಳಿ ನಡೆಸಿರುವ ತೃಣಮೂಲ ಕಾಂಗ್ರೆಸ್ ನಾಯಕ ಅಭಿಷೇಕ್ ಬ್ಯಾನರ್ಜಿ(Abhishek Banerjee), ಚುನಾವಣೆ ಆಯೋಗವನ್ನು ವಾಟ್ಸಾಪ್ ಆಯೋಗ ಎಂದು ಕಿಡಿಕಾರಿದ್ದಾರೆ.

ಈ ಕುರಿತು ಕೋಲ್ಕತ್ತಾದಲ್ಲಿ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿರುವ ಅವರು, ಸಾಂವಿಧಾನಿಕ ಸಂಸ್ಥೆ ಚುನಾವಣೆ ಆಯೋಗವು ತಂದಿರುವ ವಿಶೇಷ ತೀವ್ರ ಪರಿಷ್ಕರಣೆ(ಎಸ್​ಐಆರ್) ಪ್ರಕ್ರಿಯೆ ರಾಜ್ಯದ ಜನರಿಗೆ ಕಿರುಕುಳ ನೀಡಲು ತಂದಿದ್ದು, ತಕ್ಷಣ ಆಯೋಗ ಪಶ್ಚಿಮ ಬಂಗಾಳದ ಜನರಲ್ಲಿ ಕ್ಷಮೆ ಕೇಳಬೇಕು ಎಂದು ಒತ್ತಾಯಿಸಿದ್ದಾರೆ.

ಎಸ್​ಐಆರ್ ಸಮಯದಲ್ಲಿ ರಾಜ್ಯದಲ್ಲಿ ಸುಮಾರು 45 ಜನ ಪ್ರಾಣಕಳೆದುಕೊಂಡಿದ್ದಾರೆ. 29 ಬಿಎಲ್​ಓಗಳು ಆತ್ಮಹತ್ಯೆಗೆ ಯತ್ನಿಸಿದ್ದಾರೆ. ನಾವು ಚುನಾವಣಾ ಆಯೋಗಕ್ಕೆ ಐದು ಮೂಲಭೂತ ಪ್ರಶ್ನೆಗಳನ್ನು ಕೇಳಿದ್ದೇವೆ. ಆದರೆ ಆಯೋಗದಿಂದ ನಮಗೆ ಒಂದೇ ಒಂದು ಉತ್ತರ ಸಿಗಲಿಲ್ಲ. ಆದರೆ ಮಾಧ್ಯಮಗಳಿಗೆ ನೀಡಲಾಗಿದೆ ಎಂದು ತಿಳಿಸಿದೆ ಎಂದು ಹೇಳಿದ್ದಾರೆ.

ಸಿಐಸಿ ಜ್ಞಾನೇಶ್ ಕುಮಾರ್ ವಿರುದ್ಧ ವಾಗ್ದಾಳಿ ನಡೆಸಿರುವ ಅಭಿಷೇಕ್, ಸರ್ ಎಸ್​ಐಆರ್ ಅನ್ನೋದು ಪಶ್ಚಿಮ ಬಂಗಾಳದ ಜನರಿಗೆ ಕಿರುಕುಳ ನೀಡುವ ಪ್ರಕ್ರಿಯೆ. ನೀವು ಬಂಗಾಳಕ್ಕೆ ಮೈಕ್ರೋ-ವೀಕ್ಷಕರನ್ನು ಕಳುಹಿಸುತ್ತೀರಿ, ಆದರೆ ಗುಜರಾತ್‌ಗೆ ಮೈಕ್ರೋ-ವೀಕ್ಷಕರನ್ನು ಏಕೆ ಕಳುಹಿಸಬಾರದು? ಬಂಗಾಳದಲ್ಲೇ ಯಾಕೆ ಕಳುಹಿಸಿದ್ರಿ? ಎಂದು ಕಿಡಿಕಾರಿದ್ದಾರೆ.

ಇಸಿಯ ಕರಡು ಪಟ್ಟಿಯ ಪ್ರಕಾರ, ಸರಿಸುಮಾರು ಶೇ. 80 ರಷ್ಟು ಡೇಟಾ ಮ್ಯಾಪಿಂಗ್ ಪೂರ್ಣಗೊಂಡಿದೆ, ಹಾಗಾದರೆ ಶೇ. 40-50 ರಷ್ಟು ಮ್ಯಾಪಿಂಗ್ ಅನ್ನು ಖಚಿತಪಡಿಸಿಕೊಳ್ಳಲು ಸಾಧ್ಯವಿಲ್ಲ ಎಂದು ಇಸಿ ಈ ಹಿಂದೆ ಏಕೆ ಹೇಳಿತ್ತು. ಇಸಿ ಬಂಗಾಳದ ಜನರಲ್ಲಿ ಕ್ಷಮೆಯಾಚಿಸಬೇಕು. ಎಲ್ಲಾ ನೀತಿಗಳನ್ನು ವಾಟ್ಸಾಪ್ ಮೂಲಕ ಮಾಡಲಾಗುತ್ತಿದೆ. ಇದು ವಾಟ್ಸಾಪ್ ಆಯೋಗ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ (ಏಜೆನ್ಸೀಸ್).