ಸಿನಿಮಾ ಟೈಟಲ್​ ವಿವಾದ: ಮನೋಜ್ ಬಾಜಪೇಯಿ ಚಿತ್ರದ ವಿರುದ್ಧ ಯೋಗಿ ಸರ್ಕಾರದ ಗದಾಪ್ರಹಾರ..! Manoj Bajpayee

ಫೆಬ್ರವರಿ 3 ರಂದು ಮುಂಬೈನಲ್ಲಿ ನಡೆದ ಭವ್ಯ ಸಮಾರಂಭದಲ್ಲಿ ನೆಟ್‌ಫ್ಲಿಕ್ಸ್ ಇಂಡಿಯಾ 2026ನೇ ಸಾಲಿನ ತನ್ನ 26 ಹೊಸ ಚಿತ್ರಗಳು ಮತ್ತು ಸರಣಿಗಳ ಪಟ್ಟಿಯನ್ನು ಬಿಡುಗಡೆ ಮಾಡಿತ್ತು. ಈ ಪಟ್ಟಿಯಲ್ಲಿ ಘೂಸ್‌ಖೋರ್ ಪಂಡತ್ ಎಂಬ ಹೆಸರೂ ಇತ್ತು. ಚಿತ್ರದ ಫಸ್ಟ್ ಲುಕ್ ಪೋಸ್ಟರ್ ಹೊರಬೀಳುತ್ತಿದ್ದಂತೆಯೇ ಸಾಮಾಜಿಕ ಜಾಲತಾಣಗಳಲ್ಲಿ ಪರ-ವಿರೋಧದ ಚರ್ಚೆಗಳು ಆರಂಭವಾದವು. ವಿಶೇಷವಾಗಿ ಚಿತ್ರದ ಶೀರ್ಷಿಕೆಯಲ್ಲಿ ಪಂಡತ್ ಬ್ರಾಹ್ಮಣ ಸಮುದಾಯವನ್ನು ಸೂಚಿಸುವ ಪದದೊಂದಿಗೆ ಘೂಸ್‌ಖೋರ್ ಎಂಬ ವಿಶೇಷಣ ಬಳಸಿರುವುದು ವ್ಯಾಪಕ ಆಕ್ರೋಶಕ್ಕೆ ಕಾರಣವಾಯಿತು.

ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಕ್ತವಾದ ಪ್ರತಿರೋಧ ಮತ್ತು ಸಾರ್ವಜನಿಕರ ದೂರುಗಳನ್ನು ಗಂಭೀರವಾಗಿ ಪರಿಗಣಿಸಿದ ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್, ತಕ್ಷಣವೇ ತನಿಖೆಗೆ ಆದೇಶಿಸಿದ್ದಾರೆ. ಕಲೆ ಅಥವಾ ಮನೋರಂಜನೆಯ ಹೆಸರಿನಲ್ಲಿ ಯಾವುದೇ ಧರ್ಮ, ಜಾತಿ ಅಥವಾ ಸಮುದಾಯದ ಘನತೆಗೆ ಧಕ್ಕೆ ತರುವುದನ್ನು ಸಹಿಸಲು ಸಾಧ್ಯವಿಲ್ಲ. ಸಾಮಾಜಿಕ ಸಾಮರಸ್ಯವನ್ನು ಹಾಳುಮಾಡುವ ಪ್ರಯತ್ನಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಿ ಎಂದು ಪೊಲೀಸ್ ಇಲಾಖೆಗೆ ಸೂಚಿಸಿದ್ದಾರೆ.

ಮುಖ್ಯಮಂತ್ರಿಗಳ ಆದೇಶದ ಬೆನ್ನಲ್ಲೇ ಲಖನೌ ಪೊಲೀಸರು ನೆಟ್‌ಫ್ಲಿಕ್ಸ್ ಇಂಡಿಯಾ ಮತ್ತು ಚಿತ್ರದ ನಿರ್ಮಾಪಕರ ವಿರುದ್ಧ ಎಫ್‌ಐಆರ್ (FIR) ದಾಖಲಿಸಿದ್ದಾರೆ.

ಜಾತಿ ನಿಂದನೆ: ಚಿತ್ರದ ಶೀರ್ಷಿಕೆಯು ಒಂದು ನಿರ್ದಿಷ್ಟ ಜಾತಿಯನ್ನು ಭ್ರಷ್ಟಾಚಾರದೊಂದಿಗೆ ಜೋಡಿಸುವ ಮೂಲಕ ಆ ಸಮುದಾಯವನ್ನು ಅವಮಾನಿಸುತ್ತಿದೆ.

ಸಾರ್ವಜನಿಕ ಶಾಂತಿ ಭಂಗ: ವೈರಲ್ ಆಗಿರುವ ಟ್ರೈಲರ್ ಮತ್ತು ಶೀರ್ಷಿಕೆಯು ಸಮಾಜದ ವಿವಿಧ ವರ್ಗಗಳ ನಡುವೆ ದ್ವೇಷ ಮೂಡಿಸುವ ಸಂಚು ಹೊಂದಿದೆ.

ಮಾಹಿತಿ ತಂತ್ರಜ್ಞಾನ ಕಾಯ್ದೆ: ಒಟಿಟಿ ವೇದಿಕೆಗಳ ನಿಯಮಾವಳಿಗಳನ್ನು ಉಲ್ಲಂಘಿಸಿ ಆಕ್ಷೇಪಾರ್ಹ ವಿಷಯವನ್ನು ಪ್ರಸಾರ ಮಾಡಿದ ಆರೋಪ ಹೊರಿಸಲಾಗಿದೆ.

ಈ ವಿವಾದದ ಕುರಿತು ಪ್ರತಿಕ್ರಿಯಿಸಿರುವ ಚಿತ್ರದ ನಿರ್ದೇಶಕರು, ಈ ಸಿನಿಮಾ ವ್ಯವಸ್ಥೆಯಲ್ಲಿರುವ ಭ್ರಷ್ಟಾಚಾರದ ವಿರುದ್ಧದ ಕಥೆಯಾಗಿದೆ. ಪಂಡತ್ ಎಂಬುದು ಕೇವಲ ಆ ಪಾತ್ರದ ಉಪನಾಮ ಅಥವಾ ಅಡ್ಡಹೆಸರಾಗಿದೆಯೇ ಹೊರತು ಸಮುದಾಯವನ್ನಲ್ಲ. ಚಿತ್ರದ ಕಥೆ ನೋಡಿದ ಮೇಲೆ ಯಾರಿಗೂ ಆಕ್ಷೇಪವಿರುವುದಿಲ್ಲ ಎಂದು ಸಮರ್ಥಿಸಿಕೊಂಡಿದ್ದಾರೆ. ಆದರೆ, ಜನಸಾಮಾನ್ಯರು ಮಾತ್ರ ಭ್ರಷ್ಟಾಚಾರದ ವಿರುದ್ಧದ ಹೋರಾಟಕ್ಕೆ ಸಮುದಾಯದ ಹೆಸರನ್ನು ಬಳಸುವ ಅಗತ್ಯವೇನಿತ್ತು ಎಂದು ಪ್ರಶ್ನಿಸುತ್ತಿದ್ದಾರೆ.

ಸದ್ಯದ ಪರಿಸ್ಥಿತಿಯಲ್ಲಿ ಘೂಸ್‌ಖೋರ್ ಪಂಡತ್ ಚಿತ್ರದ ಭವಿಷ್ಯ ಅನಿಶ್ಚಿತವಾಗಿದೆ. ಉತ್ತರ ಪ್ರದೇಶದಲ್ಲಿ ಚಿತ್ರದ ಪ್ರಚಾರದ ಮೇಲೆ ನಿರ್ಬಂಧ ಹೇರುವ ಸಾಧ್ಯತೆಯಿದೆ. ಅಲ್ಲದೆ, ಸೆನ್ಸಾರ್ ಮಂಡಳಿ ಮತ್ತು ಒಟಿಟಿ ನಿಯಂತ್ರಣ ಸಂಸ್ಥೆಗಳು ಶೀರ್ಷಿಕೆ ಬದಲಾವಣೆ ಮಾಡುವಂತೆ ಚಿತ್ರತಂಡಕ್ಕೆ ಸೂಚಿಸುವ ಸಾಧ್ಯತೆ ಹೆಚ್ಚಿದೆ. ಈ ಹಿಂದೆಯೂ ಇಂತಹ ವಿವಾದಗಳಿಂದಾಗಿ ಹಲವು ಸಿನಿಮಾಗಳ ಹೆಸರು ಬದಲಾದ ಉದಾಹರಣೆಗಳಿವೆ,(ಏಜೆನ್ಸೀಸ್).