ಚಲಿಸುವ ರೈಲಿಗೆ ಮೈಯೊಡ್ಡಿ ಮಕ್ಕಳನ್ನು ರಕ್ಷಿಸಿದ ತಾಯಿ: ಎದೆ ಝಲ್ಲೆನಿಸುವ ವಿಡಿಯೋ ವೈರಲ್! Train Viral Video

ವೈರಲ್ ಆಗಿರುವ ವೀಡಿಯೊದಲ್ಲಿ, ಪ್ಲಾಟ್‌ಫಾರ್ಮ್ ಮತ್ತು ಹಳಿಗಳ ನಡುವಿನ ಕಿರಿದಾದ ಜಾಗದ ನಡುವೆ ತಾಯಿಯೊಬ್ಬರು ತಮ್ಮ ಇಬ್ಬರು ಮಕ್ಕಳನ್ನು ಅಂಟಿಕೊಂಡು ಕೂತಿರುವುದನ್ನು ನೋಡಬಹುದು. ಆ ಸಮಯದಲ್ಲಿ ಭಾರಿ ವೇಗದಲ್ಲಿ ಆಗಮಿಸಿದ ರೈಲು ಅವರ ತೀರಾ ಹತ್ತಿರದಲ್ಲೇ ಹಾದು ಹೋಗುತ್ತಿದೆ. ಈ ಅಪಾಯಕಾರಿ ಸಂದರ್ಭದಲ್ಲಿ ತಾಯಿ ಮಕ್ಕಳಿಗೆ ಏನೂ ಆಗಬಾರದೆಂದು ಯೋಚಿಸಿ ತನ್ನ ದೇಹದಿಂದ ಅವರನ್ನು ಮುಚ್ಚಿ ರಕ್ಷಣೆ ನೀಡಿದ್ದಾರೆ. ರೈಲು ಚಲಿಸುವಾಗ ಆಕೆಗೆ ಅದರಿಂದ ಪೆಟ್ಟಾಗಿದ್ದರೂ ಅವರು ಧೈರ್ಯಗೆಡದೇ ಮಕ್ಕಳನ್ನು ಹಿಡಿದುಕೊಂಡೇ ನಿಂತಿದ್ದರು.

ಆದಾಗ್ಯೂ, ಪ್ಲಾಟ್‌ಫಾರ್ಮ್‌ನಲ್ಲಿದ್ದ ಜನರು ಈ ದೃಶ್ಯವನ್ನು ಕಂಡು ಭಯದಿಂದ ಕಿರುಚಾಡುತ್ತಿರುವುದು ವೀಡಿಯೊದಲ್ಲಿ ಕೇಳಿಸುತ್ತದೆ. ರೈಲು ಸಂಪೂರ್ಣವಾಗಿ ಹಾದು ಹೋದ ನಂತರ ತಾಯಿ ಮತ್ತು ಮಕ್ಕಳು ಸುರಕ್ಷಿತವಾಗಿ ಎದ್ದು ನಿಂತರು ಅವರನ್ನು ಸ್ಥಳೀಯರು ಅಲ್ಲಿಂದ ಹೊರ ಕರೆದುಕೊಂಡು ಬಂದಿರುವುದನ್ನು ಅಲ್ಲಿನ ವಿಡಿಯೋಗಳು ತೋರಿಸುತ್ತಿವೆ.

ಈ ವಿಡಿಯೋವನ್ನು'ಭಾರತ್ ಮಾತಾ ಕೆ ಸೇವಕ್' ಎಂಬ ಎಕ್ಸ್ ಬಳಕೆದಾರರೊಬ್ಬರು ಹಂಚಿಕೊಂಡಿದ್ದು, ತಾಯಿಯನ್ನು ತನ್ನ ಮಕ್ಕಳ ಜೀವ ರಕ್ಷಿಸಿದ "ಮಾನವ ಕವಚ" (Human Shield) ಎಂದು ಬಣ್ಣಿಸಿದ್ದಾರೆ. ಈ ದೃಶ್ಯವನ್ನು ವೀಕ್ಷಿಸಿದ ನೆಟ್ಟಿಗರು ತಾಯಿಯ ಸಮಯಪ್ರಜ್ಞೆ ಮತ್ತು ಮಮತೆಗೆ ಶ್ಲಾಘನೆ ವ್ಯಕ್ತಪಡಿಸಿದ್ದು, "ಆಕೆ ನಿಜವಾದ ಹೀರೊ" ಎಂದು ಕಾಮೆಂಟ್ ಮಾಡಿದ್ದಾರೆ.

ಆದಾಗ್ಯೂ, ಈ ವೀಡಿಯೊ ಕೆಲವರ ಟೀಕೆಗೂ ಗುರಿಯಾಗಿದ್ದು, ಸುರಕ್ಷಿತವಾದ ಮೇಲ್ಸುತುವೆ ಕಾಲುದಾರಿ ಬಳಸದೇ ಅಪಾಯಕಾರಿ ಹಳಿಗಳ ನಡುವೆ ಹೇಗೆ ಹೋದರು ಎಂದು ಕೆಲ ಬಳಕೆದಾರರು ಪ್ರಶ್ನಿಸಿದ್ದಾರೆ. ತಾಯಿಯ ಸಾಹಸ ಮೆಚ್ಚುವಂತಹದ್ದಾದರೂ, ಇಂತಹ ಜಾಗಕ್ಕೆ ಹೋಗಿ ಮಕ್ಕಳ ಜೀವವನ್ನು ಅಪಾಯಕ್ಕೆ ಸಿಲುಕಿಸಿದ್ದೇಕೆ ಎಂದು ಕಿಡಿಕಾರಿದ್ದಾರೆ (ಏಜೆನ್ಸೀಸ್​).