2025ರಲ್ಲಿ ನೆಟ್ಟಿಗರು ಗೂಗಲ್​ನಲ್ಲಿ ಅತಿ ಹೆಚ್ಚು ಹುಡುಕಿದ ಹೆಸರುಗಳಿವು! ಇಲ್ಲಿದೆ ನೋಡಿ ಟಾಪ್​ 10 ಪಟ್ಟಿ

ಪ್ರತಿ ವರ್ಷ, ಗೂಗಲ್‌ನಲ್ಲಿ ಜನರು ಅತಿ ಹೆಚ್ಚು ಸರ್ಚ್​ ಮಾಡಿದ ಜನಪ್ರಿಯ ವ್ಯಕ್ತಿಗಳ ಪಟ್ಟಿಯನ್ನು ಪ್ರಕಟಿಸಲಾಗುತ್ತದೆ. ಪ್ರಸ್ತುತ ಘಟನೆಗಳು ಮತ್ತು ಟ್ರೆಂಡಿಂಗ್ ವಿಷಯಗಳ ಆಧಾರದ ಮೇಲೆ ನೆಟ್ಟಿಗರು ತಮ್ಮ ಇಚ್ಛೆಯ ಸೆಲೆಬ್ರಿಟಿಗಳು ಅಥವಾ ವ್ಯಕ್ತಿಗಳ ಬಗ್ಗೆ ಹೆಚ್ಚಿನ ಮಾಹಿತಿ ತಿಳಿಯುವ ಆಸಕ್ತಿ ಹೊಂದಿರುತ್ತಾರೆ. ಅಂತೆಯೇ, ಈ ವರ್ಷವು ಹಲವರ ಹೆಸರನ್ನು ಹುಡುಕಿರುವ ಜನರು, ವೈಭವ್ ಸೂರ್ಯವಂಶಿ, ಡೇವಿಡ್ ಆಂಥೋನಿ ಬರ್ಕ್, ಕೆಂಡ್ರಿಕ್ ಲಾಮರ್, ಜಿಮ್ಮಿ ಕಿಮ್ಮೆಲ್‌ ಸೇರಿ ಅನೇಕರ ಕುರಿತು ಗೂಗಲ್​ನಲ್ಲಿ ಮಾಹಿತಿ ಕಲೆಹಾಕಲಾಗಿದೆ.

ವೈಭವ್ ಸೂರ್ಯವಂಶಿ: 14ನೇ ವಯಸ್ಸಿನಲ್ಲಿ, ಐಪಿಎಲ್​ 18ನೇ ಆವೃತ್ತಿಯಲ್ಲಿ ರಾಜಸ್ಥಾನ ರಾಯಲ್ಸ್ ಪರ ಆರಂಭಿಕ ಬ್ಯಾಟರ್ ಆಗಿ ಕಣಕ್ಕಿಳಿದ ವೈಭವ್ ಸೂರ್ಯವಂಶಿ, ಒಂದು ಪಂದ್ಯದಲ್ಲಿ ಕೇವಲ 38 ಎಸೆತಗಳಲ್ಲಿ 101 ರನ್ ಸಿಡಿಸುವ ಮೂಲಕ ಸ್ಫೋಟಕ ಇನ್ನಿಂಗ್ಸ್ ಆಡಿದರು. ಪುರುಷರ ಟಿ20 ಕ್ರಿಕೆಟ್‌ನಲ್ಲಿ ಶತಕ ಗಳಿಸಿದ ಅತ್ಯಂತ ಕಿರಿಯ ಆಟಗಾರ ಎಂಬ ಹೆಗ್ಗಳಿಕೆಗೆ ವೈಭವ್ ಪಾತ್ರರಾದರು. 35 ಎಸೆತಗಳಲ್ಲಿ ಬಂದ ಅವರ ಈ ಶತಕವು, ಐಪಿಎಲ್ ಇತಿಹಾಸದಲ್ಲಿ 2ನೇ ವೇಗದ ಶತಕವಾಗಿದೆ. ಇದನ್ನೆಲ್ಲ ಬಹಳ ಕುತೂಹಲದಿಂದ ತಿಳಿದ ನೆಟ್ಟಿಗರು, ವೈಭವ್ ಹೆಸರನ್ನು ಹೆಚ್ಚಿನ ಸಂಖ್ಯೆಯಲ್ಲಿ ಗೂಗಲ್​ನಲ್ಲಿ ಸರ್ಚ್​ ಮಾಡಿದ್ದಾರೆ.

ಡೇವಿಡ್ ಆಂಥೋನಿ ಬರ್ಕ್: ಡೇವಿಡ್ ಆಂಥೋನಿ ಬರ್ಕ್ ಒಬ್ಬ ಅಮೇರಿಕನ್ ಗಾಯಕ ಮತ್ತು ಸಾಹಿತಿ. ಅವರನ್ನು D4vd ಎಂದೂ ಕರೆಯುತ್ತಾರೆ. ಬರ್ಕ್​ ಮಾರ್ಚ್ 28, 2005ರಂದು ಜನಿಸಿದರು. ಹಿಯರ್ ವಿತ್ ಮಿ ಮತ್ತು ರೊಮ್ಯಾಂಟಿಕ್ ಹೋಮಿಸೈಡ್​ನಂತಹ ಹಾಡುಗಳನ್ನು ರಿಲೀಸ್​ ಮಾಡಿದ ಬಳಿಕ ಅವರು 2022ರಲ್ಲಿ ಹೆಚ್ಚಿನ ಜನಪ್ರಿಯತೆ ಪಡೆದುಕೊಂಡರು.

ಕೆಂಡ್ರಿಕ್ ಲಾಮರ್: ಕೆಂಡ್ರಿಕ್ ಲಾಮರ್ ಡಕ್‌ವರ್ತ್ ಓರ್ವ ಅಮೇರಿಕನ್ ರ‍್ಯಾಪರ್, ಗಾಯಕ, ಸಾಹಿತಿ ಮತ್ತು ರೆಕಾರ್ಡ್ ಪ್ರೊಡ್ಯೂಸರ್​. ಜೂನ್ 17, 1987ರಂದು ಜನಿಸಿದ ಅವರು, ಪುಲಿಟ್ಜರ್ ಪ್ರಶಸ್ತಿ ಸೇರಿ ಹಲವಾರು ಪ್ರಶಸ್ತಿಗಳನ್ನು ಸ್ವೀಕರಿಸಿದ್ದಾರೆ.

ಜಿಮ್ಮಿ ಕಿಮ್ಮೆಲ್: ಅಮೇರಿಕನ್ ಕಾಮಿಡಿಯನ್​ ಮತ್ತು ದೂರದರ್ಶನ ನಿರೂಪಕ ಜೇಮ್ಸ್ ಕ್ರಿಶ್ಚಿಯನ್ ಕಿಮ್ಮೆಲ್ ನವೆಂಬರ್ 13, 1967ರಂದು ಜನಿಸಿದರು. 2003ರಿಂದ ಎಬಿಸಿಯಲ್ಲಿ ಪ್ರಸಾರವಾಗುವ ಜಿಮ್ಮಿ ಕಿಮ್ಮೆಲ್ ಲೈವ್‌ನ ಕಾರ್ಯನಿರ್ವಾಹಕ ನಿರ್ಮಾಪಕ ಮತ್ತು ನಿರೂಪಕರಾಗಿ ಅವರು ಹೆಚ್ಚು ಖ್ಯಾತಿ ಗಳಿಸಿದ್ದಾರೆ.

ಟೈಲರ್ ಜೇಮ್ಸ್ ರಾಬಿನ್ಸನ್: ಟೈಲರ್ ಜೇಮ್ಸ್ ರಾಬಿನ್ಸನ್ ಏಪ್ರಿಲ್ 16, 2003ರಂದು ಜನಿಸಿದರು. ಪ್ರಸ್ತುತ, ಅವರಿಗೆ 22 ವರ್ಷ. ಕಳೆದ ವರ್ಷ, ಚಾರ್ಲಿ ಕಿರ್ಕ್ ಹತ್ಯೆಯಲ್ಲಿ ಈತನೇ ಗುಂಡು ಹಾರಿಸಿದ್ದು ಎಂಬ ಆರೋಪ ಜೇಮ್ಸ್​ ಮೇಲಿದೆ.

ಪೋಪ್ ಲಿಯೋ XIV: ಪೋಪ್ ರೋಮನ್ ಕ್ಯಾಥೋಲಿಕ್ ಚರ್ಚ್‌ನ ಮುಖ್ಯಸ್ಥರು. ಪೋಪ್ ಫ್ರಾನ್ಸಿಸ್ ನಂತರ ಪೋಪ್ ಲಿಯೋ XIV ಇತಿಹಾಸದಲ್ಲಿ ಮೊದಲ ಅಮೇರಿಕನ್ ಪೋಪ್ ಆಗಿ ಆಯ್ಕೆಯಾದರು. ಇದು ಕೂಡ ನೆಟ್ಟಿಗರಿಗೆ ಬಹಳ ಇಂಟ್ರೆಸ್ಟಿಂಗ್​ ಎಂದು ಅನಿಸಿರಬೇಕು.

ಶೆಡ್ಯೂಲ್ ಸ್ಯಾಂಡರ್ಸ್: ಈತ ಒಬ್ಬ ಅಮೇರಿಕನ್ ಫುಟ್ಬಾಲ್ ಕ್ವಾರ್ಟರ್‌ಬ್ಯಾಕ್. ನ್ಯಾಷನಲ್ ಫುಟ್‌ಬಾಲ್ ಲೀಗ್ (ಎನ್‌ಎಫ್‌ಎಲ್) ನಲ್ಲಿ ಕ್ಲೀವ್‌ಲ್ಯಾಂಡ್ ಬ್ರೌನ್ಸ್ ಪರ ಆಡುತ್ತಾರೆ.

ಬಿಯಾಂಕಾ ಸೆನ್ಸೋರಿ: ಆಸ್ಟ್ರೇಲಿಯಾದ ವಾಸ್ತುಶಿಲ್ಪ ವಿನ್ಯಾಸಕಿ ಮತ್ತು ರೂಪದರ್ಶಿ ಆಗಿರುವ ಈಕೆ, ಅಮೇರಿಕನ್ ರ‍್ಯಾಪರ್ ಕಾನ್ಯೆ ವೆಸ್ಟ್ ಅವರ ಎರಡನೇ ಪತ್ನಿ. ಅಂದು ಕಾನ್ಯೆ ಅವರೊಂದಿಗೆ ಮದುವೆಯಾದ ವಿಚಾರಕ್ಕೆ ಇವರು ಜಾಗತಿಕವಾಗಿ ಭಾರೀ ಸದ್ದು ಮಾಡಿದ್ದರು. 2022ರಲ್ಲಿ ಈ ಜೋಡಿ ಹೊಸ ಬಾಳಿಗೆ ಹೆಜ್ಜೆಯಿಟ್ಟಿತು. ಈ ವರ್ಷ ಗ್ರ್ಯಾಮಿ ಪ್ರಶಸ್ತಿ ಸಮಾರಂಭದಲ್ಲಿ ಸಾರ್ವಜನಿಕವಾಗಿ ಟಾಪ್‌ಲೆಸ್ ಆಗಿ ಕಾಣಿಸಿಕೊಂಡ ಈಕೆ ನಡೆ ಹಲವರ ಟೀಕೆ ಮತ್ತು ಭಾರೀ ವಿವಾದಕ್ಕೆ ಗುರಿಯಾಗಿತ್ತು.

ಜೋಹ್ರಾನ್ ಮಮ್ದಾನಿ: ಜೋಹ್ರಾನ್ ಕ್ವಾಮಿ ಮಮ್ದಾನಿ ಓರ್ವ ಭಾರತೀಯ-ಅಮೇರಿಕನ್ ರಾಜಕಾರಣಿ. ಅಕ್ಟೋಬರ್ 1991ರಲ್ಲಿ ಉಗಾಂಡಾದ ಕಂಪಾಲಾದಲ್ಲಿ ಜನಿಸಿದ ಇವರು, ನ್ಯೂಯಾರ್ಕ್ ನಗರದ ಪ್ರಸ್ತುತ ಮೇಯರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ.

ಗ್ರೇಟಾ ಥನ್‌ಬರ್ಗ್: ಸ್ವೀಡಿಷ್ ಪರಿಸರ ಕಾರ್ಯಕರ್ತೆಯಾಗಿರುವ ಗ್ರೇಟಾ ಅವರ ಜನನ ಜನವರಿ 3, 2003. ಚಿಕ್ಕ ವಯಸ್ಸಿನಲ್ಲೇ ಪರಿಸರದಲ್ಲಿ ನಡೆಯುತ್ತಿರುವ ಹವಾಮಾನ ವೈಪರೀತ್ಯ ಮತ್ತು ರಾಜಕೀಯ ನಾಟಕಗಳ ಬಗ್ಗೆ ಅವರು ಜಗತ್ತಿಗೆ ನೇರವಾಗಿ ಹೇಳುವ ಗಟ್ಟಿತನವನ್ನು ಹೊಂದಿರುವುದು ವಿಶೇಷ. 2018ರಲ್ಲಿ ಸ್ಕೂಲ್ ಸ್ಟ್ರೈಕ್ ಫಾರ್ ಕ್ಲೈಮೇಟ್ ಆಂದೋಲನ ಎಂದೂ ಕರೆಯಲ್ಪಡುವ ಫ್ರೈಡೇಸ್ ಫಾರ್ ಫ್ಯೂಚರ್ ಅನ್ನು ಪ್ರಾರಂಭಿಸಿದರು. ಇದು ಜಾಗತಿಕವಾಗಿ ಹಲವರ ಗಮನ ಸೆಳೆಯಿತು,(ಏಜೆನ್ಸೀಸ್).