ಎಕ್ಸ್​ನಿಂದ 600ಕ್ಕೂ ಹೆಚ್ಚು ಖಾತೆ ಡಿಲೀಟ್ | X Accounts

ಐಟಿ ಸಚಿವಾಲಯ ಕಳವಳ: ಗ್ರೋಕ್​ನಂತಹ ಎಐ ಸೇವೆಗಳ ಮುಖಾಂತರ ಅಸಭ್ಯ ಮತ್ತು ಲೈಂಗಿಕ ಕಂಟೆಂಟ್​​ಗಳನ್ನು ಸೃಷ್ಟಿಸಿ ಹಂಚಿಕೊಳ್ಳಲಾಗುತ್ತಿರುವುದಕ್ಕೆ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯ ತೀವ್ರ ಕಳವಳ ವ್ಯಕ್ತಪಡಿಸಿದ ಕೆಲವೇ ದಿನಗಳಲ್ಲಿ ಸಾವಿರಾರು ಖಾತೆಗಳ ವಿರುದ್ಧ ಕಠಿಣ ಕ್ರಮಕ್ಕೆ ಎಕ್ಸ್ ಮುಂದಾಗಿದೆ.

ವಿಶೇಷವಾಗಿ ಗ್ರೋಕ್ ಮೂಲಕ ಸೃಷ್ಟಿಸಲಾದ ಎಲ್ಲ ಅಶ್ಲೀಲ, ಅಸಭ್ಯ ಮತ್ತು ಕಾನೂನುಬಾಹಿರ ಅಂಶಗಳನ್ನು ತೆಗೆದು ಹಾಕುವಂತೆ ಐಟಿ ಸಚಿವಾಲಯ ಜ. 2ರಂದು ಎಕ್ಸ್​ಗೆ ಆದೇಶಿಸಿತ್ತು. ತಪ್ಪಿದರೆ, ಐಟಿ ಕಾನೂನು ಹಾಗೂ ಇತರ ಸೂಕ್ತ ಕಾಯಿದೆಗಳಡಿ ಕಂಪನಿ ವಿರುದ್ಧ ಕ್ರಮ ಕೈಗೊಳ್ಳುವುದಾಗಿ ಖಡಕ್ ಎಚ್ಚರಿಕೆ ನೀಡಿತ್ತು. ಕ್ರಮ ಕೈಗೊಂಡ ವರದಿಯನ್ನು (ಆಕ್ಷನ್ ಟೇಕನ್ ರಿಪೋರ್ಟ್- ಎಟಿಆರ್) 72 ಗಂಟೆಯೊಳಗೆ ಸಲ್ಲಿಸುವಂತೆಯೂ ನಿರ್ದೇಶಿಸಿತ್ತು.

ನಕಲಿ ಪ್ರೊಫೈಲ್​​ಗಳ ಸೃಷ್ಟಿ ಮಾತ್ರವಲ್ಲದೆ ಚಿತ್ರ ಅಥವಾ ವಿಡಿಯೋಗಳಲ್ಲಿ ಕಂಡುಬಂದ ಮಹಿಳೆಯರನ್ನು ಟಾರ್ಗೆಟ್ ಮಾಡಿ ಕಿರುಕುಳ ನೀಡಲು ಕೂಡ ಗ್ರೋಕ್ ಅನ್ನು ಬಳಸಲಾಗುತ್ತಿದೆ ಎಂದು ಸಚಿವಾಲಯ ಹೇಳಿತ್ತು.