ಈ ಗ್ರಾಮದ ಜನಸಂಖ್ಯೆ 1500! ಕಳೆದ 3 ತಿಂಗಳಲ್ಲಿ 27,000ಕ್ಕೂ ಅಧಿಕ ಶಿಶುಗಳು ಜನನ? ಹೀಗಿದೆ ಅಚ್ಚರಿ ವರದಿ

ಮಹಾರಾಷ್ಟ್ರ: ಗ್ರಾಮದಲ್ಲಿ ಕೇವಲ 3 ತಿಂಗಳಲ್ಲಿ 27,397 ಶಿಶುಗಳು ಜನಿಸಿವೆ ಎಂಬ ದಾಖಲೆಗಳು ಸದ್ಯ ಇಡೀ ಊರನ್ನೇ ಅಚ್ಚರಿಗೊಳಿಸಿದೆ. ಅಸಲಿಗೆ, ಗ್ರಾಮದ ಜನಸಂಖ್ಯೆ ಕೇವಲ 1,500 ಎಂಬುದು ಇಲ್ಲಿ ಭಾರೀ ಅನುಮಾನಕ್ಕೆ ದಾರಿ ಮಾಡಿಕೊಟ್ಟಿದೆ. ಇದು ರಾಜ್ಯದ ಅತಿದೊಡ್ಡ ಜನನ ಪ್ರಮಾಣಪತ್ರ ಹಗರಣ ಎಂದು ಸ್ಥಳೀಯ ಅಧಿಕಾರಿಗಳು ತಿಳಿಸಿದ್ದು, ಕಡೆಗೂ ಅಕ್ರಮ ಬೆಳಕಿಗೆ ಬಂದಿದೆ.

ಯವತ್ಮಾಲ್ ಜಿಲ್ಲೆಯ ಅರ್ನಿ ತಾಲ್ಲೂಕಿನ ಶೆಂಡುರುಸಾನಿ ಗ್ರಾಮ ಪಂಚಾಯಿತಿಯಲ್ಲಿ ಈ ಅಕ್ರಮಗಳು ಬಹಿರಂಗಗೊಂಡಿವೆ. ಈ ವರ್ಷ ಸೆಪ್ಟೆಂಬರ್, ಅಕ್ಟೋಬರ್ ಮತ್ತು ನವೆಂಬರ್‌ನಲ್ಲಿ 27,000ಕ್ಕೂ ಅಧಿಕ ಶಿಶುಗಳ ಜನನ ಎಂದು ದಾಖಲೆಗಳು ತಿಳಿಸಿವೆ. ಜನನ ಮತ್ತು ಮರಣಗಳ ವಿವರಗಳನ್ನು ಪರಿಶೀಲಿಸುವ ವಿಶೇಷ ಅಭಿಯಾನದ ಭಾಗವಾಗಿ ಈ ವಿಚಾರ ಅಧಿಕಾರಿಗಳ ಗಮನಕ್ಕೆ ಬಂದಿದೆ. ಶಿಶುಗಳ ಜನನ ಸಂಖ್ಯೆಗೂ ಗ್ರಾಮದ ಜನಸಂಖ್ಯೆಗೂ ಭಾರೀ ವ್ಯತ್ಯಾಸವಿದೆ ಎಂಬುದನ್ನು ಅಧಿಕಾರಿಗಳು ಪತ್ತೆಹಚ್ಚಿದ್ದಾರೆ.

ಜನನ ಮತ್ತು ಮರಣ ನೋಂದಣಿ ವ್ಯವಸ್ಥೆಯನ್ನು ಸೈಬರ್ ಅಪರಾಧಿ ಗ್ಯಾಂಗ್ ದುರುಪಯೋಗಪಡಿಸಿಕೊಳ್ಳುತ್ತಿದೆ ಎಂದು ತನಿಖೆಯಿಂದ ತಿಳಿದುಬಂದಿದೆ. ಜನನ-ಮರಣ ನೋಂದಣಿಯನ್ನು ನಾಗರಿಕ ನೋಂದಣಿ ವ್ಯವಸ್ಥೆಯ ಮೂಲಕ ಮಾಡಲಾಗುತ್ತದೆ. ಇದು ಸರ್ಕಾರದ ಪರವಾಗಿ ಸರ್ಟಿಫಿಕೆಟ್​ ಅಧಿಕೃತವಾಗಿ ದಾಖಲಿಸುವ ಡಿಜಿಟಲ್ ವ್ಯವಸ್ಥೆಯಾಗಿದೆ. ಮುಂಬೈಗೆ ಮ್ಯಾಪ್ ಮಾಡಲಾದ ಗ್ರಾಮ ಪಂಚಾಯತಿ ನಾಗರಿಕ ನೋಂದಣಿ ವ್ಯವಸ್ಥೆಯ ಲಾಗಿನ್ ಐಡಿಯನ್ನು ಅಧಿಕಾರಿಗಳು ಗುರುತಿಸಿದ್ದಾರೆ.

ಇದು ಸೈಬರ್ ಕ್ರಿಮಿನಲ್​ ಗ್ಯಾಂಗ್‌ನ ಕೆಲಸ ಎಂದು ಅಧಿಕಾರಿಗಳು ನಂಬಿದ್ದಾರೆ. ಇಂತಹ ಗ್ಯಾಂಗ್‌ಗಳು ಡಿಜಿಟಲ್ ವ್ಯವಸ್ಥೆಗಳ ಮೂಲಕ ಡೇಟಾವನ್ನು ಅಕ್ರಮವಾಗಿ ಮಾರ್ಪಡಿಸಿ ಲಾಭ ಗಳಿಸುವ ಅಪರಾಧಗಳಲ್ಲಿ ತೊಡಗಿವೆ. ಘಟನೆ ಬೆಳಕಿಗೆ ಬಂದ ಕೂಡಲೇ, ಜಿಲ್ಲಾ ಆರೋಗ್ಯ ಅಧಿಕಾರಿ ಯವತ್ಮಾಲ್ ನಗರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದರು. ಜಿಲ್ಲಾ ಪರಿಷತ್ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಮಂದರ್ ಪಟ್ಕಿ ಪಂಚಾಯತ್ ಇಲಾಖೆಯ ಉಪ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ನೇತೃತ್ವದಲ್ಲಿ ತನಿಖಾ ಸಮಿತಿಯನ್ನು ರಚಿಸಿದರು.

ಶೆಂಡುರುಸಾನಿ ಗ್ರಾಮದಲ್ಲಿ ನೇರ ಪರಿಶೀಲನೆ ನಡೆಸಿದ ಸಮಿತಿಯು, 27,397 ಜನನ ನೋಂದಣಿ ವಿವರಗಳು ಮತ್ತು 7 ಮರಣ ನೋಂದಣಿ ವಿವರಗಳು ಗ್ರಾಮ ಪಂಚಾಯತಿ ಪ್ರದೇಶಕ್ಕೆ ಸಂಬಂಧಿಸಿಲ್ಲ ಎಂದು ನಿರ್ಧರಿಸಿತು. ನಾಗರಿಕ ನೋಂದಣಿ ವ್ಯವಸ್ಥೆಯ ಐಡಿಯನ್ನು ಹೇಗೆ ಹ್ಯಾಕ್ ಮಾಡಲಾಗಿದೆ ಎಂದು ಅಧಿಕಾರಿಗಳು ತನಿಖೆ ಕೈಗೊಂಡಿದ್ದಾರೆ. ಸೈಬರ್ ಅಪರಾಧಿಗಳು ಐಡಿ ವಂಚನೆ ಮಾಡಲು, ಸರ್ಕಾರಿ ಯೋಜನೆಗಳಿಂದ ಲಾಭ ಪಡೆಯಲು ಅಥವಾ ಇತರ ಕಾನೂನುಬಾಹಿರ ಚಟುವಟಿಕೆಗಳಿಗೆ ಡೇಟಾವನ್ನು ಬಳಸಿದ್ದಾರೆಯೇ ಎಂದು ನಿರ್ಧರಿಸಲು ತನಿಖೆಯನ್ನು ಚುರುಕುಗೊಳಿಸಲಾಗಿದೆ.

ಅಕ್ರಮವಾಗಿ ನೋಂದಾಯಿಸಲಾದ ಹೆಸರುಗಳಲ್ಲಿ ಶೇ.99ರಷ್ಟು ಪಶ್ಚಿಮ ಬಂಗಾಳ ಮತ್ತು ಉತ್ತರ ಪ್ರದೇಶದಿಂದ ಬಂದಿವೆ ಎಂದು ಹಿರಿಯ ಬಿಜೆಪಿ ನಾಯಕ ಕಿರಿತ್ ಸೋಮಯ್ಯ ಆರೋಪಿಸಿದ್ದಾರೆ. ಈ ಎಲ್ಲಾ ಜನನ ನೋಂದಣಿ ವಿವರಗಳನ್ನು ರದ್ದುಗೊಳಿಸುವಂತೆ 'ಮಹಾ' ಸಿಎಂ ದೇವೇಂದ್ರ ಫಡ್ನವಿಸ್ ಅವರಿಗೆ ಮನವಿ ಮಾಡಿರುವುದಾಗಿ ಸೋಮಯ್ಯ ಮಾಧ್ಯಮಗಳಿಗೆ ತಿಳಿಸಿದ್ದಾರೆ,(ಏಜೆನ್ಸೀಸ್).