ನಾರ್ವೆ ಮಣ್ಣಿನಲ್ಲಿ ಮೋದಿ ಶಾಂತಿ ಮಂತ್ರ! ಮಧ್ಯಪ್ರಾಚ್ಯ ಮತ್ತು ರಷ್ಯಾ-ಯುಕ್ರೇನ್ ಕದನ ಮುಗಿಸಲು ಸಿದ್ಧವಾಯ್ತಾ ಭಾರತದ ಮಹಾ ಸೂತ್ರ..? PM Modi In Norway

ಈ ಬಗ್ಗೆ ನಾರ್ವೆ ಪ್ರಧಾನಿ ಜೊನಾಸ್ ಗಹರ್ ಸ್ಟೋರ್ ಅವರೊಂದಿಗೆ ನಡೆಸಿದ ಜಂಟಿ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಪಿಎಂ ಮೋದಿ, ಯಾವುದೇ ಮಿಲಿಟರಿ ಸಂಘರ್ಷಗಳು ಅಥವಾ ಯುದ್ಧಗಳು ಜಗತ್ತಿನ ಸಮಸ್ಯೆಗಳಿಗೆ ಶಾಂತಿಯುತ ಪರಿಹಾರವನ್ನು ಒದಗಿಸಲು ಸಾಧ್ಯವಿಲ್ಲ. ಯುಕ್ರೇನ್ ಇರಲಿ ಅಥವಾ ಪಶ್ಚಿಮ ಏಷ್ಯಾ ಇರಲಿ, ಎಲ್ಲಾ ಯುದ್ಧಗಳಿಗೂ ಕೇವಲ ರಾಜತಾಂತ್ರಿಕತೆ ಮತ್ತು ಮುಕ್ತ ಸಂವಾದದ ಮೂಲಕವೇ ಮುಕ್ತಿ ಹಾಡಬೇಕಾಗಿದೆ ಎಂದು ವಿಶ್ವಸಂಸ್ಥೆ ಸೇರಿದಂತೆ ಜಗತ್ತಿನ ಪ್ರಮುಖ ದೇಶಗಳಿಗೆ ಖಡಕ್ ಸಂದೇಶ ರವಾನಿಸಿದ್ದಾರೆ.

ಭಯೋತ್ಪಾದನೆಯ ವಿರುದ್ಧದ ಹೋರಾಟದಲ್ಲಿ ಭಾರತದೊಂದಿಗೆ ದೃಢವಾಗಿ ನಿಂತಿರುವ ನಾರ್ವೆ ದೇಶಕ್ಕೆ ಧನ್ಯವಾದ ಅರ್ಪಿಸಿದ ಪ್ರಧಾನಿ ಮೋದಿ, ಉಭಯ ದೇಶಗಳು ಜಾಗತಿಕ ನಿಯಮ ಆಧಾರಿತ ವ್ಯವಸ್ಥೆಯನ್ನು ಬಲವಾಗಿ ನಂಬುತ್ತವೆ ಎಂದು ಸಾರಿದ್ದಾರೆ.

ವಿಶ್ವದ ವಿವಿಧ ವಲಯಗಳಲ್ಲಿ ಯುದ್ಧದ ಜ್ವಾಲೆ ಉರಿಯುತ್ತಿರುವ ಈ ಆತಂಕಕಾರಿ ಸಮಯದಲ್ಲಿ ಭಾರತ ಮತ್ತು ಯುರೋಪ್ ನಡುವಿನ ಸಂಬಂಧವು ಅತ್ಯಂತ ಮಹತ್ವದ ಸುವರ್ಣ ಯುಗಕ್ಕೆ ಪ್ರವೇಶಿಸುತ್ತಿದೆ ಎಂದು ಪ್ರಧಾನಿ ಮೋದಿ ಹೆಮ್ಮೆಯಿಂದ ಘೋಷಿಸಿದ್ದಾರೆ. ಇತ್ತೀಚೆಗೆ ಭಾರತ ಮತ್ತು ಯುರೋಪ್ ನಡುವೆ ಸಹಿ ಮಾಡಲಾದ ಐತಿಹಾಸಿಕ ಮುಕ್ತ ವ್ಯಾಪಾರ ಒಪ್ಪಂದವನ್ನು ಮುಕ್ತಕಂಠದಿಂದ ಶ್ಲಾಘಿಸಿದ ಪಿಎಂ, ಇದು ಉಭಯ ದೇಶಗಳ ಹಂಚಿಕೆಯ ಪ್ರಗತಿ ಮತ್ತು ಸಮೃದ್ಧಿಯ ಬ್ಲೂಪ್ರಿಂಟ್ ಆಗಿದೆ ಎಂದರು.

ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ನಾರ್ವೆ ಪ್ರಧಾನಿ ಜೊನಾಸ್ ಗಹರ್ ಸ್ಟೋರ್, ಭಾರತ ಮತ್ತು ನಾರ್ವೆ ಜಾಗತಿಕ ಸಮುದಾಯದಲ್ಲಿ ಸಮಾನ ಹಿತಾಸಕ್ತಿ ಹಾಗೂ ಸಾಮಾನ್ಯ ನಿಯಮಗಳನ್ನು ಹಂಚಿಕೊಳ್ಳುತ್ತವೆ ಎಂದು ಹೇಳಿದ್ದಾರೆ. ಕಳೆದ 10 ವರ್ಷಗಳಲ್ಲಿ ಉಭಯ ದೇಶಗಳ ನಡುವಿನ ದ್ವಿಪಕ್ಷೀಯ ವ್ಯಾಪಾರವು ಬರೊಬ್ಬರಿ ದುಪ್ಪಟ್ಟಾಗಿದೆ ಎಂದು ಅವರು ಮಾಹಿತಿ ನೀಡಿದ್ದಾರೆ.

ಈ ಭೇಟಿಯ ಅತ್ಯಂತ ಪ್ರಮುಖ ಬೆಳವಣಿಗೆಯಾಗಿ, ಉನ್ನತ ಗುಣಮಟ್ಟದ ಮತ್ತು ಹೈಟೆಕ್ ಆರೋಗ್ಯ ಸೇವೆಗಳ ಅಭಿವೃದ್ಧಿಗಾಗಿ ಉಭಯ ದೇಶಗಳು ತಿಳುವಳಿಕಾ ಪತ್ರಕ್ಕೆ (MoU) ಸಹಿ ಹಾಕಿವೆ. ಡಿಜಿಟಲ್ ಹೆಲ್ತ್, ಕೃತಕ ಬುದ್ಧಿಮತ್ತೆ, ವೈದ್ಯಕೀಯ ಸಂಶೋಧನೆ ಮತ್ತು ಹೆಲ್ತ್ ಟೆಕ್ನಾಲಜಿ ವಲಯದಲ್ಲಿ ಭಾರತ ಮತ್ತು ನಾರ್ವೆ ಅತ್ಯಂತ ನಿಕಟವಾಗಿ ಕೆಲಸ ಮಾಡಲಿವೆ. ಇದರೊಂದಿಗೆ ಡಿಜಿಟಲ್ ಸಾರ್ವಜನಿಕ ಮೂಲಸೌಕರ್ಯ ಮತ್ತು ಡಿಜಿಟಲ್ ಸಾರ್ವಜನಿಕ ಸರಕುಗಳ ಅಭಿವೃದ್ಧಿಯಲ್ಲಿ ಸಹಕಾರವನ್ನು ಮತ್ತಷ್ಟು ತೀವ್ರಗೊಳಿಸಲು ಉಭಯ ನಾಯಕರು ಐತಿಹಾಸಿಕ ನಿರ್ಧಾರ ಕೈಗೊಂಡಿದ್ದಾರೆ,(ಏಜೆನ್ಸೀಸ್).