ಮೋದಿ ಜೀ ಸಹಾಯ ಮಾಡಿ.... ವಿದೇಶಿ ಜೈಲಿನಲ್ಲಿರುವ ಸೈನಿಕನ ಬಿಡುಗಡೆಗೆ ಸೆಲಿನಾ ಜೇಟ್ಲಿ ಕಣ್ಣೀರಿನ ಆಗ್ರಹ! | Celina Jaitley

ಇಂಡಿಯಾ ಟುಡೇ ಟಿವಿಯ ಗೌರವ್ ಸಾವಂತ್ ಅವರೊಂದಿಗಿನ ಸಂದರ್ಶನದಲ್ಲಿ ಮಾತನಾಡಿದ ಸೆಲೀನಾ ಜೇಟ್ಲಿ, ತಮ್ಮ ಸಹೋದರನ ಬಂಧನ ಮತ್ತು ಅವರ ಬಂಧನದ ಸುತ್ತಲಿನ ಮಾಹಿತಿಯ ಕೊರತೆಯನ್ನು ವಿವರಿಸುತ್ತಾ ದುಃಖಿತರಾದರು.

ಸದ್ಯ ಈ ವಿಷಯ ದೆಹಲಿ ಹೈಕೋರ್ಟ್‌ ಮೆಟ್ಟಿಲೇರಿದ್ದು, ಯುಎಇಯಲ್ಲಿ ಮೇಜರ್ ಜೇಟ್ಲಿಯನ್ನು ಪ್ರತಿನಿಧಿಸಲು ಕಾನೂನು ಸಂಸ್ಥೆಯನ್ನು ನೇಮಿಸುವಂತೆ ವಿದೇಶಾಂಗ ಸಚಿವಾಲಯಕ್ಕೆ ನಿರ್ದೇಶನ ನೀಡಿದೆ. ನ್ಯಾಯಾಲಯದ ಆದೇಶದ ಬಳಿಕ ಯುಎಇ ಮೂಲದ ಕಾನೂನು ಸಂಸ್ಥೆ ಖಾಲಿದ್ ಅಲ್ಮಾರಿ ಪಾರ್ಟ್‌ನರ್ಸ್ ಮತ್ತು ಅಡ್ವೊಕೇಟ್ಸ್ ಕಾನೂನು ನೆರವು ನೀಡಲು ಮುಂದಾಗಿದೆ ಎಂದು ವರದಿಯಾಗಿದೆ.

ನಿವೃತ್ತ ವಿಶೇಷ ಪಡೆಗಳ ಕಮಾಂಡೋ ಆಗಿರುವ ಮೇಜರ್ ವಿಕ್ರಾಂತ್ ಜೇಟ್ಲಿ, ಯುಎಇಯಲ್ಲಿ 16 ತಿಂಗಳಿಗೂ ಹೆಚ್ಚು ಕಾಲ ಬಂಧನದಲ್ಲಿದ್ದಾರೆ. ತನ್ನ ಸಹೋದರನನ್ನು ಯಾವುದೇ ಔಪಚಾರಿಕ ಮಾಹಿತಿಯಿಲ್ಲದೆ ಕಾನೂನುಬಾಹಿರವಾಗಿ ಬಂಧಿಸಲಾಗಿದೆ ಎಂದು ಸೆಲೀನಾ ಜೇಟ್ಲಿ ನ್ಯಾಯಾಲಯಕ್ಕೆ ತಿಳಿಸಿದ್ದು, ಕಳೆದ ವರ್ಷ ಜೂನ್​​ನಲ್ಲಿ ಮಾತ್ರ ಅವರನ್ನು ಅಬುಧಾಬಿಯ ಅಲ್-ವಾಥ್ಬಾ ಬಂಧನ ಕೇಂದ್ರಕ್ಕೆ ಸ್ಥಳಾಂತರಿಸಲಾಗಿದೆ ಎನ್ನುವ ವಿಷಯ ತಿಳಿದಿದೆ ಎಂದು ಹೇಳಿದರು.

ತನ್ನ ಸಹೋದರನನ್ನು ಮಾಲ್ ಆಫ್ ದಿ ಎಮಿರೇಟ್ಸ್ ಪಾರ್ಕಿಂಗ್ ಪ್ರದೇಶದಿಂದ ಅಪರಿಚಿತ ವ್ಯಕ್ತಿಗಳು ಎಮಿರೇಟ್ಸ್ ಐಡಿ ಕೇಳಿ ಕಪ್ಪು ಕಾರಿನಲ್ಲಿ ಕರೆದೊಯ್ದರು. ಸುಮಾರು ಒಂಬತ್ತು ತಿಂಗಳವರೆಗೆ ಯಾವುದೇ ಅಧಿಕೃತ ಬಂಧನ ದಾಖಲೆಗಳಿಲ್ಲ ಎಂದು ಸೆಲೀನಾ ಜೇಟ್ಲಿ ತಿಳಿಸಿದ್ದಾರೆ.

ಯಾವುದೇ ವಿವರಣೆ ನೀಡದೆ ಅವರ ಸಹೋದರನನ್ನು ಬಂಧಿಸಲಾಗಿದ್ದು, ಬಂಧನದ ಯಾವುದೇ ದಾಖಲೆ ಇರಲಿಲ್ಲ, ಕಾನೂನು ಸಲಹೆಗಾರರನ್ನು ಸಂಪರ್ಕಿಸಲು, ಸಂವಹನ ನಡೆಸಲು ಅವಕಾಶವಿರಲಿಲ್ಲ. ನನ್ನ ಸಹೋದರ ಎಲ್ಲಿದ್ದಾನೆಂದು ನನಗೆ ತಿಳಿದಿರಲಿಲ್ಲ ಎಂದು ಹೇಳಿದರು.

ಸೆಲೀನಾ ಜೇಟ್ಲಿ ಇಲ್ಲಿಯವರೆಗೆ ಸ್ವೀಕರಿಸಿದ ಏಕೈಕ ಮಾಹಿತಿಯೆಂದರೆ ಪ್ರಾಸಿಕ್ಯೂಷನ್ ಸಂಖ್ಯೆ ಮತ್ತು ರಾಷ್ಟ್ರೀಯ ಭದ್ರತೆ ಬಗ್ಗೆ ಅಸ್ಪಷ್ಟ ಉಲ್ಲೇಖ, ಆರೋಪಗಳ ಬಗ್ಗೆ ಯಾವುದೇ ಸ್ಪಷ್ಟತೆ ಇಲ್ಲ ಎಂದು ಹೇಳಿದರು.

ಮೇಜರ್ ಜೇಟ್ಲಿ 2016 ರಲ್ಲಿ ತಮ್ಮ ಪತ್ನಿ ಸ್ಥಾಪಿಸಿದ ಮ್ಯಾಟಿಟಿ ಗ್ರೂಪ್ ಇಂಟರ್ನ್ಯಾಷನಲ್ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದರು, ಇದು ಮಾನವ ಸಂಪನ್ಮೂಲ, ಅಪಾಯ ನಿರ್ವಹಣೆ ಮತ್ತು ಮಾಹಿತಿ ತಂತ್ರಜ್ಞಾನದಲ್ಲಿ ಕಾರ್ಯಾಚರಣೆಗಳನ್ನು ನಡೆಸುತ್ತಿತ್ತು.

ನಮ್ಮ ದೇಶದ ಸೈನಿಕನೊಬ್ಬ ವಿದೇಶಿ ಜೈಲಿನಲ್ಲಿ ವಿಚಾರಣೆಯಿಲ್ಲದೆ ಇದ್ದಾನೆ. ನಾವು ಕಾನೂನು ನೆರವು ನೀಡಲು ಏಕೆ ವಿಳಂಬ ಮಾಡಬೇಕು?, ಸಂದರ್ಶನದ ಸಮಯದಲ್ಲಿ ಸೆಲಿನಾ ಜೇಟ್ಲಿ ಪ್ರಧಾನಿ ನರೇಂದ್ರ ಮೋದಿಯವರಿಗೆ ನೇರವಾಗಿ ಮನವಿ ಮಾಡಿದರು, ಸಶಸ್ತ್ರ ಪಡೆಗಳಿಗೆ ಅವರ ಬೆಂಬಲದ ಅಗತ್ಯವನ್ನು ಉಲ್ಲೇಖಿಸಿದರು.

ಪ್ರಧಾನಿ ಮೋದಿಜಿಯವರಿಗೆ ನನ್ನ ವಿನಂತಿ ಏನೆಂದರೆ ದಯವಿಟ್ಟು ಈ ಸೈನಿಕನನ್ನು ಮರಳಿ ಕರೆತನ್ನಿ. ಅವರು ತಮ್ಮ ಇಡೀ ಯೌವನವನ್ನು ರಾಷ್ಟ್ರಕ್ಕೆ ನೀಡಿದ್ದಾರೆ, ಅವರು ಏನಾದರೂ ತಪ್ಪು ಮಾಡಿದ್ದರೆ, ಇಷ್ಟೊತ್ತಿಗಾಗಲೇ ಕಾನೂನು ಕ್ರಮ ಜರುಗಿಸಲಾಗುತ್ತಿತ್ತು ಎಂದು ಹೇಳಿದರು.

ನಮ್ಮ ಸೈನಿಕರು ಕೇವಲ ಸಂಖ್ಯೆಗಳಲ್ಲ, ರಾಷ್ಟ್ರವು ಅವರ ಬೆನ್ನಿಗೆ ನಿಲ್ಲಬೇಕು ಎಂದಿರುವ ಸೆಲೀನಾ, ದೀದಿ ನಿಮ್ಮೊಂದಿಗಿದ್ದಾರೆ. ಇಡೀ ದೇಶವೇ ನಿಮ್ಮೊಂದಿಗಿದೆ. ನಿಮ್ಮನ್ನು ಮರಳಿ ಕರೆತರಲು ನಾನು ಪರ್ವತಗಳನ್ನು ಉರುಳಿಸುತ್ತೇನೆ ಜೈ ಹಿಂದ್ ಎಂದು ಹೇಳಿದರು(ಏಜೆನ್ಸೀಸ್​​).