ಬಂಗಾಳದ ಜನತೆಗೆ ಮೋದಿ ಸಾಷ್ಟಾಂಗ ನಮನ: ಸುವೇಂದು ಪಟ್ಟಾಭಿಷೇಕದ ವೇಳೆ ಭಾವೋದ್ವೇಗ, ಮೈದಾನದಲ್ಲಿ ಮೊಳಗಿತು ಜಯಘೋಷ! PM Modi

ಈ ದೃಶ್ಯವು ಬ್ರಿಗೇಡ್ ಪೆರೇಡ್ ಮೈದಾನದಲ್ಲಿದ್ದ ಲಕ್ಷಾಂತರ ಬೆಂಬಲಿಗರ ಕಣ್ಣಾಲಿಗಳು ತೇವಗೊಳ್ಳುವಂತೆ ಮಾಡಿತು.

ಸುವೇಂದು ಅಧಿಕಾರಿ ಮತ್ತು ಅವರ ಸಂಪುಟದ ಐವರು ಸಚಿವರು ವೇದಿಕೆಯ ಮೇಲೆ ಉಪಸ್ಥಿತರಿದ್ದಾಗ ಪ್ರಧಾನಿ ಮೋದಿ ಅಲ್ಲಿಗೆ ಆಗಮಿಸಿದರು. ಕೆಂಪು ಕಾರ್ಪೆಟ್ ಹಾಸಿದ ವೇದಿಕೆಯ ಮುಂಭಾಗಕ್ಕೆ ಬಂದ ಪ್ರಧಾನಿ, ಮೊದಲು ಜನರತ್ತ ಕೈಬೀಸಿದರು. ನಂತರ ಹಠಾತ್ತನೆ ಮಂಡಿಯೂರಿ, ಕೈಮುಗಿದು ಬಂಗಾಳದ ಜನತೆಯತ್ತ ತಲೆಬಾಗಿ ನಮಸ್ಕರಿಸಿದರು.

15 ವರ್ಷಗಳ ಮಮತಾ ಬ್ಯಾನರ್ಜಿ ಅವರ ಆಡಳಿತವನ್ನು ಅಂತ್ಯಗೊಳಿಸಿ, 294 ಕ್ಷೇತ್ರಗಳ ಪೈಕಿ 207 ಸ್ಥಾನಗಳನ್ನು ನೀಡಿ ಬಿಜೆಪಿಯನ್ನು ಆಶೀರ್ವದಿಸಿದ ಬಂಗಾಳದ ಜನತೆಗೆ ಇದು ಪ್ರಧಾನಿಯವರು ಸಲ್ಲಿಸಿದ ಗೌರವ ಸಮರ್ಪಣೆಯಾಗಿತ್ತು.

ಸಮಾರಂಭದಲ್ಲಿ ಮತ್ತೊಂದು ಭಾವನಾತ್ಮಕ ಕ್ಷಣವೆಂದರೆ, 98 ವರ್ಷದ ಹಿರಿಯ ಬಿಜೆಪಿ ಕಾರ್ಯಕರ್ತ ಮಖನ್‌ಲಾಲ್ ಸರ್ಕಾರ್ ಅವರಿಗೆ ಪ್ರಧಾನಿ ನೀಡಿದ ಗೌರವ. 1952ರಲ್ಲಿ ಶ್ಯಾಮ್ ಪ್ರಸಾದ್ ಮುಖರ್ಜಿ ಅವರೊಂದಿಗೆ ಕಾಶ್ಮೀರ ಚಳವಳಿಯಲ್ಲಿ ಭಾಗವಹಿಸಿ ಜೈಲು ಸೇರಿದ್ದ ಸರ್ಕಾರ್ ಅವರನ್ನು ವೇದಿಕೆಯ ಮೇಲೆ ಸನ್ಮಾನಿಸಲಾಯಿತು. ಪ್ರಧಾನಿ ಮೋದಿ ಅವರು ಈ ಹಿರಿಯ ಚೇತನದ ಪಾದ ಮುಟ್ಟಿ ಆಶೀರ್ವಾದ ಪಡೆದರು ಮತ್ತು ಅವರನ್ನು ಅಪ್ಪಿಕೊಂಡು ಕುಶಲೋಪರಿ ವಿಚಾರಿಸಿದರು. ಈ ಮೂಲಕ ಪಕ್ಷಕ್ಕಾಗಿ ದಶಕಗಳ ಕಾಲ ಶ್ರಮಿಸಿದ ಸಾಮಾನ್ಯ ಕಾರ್ಯಕರ್ತನಿಗೆ ಇರುವ ಬೆಲೆಯನ್ನು ಮೋದಿ ಮತ್ತೊಮ್ಮೆ ಸಾಬೀತುಪಡಿಸಿದರು.

ಪಶ್ಚಿಮ ಬಂಗಾಳದ ರಾಜಕೀಯ ಇತಿಹಾಸದಲ್ಲಿ ಇಂದು ಬರಿ ಬದಲಾವಣೆಯಲ್ಲ, ಒಂದು ಮಹಾಕ್ರಾಂತಿ ಸಂಭವಿಸಿದೆ. ಕೋಲ್ಕತ್ತಾದ ಬ್ರಿಗೇಡ್ ಪೆರೇಡ್ ಮೈದಾನದಲ್ಲಿ ನಡೆದ ದೃಶ್ಯಗಳು ಇಡೀ ದೇಶದ ಗಮನ ಸೆಳೆದಿವೆ. ಪ್ರಧಾನಿ ನರೇಂದ್ರ ಮೋದಿ ಅವರು ಬಂಗಾಳದ ಜನತೆಗೆ ತಲೆಬಾಗಿ ನಮಸ್ಕರಿಸಿದ ಕ್ಷಣವು ಕಮಲ ಪಾಳೆಯದ ಭಾವುಕ ಮತ್ತು ಐತಿಹಾಸಿಕ ವಿಜಯವನ್ನು ಸಾರುವಂತಿತ್ತು.

ಇದನ್ನು ಓದಿ: ಬಂಗಾಳದ ಅಗ್ನಿಕನ್ಯೆ ಈಗ 'ಮಾಜಿ'? ಸೋಲು ಒಪ್ಪಿಕೊಂಡರೇ ಮಮತಾ? ಎಕ್ಸ್​ನ ಬಯೋ ಬದಲಾವಣೆ ನೀಡುತ್ತಿದೆ ದೊಡ್ಡ ಸುಳಿವು! Mamata Banerjee Bio

ಕಳೆದ ಒಂದು ದಶಕಕ್ಕೂ ಹೆಚ್ಚು ಕಾಲ ಬಂಗಾಳವನ್ನು ಆಳಿದ್ದ ಮಮತಾ ಬ್ಯಾನರ್ಜಿ ಅವರು ಇಂದು ತಮ್ಮ ಸಾಮಾಜಿಕ ಜಾಲತಾಣದ ಖಾತೆಗಳಿಂದ ಮುಖ್ಯಮಂತ್ರಿ ಎಂಬ ಪದವನ್ನು ತೆಗೆದುಹಾಕಿದ್ದಾರೆ. ಇತ್ತ ಸುವೇಂದು ಅಧಿಕಾರಿ ಅವರು ಜನ ಸೇವಕನಾಗಿ ಪಟ್ಟಕ್ಕೇರಿದ್ದಾರೆ. ಪ್ರಧಾನಿ ಮೋದಿ ಮತ್ತು ಅಮಿತ್ ಷಾ ಅವರ ಕಠಿಣ ಪರಿಶ್ರಮ, ಹಲವಾರು ರ್‍ಯಾಲಿಗಳು ಮತ್ತು ರೋಡ್‌ಶೋಗಳ ಫಲವಾಗಿ ಇಂದು ಬಂಗಾಳದಲ್ಲಿ ಕೇಸರಿ ಬಾವುಟ ಹಾರಾಡುತ್ತಿದೆ.

ಬಂಗಾಳದ ಈ ಹೊಸ ಸರ್ಕಾರವು 'ಸೋನಾರ್ ಬಾಂಗ್ಲಾ' ನಿರ್ಮಾಣದ ಭರವಸೆಯೊಂದಿಗೆ ಅಧಿಕಾರಕ್ಕೆ ಬಂದಿದೆ. ಪ್ರಧಾನಿ ಮೋದಿ ಅವರ ಈ ಗೌರವದ ನಡೆ ಬಂಗಾಳದ ಜನರ ಮತ್ತು ಸರ್ಕಾರದ ನಡುವಿನ ಬಾಂಧವ್ಯವನ್ನು ಮತ್ತಷ್ಟು ಗಟ್ಟಿಗೊಳಿಸಿದೆ,(ಏಜೆನ್ಸೀಸ್​).