9 ಕಿ.ಮೀ ಸಾವು-ಬದುಕಿನ ಹೋರಾಟ: ಮೊಬೈಲ್​ ಖದೀಮನಿಗೆ ಸರಿಯಾದ ಪಾಠ ಕಲಿಸಿದ ಪ್ರಯಾಣಿಕರು! ವಿಡಿಯೋ ವೈರಲ್​... Mobile Theft

Mobile Theft : ಬಿಹಾರದ ಖಗೇರಿಯಾ ಜಿಲ್ಲೆಯಲ್ಲಿ ರೈಲಿನ ಕಿಟಕಿಯ ಹೊರಗಿನಿಂದ ಪ್ರಯಾಣಿಕರೊಬ್ಬರ ಮೊಬೈಲ್ ಕದಿಯಲು ಯತ್ನಿಸಿದ ಕಳ್ಳನಿಗೆ ಭಾರಿ ಶಿಕ್ಷೆಯೊಂದು ಕಾದಿತ್ತು. ಕಿಟಕಿಯಿಂದ ಕೈಹಾಕಿ ಫೋನ್ ಕಸಿಯಲು ಯತ್ನಿಸಿದಾಗ ಜಾಗರೂಕರಾದ ಪ್ರಯಾಣಿಕರು ಆತನ ಕೈಯನ್ನು ಗಟ್ಟಿಯಾಗಿ ಹಿಡಿದುಕೊಂಡಿದ್ದಾರೆ, ಆದರೆ ಚಲಿಸುತ್ತಿದ್ದ ರೈಲಿನಿಂದ ಆತ ಕೆಳಗೆ ಬಿದ್ದರೆ ಪ್ರಾಣಕ್ಕೆ ಅಪಾಯವಿರಬಹುದು ಎಂಬ ಕಾರಣಕ್ಕೆ ಆತನ ಕೈಯನ್ನು ಬಿಡದೆ, ಹಾಗೇ ರೈಲಿನ ಹೊರಗೆ ನೇತಾಡಿಕೊಂಡೇ ಸುಮಾರು 9 ಕಿಲೋಮೀಟರ್ ದೂರದವರೆಗೆ ಕರೆದೊಯ್ದು ನಂತರ ಪೊಲೀಸರಿಗೆ ಒಪ್ಪಿಸಿದ್ದಾರೆ. ಸದ್ಯ ಈ ಇಡೀ ರೋಚಕ ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದೆ.

ಶುಕ್ರವಾರ ರಾತ್ರಿ ಜನಹಿತ್ ಎಕ್ಸ್‌ಪ್ರೆಸ್ ರೈಲಿನಲ್ಲಿ ಈ ಘಟನೆ ನಡೆದಿದೆ. ಮಾನ್ಸಿ ರೈಲ್ವೆ ನಿಲ್ದಾಣದಿಂದ ರೈಲು ಹೊರಟ ಕೆಲವೇ ಕ್ಷಣಗಳಲ್ಲಿ, ಕಿಟಕಿಯ ಹೊರಗಡೆ ನಿಂತಿದ್ದ ಯುವಕನೊಬ್ಬ ಕಿಟಕಿಯ ಪಕ್ಕದಲ್ಲಿ ಕುಳಿತಿದ್ದ ಪ್ರಯಾಣಿಕರೊಬ್ಬರ ಮೊಬೈಲ್ ಫೋನ್ ಕಸಿಯಲು ಯತ್ನಿಸಿದ್ದಾನೆ, ಆದರೆ ಅಲ್ಲೇ ಇದ್ದ ಇತರ ಪ್ರಯಾಣಿಕರು ತಕ್ಷಣವೇ ಕಾರ್ಯಪ್ರವೃತ್ತರಾಗಿ ಆತನ ಕೈಯನ್ನು ಗಟ್ಟಿಯಾಗಿ ಹಿಡಿದುಕೊಂಡಿದ್ದರಿಂದ ಕಳ್ಳತನದ ಯತ್ನ ವಿಫಲವಾಯಿತು. ಪರಿಣಾಮವಾಗಿ, ರೈಲು ವೇಗವಾಗಿ ಚಲಿಸುತ್ತಿದ್ದರೂ ಆರೋಪಿಯು ರೈಲಿನ ಕಿಟಕಿಯ ಹೊರಗೆ ನೇತಾಡಿಕೊಂಡೇ ಪ್ರಯಾಣಿಸಬೇಕಾಗಿ ಬಂತು.

ವೇಗವಾಗಿ ಚಲಿಸುತ್ತಿದ್ದ ರೈಲಿನಿಂದ ಆತನ ಕೈ ಬಿಟ್ಟರೆ ಕೆಳಗೆ ಬಿದ್ದು ಪ್ರಾಣಾಪಾಯ ಸಂಭವಿಸಬಹುದು ಎಂಬ ಮಾನವೀಯತೆಯಿಂದ ಪ್ರಯಾಣಿಕರು ಆತನ ಕೈಯನ್ನು ಬಿಡದೆ ಗಟ್ಟಿಯಾಗಿ ಹಿಡಿದುಕೊಂಡಿದ್ದರು. ಈ ಮಧ್ಯೆ, ತನ್ನನ್ನು ಬಿಟ್ಟುಬಿಡುವಂತೆ ಆತ ಜೋರಾಗಿ ಕಿರುಚುತ್ತಾ, ಕಣ್ಣೀರು ಹಾಕುತ್ತಾ ಬೇಡಿಕೊಂಡರೂ ಪ್ರಯಾಣಿಕರು ಆತನನ್ನು ಸುರಕ್ಷಿತವಾಗಿ ಹಿಡಿದಿಟ್ಟುಕೊಂಡಿದ್ದರು. ಈ ಮಧ್ಯೆ ಕೆಲ ಪ್ರಯಾಣಿಕರು ಆತನಿಗೆ ಕಪಾಳಮೋಕ್ಷ ಕೂಡ ಮಾಡಿದರು ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ.