'ಮೆಸ್'​ ಆಯ್ತು ಮೆಸ್ಸಿ ಎಂಟ್ರಿ! ಬಾಟಲಿ, ಕುರ್ಚಿ ಎಸೆತ​; ಘಟನೆ ಬೆನ್ನಲ್ಲೇ ಉಪ್ಪಾಳ್​ ಸ್ಟೇಡಿಯಂ​ ಬಳಿ ಹೈಅಲರ್ಟ್​

ಕೋಲ್ಕತ: ಜಗತ್ತಿನಾದ್ಯಂತ ಕೋಟ್ಯಂತರ ಅಭಿಮಾನಿ ಬಳಗವನ್ನು ಹೊಂದಿರುವ ಫುಟ್ಬಾಲ್​ ದಂತಕಥೆ ಮೆಸ್ಸಿ, GOAT ಇಂಡಿಯಾ ಟೂರ್-2025ರ ಭಾಗವಾಗಿ 3 ದಿನಗಳ ಭಾರತ ಪ್ರವಾಸಕ್ಕಾಗಿ ಇಂದು (ಡಿ.13) ಮುಂಜಾನೆ 1.30ರ ಸುಮಾರಿಗೆ ಕೋಲ್ಕತಾಗೆ ಬಂದಿಳಿದರು. ಈ ಸಂದರ್ಭದಲ್ಲಿ, ಸಾಲ್ಟ್ ಲೇಕ್ ಕ್ರೀಡಾಂಗಣಕ್ಕೆ ಭೇಟಿ ಕೊಟ್ಟ ಅವರು, ಹೆಚ್ಚು ಸಮಯ ಇರದ ಹಿನ್ನೆಲೆ ಮೈದಾನಕ್ಕೆ ಆಗಮಿಸಿದ್ದ ಜನರು ಕುಪಿತಗೊಂಡರು. ಬಾಟಲಿ ಮತ್ತು ಕೈಗೆ ಸಿಕ್ಕ ವಸ್ತುಗಳನ್ನು ಕೋಪದಿಂದ ಎಸೆದು, ಮೆಸ್ಸಿ ವಿರುದ್ಧ ತೀವ್ರ ಆಕ್ರೋಶ ಹೊರಹಾಕಿದರು.

ಈ ಘಟನೆ ಬೆನ್ನಲ್ಲೇ ಹೈದರಾಬಾದ್ ಪೊಲೀಸರು ಹೈಅಲರ್ಟ್​ ಆಗಿದ್ದು, ಮೆಸ್ಸಿ ಭೇಟಿ ಕೊಡಲಿರುವ ಎರಡನೇ ಸ್ಥಳವಾದ ಉಪ್ಪಾಳ್​ ಕ್ರೀಡಾಂಗಣದ ಬಳಿ ಭಾರೀ ಭದ್ರತೆಯನ್ನು ನಿಯೋಜಿಸಿದ್ದಾರೆ. ಯಾವುದೇ ಅಹಿತಕರ ಘಟನೆಗಳು ನಡೆಯದಂತೆ ಕಟ್ಟುನಿಟ್ಟಿನ ಕ್ರಮಗಳನ್ನು ತೆಗೆದುಕೊಳ್ಳಲಾಗಿದೆ. ಕೋಲ್ಕತ ಸ್ಟೇಡಿಯಂನಲ್ಲಿ ಉಂಟಾದ ಗದ್ದಲ, ಕುರ್ಚಿಗಳು ಮತ್ತು ನೀರಿನ ಬಾಟಲಿಗಳ ಎಸೆತದಂತಹ ಘಟನೆಗಳು ಇಲ್ಲಿ ನಡೆಯದಂತೆ ಕಟ್ಟೆಚ್ಚರ ವಹಿಸಲಾಗಿದೆ.