ದೇಶ

ಸಿಎಂ ವಿಜಯ್ ಕ್ಯಾಬಿನೆಟ್‌ನ ಆ ನವಗ್ರಹಗಳು ಯಾರು?; ಸಚಿವರ ಹಿನ್ನೆಲೆ ಇಲ್ಲಿದೆ..TVK Cabinet Ministers

TVK Cabinet Ministers
TVK Cabinet Ministers
Published on: 

ಪ್ರಮುಖ ಮುಖ್ಯಾಂಶಗಳು

  • 60 ವರ್ಷಗಳ ಬಳಿಕ DMK ಮತ್ತು AIADMK ಹೊರತಾದ ಪಕ್ಷವೊಂದು ಅಧಿಕಾರಕ್ಕೆ ಬಂದಿದೆ.
  • 120 ಶಾಸಕರ ಬೆಂಬಲದೊಂದಿಗೆ ವಿಜಯ್ ಸರ್ಕಾರ ರಚನೆ
  • ತಂಡದಲ್ಲಿ ವೈದ್ಯರು, ಮಾಜಿ ಅಧಿಕಾರಿಗಳು ಮತ್ತು ಯುವ ಮುಖಗಳಿಗೆ ಆದ್ಯತೆ
TVK Cabinet Minister: ತಮಿಳುನಾಡು ರಾಜಕೀಯದಲ್ಲಿ ಆರು ದಶಕಗಳ ಆಳ್ವಿಕೆ ನಡೆಸಿದ ಡಿಎಂಕೆ ಕೋಟೆಯನ್ನು ಒಡೆದು 'ತಮಿಳಗ ವೆಟ್ರಿ ಕಳಗಂ' ಅಧ್ಯಕ್ಷ ಸಿ. ಜೋಸೆಫ್ ವಿಜಯ್ ಅವರು ಇಂದು ತಮಿಳುನಾಡಿನ ನೂತನ ಮುಖ್ಯಮಂತ್ರಿಯಾಗಿ ಪ್ರಮಾಣವಚನ ಸ್ವೀಕರಿಸಿದರು. ವಿಜಯ್ ಅವರೊಂದಿಗೆ ಇಂದು 9 ಪ್ರಮುಖ ನಾಯಕರು ಸಚಿವರಾಗಿ ಪ್ರಮಾಣವಚನ ಸ್ವೀಕರಿಸಿದರು.

ಸ್ಟೇಡಿಯಂನಲ್ಲಿ ಜನ ಸಾಗರ

ಚೆನ್ನೈನ ಜವಾಹರಲಾಲ್ ನೆಹರು ಕ್ರೀಡಾಂಗಣದಲ್ಲಿ ನಡೆದ ಅದ್ಧೂರಿ ಸಮಾರಂಭದಲ್ಲಿ ನೋರಾರು ಅಭಿಮಾನಿಗಳು, ರಾಜಕೀಯ ಬೆಂಬಲಿಗರು ಭಾಗಿಯಾಗಿದ್ದರು.  ರಾಜ್ಯಪಾಲ ರಾಜೇಂದ್ರ ವಿಶ್ವನಾಥ್ ಅರ್ಲೇಕರ್ ಅವರು ಪ್ರಮಾಣವಚನ ಬೋಧಿಸಿದರು.

ಹಲವರು ಭಾಗಿ

ಈ ಐತಿಹಾಸಿಕ ಕ್ಷಣಕ್ಕೆ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ, ನಟಿ ತ್ರಿಶಾ. ನಟಿ ಸಂಗೀತಾ, ವಿಜಯ್​ ಪೋಷಕರಾದ ಎಸ್.ಎ. ಚಂದ್ರಶೇಖರ್ ಮತ್ತು ಶೋಭಾ ಚಂದ್ರಶೇಖರ್​ ಸೇರಿದಂತೆ ಹಲವು ಗಣ್ಯರು ಸಾಕ್ಷಿಯಾದರು.

 ಕೆಎ ಸೆಂಗೊಟ್ಟೈಯನ್ 

ಚೆನ್ನೈನಲ್ಲಿ ಪ್ರಮಾಣ ವಚನ ಸ್ವೀಕರಿಸಿದ ಸಂಪುಟದ ಪ್ರಮುಖ ಮುಖಗಳಲ್ಲಿ ಹಿರಿಯ ಎಐಎಡಿಎಂಕೆ ನಾಯಕ ಕೆಎ ಸೆಂಗೊಟ್ಟೈಯನ್ ಕೂಡ ಒಬ್ಬರು. ಅವರು ದಶಕಗಳಿಂದ ಮಾಜಿ ಮುಖ್ಯಮಂತ್ರಿಗಳಾದ ಎಂಜಿಆರ್ ಮತ್ತು ಜಯಲಲಿತಾ ಅವರೊಂದಿಗೆ ನಿಕಟವಾಗಿ ಕೆಲಸ ಮಾಡಿದ್ದಾರೆ. ವಿಧಾನಸಭಾ ಚುನಾವಣೆಯಲ್ಲಿ ಗೋಬಿಚೆಟ್ಟಿಪಾಳ್ಯಂ ಕ್ಷೇತ್ರದಿಂದ ಸ್ಪರ್ಧಿಸಿ ಗೆದ್ದಿದ್ದರು.
ಇಪಿಎಸ್ ನಾಯಕತ್ವವನ್ನು ಬಹಿರಂಗವಾಗಿ ಪ್ರಶ್ನಿಸಿದ ಮತ್ತು ಉಚ್ಚಾಟಿತ ನಾಯಕರನ್ನು ಮತ್ತೆ ಪಕ್ಷಕ್ಕೆ ಕರೆತರುವಲ್ಲಿ ಪಕ್ಷ ವಿಫಲವಾಗಿದೆ ಎಂದು ಟೀಕಿಸಿದ ನಂತರ  ನವೆಂಬರ್ 2025 ರಲ್ಲಿ ಸೆಂಗೊಟ್ಟೈಯನ್ ಅವರನ್ನು ಎಐಎಡಿಎಂಕೆಯಿಂದ ಹೊರಹಾಕಲಾಯಿತು. ಅವರನ್ನು ಟಿವಿಕೆ  ಹೊಸ ಸರ್ಕಾರಕ್ಕೆ ಸೇರ್ಪಡಿಸಿಕೊಂಡಿದೆ. ಆ ಮೂಲಕ ಆಡಳಿತಾತ್ಮಕ ಅನುಭವ ಮತ್ತು ರಾಜಕೀಯ ತೂಕವನ್ನು ಸೇರಿಸುವ ವಿಜಯ್ ಅವರ ಪ್ರಯತ್ನವೆಂದು ಪರಿಗಣಿಸಲಾಗುತ್ತಿದೆ.

 ಆಧವ್ ಅರ್ಜುನ್

ಟಿವಿಕೆ ಮುಖ್ಯಸ್ಥ ವಿಜಯ್ ಅವರ ವಿಶ್ವಾಸಾರ್ಹ ತಂತ್ರಜ್ಞರಲ್ಲಿ ಒಬ್ಬರೆಂದು ಪರಿಗಣಿಸಲ್ಪಟ್ಟ ಆಧವ್ ಅರ್ಜುನ್ ತಮಿಳುನಾಡಿನ ಪ್ರಮುಖ ರಾಜಕಾರಣಿ. ಚುನಾವಣಾ ತಂತ್ರಗಾರ ಮತ್ತು ಕ್ರೀಡಾ ನಿರ್ವಾಹಕರಾಗಿದ್ದಾರೆ.  ಅರ್ಜುನ ಚೆನ್ನೈನ ವಿಲ್ಲಿವಕ್ಕಂ ಕ್ಷೇತ್ರದಿಂದ ಸ್ಪರ್ಧಿಸಿ ಗೆದ್ದಿದ್ದಾರೆ. ಟಿವಿಕೆಯ ಸಾಂಸ್ಥಿಕ ಯೋಜನೆಯಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ. ಲಾಟರಿ ಉದ್ಯಮಿ ಸ್ಯಾಂಟಿಯಾಗೊ ಮಾರ್ಟಿನ್ ಅವರ ಅಳಿಯ ಕೂಡ.

ನಿರ್ಮಲ್ ಕುಮಾರ್ 

ಮಧುರೆಯ ತಿರುಪರಂಕುಂಡ್ರಂ ಕ್ಷೇತ್ರದಿಂದ ಗೆಲುವು ಸಾಧಿಸಿದ ನಿರ್ಮಲ್ ಕುಮಾರ್ ಅವರು ಸಂಪುಟವನ್ನು ಸೇರಿದ್ದಾರೆ. ಬಿಜೆಪಿಯ ಮಾಜಿ ಪದಾಧಿಕಾರಿಯಾಗಿದ್ದ ನಿರ್ಮಲ್ ಕುಮಾರ್, ರಾಜಕೀಯ ಪಕ್ಷವನ್ನು ಬದಲಿಸಿ  ಟಿವಿಕೆ ಪಕ್ಷದ ಪ್ರಮುಖ ನಾಯಕನಾಗಿ ಹೊರಹೊಮ್ಮಿದ್ದಾರೆ.

'ಬುಸ್ಸಿ' ಆನಂದ್

ಟಿವಿಕೆ ಪ್ರಧಾನ ಕಾರ್ಯದರ್ಶಿ ಮತ್ತು ಚೆನ್ನೈನ ಟಿ.ನಗರ ಅಂದರೆ ತ್ಯಾಗರಾಯನಗರ ಕ್ಷೇತ್ರದ ಶಾಸಕ. ಪಕ್ಷದ ಸಂಘಟನೆಯಲ್ಲಿ ಪ್ರಮುಖ ಪಾತ್ರ ವಹಿಸಿದ ಇವರು ಸಂಪುಟದ ಪ್ರಭಾವಿ ನಾಯಕ.  2006 ರಲ್ಲಿ ಪುದುಚೇರಿಯ 'ಬುಸ್ಸಿ' ಕ್ಷೇತ್ರದಿಂದ ಗೆದ್ದಿದ್ದರಿಂದ ಅವರಿಗೆ ಆ ಹೆಸರು ಬಂದಿದೆ. ನಟ ವಿಜಯ್ ಅವರ ಪಕ್ಷದ ಸಂಘಟನೆ ಮತ್ತು ತಳಮಟ್ಟದ ಕಾರ್ಯಕರ್ತರನ್ನು ಒಗ್ಗೂಡಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ.

 ರಾಜ ಮೋಹನ್ 

 ಉತ್ತಮ ವಾಗ್ಮಿ  ರಾಜ ಮೋಹನ್  ಇವರು ಸಂಪುಟಕ್ಕೆ ಗ್ಲಾಮರ್ ಮತ್ತು ಜ್ಞಾನದ ಸ್ಪರ್ಶ ನೀಡಲಿದ್ದಾರೆ. ಎಗ್ಮೋರ್ ವಿಧಾನಸಭಾ ಕ್ಷೇತ್ರದಲ್ಲಿ ಸ್ಪರ್ಧಿಸಿ 45.02% ಮತಗಳೊಂದಿಗೆ ಗೆದ್ದರು. ಯುಟ್ಯೂಬ್ ಚಾನೆಲ್ 'ಪುಟ್ ಚಟ್ನಿ'  ಮೂಲಕ ಜನಪ್ರಿಯರಾಗಿದ್ದರು ಮತ್ತು ನಂತರ 'ತಮಿಳ್ ವಣಕ್ಕಂ' ಚಾನೆಲ್ ಸ್ಥಾಪಿಸಿದರು.

ಡಾ. ಟಿ.ಕೆ. ಪ್ರಭು 

ದಂತವೈದ್ಯರಾಗಿದ್ದ ರಾಜಕಾರಣಿ ಡಾ. ಟಿ.ಕೆ. ಪ್ರಭು ಅವರು ಇಂದು ಪ್ರಮಾಣವಚನ ಸ್ವೀಕರಿಸಿದ ಇತರ ಸಚಿವರಲ್ಲಿ ಪ್ರಮುಖರಾಗಿದ್ದಾರೆ. ಇವರು ಕಾರೈಕುಡಿ ವಿಧಾಸನಭಾ ಕ್ಷೇತ್ರದಿಂದ ಸ್ಪರ್ಧಿಸಿ ಶಾಸಕರಾಗಿದ್ದಾರೆ.   ಗ್ರಾಮೀಣ ಕೃಷಿ ಕುಟುಂಬದಿಂದ ಬಂದವರಾದ ಇವರು ಉದ್ಯಮಿಯೂ ಹೌದು. 

 ಅರುಣ್ ರಾಜ್ 

ತಮ್ಮ ಐಆರ್‌ಎಸ್  ವೃತ್ತಿಯನ್ನು ತ್ಯಜಿಸಿ ಟಿವಿಕೆ ಸೇರಿದ್ದ ವೈದ್ಯರಾದ ಅರುಣ್ ರಾಜ್ ಅವರು, ತಮ್ಮ ತವರು ಕ್ಷೇತ್ರವಾದ ತಿರುಚ್ಚೆಂಗೋಡ್‌ನಲ್ಲಿ ಗೆಲುವು ಸಾಧಿಸಿ ಈಗ ಸಚಿವ ಸಂಪುಟವನ್ನು ಪ್ರವೇಶಿಸಿದ್ದಾರೆ. ತಮಿಳುನಾಡು ವಿಧಾನಸಭಾ ಚುನಾವಣೆಯಲ್ಲಿ, ಟಿವಿಕೆ ಪಕ್ಷವನ್ನು ಬಲಪಡಿಸುವಲ್ಲಿ ಮತ್ತು ಪಕ್ಷದ ಪ್ರಣಾಳಿಕೆಯನ್ನು ರೂಪಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ.

ಪಿ. ವೆಂಕಟರಮಣನ್

ಮೈಲಾಪುರ ಕ್ಷೇತ್ರದ ಶಾಸಕರಾದ ಇವರು ವಿಜಯ್ ತಂಡದ ಪ್ರಮುಖ ಮುಖ. 2000ನೇ ಇಸವಿಯಿಂದ ನಟ ವಿಜಯ್ ಅವರ ಮ್ಯಾನೇಜರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ವೃತ್ತಿಯಲ್ಲಿ ವಕೀಲರಾಗಿರುವ ಅವರಿಗೆ  48 ವರ್ಷ.ಈಗ  ತಮಿಳುನಾಡು ಸಚಿವರಾಗಿ ಪ್ರಮಾಣವಚನ ಸ್ವೀಕರಿಸಿದ್ದಾರೆ.

ಕೀರ್ತನಾ

ಸಿನಿಮಾ ಮತ್ತು ಪಟಾಕಿಗಳ ನಗರಿ ಎಂದೇ ಖ್ಯಾತಿಯಾದ ಶಿವಕಾಶಿ ಕ್ಷೇತ್ರದಿಂದ ಕೀರ್ತನಾ ಕಣಕ್ಕಿಳಿದಿದ್ದರು. ಅನುಭವವಿಲ್ಲದ ಯುವತಿಯೆಂದು ವಿರೋಧ ಪಕ್ಷಗಳು ಲೇವಡಿ ಮಾಡಿದ್ದರು.  ಸುಮಾರು 11,000ಕ್ಕೂ ಅಧಿಕ ಮತಗಳ ಅಂತರದ ಗೆಲುವು ತಂದುಕೊಟ್ಟಿತು. ಕಾಂಗ್ರೆಸ್‌ನ ಅನುಭವಿ ನಾಯಕ ಅಶೋಕನ್​ರನ್ನು ಸೋಲಿಸಿದ್ದಾರೆ. ರಾಜಕೀಯಕ್ಕೆ ಬರುವ ಮುನ್ನ ರಾಜಕೀಯ ಸಲಹೆಗಾರರಾಗಿ ಮತ್ತು ಪ್ರಚಾರ ತಂತ್ರಗಾರರಾಗಿ ಕೀರ್ತನಾ ಕೆಲಸ ಮಾಡಿದ್ದರು.

ಬೆಂಬಲಿಸಿದ ಪಕ್ಷಕ್ಕೂ ಸಿಗುತ್ತೆ ಸ್ಥಾಮ

ಟಿವಿಕೆ ಸರ್ಕಾರ ರಚನೆಗೆ ಬೆಂಬಲ ನೀಡಿರುವ ಕಾಂಗ್ರೆಸ್ ನಾಯಕರು ಮತ್ತು ಇತರೆ ಎಡ ಪಂಥೀಯ ನಾಯಕರಿಗೆ  ಖಾತೆ ಹಂಚಿಕೆ ಚರ್ಚೆಗಳು ಪೂರ್ಣಗೊಂಡ ನಂತರ ನಂತರದ ಹಂತದಲ್ಲಿ ಪ್ರಮಾಣ ವಚನ ಸ್ವೀಕರಿಸಬಹುದು. ವಿಜಯ್ ಅವರ ಹೊಸ ಸರ್ಕಾರ ಮೇ 13 ರ ಮೊದಲು ವಿಧಾನಸಭೆಯಲ್ಲಿ ತನ್ನ ಬಹುಮತವನ್ನು ಸಾಬೀತುಪಡಿಸಬೇಕಾಗುತ್ತದೆ. ಹೊಸ ಸರ್ಕಾರವು ಕಾಂಗ್ರೆಸ್, ಸಿಪಿಐ, ಸಿಪಿಐ(ಎಂ), ವಿಸಿಕೆ ಮತ್ತು ಐಯುಎಂಎಲ್‌ ಪಕ್ಷವನ್ನು ಒಳಗೊಂಡಿದೆ, (ಏಜೆನ್ಸೀಸ್).
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net