ಈ ವರ್ಷ ಕಾಮನ್​ವೆಲ್ತ್​ ಗೇಮ್ಸ್​ನಲ್ಲಿ ಭಾರತದ ಮೆಡಲ್​ ಸಂಖ್ಯೆ 24 ವರ್ಷಗಳಲ್ಲಿಯೇ ಅತ್ಯಂತ ಕಡಿಮೆ! ಇದಕ್ಕೆ ಕಾರಣವೂ ಇದೆ

ನವದೆಹಲಿ: ಇತ್ತೀಚೆಗಷ್ಟೇ ಮುಕ್ತಾಯಗೊಂಡ ಕಾಮನ್‌ವೆಲ್ತ್ ಕ್ರೀಡಾಕೂಟದಲ್ಲಿ (Commonwealth Games 2026 ) ಭಾರತ ಒಟ್ಟು 39 ಪದಕಗಳನ್ನು ಗೆದ್ದಿದೆ. ಇದರಲ್ಲಿ 13 ಚಿನ್ನ, 17 ಬೆಳ್ಳಿ ಹಾಗೂ 9 ಕಂಚಿನ ಪದಕಗಳು ಸೇರಿವೆ. ಆದರೆ, 24 ವರ್ಷಗಳಲ್ಲಿ ಇದೇ ಅತ್ಯಂತ ಕಡಿಮೆ ಪದಕ ಬೇಟೆ ಎನ್ನಲಾಗಿದೆ.

1998ರ ಕೌಲಾಲಂಪುರದಲ್ಲಿ ನಡೆದ ಕಾಮನ್‌ವೆಲ್ತ್ ಕ್ರೀಡಾಕೂಟದ ಬಳಿಕ ಭಾರತ 50 ಪದಕಗಳ ಗಡಿ ದಾಟಲು ವಿಫಲವಾಗಿರುವುದು ಇದೇ ಮೊದಲು. 2002ರ ಮ್ಯಾಂಚೆಸ್ಟರ್‌ ಗೇಮ್ಸ್‌ನಲ್ಲಿ 69 ಪದಕಗಳನ್ನು ಬಾಚಿಕೊಂಡಿದ್ದ ಭಾರತ, ಕಳೆದ 24 ವರ್ಷಗಳಲ್ಲಿ ಅತ್ಯಂತ ಕಡಿಮೆ ಪದಕಗಳನ್ನು ಗೆದ್ದಿದ್ದು ಈ ವರ್ಷವೇ. ಪದಕಗಳ ಕುಸಿತವಿದ್ದರೂ ಸ್ಕಾಟ್ಲೆಂಡ್​ ಮಣ್ಣಿನಲ್ಲಿ ಭಾರತೀಯ ಕ್ರೀಡಾಪಟುಗಳ ಪ್ರದರ್ಶನ ಅಮೋಘವಾಗಿತ್ತು ಎಂಬುದಕ್ಕೆ ಅವರು ಕೊಟ್ಟಿರುವ ಭರ್ಜರಿ ಪೈಪೋಟಿಗಳೇ ಸಾಕ್ಷಿ.

ಕ್ರೀಡಾಪಟುಗಳ ಪ್ರದರ್ಶನವನ್ನು ಕೇವಲ ಪದಕಗಳ ಸಂಖ್ಯೆಯನ್ನು ಆಧಾರಿಸಿ ನಿರ್ಣಯಿಸುವುದು ಸರಿಯಲ್ಲ. ಈ ಬಾರಿ, ಭಾರತದ ಚಾಂಪಿಯನ್​ಗಳು ಸಂದರ್ಭಕ್ಕೆ ತಕ್ಕಂತೆ ಆಡಿದ್ದಾರೆ ಮತ್ತು ಕಡಿಮೆ ಅವಕಾಶಗಳಲ್ಲಿ ಅಸಾಧಾರಣವಾಗಿ ಅಮೋಘ ಪ್ರದರ್ಶನವನ್ನೇ ನೀಡಿ, ದೇಶದ ಕೀರ್ತಿಯನ್ನು ಇನ್ನಷ್ಟು ಎತ್ತರಕ್ಕೆ ಕೊಂಡೊಯ್ದಿದ್ದಾರೆ. ಇದೇ ನಾಲ್ಕು ವರ್ಷಗಳ ಹಿಂದೆ ಬರ್ಮಿಂಗ್‌ಹ್ಯಾಮ್‌ನಲ್ಲಿ ನಡೆದ 19 ಕ್ರೀಡಾಕೂಟಕ್ಕೆ ಹೋಲಿಸಿದರೆ ಈ ಬಾರಿ, ಹಣಕಾಸಿನ ಅಡಚಣೆಯಿಂದಾಗಿ, ಕೇವಲ 10 ಕ್ರೀಡೆಗಳಿಗೆ ಮಾತ್ರ ಕಾಮನ್​ವೆಲ್ತ್​ ಗೇಮ್ಸ್​ ಸೀಮಿತವಾಗಿತ್ತು ಎಂಬುದು ಗಮನಾರ್ಹ.

ಸಾಂಪ್ರದಾಯಿಕವಾಗಿ ಭಾರತಕ್ಕೆ ಹೆಚ್ಚು ಪದಕಗಳನ್ನು ಒದಗಿಸುವ ಕ್ರೀಡೆಗಳಾದ ಶೂಟಿಂಗ್ (135 ಪದಕ), ಬ್ಯಾಡ್ಮಿಂಟನ್ (31), ಟೇಬಲ್ ಟೆನ್ನಿಸ್ (28) ಮತ್ತು ಹಾಕಿಯನ್ನು (6 ಪದಕ) ತೆಗೆದುಹಾಕಲಾಯಿತು. ಈ ಐದು ಕ್ರೀಡೆಗಳಲ್ಲಿ, 2022ರ ಬರ್ಮಿಂಗ್ಹ್ಯಾಮ್ ಕ್ರೀಡಾಕೂಟದಲ್ಲಿ ಭಾರತವು 13 ಚಿನ್ನದ ಪದಕಗಳನ್ನು ಬಾಚಿಕೊಂಡಿತ್ತು. 61 ಪದಕಗಳಲ್ಲಿ 30 ಪದಕಗಖು ಇದರಿಂದಲೇ ಬಂದಿತ್ತು. ಆದರೆ, ಈ ವರ್ಷದ ಕ್ರೀಡಾಕೂಟದಲ್ಲಿ ಹೆಚ್ಚು ಪದಕಗಳನ್ನು ಒದಗಿಸುವ ಕ್ರೀಡೆಗಳಿಲ್ಲದೆಯೇ ಭಾರತ 39 ಪದಕ ಗೆದ್ದಿರುವುದು ಶ್ಲಾಘನೀಯ.

ಭಾರತ ತಂಡ ಎದೆಗುಂದದೆ ಉಳಿದ ಪಂದ್ಯಗಳಲ್ಲಿ ಉತ್ತಮ ಪ್ರದರ್ಶನ ನೀಡಿ, ಒಟ್ಟಾರೆ ಪದಕ ಪಟ್ಟಿಯಲ್ಲಿ ಆಸ್ಟ್ರೇಲಿಯಾ, ಇಂಗ್ಲೆಂಡ್ ಮತ್ತು ಕೆನಡಾ ನಂತರ ನಾಲ್ಕನೇ ಸ್ಥಾನವನ್ನು ಅಲಂಕರಿಸಿದೆ. ಭಾರತ ಮತ್ತು ಆತಿಥೇಯ ರಾಷ್ಟ್ರ ಸ್ಕಾಟ್ಲೆಂಡ್ ಎರಡೂ 39 ಪದಕಗಳನ್ನು ಗೆದ್ದಿದ್ದರೂ, ಹೆಚ್ಚು ಬೆಳ್ಳಿ ಪದಕಗಳನ್ನು ಹೊಂದಿರುವ ಕಾರಣ ನಾಲ್ಕನೇ ಸ್ಥಾನಕ್ಕೆ ಜಿಗಿದಿದೆ.

ಈ ಬಾರಿ ಭಾರತೀಯ ಬಾಕ್ಸರ್‌ಗಳು ಇತಿಹಾಸ ನಿರ್ಮಿಸಿದ್ದಾರೆ. ಒಟ್ಟು 14 ಬಾಕ್ಸರ್‌ಗಳಲ್ಲಿ 10 ಮಂದಿ ಪದಕ ಗೆದ್ದಿದ್ದಾರೆ. ಇದರಲ್ಲಿ 7 ಚಿನ್ನ ಮತ್ತು 3 ಬೆಳ್ಳಿ ಸೇರಿದೆ. ಮಹಿಳಾ ಬಾಕ್ಸರ್‌ಗಳಲ್ಲಿ ಪ್ರೀತಿ ಪವಾರ್, ಜಾಸ್ಮಿನ್ ಲಂಬೋರಿಯಾ, ಸಾಕ್ಷಿ ಚೌಧರಿ, ಪ್ರಿಯಾ ಗಂಗಾಸ್ ಮತ್ತು ಅರುಂಧತಿ ಚೌಧರಿ ಐದು ಚಿನ್ನದ ಪದಕಗಳನ್ನು ಗೆದ್ದಿದ್ದಾರೆ. ಪುರುಷರ ವಿಭಾಗದಲ್ಲಿ ಸಚಿನ್ ಸಿವಾಚ್ ಮತ್ತು ಅಂಕುಶ್ ಪಂಗಲ್ ಸ್ವರ್ಣ ಗೆದ್ದರು.

ಭಾರತದ ಯಶಸ್ಸು ಬಾಕ್ಸಿಂಗ್‌ಗೆ ಮಾತ್ರ ಸೀಮಿತವಾಗಿರಲಿಲ್ಲ. ಜೂಡೋ ಆಟಗಾರರು ಕೂಡ ಮ್ಯಾಟ್ ಮೇಲೆ ಪ್ರಭಾವಶಾಲಿ ಸಾಧನೆಗಳನ್ನು ಮಾಡಿದರು. ಹರ್ಷ್ ಸಿಂಗ್ (ಪುರುಷರ 60 ಕೆಜಿ ವಿಭಾಗ) ಮತ್ತು ಅಸ್ಮಿತಾ ಡಿ (ಮಹಿಳೆಯರ 48 ಕೆಜಿ ವಿಭಾಗ) ಜೂಡೋದಲ್ಲಿ ಭಾರತದ ಮೊದಲ ಕಾಮನ್‌ವೆಲ್ತ್ ಗೇಮ್ಸ್ ಚಿನ್ನದ ಪದಕಗಳನ್ನು ಗೆದ್ದರು. ಯಾಮಿನಿ ಮೌರ್ಯ (ಬೆಳ್ಳಿ) ಮತ್ತು ಉನ್ನತಿ ಶರ್ಮಾ (ಕಂಚಿನ) ಪದಕ ಗೆದ್ದರು. ಇದುವರೆಗಿನ ಕಾಮನ್‌ವೆಲ್ತ್ ಗೇಮ್ಸ್‌ನಲ್ಲಿ ಭಾರತದ ಅತ್ಯುತ್ತಮ ಜೂಡೋ ಪ್ರದರ್ಶನ ಇದಾಗಿತ್ತು.

ಪುರುಷರ ಜಾವೆಲಿನ್ ಎಸೆತದಲ್ಲಿ ಬೆಳ್ಳಿ ಪದಕ ಗೆಲ್ಲುವ ಮೂಲಕ ನೀರಜ್ ಚೋಪ್ರಾ ಕಾಮನ್‌ವೆಲ್ತ್ ಗೇಮ್ಸ್ ಹಂತಕ್ಕೆ ಮರಳಿದರು. ಗುಲ್ವೀರ್ ಸಿಂಗ್ 10,000 ಮೀಟರ್ ಓಟದಲ್ಲಿ ಬೆಳ್ಳಿ ಮತ್ತು 5,000 ಮೀಟರ್ ಓಟದಲ್ಲಿ ಕಂಚು ಗೆಲ್ಲುವ ಮೂಲಕ ಒಂದೇ ಕಾಮನ್ವೆಲ್ತ್ ಕ್ರೀಡಾಕೂಟದಲ್ಲಿ ಎರಡು ಪದಕಗಳನ್ನು ಗೆದ್ದ ಮೊದಲ ಭಾರತೀಯ ಟ್ರ್ಯಾಕ್ ಅಥ್ಲೀಟ್ ಎನಿಸಿಕೊಂಡರು. ತೇಜಸ್ವಿನ್ ಶಂಕರ್ ಡೆಕಾಥ್ಲಾನ್‌ನಲ್ಲಿ ಕಂಚಿನ ಪದಕ ಗೆದ್ದು, ಭಾರತಕ್ಕೆ ಕ್ರೀಡಾಕೂಟದಲ್ಲಿ ಮೊದಲ ಪದಕಕ್ಕೆ ಮುತ್ತಿಟ್ಟರು.

1998ರ ನಂತರ 39 ಪದಕಗಳು ಸಂಖ್ಯೆಯಲ್ಲಿ ಚಿಕ್ಕದಾಗಿ ಕಾಣಿಸಿದರೂ ಇದು ಭಾರತೀಯ ಕ್ರೀಡಾ ಇತಿಹಾಸದಲ್ಲಿ ಅತ್ಯಮೂಲ್ಯ ಪ್ರದರ್ಶನ ಎಂಬುದು ಮೆಚ್ಚುವಂತದ್ದು. ಭಾರತ ಹೆಚ್ಚು ಪದಕಗಳನ್ನು ಗೆಲ್ಲುವ ಚಿಂತೆಯಿಲ್ಲದೆ ಹೊಸ ಕ್ರೀಡೆಗಳಲ್ಲಿ ಉತ್ತಮ ಫಲಿತಾಂಶಗಳನ್ನು ಸಾಧಿಸುವ ಮೂಲಕ ತನ್ನ ಸಾಮರ್ಥ್ಯವನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ. ಈ ಪ್ರದರ್ಶನವು ಭವಿಷ್ಯದಲ್ಲಿ ಭಾರತೀಯ ಬಹು-ಕ್ರೀಡೆಯ ಅಭಿವೃದ್ಧಿಗೆ ಬಲವಾದ ಅಡಿಪಾಯವನ್ನು ಹಾಕಿಕೊಟ್ಟಿದೆ ಎಂಬುದರಲ್ಲಿ ಕಿಂಚಿತ್ತು ಅನುಮಾನವಿಲ್ಲ,(ಏಜೆನ್ಸೀಸ್).