MarriageTwist; ಮದುವೆ ಮಂಟಪದಲ್ಲೇ ವರನಿಗೆ ಕೈಕೊಟ್ಟು ಪ್ರಿಯತಮನಿಗೆ ಹಾರ ಹಾಕಿದ ವಧು!

ಮಧ್ಯಪ್ರದೇಶದ ಛಿಂದ್ವಾರ ಜಿಲ್ಲೆಯ ಉಮ್ರೆತ್ ಗ್ರಾಮದಲ್ಲಿ ಏಪ್ರಿಲ್ 27-28ರ ರಾತ್ರಿ ಈ ಘಟನೆ ಸಂಭವಿಸಿದೆ. ಪರಾಸಿಯಾದಿಂದ ವರನು ಅದ್ದೂರಿ ಮೆರವಣಿಗೆಯೊಂದಿಗೆ ಮದುವೆಗೆ ಆಗಮಿಸಿದ್ದನು. ಪಟಾಕಿ ಸಿಡಿಸಿ ವರನನ್ನು ಬರಮಾಡಿಕೊಳ್ಳಲಾಗಿತ್ತು. ವರಮಾಲೆ (ವರ್ಮಾಲಾ) ಶಾಸ್ತ್ರಕ್ಕಾಗಿ ವರನು ವೇದಿಕೆಯ ಮೇಲೆ ನಿಂತಿದ್ದನು, ಅಷ್ಟರಲ್ಲಿ ಕೈಯಲ್ಲಿ ಹಾರ ಹಿಡಿದು ವಧು ಮಂಟಪಕ್ಕೆ ಬಂದಿದ್ದಳು.

ವೈರಲ್ ವಿಡಿಯೋದಲ್ಲಿ ಕಂಡುಬರುವಂತೆ, ವಧು ಮಂಟಪಕ್ಕೆ ಬಂದ ಮೇಲೆ ಕೆಲ ಕ್ಷಣಗಳ ಕಾಲ ಅತ್ತಿತ್ತ ನೋಡುತ್ತಾಳೆ. ನಂತರ ಹಠಾತ್ತನೆ ವೇದಿಕೆಯಿಂದ ಕೆಳಕ್ಕೆ ಹಾರಿ ಓಡಿಹೋಗುತ್ತಾಳೆ. ಮದುವೆ ಮಂಟಪದಲ್ಲೇ ಹಾಜರಿದ್ದ ತನ್ನ ಪ್ರಿಯತಮನ ಬಳಿ ನೇರವಾಗಿ ತೆರಳಿ ಆತನನ್ನು ಅಪ್ಪಿಕೊಂಡು, ವರನಿಗಾಗಿ ತಂದಿದ್ದ ಹಾರವನ್ನು ಪ್ರಿಯತಮನ ಕೊರಳಿಗೆ ಹಾಕಿದ್ದಾಳೆ. ಈ ದೃಶ್ಯವನ್ನು ಕಂಡ ಅತಿಥಿಗಳು ಮತ್ತು ಎರಡೂ ಕುಟುಂಬದವರು ಬೆಚ್ಚಿಬಿದ್ದಿದ್ದಾರೆ.

ಈ ಹೈಡ್ರಾಮಾ ನಡೆದ ಬೆನ್ನಲ್ಲೇ ವಧುವಿನ ಕಡೆಯವರು ಆಕೆಯ ಪ್ರಿಯತಮನನ್ನು ಹಿಡಿದು ಮನಬಂದಂತೆ ಥಳಿಸಿ ಮಂಟಪದಿಂದ ಹೊರಹಾಕಿದ್ದಾರೆ. ಇದರಿಂದ ಸಿಟ್ಟಿಗೆದ್ದ ವರನ ಕಡೆಯವರು ಮತ್ತು ವಧುವಿನ ಕುಟುಂಬದವರ ನಡುವೆ ಮಾತಿನ ಚಕಮಕಿ ನಡೆದು ಪರಿಸ್ಥಿತಿ ವಿಕೋಪಕ್ಕೆ ತಿರುಗಿದೆ. ಅವಮಾನಕ್ಕೊಳಗಾದ ವರನು ಮದುವೆಯನ್ನು ನಿಲ್ಲಿಸಿ ಮೆರವಣಿಗೆಯೊಂದಿಗೆ ವಾಪಸ್ ಮನೆಗೆ ಮರಳಿದ್ದಾನೆ.

ವರದಿಗಳ ಪ್ರಕಾರ, ವಧು ಮತ್ತು ಆಕೆಯ ಪ್ರಿಯತಮ ಕಳೆದ ಎರಡು ವರ್ಷಗಳಿಂದ ಪರಸ್ಪರ ಪ್ರೀತಿಸುತ್ತಿದ್ದರು. ಈ ವಿಷಯ ಮನೆಯವರಿಗೂ ತಿಳಿದಿತ್ತು. ಆದರೆ ಕುಟುಂಬದವರ ಒತ್ತಾಯಕ್ಕೆ ಮಣಿದು ಆಕೆ ಈ ಮದುವೆಗೆ ಒಪ್ಪಿಗೆ ಸೂಚಿಸಿದ್ದಳು ಎನ್ನಲಾಗಿದೆ. ಕೊನೆ ಕ್ಷಣದಲ್ಲಿ ಆಕೆ ತನ್ನ ಪ್ರೀತಿಯನ್ನು ಆಯ್ಕೆ ಮಾಡಿಕೊಂಡಿದ್ದಾಳೆ.

ವರನ ಕುಟುಂಬದವರು ಈ ಸಂಬಂಧ ಪೊಲೀಸರಿಗೆ ದೂರು ನೀಡಿದ್ದು, ಮದುವೆ ಮುರಿದುಬಿದ್ದಿರುವುದರಿಂದ ತಮಗಾದ ಆರ್ಥಿಕ ನಷ್ಟ ಮತ್ತು ಮಾನಸಿಕ ಕಿರಿಕಿರಿ ಬಗ್ಗೆ ಉಲ್ಲೇಖಿಸಿದ್ದಾರೆ. ಮದುವೆ ಸಮಯದಲ್ಲಿ ನೀಡಲಾಗಿದ್ದ ಉಂಗುರ, ಮೊಬೈಲ್ ಫೋನ್ ಮತ್ತು ಆಭರಣಗಳನ್ನು ಹಿಂಪಡೆಯಲಾಗಿದೆ. ಸದ್ಯ ಪೊಲೀಸರು ಪ್ರಕರಣದ ತನಿಖೆ ನಡೆಸುತ್ತಿದ್ದಾರೆ,(ಏಜೆನ್ಸೀಸ್).