ತಾಳಿ ಕಟ್ಟುವ ಶುಭ ವೇಳೆಗೆ ಇಡೀ ಸ್ಟೋರಿಯೇ ಚೇಂಜ್​! ಪೋಷಕರು ಮಾಡಿದ್ದೇ ಒಂದು, ಮಂಟಪದಲ್ಲಿ ಆಗಿದ್ದೇ...

ಮೈಲವರಂ: ಮೂರು ಗಂಟಿನ ಮದುವೆ ನೂರಾರು ವರ್ಷಗಳ ನಂಟು ಬೆಸೆಯುತ್ತದೆ ಎಂಬ ಹಿರಿಯರ ಮಾತು ಸುಳ್ಳಲ್ಲ ಬಿಡಿ. ದಾಂಪತ್ಯ ಜೀವನಕ್ಕೆ ಕಾಲಿಡುವ ಪ್ರತಿ ಹೆಣ್ಣು-ಗಂಡಿಗೂ ಅವರದ್ದೇ ಆದ ಆಸೆ, ಆಕಾಂಕ್ಷೆಗಳು ಮನದಲ್ಲಿ ಬೆಟ್ಟದಷ್ಟು ಇರುತ್ತವೆ. ಹೆತ್ತವರ ಆಸೆಗೆ ಕೆಲವರು ಮಣಿದರೆ, ಇನ್ನೂ ಕೆಲವರು ಪ್ರೀತಿಸಿ ತಮ್ಮಿಷ್ಟದಂತೆ ಮದುವೆಯಾಗುವುದು ವಿಶೇಷ. ಆದರೆ, ಅಂತಹ ವಿವಾಹಗಳು ಪೋಷಕರಲ್ಲಿ ಕಣ್ಣೀರು ತರಿಸಿ, ಎಲ್ಲರ ಮುಂದೆ ತಲೆ ತಗ್ಗಿಸುವಂತಾಗಬಾರದು.

ತಮ್ಮ ತಂದೆ-ತಾಯಂದಿರ ಮುಂದೆ ನೀವು ತೋರಿಸುವ ಹುಡುಗ ಅಥವಾ ಹುಡುಗಿ ನನಗಿಷ್ಟ ಎಂದು ತಲೆ ಅಲಾಡಿಸಿ, ಒಪ್ಪಿಕೊಳ್ಳುವವರು, ಅದೇ ಮಂಟಪಕ್ಕೆ ಬಂದು ತಾಳಿ ಕಟ್ಟುವ ಕೊನೆಯ ಘಳಿಗೆಯಲ್ಲಿ ಆಗಲ್ಲ ಅಥವಾ ಪರಾರಿಯಾದರೆ ಏನು ಗತಿ? ಅಂತಹದ್ದೇ ಒಂದು ಘಟನೆ ಆಂಧ್ರಪ್ರದೇಶದ ಎನ್​ಟಿಆರ್​ ಜಿಲ್ಲೆಯ ಮೈಲವರಂನಲ್ಲಿ ವರದಿಯಾಗಿದೆ.

ಬಂಧು-ಬಳಗಕ್ಕೆ ಆಮಂತ್ರಣ ಪತ್ರಿಕೆ ಹಂಚಿ, ಲಕ್ಷಾಂತರ ರೂಪಾಯಿ ಕೊಟ್ಟು ಮದುವೆ ಮಂಟಪ ಬುಕ್​ ಮಾಡಿ, ಒಡವೆ, ಪೂಜಾರಿ, ಶಾಸ್ತ್ರಗಳು, ಊಟ, ವರೋಪಚಾರ ಸೇರಿದಂತೆ ಸಾಕಷ್ಟು ಖರ್ಚು ಮಾಡಿ ವಿವಾಹ ಮಾಡಿಸಲು ಮುಂದಾಗಿದ್ದ ಪೋಷಕರಿಗೆ ಈ ಯುವತಿ ಕೊಟ್ಟಿದ್ದು ಅಕ್ಷರಶಃ ಆರ್ಥಿಕ ನಷ್ಟ, ಮಾನನಷ್ಟ ಮತ್ತು ತುಂಬಲಾರದ ದುಃಖ. ವರ ಇನ್ನೇನು ತಾಳಿ ಕಟ್ಟಬೇಕು ಎನ್ನುವಷ್ಟರಲ್ಲಿ ಮಂಟಪದಿಂದ ಎದ್ದು, ತಾನು ಪ್ರೀತಿಸುತ್ತಿದ್ದ ಹುಡುಗನ ಪಕ್ಕದಲ್ಲಿ ನಿಂತು, ಇವನೇ ನನ್ನ ಜೀವ ಎಂದ ಯುವತಿ ಮಾತುಗಳು ಇಡೀ ಮಂಟಪದಲ್ಲಿದ್ದವರನ್ನು ಅಚ್ಚರಿಗೊಳಿಸಿತು.

ಇವನು ನಮ್ಮೂರಿನವನೇ. ನಾವಿಬ್ಬರು ಪರಸ್ಪರ ಪ್ರೀತಿಸುತ್ತಿದ್ದೇವೆ. ಈ ಮದುವೆ ನನಗೆ ಇಷ್ಟವಿಲ್ಲ ಎಂದು ಎಲ್ಲರ ಮುಂದೆ ಜೋರಾಗಿ ಕೂಗಿ ಹೇಳಿದ್ದಾಳೆ. ಕುಟುಂಬಸ್ಥರು ಆಕ್ರೋಶದಿಂದ ಯುವತಿಯ ಪ್ರಿಯಕರನನ್ನು ಹಿಡಿದು ಥಳಿಸಿದ್ದಾರೆ. ಗಲಾಟೆ ತಾರಕಕ್ಕೇರುತ್ತಿದ್ದಂತೆ ಮಾಹಿತಿ ಮೇರೆಗೆ ಮದುವೆ ಮಂಟಪಕ್ಕೆ ತಕ್ಷಣವೇ ಧಾವಿಸಿದ ಸ್ಥಳೀಯ ಪೊಲೀಸರು, ಜಟಾಪಟಿಯನ್ನು ತಣ್ಣಗಾಗಿಸಿದ್ದಾರೆ. ಈ ವೇಳೆ, ವರನ ಹೆತ್ತವರು ಬಿಕ್ಕಿ ಬಿಕ್ಕಿ ಅತ್ತಿದ್ದಾರೆ.

ನಮಗೆ ಇರುವುದು ಇವನೊಬ್ಬನೆ ಮಗ. 20 ಲಕ್ಷ ರೂ. ಖರ್ಚು ಮಾಡಿ ಅದ್ಧೂರಿಯಾಗಿ ಮಂಟಪದಲ್ಲಿ ಮದುವೆಗೆ ತಯಾರಿ ಮಾಡಿದ್ವಿ. ಸಾವಿರಾರೂ ಮಂದಿಗೆ ಊಟಕ್ಕೂ ವ್ಯವಸ್ಥೆ ಮಾಡಿದ್ದೆವು. ಕೊನೆಯ ಕ್ಷಣದಲ್ಲಿ ಇವೆಲ್ಲವನ್ನೂ ನೀರಿನಲ್ಲಿ ಹೋಮ ಮಾಡಿದ ಈಕೆ, ಬಂದ ಅತಿಥಿಗಳು, ಸಂಬಂಧಿಕರ ಮುಂದೆ ನಮ್ಮ ಮಾನ-ಮರ್ಯಾದೆ ಕಳೆದಿದ್ದಾಳೆ ಎಂದು ಕಣ್ಣೀರಿಟ್ಟರು.

ಕಡೆಗೆ ಗ್ರಾಮದ ಹಿರಿಯರ ಸಮ್ಮುಖದಲ್ಲಿ ಪಂಚಾಯಿತಿ ನಡೆಸಿ, ನಿಶ್ಚಯಗೊಂಡಿದ್ದ ಮದುವೆಯನ್ನು ವಿಧಿಯಿಲ್ಲದೆ ಮುರಿಯಲಾಯಿತು. ಇನ್ನು ವರನ ಕುಟುಂಬಸ್ಥರಿಗೆ ಆದ ನಷ್ಟಕ್ಕೆ ಸಂಬಂಧಿಸಿದಂತೆ ಉದ್ಭವಿಸಿದ ವಿವಾದಗಳನ್ನು ಚರ್ಚಿಸಿ ಬಗೆಹರಿಸಲಾಯಿತು ಎಂದು ವರದಿಯಾಗಿದೆ,(ಏಜೆನ್ಸೀಸ್).