ತನ್ನ ಸ್ನೇಹಿತನಿಗೆ ಸರ್ಪ್ರೈಸ್ ಕೊಡಲು 12,800 ಕಿ.ಮೀ ದೂರದಿಂದ ಬಂದ ಯುವಕ! ಮುಂದೇನಾಯ್ತು ವಿಡಿಯೋ ನೋಡಿ...Friend

ನವದೆಹಲಿ: ರಕ್ತಸಂಬಂಧಕ್ಕೂ ಮಿಗಿಲಾದ ಸಂಬಂಧವೆಂದರೆ ಅದು ಸ್ನೇಹ ( Friend ) . ಕಷ್ಟ ಅಂತಾ ಬಂದಾಗ ಮೊದಲು ಜತೆಗೆ ನಿಲ್ಲುವುದು ಸ್ನೇಹಿತ ಮಾತ್ರ. ಆದರೆ, ಈ ಸ್ವಾರ್ಥ ಪ್ರಪಂಚದಲ್ಲಿ ಅಂತಹ ಅಮೂಲ್ಯ ಸ್ನೇಹ ಪಡೆದ ವ್ಯಕ್ತಿ ನಿಜಕ್ಕೂ ಅದೃಷ್ಟವಂತನೇ ಸರಿ. ಆ ಅದೃಷ್ಟಶಾಲಿಯಲ್ಲಿ ಸರ್ವೇಶ್ ವೈಭವ್ ಟಿಖೆ ಕೂಡ ಒಬ್ಬರು.

ಹೌದು, ವೈಭವ್​ಗೆ ಸರ್ಪ್ರೈಸ್​ ಕೊಡಲೆಂದೇ ಅವರ ಸ್ನೇಹಿತ ಪ್ರೇಷಿತ್ ಗುಜರ್ ಸುಮಾರು 12,800 ಕಿ.ಮೀ ಪ್ರಯಾಣ ಮಾಡಿದ್ದಾರೆ. ಇದಕ್ಕೆ ಸಂಬಂಧಿಸಿದ ಮನಮುಟ್ಟವ ವಿಡಿಯೋವೊಂದು ಸಾಮಾಜಿಕ ಜಾಲತಾಣದಲ್ಲಿ ಇದೀಗ ವೈರಲ್​ ಆಗಿದ್ದು, ನೆಟ್ಟಿಗರ ಮೆಚ್ಚುಗೆಗೆ ಪಾತ್ರವಾಗಿದೆ.

ಅಮೆರಿಕದಿಂದ ಪುಣೆಗೆ ಸುಮಾರು 8 ಸಾವಿರ ಮೈಲಿ (12,800 ಕಿ.ಮೀ)ಗಳನ್ನು ದಾಟಿಬಂದು ನನ್ನ ಸ್ನೇಹಿತನಿಗೆ ಸರ್ಪೈಸ್ ನೀಡಿದೆ ಎಂದು ಟೈಟಲ್​ ನೀಡಿರುವ ವಿಡಿಯೋವನ್ನು​ ಪ್ರೇಷಿತ್ ಗುಜರ್ ಎಂಬುವರು ತಮ್ಮ ಇನ್​ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿದ್ದಾರೆ. ವಿಡಿಯೋದಲ್ಲಿ ಗುಜರ್​ ಅವರು ತಮ್ಮ ಸ್ನೇಹಿತ ವೈಭವ್​ಗೆ ಸರ್ಪ್ರೈಸ್​ ನೀಡಿರುವ ರೀತಿ ಅಭಿಮಾನಿಗಳ ಮನಸ್ಸು ಮುಟ್ಟಿದ್ದು, ಸ್ನೇಹಿತರ ನಡುವಿನ ಬಂಧ ಎಷ್ಟು ಗಟ್ಟಿಯಾಗಿದೆ ಎಂಬುದಕ್ಕೆ ವಿಡಿಯೋ ಸಾಕ್ಷಿಯಾಗಿದೆ.

ವಿಡಿಯೋದಲ್ಲಿ, ವೈಭವ್​ ಅವರು ಸ್ನೇಹಿತರೊಂದಿಗೆ ಮಾತನಾಡುತ್ತಾ ಕುಳಿತಿರುತ್ತಾರೆ. ಈ ವೇಳೆ ಹಿಂದಿನಿಂದ ಟಿ-ಶರ್ಟ್ ಮತ್ತು ಶಾರ್ಟ್ಸ್ ಧರಿಸಿ, ಮುಖ ಕಾಣದಂತೆ ಸ್ಕಾರ್ಫ್ ಹಾಕಿಕೊಂಡು ಬರುವ ಗುಜರ್​, ವೈಭವ್​ ಪಕ್ಕದಲ್ಲೇ ಕೂರುತ್ತಾರೆ. ಮಾತನಾಡುತ್ತಲೇ ಪಕ್ಕದಲ್ಲಿ ನೋಡುವ ವೈಭವ್​, ಯಾರೋ ಅಪರಿಚಿತರು ಎಂದು ಭಾವಿಸುತ್ತಾರೆ. ಎರಡು ಬಾರಿ ನೋಡುತ್ತಾರೆ. ಆದರೆ, ಮೂರನೇ ಬಾರಿ ನೋಡಿದಾಗ ಗುಜರ್​ ಅವರು ತಮ್ಮ ಸ್ಕಾರ್ಫ್​ ಅನ್ನು ತೆಗೆಯುತ್ತಾರೆ. ತನ್ನ ಸ್ನೇಹಿತ ಎಂದು ಗೊತ್ತಾದ ಕೂಡಲೇ ವೈಭವ್​ ತುಂಬಾ ಉತ್ಸಾಹದಿಂದ ಎದ್ದು ಓಡಿ ಹೋಗಿ ತಮ್ಮ ಸ್ನೇಹಿತನನ್ನು ತಬ್ಬಿಕೊಳ್ಳುತ್ತಾರೆ.

4 ದಿನಗಳ ಹಿಂದೆ ಗುಜರ್​ ಅವರ ಇನ್​ಸ್ಟಾಗ್ರಾಂನಲ್ಲಿ ಪೋಸ್ಟ್​ ಮಾಡಿರುವ ಈ ವಿಡಿಯೋ ಈವರೆಗೂ 40 ಲಕ್ಷಕ್ಕೂ ಅಧಿಕ ವೀಕ್ಷಣೆ ಪಡೆದುಕೊಂಡಿದ್ದು, 2 ಲಕ್ಷಕ್ಕೂ ಅಧಿಕ ಲೈಕ್ಸ್​ ಗಿಟ್ಟಿಸಿಕೊಂಡಿದೆ. ಸಾವಿರಾರು ಕಾಮೆಂಟ್​ ಕೂಡ ಹರಿದುಬಂದಿದೆ. ಇದು ನಿಜವಾದ ಸ್ನೇಹ ಅಂದರೆ. ಪರಸ್ಪರ ನೋಡಿದಾಗ ಅವರಿಬ್ಬರ ಮುಖದಲ್ಲಿದ್ದ ಉತ್ಸಾಹ ನೋಡಿದರೆ ಇಬ್ಬರ ಸ್ನೇಹ ಎಷ್ಟೊಂದು ಬಲವಾಗಿದೆ ಎಂದು ಗೊತ್ತಾಗುತ್ತದೆ ಎಂದೆಲ್ಲ ಕಾಮೆಂಟ್​ ಮಾಡಿದ್ದಾರೆ.

ಈ ವಿಡಿಯೋ ನೋಡಿ ನಿಮಗೆ ಏನು ಅನಿಸಿತು? ಹಾಗೂ ನಿಮ್ಮ ಸ್ನೇಹಿತರು ಯಾರಾದರೂ ನಿಮಗೆ ಈ ರೀತಿ ಸರ್ಪ್ರೈಸ್​ ನೀಡಿದ್ದಾರಾ? ಎಂಬುದನ್ನು ಕಾಮೆಂಟ್​ ಮೂಲಕ ನಮ್ಮೊಂದಿಗೆ ಹಂಚಿಕೊಳ್ಳಿ, (ಏಜೆನ್ಸೀಸ್​).