ಸಹಪ್ರಯಾಣಿಕನ ಹಠಕ್ಕೆ ಬಲಿಯಾಯ್ತು ಯುವಕನ ಪ್ರಾಣ!...ಮುಂಬೈ ರೈಲಿನಲ್ಲಿ ನಡೆದ ಭಯಾನಕ ಕೃತ್ಯದ ಇನ್ಸೈಡ್ ಸ್ಟೋರಿ ಇಲ್ಲಿದೆ | Mumbai Local Train

ಚರ್ಚ್‌ಗೇಟ್‌ನಿಂದ ನಲಸೋಪಾರಾ ಕಡೆಗೆ ವೇಗವಾಗಿ ಚಲಿಸುತ್ತಿದ್ದ ಲೋಕಲ್ ರೈಲಿನ ಫಸ್ಟ್‌ ಕ್ಲಾಸ್ ಬೋಗಿಯಲ್ಲಿ ಈ ಘಟನೆ ನಡೆದಿದೆ. ಮೃತನನ್ನು ಮಯಾಂಕ್ ಲೋಹರ್ (21) ಎಂದು ಗುರುತಿಸಲಾಗಿದ್ದು, ಗೋರೆಗಾಂವ್ ಮತ್ತು ಕಾಂದಿವಲಿ ನಿಲ್ದಾಣಗಳ ನಡುವೆ ಪ್ರಯಾಣಿಸುತ್ತಿದ್ದಾಗ ಮತ್ತೊಬ್ಬ ಪ್ರಯಾಣಿಕನೊಂದಿಗೆ ಈತನಿಗೆ ತೀವ್ರ ವಾಗ್ವಾದ ನಡೆದಿತ್ತು. ಸದ್ಯ ಪ್ರಕರಣದ ಆರೋಪಿ ರೋಶನ್ ಸುವರ್ಣ ಎಂಬಾತನನ್ನು ಮುಂಬೈನ ಕುರ್ಲಾ ಪ್ರದೇಶದಲ್ಲಿ ಪೊಲೀಸರು ಬಂಧಿಸಿದ್ದಾರೆ.

ರೈಲಿನಲ್ಲಿ ನಡೆದ ಈ ಘಟನೆಯ ಆತಂಕಕಾರಿ ವಿಡಿಯೋ ವೈರಲ್​ ಆಗಿದ್ದು, ಅದರಲ್ಲಿ ಕಪ್ಪು ಬಟ್ಟೆ ಧರಿಸಿದ್ದ ಆರೋಪಿಯು ಯುವಕನ ಮೇಲೆ ದಾಳಿ ನಡೆಸಿ ಚಾಕು ಹಿಡಿದು ನಿರಾತಂಕವಾಗಿ ನಡೆದುಹೋಗುತ್ತಿರುವುದು ಸೆರೆಯಾಗಿದೆ. ರೈಲಿನ ಸೀಟುಗಳ ಮೇಲೆ ರಕ್ತದ ಕಲೆಗಳು ಹರಡಿದ್ದು, ಬೋಗಿಯಲ್ಲಿದ್ದ ಜನರು ಅವನು ಕೊಲೆ ಮಾಡಿಯೇ ಬಿಟ್ಟ ಎಂದು ಆತಂಕದಿಂದ ಕೂಗಾಡುತ್ತಿರುವುದು ಕೇಳಬಹುದು. ರಕ್ತದ ಮಡುವಿನಲ್ಲಿ ಬಿದ್ದಿದ್ದ ಮಯಾಂಕ್‌ನನ್ನು ಕಂಡು ಇತರೆ ಪ್ರಯಾಣಿಕರು ಭಯದಿಂದ ದೂರ ಸರಿಯುತ್ತಿದ್ದರೇ ವಿನಃ, ಯಾರೂ ಕೂಡ ಆರೋಪಿಯನ್ನು ತಡೆಯುವ ಧೈರ್ಯ ಮಾಡಲಿಲ್ಲ.

ಮಗನ ಸಾವಿನಿಂದ ಆಘಾತಕ್ಕೊಳಗಾಗಿರುವ ಮಯಾಂಕ್ ತಾಯಿ ಮಾಧ್ಯಮಗಳ ಮುಂದೆ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ನನ್ನ ಮಗ ಯಾರೊಂದಿಗೂ ಜಗಳ ಆಡುವವನಲ್ಲ, ಶಾಂತ ಸ್ವಭಾವದವನಾಗಿದ್ದ. ನಿನ್ನೆ ಹೋದವನು ಇನ್ನು ಮನೆಗೆ ಮರಳಲೇ ಇಲ್ಲ, ನನಗೆ ನ್ಯಾಯ ಕೊಡಿಸಿ, ಆರೋಪಿಗೆ ಕಠಿಣ ಶಿಕ್ಷೆ ನೀಡಿ ಎಂದು ಕಣ್ಣೀರಿಟ್ಟಿದ್ದಾರೆ. ಇತ್ತ ಮೃತನ ಸಹೋದರಿ ಮಾತನಾಡಿ, ರಾತ್ರಿ 10:30ರ ಸಮಯದಲ್ಲಿ ನನ್ನ ತಮ್ಮನ ಮೇಲೆ ಇಷ್ಟೊಂದು ದೊಡ್ಡ ಚಾಕುವಿನಿಂದ ದಾಳಿ ನಡೆಯುತ್ತಿದ್ದಾಗ ಬೋಗಿಯಲ್ಲಿದ್ದ ಜನರೆಲ್ಲಾ ಎಲ್ಲೋಗಿದ್ದರು..? ಯಾರೂ ಅವನನ್ನು ಉಳಿಸಲು ಬರಲಿಲ್ಲವೇ..? ಆರೋಪಿಗೆ ಮರಣದಂಡನೆ ಶಿಕ್ಷೆಯಾಗಬೇಕು. ಇಂದು ಇವನಿಗೆ ಶಿಕ್ಷೆಯಾಗದಿದ್ದರೆ ನಾಳೆ ಮತ್ತೊಬ್ಬರು ಬಲಿಯಾಗುತ್ತಾರೆ ಎಂದು ಆಕ್ರೋಶ ಹೊರಹಾಕಿದ್ದಾರೆ ಹಾಗೂ ರೈಲ್ವೆ ಸುರಕ್ಷತೆಯ ಬಗ್ಗೆ ಪ್ರಶ್ನಿಸಿದ್ದಾರೆ(ಏಜೆನ್ಸೀಸ್​​).