ಅಮ್ಮನನ್ನು ಕೊಂದು ನನ್ನನ್ನು ಕೆರೆಗೆ ಎಸೆದ್ರು... ನೀರಿನಲ್ಲಿ ಮುಳುಗಿ ಹೋದಂತೆ ನಟಿಸಿ ಪಾರಾದ ಬಾಲಕ ಬಿಚ್ಚಿಟ್ಟ ತಂದೆಯ ಪಾಪದ ಕೃತ್ಯ

ಇಂದೋರ್: ಮನೆಯೊಳಗೆ ಹೆಂಡತಿಯೊಡನೆ ಜಗಳಕ್ಕೆ ಬಿದ್ದ ಗಂಡ, ಪತ್ನಿ ಮತ್ತು 11 ವರ್ಷದ ಮಗಳನ್ನು ಬರ್ಬರವಾಗಿ ಕೊಂದು, ಅವರ ಮೃತದೇಹಗಳ ಜತೆಗೆ ಜೀವಂತವಾಗಿದ್ದ ಮಗನನ್ನು ಕೆರೆಗೆ ಬಿಸಾಡಿದ ಭೀಕರ ಘಟನೆ ಮಧ್ಯಪ್ರದೇಶದ ಇಂದೋರ್​ನಲ್ಲಿ ವರದಿಯಾಗಿದೆ. 

8 ವರ್ಷದ ಮಗನನ್ನೂ ಕೆರೆಗೆ ತಳ್ಳಿದ ಬೆನ್ನಲ್ಲೇ ಸ್ಥಳದಿಂದ ಕಾಲ್ಕಿತ್ತ ಪಾಪಿ, ಪುತ್ರ ಜೀವ ಉಳಿಸುವಂತೆ ಬೇಡಿಕೊಂಡರೂ ಹಿಂತಿರುಗಲಿಲ್ಲ. ಆದರೆ, ಪವಾಡ ಸದೃಶ್ಯ ಎನ್ನುವಂತೆ ಚಾಣಾಕ್ಷತನದಿಂದ ಬದುಕುಳಿದ ಬಾಲಕ, ನೀರಿನಿಂದ ಎದ್ದು ಬಂದು, ಇಡೀ ಗ್ರಾಮಸ್ಥರಿಗೆ ತಂದೆಯ ಪಾಪದ ಕೃತ್ಯದ ಬಗ್ಗೆ ಹೇಳಿದ ಬಳಿಕವೇ ಈ ಬೆಚ್ಚಿಬೀಳಿಸುವ ಜೋಡಿ ಕೊಲೆ ಬೆಳಕಿಗೆ ಬಂದಿದೆ.

ಸೋಮವಾರ (ಆ.17) ರಾತ್ರಿ ಗಸ್ತು ತಿರುಗುತ್ತಿದ್ದ ಪೊಲೀಸ್ ತಂಡಕ್ಕೆ ಸಿಕ್ಕ ಈ ಬಾಲಕ, ತಂದೆ ನಡೆಸಿದ ಭೀಕರ ಕೃತ್ಯವನ್ನು ವಿವರಿಸಿದ್ದಾನೆ. ತನ್ನ ತಾಯಿ ಮತ್ತು ಅಕ್ಕನ ಮೇಲೆ ಬರ್ಬರವಾಗಿ ಹಲ್ಲೆ ನಡೆಸಿ, ಅವರನ್ನು ಸಾಯಿಸಿದರು. ಬಳಿಕ ಮೃತದೇಹಗಳ ಜತೆ ನನ್ನನ್ನು ಕೆರೆಗೆ ಬಿಸಾಡಿದರು. ಆದರೆ, ನಾನು ಮುಳುಗುತ್ತಿರುವಂತೆ ನಟಿಸಿ, ಕೆರೆಯ ದಂಡೆಯಲ್ಲಿದ್ದ ಪೊದೆಗಳನ್ನು ಹಿಡಿದು ಪ್ರಾಣ ಉಳಿಸಿಕೊಂಡೆ. ಆ ನಂತರ ಊರಿನ ಜನರಿಗೆ ಹಾಗೂ ಪೊಲೀಸರಿಗೆ ಮಾಹಿತಿ ನೀಡಿದೆ ಎಂದು ಹೇಳಿಕೊಂಡಿದ್ದಾನೆ. 

ಬಾಲಕ ನೀಡಿದ ಮಾಹಿತಿಯ ಮೇರೆಗೆ, ಪೊಲೀಸರು ಹಾಗೂ ರಾಜ್ಯ ವಿಪತ್ತು ತುರ್ತು ಸ್ಪಂದನಾ ಪಡೆ (SDERF) ಸ್ಥಳಕ್ಕೆ ದೌಡಾಯಿಸಿ, ರಾತ್ರೋರಾತ್ರಿ ಶೋಧ ಕಾರ್ಯಾಚರಣೆ ನಡೆಸಿತು. ಕೆರೆಯಿಂದ ಅನಿತಾ (32) ಹಾಗೂ ಆಕೆಯ ಮಗಳು ಮಹಿಯ (12) ಮೃತದೇಹಗಳನ್ನು ಹೊರತೆಗೆಯಲಾಯಿತು. ಆರೋಪಿಯನ್ನು ಸುನಿಲ್ ಚೌಹಾಣ್ ಎಂದು ಗುರುತಿಸಲಾಗಿದ್ದು, ವೃತ್ತಿಯಲ್ಲಿ ಈತ ಡ್ರೈವರ್​ ಎನ್ನಲಾಗಿದೆ. ದಂಪತಿ ನಡುವೆ ಕಳೆದ ಕೆಲವು ದಿನಗಳಿಂದ ಪದೇ ಪದೇ ಜಗಳ ನಡೆಯುತ್ತಿತ್ತು. ಈ ಹಿನ್ನೆಲೆಯಲ್ಲಿ ಕೊಲೆ ನಡೆದಿದೆ ಎಂದು ವಿವರಿಸಲಾಗಿದೆ. 

ಪತ್ನಿ ಅನಿತಾ ಅವರ ಮೊಬೈಲ್‌ನಲ್ಲಿ ಇತರೆ ನಂಬರ್‌ಗಳು ಇರುವುದನ್ನು ಕಂಡಿದ್ದ ಸುನಿಲ್, ಆಕೆಗೆ ಅಕ್ರಮ ಸಂಬಂಧವಿದೆ ಎಂದು ಶಂಕಿಸಿ, ಮನೆಯಲ್ಲಿ ಜಗಳ ಆಡುತ್ತಿದ್ದ. ಸೋಮವಾರ ಸಂಜೆಯೂ ಇದೇ ವಿಚಾರಕ್ಕೆ ದಂಪತಿ ನಡುವೆ ಮಾತಿನ ಜಟಾಪಟಿ ನಡೆದಿದೆ. ಪತ್ನಿ ಹಾಗೂ ಮಕ್ಕಳನ್ನು ಕೆರೆಯ ಬಳಿ ಎಳೆದೊಯ್ದ ಸುನಿಲ್​, ಅಲ್ಲಿ ಅನಿತಾಳ ಸೀರೆಯ ಸೆರಗಿನಿಂದಲೇ ಕುತ್ತಿಗೆ ಬಿಗಿದು, ಚಾಕುವಿನಿಂದ ಇರಿದು ಕೊಲೆ ಮಾಡಿದ್ದಾನೆ. ನಂತರ ಮಗಳನ್ನು ನೀರಿನಲ್ಲಿ ಮುಳುಗಿಸಿ, ಕೊನೆಗೆ ಮಗನನ್ನೂ ಕೆರೆಗೆ ನೂಕಿದ್ದಾನೆ ಎಂದು ವರದಿಯಾಗಿದೆ. 

ಕೊಲೆಗೈದ ಬಳಿಕ ಆರೋಪಿ ಆತ್ಮಹತ್ಯೆಗೆ ಯತ್ನಿಸಿದ್ದ ಎಂದು ತಿಳಿದುಬಂದಿದ್ದು, ಅಷ್ಟರಲ್ಲೇ ಪೊಲೀಸರು ಆತನನ್ನು ವಶಕ್ಕೆ ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ. ಕೊಲೆ ಹಾಗೂ ಕೊಲೆ ಯತ್ನ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು, ಸುನಿಲ್​ನನ್ನು ತೀವ್ರ ವಿಚಾರಣೆಗೆ ಒಳಪಡಿಸಿದ್ದಾರೆ,(ಏಜೆನ್ಸೀಸ್).