ಭೋಪಾಲ್: ಸಿಹಿತಿಂಡಿ (ರಸಗುಲ್ಲಾ) ಎಂದು ನಂಬಿ ಬಾಯಿಗೆ ಹಾಕಿಕೊಂಡ ವಸ್ತುವೊಂದು ಕ್ಷಣಾರ್ಧದಲ್ಲೇ ಬಾಯೊಳಗೆ ಸ್ಫೋಟಗೊಂಡು 35 ವರ್ಷದ ವ್ಯಕ್ತಿಯೊಬ್ಬರು ದಾರುಣವಾಗಿ ಮೃತಪಟ್ಟಿರುವ ಬೆಚ್ಚಿಬೀಳಿಸುವ ಘಟನೆ ಮಧ್ಯಪ್ರದೇಶದ ದಿಂಡೋರಿ ಜಿಲ್ಲೆಯಲ್ಲಿ ನಡೆದಿದೆ. ಕಾಡುಹಂದಿಗಳನ್ನು ಕೊಲ್ಲಲು ಬಳಸುವ ಕಚ್ಚಾ ಸ್ಫೋಟಕವನ್ನು ರಸಗುಲ್ಲಾದಂತೆ ನೀಡಿದ್ದ ನೆರೆಮನೆಯ ಆರೋಪಿ ರಾಮಭಗತ್ ಬರೌಟಿಯಾ ಎಂಬಾತನನ್ನು ಪೊಲೀಸರು ಬಂಧಿಸಿದ್ದಾರೆ. ಮೃತರನ್ನು ಪದಾರಿಯಾ ಛಾಂಟಾ ಗ್ರಾಮದ ನಿವಾಸಿ ರಾಜೇಂದ್ರ ಬರೌಟಿಯಾ (35) ಎಂದು ಗುರುತಿಸಲಾಗಿದೆ.
ಘಟನೆಯ ಹಿನ್ನೆಲೆ: ಬೆಂಕಿ ಕಾಯಿಸುತ್ತಿದ್ದಾಗ ನಡೆದ ದುರಂತ
ಮಂಗಳವಾರ ರಾತ್ರಿ 8 ಗಂಟೆಯ ಸುಮಾರಿಗೆ ರಾಜೇಂದ್ರ ಅವರು ಊಟ ಮುಗಿಸಿ, ತಮ್ಮ ಮನೆಯ ಅಂಗಳದಲ್ಲಿ ಕುಟುಂಬಸ್ಥರೊಂದಿಗೆ ಚಳಿಗೆ ಬೆಂಕಿ ಕಾಯಿಸುತ್ತಾ ಕುಳಿತಿದ್ದರು. ಈ ವೇಳೆ ಅಲ್ಲಿಗೆ ಬಂದ ಅದೇ ಗ್ರಾಮದ ರಾಮಭಗತ್, ಮಾತುಕತೆಯ ನಡುವೆ ರಸಗುಲ್ಲಾದಂತೆ ಕಾಣುತ್ತಿದ್ದ ವಸ್ತುವೊಂದನ್ನು ರಾಜೇಂದ್ರ ಅವರಿಗೆ ತಿನ್ನಲು ನೀಡಿದ್ದಾನೆ.
ನೆರೆಮನೆಯವನ ಮಾತನ್ನು ನಂಬಿ, ಅದು ಸಿಹಿತಿಂಡಿಯೇ ಇರಬೇಕೆಂದು ಭಾವಿಸಿದ ರಾಜೇಂದ್ರ ಯಾವುದೇ ಅನುಮಾನವಿಲ್ಲದೆ ಅದನ್ನು ಬಾಯಿಗೆ ಹಾಕಿಕೊಂಡು ಕಚ್ಚಿದ್ದಾರೆ. ಕಚ್ಚಿದ ಮರುಕ್ಷಣವೇ ಆ ವಸ್ತು ಭಾರಿ ಶಬ್ದದೊಂದಿಗೆ ಬಾಯೊಳಗೆ ಸ್ಫೋಟಗೊಂಡಿದೆ. ಸ್ಫೋಟದ ತೀವ್ರತೆಗೆ ರಾಜೇಂದ್ರ ಅವರ ಬಾಯಿ ಮತ್ತು ದವಡೆ ಛಿದ್ರಗೊಂಡಿದ್ದು, ತೀವ್ರ ರಕ್ತಸ್ರಾವವಾಗಿದೆ. ಆತಂಕಗೊಂಡ ಕುಟುಂಬಸ್ಥರು ತಕ್ಷಣ ಅವರನ್ನು ಆಟೋರಿಕ್ಷಾದಲ್ಲಿ ದಿಂಡೋರಿ ಜಿಲ್ಲಾ ಆಸ್ಪತ್ರೆಗೆ ಸಾಗಿಸಿದರಾದರೂ, ಚಿಕಿತ್ಸೆ ಫಲಕಾರಿಯಾಗದೆ ಅವರು ಕೊನೆಯುಸಿರೆಳೆದಿದ್ದಾರೆ.
