ಸೋಲಿನ ಬೆನ್ನಲ್ಲೇ ಮಮತಾ ಕವನ ಕದನ: ಧೈರ್ಯವಾಗಿರಿ, ಬಲಿಷ್ಠರಾಗಿರಿ! ಕಾರ್ಯಕರ್ತರಲ್ಲಿ ಕಿಚ್ಚು ಹಚ್ಚಿದ ದೀದಿ ಸಾಹಿತ್ಯ! Mamata Banerjee

ಈ ಬಗ್ಗೆ ಮಂಗಳವಾರ ಅವರು ಎಕ್ಸ್​ನಲ್ಲಿ ಪೋಸ್ಟ್​ ಹಂಚಿಕೊಂಡಿರುವ ದೀದಿ, ಧೈರ್ಯವಂತ ಎಂಬ ಶೀರ್ಷಿಕೆಯ ಕವನವು ಈಗ ರಾಜಕೀಯ ವಲಯದಲ್ಲಿ ಭಾರಿ ಚರ್ಚೆಗೆ ನಾಂದಿ ಹಾಡಿದೆ.

ಸತತ ಸೋಲು ಮತ್ತು ಅಧಿಕಾರ ಕಳೆದುಕೊಂಡ ಆಘಾತದಲ್ಲಿರುವ ಟಿಎಂಸಿ ಕಾರ್ಯಕರ್ತರಿಗೆ ಧೈರ್ಯ ತುಂಬುವುದು ಮಮತಾ ಅವರ ಮೊದಲ ಆದ್ಯತೆಯಾಗಿದೆ. ತಮ್ಮ ವಿಶಿಷ್ಟ ಶೈಲಿಯ ಸರಳ ಹಾಗೂ ನೇರ ಸಾಲುಗಳ ಮೂಲಕ ಅವರು ಧೈರ್ಯವಾಗಿರಿ ಮತ್ತು ಬಲಿಷ್ಠರಾಗಿರಿ ಎಂದು ಕರೆ ನೀಡಿದ್ದಾರೆ.

ಈ ಕವನವು ಕೇವಲ ಸಾಹಿತ್ಯವಲ್ಲ, ಬದಲಾಗಿ ಮುಂಬರುವ ದಿನಗಳಲ್ಲಿ ವಿರೋಧ ಪಕ್ಷವಾಗಿ ನಡೆಸಲಿರುವ ಹೋರಾಟದ ದಿಕ್ಸೂಚಿಯಂತೆ ಕಾಣುತ್ತಿದೆ. ಪ್ರತಿಕೂಲ ಪರಿಸ್ಥಿತಿಯಲ್ಲಿ ಒಬ್ಬ ನಾಯಕ ಹೇಗೆ ತನ್ನ ಆತ್ಮಗೌರವ ಮತ್ತು ಆಂತರಿಕ ಶಕ್ತಿಯನ್ನು ಕಾಪಾಡಿಕೊಳ್ಳಬೇಕು ಎಂಬುದನ್ನು ಅವರು ಕವನದ ಮೂಲಕ ದೀದಿ ವಿವರಿಸಿದ್ದಾರೆ.

ಮಮತಾ ಬ್ಯಾನರ್ಜಿ ಅವರ ಈ ಕವನದಲ್ಲಿನ ಕೆಲವು ಪ್ರಮುಖ ಆಯಾಮಗಳು ಹೀಗಿವೆ.

ಆತ್ಮಗೌರವದ ರಕ್ಷಣೆ: ಅಧಿಕಾರ ಹೋದರೂ ಜನರ ಹಿತಕ್ಕಾಗಿ ಹೋರಾಡುವ ಛಲ ಬಿಡಬಾರದು ಎಂಬ ಸಂದೇಶ.

ಎದೆಗುಂದದ ಹೋರಾಟ: ಸೋಲು ಅಂತಿಮವಲ್ಲ, ಅದು ಹೊಸ ಹೋರಾಟಕ್ಕೆ ನಾಂದಿ ಎಂಬ ಆಶಯವಾಗಿದೆ.

ಕಾರ್ಯಕರ್ತರಿಗೆ ಭರವಸೆ: ಪಕ್ಷದ ಕೇಡರ್ ಸೋಲಿನ ಹತಾಶೆಯಿಂದ ಹೊರಬಂದು ಮತ್ತೆ ಸಂಘಟಿತರಾಗಲು ಪ್ರೇರಣೆಯಾಗುತ್ತದೆ.

ಬಂಗಾಳದಲ್ಲಿ ಬಿಜೆಪಿ ಅಧಿಕಾರಕ್ಕೆ ಬಂದ ನಂತರ ಮುಖ್ಯಮಂತ್ರಿ ಸುವೇಂದು ಅಧಿಕಾರಿ ಅವರು ನುಸುಳುಕೋರರ ವಿರುದ್ಧ ಮತ್ತು ಭದ್ರತೆಯ ಬಗ್ಗೆ ಕಠಿಣ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತಿದ್ದಾರೆ. ಇತ್ತ ಮಮತಾ ಬ್ಯಾನರ್ಜಿ ಅವರು ರಚನಾತ್ಮಕ ವಿರೋಧ ಪಕ್ಷವಾಗಿ ಕಾರ್ಯನಿರ್ವಹಿಸಲು ಸಜ್ಜಾಗುತ್ತಿದ್ದಾರೆ. ಇತ್ತೀಚೆಗೆ ಸ್ಟಾಲಿನ್ ಅವರು ತಮಿಳುನಾಡಿನಲ್ಲಿ ವಿಜಯ್ ಅವರಿಗೆ ನೀಡಿದ ಬೆಂಬಲದಂತೆ, ಬಂಗಾಳದಲ್ಲಿ ಮಮತಾ ಅವರು ಯಾವ ಹಾದಿ ತುಳಿಯಲಿದ್ದಾರೆ ಎಂಬುದು ಕುತೂಹಲಕಾರಿಯಾಗಿದೆ.

ವಿಶ್ಲೇಷಕರ ಪ್ರಕಾರ, ಮಮತಾ ಬ್ಯಾನರ್ಜಿ ಅವರು ಸದ್ಯಕ್ಕೆ ಮೌನಕ್ಕೆ ಶರಣಾಗುವವರಲ್ಲ. ಅವರು ಬೀದಿಗಿಳಿದು ಹೋರಾಡುವ ಮೂಲಕ ತಮ್ಮ ಜನಪ್ರಿಯತೆಯನ್ನು ಮರಳಿ ಪಡೆಯಲು ಪ್ರಯತ್ನಿಸಲಿದ್ದಾರೆ. ಅವರ ಈ ಕವನವು ಆ ಸುದೀರ್ಘ ಹೋರಾಟದ ಮೊದಲ ಹೆಜ್ಜೆಯಾಗಿದೆ.

ಸೋಲನ್ನೇ ಸೋಲಿಸುವ ಚಲ ಹೊಂದಿರುವ ಮಮತಾ ಬ್ಯಾನರ್ಜಿ ಅವರ ಈ ಕಾವ್ಯಾತ್ಮಕ ಹೋರಾಟವು ಬಂಗಾಳದ ಮಣ್ಣಿನಲ್ಲಿ ಮತ್ತೆ ಚೈತನ್ಯ ಮೂಡಿಸುತ್ತದೆಯೇ ಎಂಬುದನ್ನು ಕಾದು ನೋಡಬೇಕಿದೆ. ಅಸ್ಸಾಂನಲ್ಲಿ ಹಿಮಂತ ಬಿಸ್ವ ಶರ್ಮಾ ಅವರ ಯುಸಿಸಿ ಜಾರಿ ಮತ್ತು ಬಂಗಾಳದಲ್ಲಿ ಸುವೇಂದು ಅವರ ಆಡಳಿತದ ನಡುವೆ ದೀದಿ ಅವರ ಈ ಬ್ರೇವ್ ಸಂದೇಶವು ಭಾರಿ ಮಹತ್ವ ಪಡೆದಿದೆ,(ಏಜೆನ್ಸೀಸ್​).